Nạ Amiịn Ika Baibul Phọ?

IDỊ ABAIBUL PHỌ AḄẸM

“Enaạn kụ iphum ghan we mọ ogẹ oomo phọ ipẹ edi bọ siphẹ aḍinyạ iigbia phọ.”—2 Timoti 3:16, Ooḅi Oghaạph.

ASUỌ DỊ OMEERAAM IPẸ PHỌ KENGỌ NYINẠ

Ophanyanaạn dị agbaanyạn ilọ asipuru aghuḍum dị emạn maạr.—Asidogh phọ 2:1-5.

Iiḅakiọm dị ekpẹ obeḍenọm ilọ adọl aḍio etum ḍio.—Asuọr phọ 119:105.

Okạr oḍuom-ologhi ilọ aghisigh phọ.—Rom 15:4.

YIRA KOTUE NI OKẠR OMEERAAM IPẸ ABAIBUL PHỌ RAKAẠPH BỌ?

Ii, eghom ephughạn pọ esi iraạr ariphigh:

• Amuuḅọph dị aphughạn. Awe dị romạn ni 40 akirokirọ odọ awe kụ usighẹ siạ dị epel li 1,600 asiạ ogeọm Baibul phọ. Ibadị abidị oniin ko/miịn ghan nyoorị phọ. Ghalamọ r’iduọn phọ ni, oomo phọ aḍinyạ phọ emoọgh ni muuḅọph, r’eniin ekpanạ emụ oghaạph!

• Iphirigba dị okpẹ u/lo. Abugbaạm iphirigba aḅirini ibadị amem rokaạph ghan kookpereghi idị okpạr opu we phọ abidị. Kuolọ, abugeọm aBaibul phọ ugẹ ghan eten dị u/booghị yaạr opiomạn abidị r’aloor ḅilẹ r’ilọ eelhe phọ abidị.—2 Kronikụls 36:15, 16; Asuọr phọ 51:1-4.

• Imiịn dị ekpẹ obeḍenọm. ABaibul phọ amiịn ni imiịn ilọ amuphe egbogh emạ ageedi phọ Babilọn siạ dị rekiọm ni 200 asiạ kụ egbi oteẹny amem mọ kemite bọ. (Aizayạ 13:17-22) Igananami ni k/eten phọ epẹ aBabilọn kameel bọ ḅin kuolọ r’aḍien oye phọ opọ kakpạr bọ apu nyodị!—Aizayạ 45:1-3.

  Inhọn iboom imiịn aBaibul phọ iḅilẹ ni emunughan dị r’iyaạr dị eghom iboom dị esugha i/tọl. Kuolọ ipẹ kụ ki/dị yira kogon omiịn esi Ekpo-onhụ Enaạn ḍughụm?—2 Pita 1:21.