Amem Ketọl Li Dị Iminimiịn Kesi Eekuna?

IDỊ ABAIBUL PHỌ AḄẸM

“Enaạn . . . kagbuurogh ni oomo izin riḍien abidị. Aḍuugh r’amukum ologhi r’emoghi r’eephina ke/tọl mun.”—Ogananami 21:3, 4.

ASUỌ DỊ OMEERAAM IPẸ PHỌ KENGỌ NYINẠ

Okuphom owol mọ Enaạn kụ ra/kọm ghan bọ iiḅaghamị phọ ayira.—Jems 1:13.

Iidereghị esi olhegheri mọ Enaạn anaghanạn ni amadạn ipẹ yira ologhoma bọ mem lọ yira romiinọm.—Zakarayạ 2:8.

Oḍuom-ologhi mọ oomo iminimiịn kesi ni eekuna—Asuọr phọ 37:9-11.

YIRA KOTUE NI OKẠR OMEERAAM IPẸ ABAIBUL PHỌ RAKAẠPH BỌ?

Ii, eghom ephughạn pọ esi iyạl ariphigh:

• Enaạn akel li iminimiịn r’ekeeny ooruẹn. Ḅeeḅeghiọn ipẹ aJihova Enaạn phọ aloghoma ghan bọ mem dị romiinẹ we phọ odị iḍiodi phọ r’aḍigbagarạ aḍighaạgh. ABaibul phọ aḅẹm mọ iiḅaghamị ghan ni nyodị loor emụ “abuphẹ romiinẹ bọ bidị.”—Abuọ Iiruẹn 2:18, New World Translation.

  Enaạn rapoghom ghan ni ekarạph ekpeḍien buphẹ roḍighi ghan bọ ikarạph bunhọn awe. Esi omaaniọm, aBaibul phọ aḅẹm mọ “araghaạgh dị rezuughi ghan ibaạl dị i/piọm” eḍighi ni yaạr aḅaphanyạ esi odị.—Asidogh phọ 6:16, 17.

• Enaạn ruphogh ghan ni iyira oye atum oye. K’ogina awe isiẹn ade phọ kụ “ulhegheri torobọ oye r’ezẹgh phọ nyepẹ odị r’eephina phọ odị” kuolọ iduọn kụ idị aJihova alhegheri aani ni!—2 Kronikụs 6:29, 30.

  Dị eego esi Omạr phọ odị, moọny amem aJihova kasiemi ni eekuna iminimiịn atorobọ torobọ oye. (Matiu 6:9, 10) Siẹn amem mọ amuẹn, odị raadereghị ghan ni r’igbiririph buphẹ rowạ bọ nyodị r’oomo ologhi abidị.—Iiḍighi 17:27; 2 Korịnt 1:3, 4.