ESI ỊTUUGHA PHỌ 61
Bịdi Úmeera Ukpuḍian
Mem dị ọghaaph ạmalha igbudu phọ a Nebukạdneza roten, bịn a Nebukạdneza ạka igbogh igbudu a gol ạmheremhi esi dị oghol mọ Dura. Kụ ạmhagh ikpolhom awe ẹmha phọ ẹḅaram bọ ni Sedạrạk, Misạk, rạ Ạbẹdnigo, mọ ookpomhoghan sịphe Dura. Ọdi ạto ạḅenhi we phọ mọ: ‘Mem dị nyinha ẹnhaghan rọḍogh aruuḍue r’ạrukuodu, r’iitia ọdo kịrokiro ạraraar areephegh, ikpuḍian ẹngo igbudu phọ! Kụ oye lọ úmeera ukpuḍian, kosumeeny ni nyọdi olhoghi ạnian.’ A Sedạrạk, Misạk, rạ Ạbẹdnigo komeera ni okpuḍian ọngo igbudu phọ ịphen phọ ḍụghum?
Ịpe reten kụ uwo ẹmha phọ ạngo ịto mọ ophulha rạraar areephegh phọ, kụ ạbueripho awe phọ okpuḍian ọoḅereghi igbudu phọ. Kụolo a Sedạrạk, Misạk, rạ Ạbẹdnigo úmeera ukpuḍian aani. Awe ụmhiin ni ịphen phọ kụ ọghi ọḅenhi uwo ẹmha phọ mọ: ‘Ịraar phọ ạnmuny phọ oḍighi bọ bụo Izrẹl úmeera ụuḅereghi igbudu phọ nạ ạka bọ.’ A Nebukạdneza arom ni mọ ọghi ọmhagh bịdi kụ ạḅenhi mọ: ‘Mị kịngo inyinha ẹnhon eepoogh ọoḅereghi igbudu phọ. Eḍighi mạar dị nyinha ị́iḅereghi, mị kiroph inyinha asumeeny olhoghi ạnian. Kụ ẹmhugh ílo dị kịphel inyinha ẹsighe ḍịghaagh ạmhi.’ Ạnmuny phọ ụphagharanhaan nyọdi mọ: ‘Iyoor kụ́ngo ẹnhon eepoogh. Ẹnhaan phọ ayoor kụphel li iyoor. Kụ ghạlhamo iyoor ụ́phel li, uwo ẹmha ayoor, yoor kọ́oḅereghi igbudu phọ.’
A Nebukạdneza ạghagh ni olhoghi kụ ạḅenhi we phọ ọdi mọ: ‘Iḍighi ịdi ạnian phọ kẹkolhoghol oḍual amem epu ịpe ẹrol bọ!’ Kụ ọdi ạḅilhe ạḅenhi we ẹgham mọ ọdi mọ: ‘Ịkoroghi bịdi eroph esumeeny sịphe ạnian phọ!’ Awe phọ oroph bọ bịdi osumeeny sịphe ạnian phọ umhugh ni loor esi ẹgholhoghol ạnian phọ. Kụolo mem dị a Nebukạdneza aphogh olhoghi ạnian phọ, ọdi ạmhiin inya awe dị rotelhe sịphe phọ. Ịpe ọdi ạmhiin bọ iḍigh ni ḍiigu esi ọdi kụ apuru we phọ ọdi mọ: ‘Kị̋raar awe ḍịen kụ ẹdi yira oroph bọ osumeeny sịphe ạnian phọ? Nyịidipho mị rạmiin ghan inya awe, kụ oniin sịphe phọ ạkigh ọokpaany!’
A Nebukạdneza arelhe ni atuman sịphe ạnian phọ kụ ạlo mọ: ‘Imite, nyinha ạrebenhe Ẹnhaan phọ Epelheghiom bọ!’ Iḍigh ni ḍiigu esi awe phọ ọmhiin dị a Sedạrạk, Misạk, rạ Ạbẹdnigo orelhe omite sịphe ạnian phọ dị ịyaar íḍighi rụsuoma, sịlhaal r’aloor phọ ạbidi. Bịdi phọ kẹn, úpur rophur eḍu ạmughi.
A Nebukạdneza ạḅem mọ: ‘Ẹnhaan phọ a Sedạrạk, Misạk, rạ Ạbẹdnigo egbogh Ẹnhaan. Ẹnhaan phọ ạbidi irom ọokpaany ọdi kụ ạphel bịdi. Ẹmhugh ílo dị ẹrol ịduon ọdi.’
Ịdipho a Sedạrạk, Misạk, rạ Ạbẹdnigo, nạ asopha ni okumu a Jehova etigheri dọl dị nạ asoman?
“A Jehova Ẹnhaan phọ ạna kụ ẹdi nạ kaaseeny, ọdi bịn kụ ẹdi nạ kakumuan ghan rukumuan iigbia ạngo.”—Mạtiu 4:10