Uḍien Dị Ạ Jọn Ạmhiin

Mem dị otelhedom mọ Jọn odi ikoli ekpu ogbo dị oghol mọ Pạtmọs, a Jizọs aḍighi ni ịdi ọdi ạmhiin 16 uḍien dị egbolhomaam rạraar dị kemite ghisigh. Uḍien phọ uḍeenhaan iyira ịpe kọḅaalhamhi bọ ḍien a Jehova, ịpe Ọmhar phọ ọdi katu bọ, kụ oḍighi aani ịpe ọdi rạwa bọ sịen ade phọ ịdipho edi bọ ẹpe k’ạke phọ.

Oniin uḍien dị oḍeenhaan Jọn, ọdi ạmhiin a Jehova dị ạrolhom ạgada ẹpe k’ạke phọ r’eghuan phọ ọdi. Kụ 24 ikumor awe dị ọkpolhoghian ịphalhaḅaal ạrusuoma ọḅilhe ozua roghoony dị oḍighinhom gol ukitonhom ni ạgada phọ ọdi. Ạḍiḅaal imite ghan ni sịphe ạgada phọ kụ ẹḍogh ọomhaany ẹḅilhe ẹḅa ghan. Ịyal dị r’inya ikumor awe phọ ukpuḍian ni ghisigh a Jehova kụ ooseeny nyọdi. Ạ Jọn ạḅilhe ni ạmhiin ọnhon uḍien. Sịphe uḍien phọ ọdi ạmhiin we areelhe, rụnhu r’ạramha kịrokiro, dị rọoḅereghi a Jehova. Kụ a Jizọs phọ aḍighi bọ Ọony Oyool Ọga phọ, ạmhaar ri aphogh bịdi kụ arorori ạghi ạngo mụum dị kaḍighi ịdi bịdi kọtol k’agee-pọ. Ạ Jọn ạḅilhe kẹn ni ạmhiin ọnhon uḍien dị a Jizọs rạtooghi ẹpe k’ạke r’ 24 ikumor awe phọ. Esi ọnhon uḍien, ạ Jọn ạmhiin ni Jizọs dị ee ẹgham r’elhom ẹnham, aḍighi bọ Setạn, ḅịlhe r’ạruukpaany phọ ọdi. Kụ aroph bịdi sịen ade phọ.

Ạ Jọn ạḅilhe ni ạmhiin ọnhon uḍien, sịphe phọ Ọony Oyool Ọga phọ r’ 144,000 ọmeera Ẹeḅaraph ạ Zạyọn ẹpe k’ạke. Ọdi ạmhiin kẹn ni ọokpaany dị rạpeeph ẹpe okuaḍio phọ kọḅenhi we mọ oghiilhaan Ẹnhaan ọḅilhe ọngo nyọdi rughuenhian.

Ọdi ạḅilhe ni ạmhiin ọnhon uḍien. Sịphe uḍien phọ, ee ni ẹgham Ạmạgẹdọn. Sịphe ẹgham mọ ẹpe phọ a Jizọs r’ạruukpaany phọ ọdi uphiemhi ni aḅirinhi phọ a Setạn. Ạ Jọn ạḅilhe ni ạmhiin uḍien dị asughanham ọmhan. Sịphe phọ ọdi ạmhiin mọ ẹepho edi ẹpe k’ạke phọ r’ịsien ade phọ. Kụ mophiemhi Setạn r’ạbuphe rọdaph bọ nyọdi. Tọrobo oye ẹpe k’ạke phọ r’ịsien ade phọ rạlogh ghan eegu ḍien phọ a Jehova kạḅilhe ạaḅereghi nyọdi.