Loghonhaạn Ḍighaạgh Buphẹ Nạ Ratughemhị Ghan Bọ Baibul Phọ Okpạr Opu Ikarạph Aroozọ

Oginha awe dị omhoọgh roozọ dị eḅaạl kụ kotue okelhọm siya arighirị dị ekpulhạn r’aZihova. (1Pit 1:14-16) Mem dị abuẹn yira rotughemhị ghan bọ Baibul phọ owilhẹ yogh ikarạph araagharạ, bidị komoọgh ni suọ siphẹ eghunotu phọ abidị, omoọgh ogey omhoon aloor, ḅilhẹ ko/moọgh ibadị iiḅaghamhị ikpoki.

Kaạph aagholhomhi siigbu phọ aZihova, iyaạr phọ otụ bọ omiteom, r’asuọ odaphạn phọ. Gbon olhoghonhaạn aḍighaạgh opọ nạ ratughemhị bọ dị kanme eten iitughiạn phọ odị, bịn marue aḍighi ipẹ aZihova rawạ bọ. (Efẹ 4:22-24) Kparamhị oḅio abidị mọ r’olhoghonhaạn aḍighaạgh aZihova, bidị kotue ni okpạr opu ekarạph eegharạ lọ omhoọgh. (Fil 4:13) Tughemhị bidị ilọ olhọm ghan olhoghonhaạn aḍighaạgh aZihova mem dị inyuughiom oḍighi ikarạph eru. Loghonhaạn kẹn bidị ḍighaạgh orọph ghan omhiịn asidọl dị kelọgh bidị esi odẹgh ophogh. Ḅạ ghan ikpo-onhụ dị kekparamhị bidị owilhẹ ikarạph araagharạ kụ oḍighi ghan idị enhighẹ. Ibo retọl ghan ni omhiịn dị opọ nạ ratughemhị bọ r’anmeeghi raraạr r’olhoghonhaạn aḍighaạgh aZihova.

IPOGH VIDIO PHỌ LOGHONHAẠN ḌIGHAẠGH BUPHẸ NẠ RATUGHEMHỊ GHAN BỌ BAIBUL PHỌ OKPẠR OPU IKARẠPH AROOZỌ, KỤ EPHANYANHAẠN SIPURU PHỌ EDAPHẠN BỌ SIẸN:

• 

  Ika kụ idị ikumor awe phọ r’aNeeta oḍeenhaan mọ bunọ oḍuom ni olhoghi Jade?

• 

  Ika kụ idị aNeeta aḅilhẹ alhoghonhaạn ḍighaạgh Jade?

• 

  Ika kụ idị aJade awạ olhoghonhaạn aḍighaạgh aZihova?