“Ḅẹnhi Ikumor Awe Phọ”

1. Ika kụ ịdi a Jehova aḍeenhaan mọ ọdi ạmaghamhi ni mạar iyool phọ ọdi?

A JEHOVA ạmaghamhi ni mạar iyool phọ ọdi. Ọdi ạsighe ịḅaal phọ a Jizọs kụ aghoom bịdi ạḅilhe ạma ikumor awe ookpomhoghan phọ ọmhaar ophogh ạbidi. (Iiḍ. 20:28) Ẹnhaan rạwa mọ ikumor awe phọ ọzoom iyool phọ ẹyoghoyogho eten. Dị eego esi ịiḅakiom a Krạịst, ikumor awe phọ roomhanhamhi ghan iyool phọ kọḅilhe oghoph bịdi esi ootor’osooromineen.—Isa. 32:1, 2.

2. Ịghen iyool kụ ịdi a Jehova rạloghonhaan ghan ḍịghaagh eten dị ẹgbatanhaan? (Ezekiel 34:15, 16)

² A Jehova ạkar rạloghonhaan ghan ḍighaagh oomo iyool phọ ọdi, ẹkar ẹkpaariom bụphe rọmiinhom bọ. Dị eego esi ikumor awe phọ, a Jehova rạloghonhaan ghan ni ḍịghaagh bụlo rọmiinhom eten aruwaloor. (Bạl Ezekiel 34:15, 16.) Tọrobo ịpe ẹrol bọ, ọdi rạwa mọ yira kụ opuru ghan ọlhoghonhaan ạḍighaagh phọ. Mem dị yira mọoḅereghi ọlhom nyọdi ọlhoghonhaan ạḍighaagh, ọḅilhe ni ọwa ọlhoghonhaan ạḍighaagh abupoghom r’ạbutughemhia ookpomhoghan phọ.—Ẹfẹ. 4:11, 12.

3. Ika kụ ịdi ọoḅeghion iiḍighi ikumor awe phọ kẹngo oomo ayira sụo?

³ Sịen ẹmhuoghaaph phọ ẹphen phọ yira kọoḅeghion ịpe a Jehova rạsighe ghan bọ ikumor awe phọ kạlhoghonhaan ḍịghaagh bụphe asiya phọ ạbidi ra Jehova medugh bọ. Yira kọpanyanhaan sipuru phọ ịphen: Pụr amem kụ ẹdi yira kọmagh bọ ikumor awe phọ? Yira ụtu eeghe kụ koḍighi bọ ịduon phọ? Ḅịlhe ika kụ ịdi bịdi rụlhoghonhaan ghan iyira ḍịghaagh? Ghạlhamo asiya phọ ayira ra Jehova ẹkpar ri nyịidipho, ọphanyanhaan asipuru phọ ịphen phọ keḍighi ịdi yira kọsereghian ọḅilhe ọmooghom sụo iikolhobian phọ a Jehova mamiteom bọ.

ẠPUR AMEM KỤ ẸDI YIRA KỌMAGH BỌ IKUMOR AWE PHỌ?

4. Yira ulhegheri ika mọ ịpe edi bọ Jems 5:14-16, 19, 20 rẹkaaph ghan ịlo oye dị rạarurughian eten aruwaloor? (Mịin kẹn sifoto phọ.)

⁴ Ọnyo ạmatuan phọ Jems ạghaaph ni aagholhomhi ịpe a Jehova rụlhoghonhaan ghan bọ iyira ḍịghaagh dị eego esi ikumor awe phọ, kụ apuru mọ: ‘Ạnhian ọnyo anyina kụ rạarurughian? Ọdi ạmhagh ikumor awe ookpomhoghan phọ.’ (Bạl Jems 5:14-16, 19, 20.) Ịge phọ a Jems eḍeenhaan mọ ọdi rạkaaph ghan ịlo ịirurughian eten aruwaloor. Esi ọmaam, ọḅenhi nyọpo rạarurughian bọ mọ ọdi ạmhagh ikumor awe phọ, kóyil arookonhom. A Jems ạḅilhe kẹn ạkaaph mọ ọpo rạarrurughian bọ kamoon mem dị ọsar ịkaraph ọdi ọwilhenhaan. Eeni amem, ịpe rookonhom ghan bọ oye dị úmoon eten aruwaloor reḍighi ghan ni iniin r’ịpe rookonhom ghan bọ oye dị úmoon eten iphulhupul. Esi ọmaam, mem dị yira úmoon, yira rọteeny ghan oyil arookonhom, ọkaaph ịpe riḍighi bọ iyira, kụ ọdaphan tọrobo ịiḅakiom dị ọdi ạngo. Iniin phọ kẹn, mem dị yira úmoon eten aruwaloor, ọteeny ikumor awe phọ, ọghaaph ịpe riḍighi bọ iyira, kụ ọḅilhe ọdaph tọrobo oromha ạ Bạịbul dị bịdi ụngo iyira.

5. Ika kụ ịdi yira kolegheri mọ asiya phọ ayira ra Jehova medugh?

⁵ A Jems ẹmhu phọ 5 uroma iyira mọ ọghi ghan ọteeny ikumor awe phọ mem dị yira olhoghoma mọ asiya phọ ayira ra Jehova medugh. Eḍeenhaan ọsu olhoghi eḍighi mạar dị yira ọghi ọwa ọlhoghonhaan ạḍighaagh ạbidi kụ asiya phọ ayira ra Jehova egbi ọka! Ạ Bạịbul phọ ụphur iyira rụru mọ eḍighi mạar dị yira úmiigha loor, yira otue ni ọotughian mọ yira ọmoogh ni kuuḅi aghisigh a Jehova mem dị yira ụ́moogh. (Jems 1:22) Ḍịen kụ ạdol phọ ạ Krịsten ạ Sạdịs phọ ọrol bọ, kụolo a Jizọs ạphur ri bịdi rụru mọ bịdi ụ́moogh igey asiya ra Jehova. (Ogan. 3:1, 2) Eniin eten dị yira kotue olegheri mọ asiya phọ ayira ra Jehova medugh pọ ọsighe oophugh phọ yira ọmhoogh bọ esi arukumuan phọ a Jehova nyịidipho ọtomaam ọpo ẹḅel amem mọ. (Ogan. 2:4, 5) Yira otue ni opuruan loor mọ: ‘Ibo phọ mị ạmhoogh ghan bọ mem dị mị ạal ạḅilhe agbirima Bạịbul phọ meghom ḍụghum? Iikolhobian r’ẹghimom ịtuugha ạmhi medugh ḍụghum? Oophugh phọ mị ạmhoogh ghan bọ omite ẹpe erugh phọ mạaphoom ḍụghum? Mị ragbor ghan ni kạmhoogh ịitughian ọḍe ọḍe r’ọmhoogh aruphua ḍụghum?’ Eḍighi mạar dị ọphagharanhaan aḍiniin sịen oomo asipuru phọ ịphen phọ aḍighi ii, pọ rẹma ghan mọ asiya phọ ayira rạ Jehova redugh. Yira úugboronhom uḍighi ịyaar, pọ kẹloghori ni. Eḍighi mạar dị yira útue uulemhi ịiḅaghamhi phọ r’aloor, ọbobo yira moḍighi ịyaar dị ị́ḅeraan a Jehova, pọ ọghi ọḅenhi ikumor awe phọ bịdi ọlhogh ḍịghaagh.

6. Ẹwa mọ awe dị moḍighi igbogh ịkaraph oḍighi eeghe?

⁶ Oye dị aḍighi igbogh ịkaraph dị kemoghi mọ ọgbatan sịen ookpomhoghan phọ ạghi ạḅenhi okumor oye. (1 Kọr. 5:11-13) Tọro oye lọ maḍighi ọdo ịkaraph phọ ịphen phọ amoghi ni ọokoḍi asiya phọ ọdi ra Jehova. Orue ọmhoogh ọsar ọwilhenhaan phọ a Jehova dị eego esi ẹkia ẹtagharan phọ, pọ yira ọmoogh oḍighi oḍeenhaan mọ yira mokiton. (Iiḍ. 26:20) Eniin eten dị yira koḍeenhaan mọ yira mọkar okiton pọ ọghi ọḅenhi ikumor awe phọ ịkaraph phọ.

7. Bụo ạnhian kẹn kụ umhoghi ọlhoghonhaan ạḍighaagh ikumor awe phọ?

⁷ Ikumor awe phọ rọloghonhaan ghan kẹn ḍịghaagh bụphe modugh bọ eten aruwaloor. (Iiḍ. 20:35) Esi ọmaam, bịdi rọloghonhaan ghan ni ḍịghaagh oye dị reenhan ịkaraph ạruuphua. Reḍighi ghan ni ịpaanhaan eḍighi mạar dị oye phọ ạphughol ghan ịgbagara ạsiroogho, aphogh ghan sifoto ẹdaḅa, ọbobo apesi ghan ipesi kụ agbi bọ ọtuugha igey phọ. Esi ịduon phọ, kákiilhaan opuru ọlhoghonhaan ạḍighaagh. Nạ atue ni ạḅaanhaan oniin okumor oye dị kaler rụru ạngo ịpe nạ rạkaaph bọ, ạḅilhe ạatughianham nyịnha mọ nạ katue ni aḍighi ịdi olhoghi a Jehova kạḅaal eḍighi mạar dị nạ úmeel ghan uḍighanhaan ịkaraph ạruuphua phọ ịpe phọ. (Eccl. 4:12) Eḍighi mạar dị nạ aḅonyonhu azuan loor ịduon nạ útue bọ ụ́kpar upu ịkaraph ạruuphua phọ ạna, ikumor awe phọ kọghiom ni nyịnha olhoghi mọ ịphen phọ eḍeenhaan mọ nạ ạmaghamhi ni mạar siya phọ ạna ra Jehova ḅịlhe mọ nạ ọ́beḍenhom ịnyaam ạna.—1 Kọr. 10:12.

8. Emoghi ni ọghaaph ghan ọḅenhi ikumor awe phọ tọrobo amem dị yira ọpioman? Gbạ.

⁸ Ímoghi mọ ọghi ghan ọteeny ikumor awe phọ tọrobo amem dị yira ọpioman. Esi ọmaam, ọḅem mọ nạ ạkaaph ọbobo aḍighi ịyaar dị ephin esi ọnyo umor ọbobo umaranhi, eeni nạ ụghagham bịdi olhoghi. Kpạripe r’ọghi ọteeny okumor oye, kẹnighe ghụn ọdaphan oroma phọ a Jizọs ạngo bọ ịlo ọwa ghan ẹepho r’umor ọbobo umaramhi ạna. (Mạt. 5:23, 24) Nạ atue ni ạki ạwaaghi rạraar ạbughe sịphe ạrinya phọ ayira ịlo ẹeghara ọyoghoyogho, ọkparam, ḅịlhe r’ọphamhaghan aloor. Kụ eḍighi mạar dị nạ ạḅilhe ni amhoghi ọlhoghonhaan ạḍighaagh, pọ nạ atue ni ạki ạteeny okumor oye ạḅenhi. Sịphe ạḍinya phọ ạ Pọl ạge bọ ạghiom bụo a Filipai phọ, ọdi ạḅenhi ni ọnyo umor dị ạ Bạịbul phọ úkol ḍien phọ mọ ạlhoghonhaan ḍịghaagh ịyal abumaranhi dị odi ookpomhoghan ạbidi, Yuodia r’aSintiki, ọokoḍi ịiḅaghamhi dị bịdi ọmhoogh. Okumor oye ookpomhoghan anyinha katue ni ạlhoghonhaan aani nyịnha ḍịghaagh.—Fil. 4:2, 3.

UḌIGHI IKA KỤ YIRA KỌMAGH BỌ IKUMOR AWE PHỌ?

9. Uḍighi ika kụ ị́kpe bọ mọ omheera umugholoor usophoghom iyira ọmhagh ikumor awe phọ ọḅenhi mem dị yira ọpioman? (Proverbs 28:13)

⁹ Eḍighi mạar dị yira oḍighi igbogh ịkaraph ọbobo olhoghomha mọ yira útue mụn eenan ịkaraph ạruuphua, kemoghi ni ạkpo oḅio orue opuru ọlhoghonhaan ạḍighaagh. R’amem kúmeera umugholoor usophoghom iyira ọḅenhi ikumor awe phọ. Eeghe kụ iḍighi? Eḍighi mạar dị yira ọdaphan iromhoghiom mọ a Jehova ịlo ịphen phọ, pọ keḍeenhaan mọ yira oḍuom ni nyọdi olhoghi ḅịlhe mọ iromhoghiom mọ ọdi kụ kimhoonhomhi iyira. Reḍeenhaan ghan kẹn mọ yira omoghi ni ọlhoghonhaan ạḍighaagh ọdi ọḅilhe orue ọmheera mem dị yira ọghorom. (Ps. 94:18) Esi ịduon phọ, mem dị yira oḍighi igbogh ịkaraph, Ẹnhaan kuḍeenhaan ni iyira ọnma ighirigiir lọ yira ọghaaph ịkaraph phọ ayira omiteom kụ ọḅilhe okiton.—Bạl Proverbs 28:13.

10. Eeghe kụ ketue ni emite eḍighi mạar dị yira oḍighi igbogh ịkaraph kụ ạaghi?

¹⁰ Mem dị yira oḍighi igbogh ịkaraph kụ ọghaaph ọḅenhi ikumor awe phọ yira kọmoogh ni ḍịseph, kụolo yira ạaghi ạraraar kebeeph ghan bịn. Ịphen phọ imitenhaan ni Uwo ẹmha phọ Devid mem mọ ọdi aḍighi bọ igbogh ịkaraph phọ kụ ạkparagha bọ ạaghi, ọdi ạmhiinhom ni eten aruwaloor, eten ịitughian, r’eten iphulhupul. (Ps. 32:3-5) Ịdipho émoon ọbobo esi dị oye phọ aḍighima kepogh ghan bọ ọlhoghori mem dị úukonhom agey, ịduon kẹn kụ ẹdi émoon oye eten aruwaloor kẹloghori ghan bịn mem dị ụ́loghonhaan ḍịghaagh. A Jehova ạtuan ịduon kụ ạḅem bọ mọ ọghi ‘oolemhi rạraar’ r’ọdi dị eego esi ikumor awe phọ.—Isa. 1:5, 6, 18.

11. Eeghe kụ ketue emite eḍighi mạar dị yira ạaghinaan ikumor awe phọ igbogh ịkaraph dị oye aḍighi?

¹¹ Eḍighi mạar dị yira oḍighi igbogh ịkaraph kụ ạaghi, etue ni etir bụnhon. Ketue ni ẹkom ịdi uwaloor phọ a Jehova kạ́tol mụn ookpomhoghan phọ ẹḅilhe ẹgbaragbaramhi ẹepho abumor r’abumaranhi phọ. (Ẹfe. 4:30) Eniin phọ eten phọ, eḍighi mạar dị yira olhegheri mọ oye sịphe ookpomhoghan phọ maḍighi igbogh ịkaraph, ọḅenhi nyọdi mọ ọdi ạghi ạḅenhi ikumor awe phọ.a Loor esi dị eḍighi mạar dị yira ạaghi ịkaraph dị oye aḍighi, pọ yira roḍighi aani kẹn ịkaraph. (Lev. 5:1) Esi ịduon phọ eḍighi mạar dị yira olhegheri mọ oye aḍighi ịkaraph kụ ạaghinaan ikumor awe phọ, ẹphomhoghian phọ ayira esi a Jehova kinyu ni iyira ọghi ọḅenhi ạbidi. Yira oḍighi ịduon phọ, kekoph ni bumor r’abumaranhi phọ ayira ẹḅilhe ẹloghonhaan ḍịghaagh ọpo aḍighi bọ ịkaraph phọ ọḅilhe ọmhoogh igey asiya ra Jehova.

IKA KỤ ỊDI IKUMOR AWE PHỌ RỤLHOGHONHAAN GHAN IYIRA ḌỊGHAAGH?

12. Ika kụ ịdi ikumor awe phọ rọloghonhaan ghan ḍịghaagh bụphe modugh bọ eten aruwaloor?

¹² Ạ Bạịbul phọ atoma ikumor awe phọ mọ bịdi ọlhoghonhaan ḍịghaagh bụphe modugh bọ eten aruwaloor. (1 Tẹs. 5:14) Esi ịduon phọ eḍighi mạar dị nạ aḍighi ịkaraph, ikumor awe phọ otue ni opuru nyịnha sipuru pịdi bịdi otue ọnaghanhan ịitughian phọ ạna r’ịpe nạ alhoghoma bọ. (Prov. 20:5) Ii, kédugh ọḅenhi ikumor awe phọ ịpe emite bọ loor esi umugholoor, kụolo nạ ạḅenhi bịdi kedughanhaan bịdi ọlhoghonhaan ạna ḍịghaagh. Kụ iḍighi kụ, kákiilhaan mọ ikpo ọnhu phọ ạna kẹ́dugh esi ạbidi ọnhaghan. (Job 6:3) Ikumor awe phọ kóogboronhom bịn osoph ọoruen ọngo ạna, bịdi koler ghụn rụru ọnaghan ịpe nạ rạkaaph bọ kụ ogbi ọsighe ạ Bạịbul phọ ọngoom ạna oroma. (Prov. 18:13) Ikumor awe phọ olegheri ni mọ rẹsighe ghan ni mem kụ oye agbi ọmhoogh ọlhoghonhaan ạḍighaagh phọ ọdi amhoghi bọ, esi ịduon phọ bịdi kọmoogh ni rạghaaph r’ạna ịbadi amem kụ bịdi ogbi olhegheri ịlo ọlhoghonhaan ạna ḍịghaagh.

13. Ika kụ ịdi ikumor awe phọ kụlhoghonhaan iyira ḍịghaagh dị eego esi ịiḅereghi r’ịiḅakiom ạ Bạịbul phọ? (Mịin kẹn sifoto phọ.)

¹³ Mem dị nạ ạghi ạteeny ikumor awe phọ, bịdi kọ́kaaph rạraar dị kẹbughe apum mọ nạ alhoghomha bọ. Kpạripe ghụn, bịdi kọoḅereghinhaan nyịnha. Ịiḅereghi phọ ạbidi ẹmhoogh bọ ịikpo kẹkparamhi ẹḅilhe ẹedereghi nyịnha eten dị nạ úseere olhoghi. Ọlhoghonhaan ạḍighaagh phọ ikumor awe phọ kọngo bọ nyịnha ẹḅaramhaam ọsighe elo ogbul ạna dị eego esi aḍien phọ a Jehova. (Jems 5:14-16) “Elo” phọ ẹphen phọ pọ igey phọ edi bọ pạ Ekpo ọnhu phọ Ẹnhaan. Ikumor awe phọ kọsighe ịpe ạ Bạịbul phọ ạghaaph bọ kụ ọodereghiom nyịnha ọḅilhe ọkparamhiom nyịnha, pịdi nạ ạḅilhe ạmoogh igey asiya ra Jehova. (Isa. 57:18) Iromhoghiom mọ ạbidi ẹkpasi bọ sịphe ạ Bạịbul phọ kẹngo ni nyịnha ịnyaam ọghiom aghisigh oḍighi ghan ịpe a Jehova rạwa bọ. Dị eego esi ikumor awe phọ, nạ kạnaghan ni ẹḍogh a Jehova dị rẹḅenhi ghan nyịnha mọ: “Ẹphen kụ eten phọ. Telhe nyẹen.”—Isa. 30:21.

14. Ọdaphan Galetia 6:1, ika kụ ịdi ikumor awe phọ rọloghonhaan ghan ḍịghaagh oye dị ạpioman? (Mịin kẹn sifoto phọ.)

¹⁴ Bạl Galetia 6:1. Ọnyo ạ Krịstẹn dị mạpioman pọ óḍighi mụn ịpe a Jehova rạwa bọ. Eeni ọdi asopha osopha dị ụ́nighe ọbobo aḍighi ịyaar dị ẹgbagh olhogh phọ Ẹnhaan. Eten dị ẹyoghoyogho, ikumor awe phọ rọlhoghonhaan ghan ni ḍịghaagh ọḅilhe “oḅulhemi” ọpo ạpioman bọ loor ịduon bịdi ọphomhoghian bọ nyọdi. Ekpo ọnhu aGrik phọ ọgba bọ mọ “obulhemi” rẹma ghan eten phọ ẹpe oyil arookonhom rạḅilhe ghan bọ kaalemi ọḅarara oye dị aḍighima ịyaar ọbo oye phọ kaḍigh ghan bọ ẹgha. Ịdipho ogey oyil arookonhom kaalemi bọ ọḅarara dị awunaan eten dị eephinha phọ kẹ́bugh iboom, kụ ịdi ikumor awe phọ rọloghonhaan ghan ḍịghaagh oolemhi oye dị ạpioman eten dị kẹ́bughe eephinha phọ ọdi. Ạ Bạịbul phọ ạḅilhe ni atomha ikumor awe phọ mọ “imiigha loor.” Ịduon bịdi rụlhoghonhaan bọ iyira ḍịghaagh oolemhi eten phọ ayira, ikumor awe phọ olegheri ni mọ bịdi phọ kẹn úmunhughan aani ḅịlhe mọ bịdi rọpioman ghan ni. Kpạripe roḍeenhaan ghan mọ bịdi kụ umhạn mạar opu oye phọ, ọbobo rọ́pioman ghan, ikumor awe phọ rosooromhi ghan ghụn loor koḍeenhaan igbiririph oye phọ.—1 Pit. 3:8.

15. Yira koḍighi eeghe eḍighi mạar dị yira ọmhoogh ịiḅaghamhi?

¹⁵ Yira kotue ni oḍuom olhoghi ikumor awe phọ. Loor esi dị mọtughemhi bịdi dị kọ́kaaphom ghan rạraar ịbooghian ayira, oroma phọ abịdi rạkpasi ghan sịphe ạ Bạịbul phọ ḅịlhe rụlhoghonhaan ghan iyira ḍịghaagh orool ịiḅaghamhi ayira. (Prov. 11:13; Gal. 6:2) Olhegheri ịyaar r’ạraaghara ikumor awe phọ ẹgbaranhaan ni, ghạlhamo r’ịduon phọ ni, nạ atue ni ạteeny tọrobo ọnyo ạbidi ạḅenhi ịiḅaghamhi ạna. Kụ ụ́ḅua ghan okumor oye ụgba okumor oye opuru oroma, ọwa ghan ọlo kụḅenhi iyira ịpe yira rọwa bọ ọnhaghan. Yira oḍighi ịduon phọ, pọ yira ọkigh we dị rọwa ghan ọnhaghan ịpe ịḅeraan bọ iyira kpạripe r’igey ịtughemhi ạ Bạịbul phọ. (2 Tim. 4:3) Mem dị yira ọmhoogh ịiḅaghamhi kụ ọghi ọteeny okumor oye, ọdi atue ni upuru iyira mụghumo yira mọteeny ni ọnhon okumor oye ḅịlhe r’oroma phọ okumor phọ ụngo bọ iyira. Kụ osooromhi aloor kanyu ni nyọdi opuru aani ọnhon okumor oye oroma.—Prov. 13:10.

ADOOL DỊ TỌROBO ỌNYO AYIRA AROOL

16. Eeghe adool kụ ẹdi yira orool?

¹⁶ Ghạlhamo r’ịduon ikumor awe phọ ruphogh ghan bọ iyira ịdipho iyool Ẹnhaan, bịdi kụ iyira rụ́ḅenhi ghan ịlo oḍighi. Adool dị tọrobo ọnyo ayira arool pọ oḍeenhaan Ẹnhaan mọ yira ọpomoghian ni nyọdi ḅịlhe roḍighi ịpe ẹḅeraan bọ nyọdi esi ikpo ọnhu r’eḍighinhom ịyaar. R’ọlhoghonhaan ạḍighaagh ọdi, yira kotue ni ọḅar nyọdi. (Rom 14:12) Esi ịduon phọ, kpạripe r’ọḅenhi ayira ịlo oḍighi, ikumor awe phọ rọsighe ghan Bạịbul phọ kuḍeenhaan iyira ḍịitughian a Jehova ẹlo ịyaar phọ. Mem dị yira ọdaphan oroma phọ ạbidi ạkpasi bọ sịphe ạ Bạịbul phọ, pọ yira kosopha ghan ni osopha dị ạdaphan ḍịitughian a Jehova.—Hib. 5:14.

17. Eeghe kụ eḍighi osopha ayira?

¹⁷ P’eeghe eepoogh dị yira ọmhoogh oḍighi iyool a Jehova! A Jehova marom “ooḅi opoghom iyool phọ” Jizọs, ọngo ayira ghuḍum ọdi pịdi yira ọmhoogh eepoogh ọrol k’agee-pọ. (Jọn 10:11) Dị eego esi ikumor awe ookpomhoghan phọ, ọdi mamhunheni ịpe ọdi aguanhaan bọ mọ: “Mị kịngo inyina buḍiemhiom dị kụnhaghanhan ghan imị, kụ bịdi kọsighe olhegheri ịyaar r’ọnhaghanhan ạḍughum kụ iphoghom ghan inyina.” (Jer. 3:15) Mem dị yira odugh ọbobo úmoon eten aruwaloor, kúpiemhi mem ọghi opuru ikumor awe phọ ịlo ọlhoghonhaan ạḍighaagh. Bịn yira kọmiin ni ịdi a Jehova rạsighe ghan ikumor awe ookpomhoghan phọ kụlhoghonhaan iyira ḍịghaagh.