1925—Oniin Okuron Ạsia Dị Maten

ỊPE BỊDI OḌUOM BỌ OLHOGHI ÍMITE

Ịbadi Ạnmuny Askul Ạ Bạịbul phọ uḍuom ghan olhoghi mọ ade phọ keḍighi Pạrạdạịs lhạ phọ 1925. Eeghe kụ iḍighi? Umor phọ Albert Schroeder, aḍighi aani bọ oniin sịphe Aloor Phọ Repogh Bọ ạḅem mọ: “Ụutughian ghan mọ abusughenheen phọ ạbuphe ọsagharan bọ uwaloor iigbia phọ kokeel k’ạke ọtooghi rạ Krạịst lhạ phọ ạḍiphe phọ, kụ oḅerion rẹbenhe Ẹnhaan iḍiodi phọ dị ọkpe oḍuomolhoghi, ịdipho Ebraham, Devid, r’ạbunhon kụ bịdi oḍiemhiom we phọ Ẹnhaan sịen ade phọ ịdipho ạpakiri ịtooghi Ọmhar phọ Ẹnhaan.” Ịduon ạlha phọ rẹki bọ kụ ịpe phọ ímite bọ, iḍighi ni mabi esi ịbadi.—Prov. 13:12.

Etigheri ịduon ịpe bịdi ogon bọ ímite bọ, ogbogh opol Ạnmuny Askul Ạ Bạịbul phọ ụghiom ni ghisigh oḍighi iphelhegbeel phọ, kụ bịdi ọlhogh elhegh mọ oḍighi ọghaaph ịlo a Jehova kụ ịyaar dị ẹmhan maạr dị koḍighi. Esi ọmaam, ọoḅeghion ịpe bịdi ọsighe bọ redio ọraramhi ọghaaph iiḅi ịinhaghan phọ.

ỤLHOGHOḌI ỊNHON OTU A REDIO

Lhạ phọ 1924, ịbadi awe ulher ghan ni rụru ọnhaghan otu a redio phọ oghol bọ mọ WBBR. Loor ịduon phọ, lhạ phọ 1925, Ạnmuny Askul Ạ Bạịbul phọ ụlhogh ni ọnhon otu a redio dị ạmhoogh ịikpo apu ọphoripho dị atuman Chicago, ẹpe Illinois. Ughol omhoom otu a redio phọ ọphon phọ mọ WORD. Umor phọ Ralph Leffler, oniin ọdi akumuan aani ọkpamaghi otu a redio phọ ạḅem mọ: “Ḍughul mem dị ariisi mẹphooghi, ẹḍogh a redio phọ isi ghan ni k’ẹekalha ekpisi.” Esi ọmaam, eniin eghun otu dị ọrol Pilot Station, epẹ Alaska, ụnhaghan ni ḍịḅel adom mọ ọghaaph bọ sịphe otu a redio phọ. Ghạlhamo r’ịduon ạḍikel ekpisi phọ ẹmhan bọ ni 3,000 itobi, ọḍua osi ẹpe otu a redio phọ odi bọ. Mem mọ bịdi ọnhaghan bọ, eghun otu phọ ẹphen phọ ụge ni ḍịnya ọseph bụphe rokumuan bọ sịphe otu a redio phọ, loor esi dị adom mọ bịdi ọnhaghan bọ ịkar kụ ẹkparamhi bịdi.

Rọkaaph bọ rikpisi kịrokiro a redio phọ ọphon phọ asi ghan bọ, Ạ Watch Tower aDecember 1, 1925, ạḅem mọ: “Ạ WORD aḍighi aani oniin otu a redio dị ạmhoogh ịikpo apu sịphe United States. Ịikpo phọ ọdi ịmhan 5,000 watts. Loor ịduon phọ, ẹḍogh a redio phọ iigholhaan ghan agey. Ghạlhamo r’awe dị orugh otuman ẹpe ạbazi Atlantic rạ Pacific, Cuba, ḅịlhe r’ẹpe ẹsiinyom mọ Alaska bịn ụnhaghan ghan ni dom mọ. Ịphen phọ iḍighi ni ịdi ịbadi dị kọ̋nhaghan ghan dom ạ Bạịbul phọ oru ọmhoogh ḍịḅeraan.”

Mem mọ ạmuphe phọ kẹn, Ạnmuny Askul Ạ Bạịbul phọ ụlhogh ni ikuph ọmhiin mọ ọkaaph ni iiḅi ịinhaghan phọ dị eego esi a redio ẹpe Canada. Esi ịduon phọ, lhạ phọ 1924, Ạbugbaanhaan dị odi ẹpe phọ ụlhogh ni otu a redio dị oghol mọ CHUC ẹpe Saskatoon, Saskatchewan. Ọpo kụ aḍighi ọḅel otu a redio dị ọtuan oḍighi Ẹnhaan kụ omiteom ẹpe Canada. Esi ịduon phọ, lhạ phọ 1925, imhoghi ni mọ onme esi phọ ọbam otu a redio phọ ọphon phọ ạrol ghan bọ. Loor ịduon phọ, bịdi ụḅogh otu a redio phọ ọngo Watch Tower Society, kụ bịdi ọsighe ọghimom ogbaany otu areephegh dị bịdi ogho kụ oselhemhi dị oghol mọ Regent Building, ẹpe Saskatoon, loor ẹmhu ịphen phọ.

Otu a redio phọ ọphon phọ ạkar kụ aḍighi oḍighi agey, loor esi dị ịbadi awe dị ọrol ịbam ạramha ẹpe Saskatchewan bịn ụnhaghan ni dom iiḅi ịinhaghan phọ ịdipho ẹḅel amem. Esi ọmaam, oniin ạnhir dị oghol mọ Mrs. Graham dị ạrol ẹmha dị ẹkelhan ni otu a redio phọ ạnhaghan ni dom iiḅi ịinhaghan phọ. Ạnhir phọ ọphon phọ ạge ni ḍịnya ạghiom bụphe roḍighi bọ oḍighi sịphe otu a redio phọ mọ bịdi ọsighe rịnya dị ẹgba Bạịbul phọ ọghiomaan nyọdi. Umor phọ George Naish ạḅem mọ: “Emoghi phọ ọdi amhoghi bọ ạlhom mọ ‘Ịtughemhi aani iyoor!’ ịghi ni ạnyu ẹḅilhe eegholhaan dị tụtu yoor ọsighe oomo ạḍinya phọ oghol bọ mọ Studies in the Scriptures” ọghiomaan nyọdi. Tụtu yoor olegheri ạnhir phọ ọphon phọ mamhiigh rạkaaph iiḅi ịinhaghan phọ ghalhamọ r’arikpisi dị ẹkel li.

ỊTUGHEMHI DỊ OOGHOLHOMHI

Ạ Watch Tower a March 1, 1925, ạpham ni ẹmhuoghaaph dị ẹmhan mạar. Ẹmhuoghaaph phọ ịḅem mọ “Birth of the Nation.” Uḍighi ika kụ ẹmhuoghaaph phọ ẹphen phọ ẹmhan bọ mạar? Mem dị eten, Ạnmuny Askul Ạ Bạịbul phọ umheeraam ghan mọ ạ Setạn ạmoogh ni ookpomhoghan ọlo ọdi dị yira ụ́miin ẹpe k’ạke, dị rạaḅaki ịkaraph aruwaloor phọ, rụuku ịiḅereghi ọkpe, igbogh asiḍighi aḅirinhi phọ, ḅịlhe r’ạbuo imirighan ịtooghi sịen ade phọ. Tọrobo ịpe ẹrol bọ, “ẹbenhe phọ ạkpe bọ oḍuom olhoghi ạḅilhe ạsu olhoghi” ạsighe ni ẹmhuoghaaph phọ ẹphen phọ ạlhoghonhaan ḍịghaagh bumor r’abumaranhi phọ ọnhaghanhan mọ a Jehova ạmoogh ni ookpomhoghan ọlo ọdi, ḅịlhe mọ ookpomhoghan phọ ọdi ạgbatanhaan ni kụ rabianhan ni ookpomhoghan phọ a Setạn. (Mạt. 24:45) Ọḅaram ịsiphe, sịphe ẹmhuoghaaph phọ ẹpe phọ “ẹbenhe phọ ạkpe bọ oḍuom olhoghi ạḅilhe ạsu olhoghi” ạḅem kẹn mọ, mophighi Ọmhar phọ kạ Ẹnhaan lhạ phọ 1914, kụ mọ loor ‘ẹgham mọ oruphe bọ ẹpe k’ạke’ lhạ phọ ạḍiphe phọ mophorogh Setạn r’ịkaraph aruwaloor phọ otoph sịen ade phọ. Bịdi ụ́moogh mụn eepoogh ọḅilhe oḅula k’ạke.—Ogan. 12:7-9.

Ịkparanhaan ni ịbadi omheeraam imhoom ịtughemhi phọ ịphen phọ. Loor ephigh phọ ẹphen phọ, ẹmhuoghaaph phọ ịḅaram kẹn mọ: “Tọrobo oye dị rạbal aani ghan Watch Tower phọ, dị úmeeraam ịphen ọge bọ sịen phọ, pọ rọḅenhi ni nyọdi mọ ọdi ạphoomhi loor ạḅilhe amhiigha loor akori Uwo Ẹmhoogh phọ kụ ạghiom ghisigh ạmhoogh ekpom dị ẹserere.”

Ọnyo umor ọlo a Britain dị oghol mọ Tom Eyre, dị aḍighi colporteur (nyịidipho rokol ghan mọ ọkoy eten), ạghaaph ni ịdi ogbogh opol Ạnmuny Askul Ạ Bạịbul phọ olhoghoma ịlo ẹmhuoghaaph phọ ẹphen phọ. Ọdi ạḅem mọ: “Ilhoghi abumor phọ ịḅaal agey esi eten phọ ọgba bọ oogholhomhi Ogananami 12. Yoor oru bọ olhegheri mọ mophighi ịtooghi phọ ẹpe k’ạke olhoghi ayoor ạḅaal li ọghaaph iiḅi ịinhaghan phọ ọḅenhi ạbunhon r’oophugh. Ịkar kụ ịisa iyoor ọbughe arukumuan phọ ayoor. Ịlhoghonhaan iyoor kẹn ḍịghaagh ọmhiin mọ a Jehova kaḍighi ni rạraar dị ẹbugh epu sịen ghisigh.”

ỌNGO ỌGBAANHAAN ỊLO A JEHOVA

Rodon, Ạbugbaanhaan A Jehova olegheri ni ikpo ọnhu phọ edi bọ Isaiah 43:10, ẹḅem bọ mọ: “A Jehova ạḅem mọ ‘nyinha ạbugbaanhaan ạmhi, Ii, ạrebenhe phọ ạmhi mị mạsaḅar bọ.’” Kụ egbi bọ ọteeny ạlha phọ 1925, ạrinya phọ ayira ị́kaaph ghan iboom ịlo esi ạ Bạịbul phọ ẹphen phọ. Tọrobo ịpe ẹrol bọ, ịpe phọ inmia ni. Loor esi dị 11 ạsi Watch Tower dị omiteom lhạ phọ 1925 kụ ịghaaph ịlo Isaiah 43:10 rạ 12!

Eekunha ụnwanyu August 1925, Ạnmuny Askul Ạ Bạịbul phọ ụpham ni ookpomhoghan eephugh pạ Indianapolis, ẹpe Indiana. Umor phọ Joseph F. Rutherford ạge ni dom ọḅem mọ nyinha mesi sịphe ạḍinya ẹdeom ookpomhoghan eephugh phọ omiteom bọ, kụ ịḅem mọ: “Yira uru sịen ookpomoghan eephugh phọ ọphon phọ ọsighe . . . ịnyaam ḍịghaagh Uwo Ẹmhoogh phọ, pịdi yira okeelhom r’imhoom ịnyaam ẹpe arokool phọ ayira oḍighi ạbugbaanhaan a Jehova.” Sịphe oomo ọphaanya aḍughul otu phọ ọpham bọ ookpomhoghan eephugh phọ, ụghaaph ni ọkparamhi oomo awe phọ oru bọ mọ bịdi ọsighe ghan ni tọrobo eepoogh dị bịdi ọmhoogh ọghaaphom ghan ịlo a Jehova.

Ḍio a Saturday, August 29, Umor phọ Rutherford ạngo ni ọghaaph dị ạḅem mọ “A Call to Action.” Sịphe ọghaaph phọ ọdi, ọdi ạghaaph ni ạkparamhi ịdi oḍighi iphelhegbeel phọ ạmhan mạar, ọdi ạḅem mọ: “A Jehova ạḅenhi we phọ ọdi . . . : ‘Nyinha ạbugbaanhaan ạmhi . . . mị kụ Ẹnhaan.’ Loor ephigh phọ ẹphen phọ, ọdi ạngo ni bịdi ịto phọ ịphen eegholhaan bọ mọ: ‘Ịkpo ạlagba oḍeenaan ọbo areelhe olegheriom.’ Ogina awe dị odi sịen ade phọ dị kotue ọngo ọgbaanhaan ịlo a Jehova pọ awe phọ ạbuphe ọdi rạloghonhaan ghan bọ ḍịghaagh dị eego esi uwaloor iigbia phọ ọdi, loor esi dị bịdi oḍighi bụgbaanhaan ọdi.”—Isa. 43:12; 62:10.

Umor phọ Rutherford r’ọngo ọghaaph phọ ọmhan, ọdi ạal li ḍịnya dị oghol mọ “Message of Hope.” Awe phọ umheeraam ni dom ạḍinya phọ, kụ ịḅem mọ ogina Ọmhar phọ Ẹnhaan “kụ katue ạngo we ẹepho, edughom, omhoon aloor, ghuḍum, ẹereegh, ḅilhẹ r’ọḅaal olhoghi dị kạtol k’agee-pọ.” Ụgba ni otenheghi ḍịnya phọ ạḍiphe phọ ịbadi ạrunhu kụ omiteom ịdipho ạḍibam ạḍinya. Kụ odiighi ịdi rẹman ni 40 erubal.

Ạnmuny Askul Ạ Bạịbul phọ úmiigh omheera aḍien phọ Ạbugbaanhaan A Jehova esi ịbadi ạsia. Ghạlhamo r’ịduon phọ ni, bịdi umhiigh ni ọnhaghanhan oḍighi phọ odi bọ ọmheera enye a Jehova.

ỌḄILHE OḄULA OPHOGH GHAN AWE DỊ ỌMHOOGH ḌỊḄERAAN

Uroma ni Nmụny Askul Ạ Bạịbul phọ mọ bịdi ọḅilhe ghan oḅula ophogh bụphe oḍeenhaan bo ḍịḅeraan loor ịduon awe phọ odiighi bọ rịnya phọ ọngo rọbugh bọ. Ạrunwanyu odiighi ạḍibam ạḍinya phọ oghol bọ mọ the Message of Hope reten, ạḍinya pho Bulletina ịḅem mọ: “Iikolhobian ghan ni ọḅilhe oḅulha ophogh aruutu awe phọ ạbuphe phọ osereghi bọ ḍịḅam ạḍinya phọ Message of Hope.”

A Bulletin a January 1925 ịpham ni ịinhaghan dị oniin ọnyo Askul Ạ Bạịbul ẹpe Plano, Texas ạngo, kụ ịḅem mọ: “Rịḅeraan ghan ni iyoor ọmhiin mọ awe romegheron ghan agey ekool dị mọḅilhe ni oḅulha ịbadi amem kopu emhoom ekool. Esi ọmaam, eniin ẹḅam ẹmha ẹpe ekool ayoor dị yoor moḅula ni oogh amem esi aḍioph ạsia. . . . Dị kébia, umaranhi phọ Hendrix r’onhiin ạmhi ụḅilhe ni oḅula kụ ọngo rịnya dị epu ịdi mọngo ghan ekool phọ ẹpe phọ.”

Ẹpe Panama, oniin ọnyo umor dị ạdighi colporteur ạge mọ: “Ịbadi awe dị uphorogh ghan iyoor ẹḅel amem dị mị akar eghuugh ạbidi unmia ni mem mọ yoor ọḅilhe bọ oḅula ịyal ọbobo ịraar amem. Lhạ phọ ạḍiphe eten bọ, mị ụḅilhe ghan ni ạghi rokool dị mị mạghaaph ghan iiḅi ịinhaghan phọ kụ ịbadi ụkar kụ olher rụru ụngo ịmhi.”

OPHOGH ỌGHIMOM AGHISIGH

Eekunha ạlha 1925, umor phọ Rutherford ạge ni ḍịnya ạghiom oomo ạbukoy eten kụ ạghaaph ịdi bịdi oḍighi lhạ phọ ạḍiphe phọ r’ịlo bịdi koḍighi lhạ phọ etum bọ sịphe. Ọdi ạḅem mọ: “Lhạ phọ ạḍiphe eten bọ, nyinha ịmoogh ni eepoogh ọodereghi awe dị olhoghi ụ́ḅaal. Kụ oḍighi phọ ọphon phọ mịngo inyinha ibo . . . Lhạ phọ ạḍien retu bọ, nyinha kẹmoogh kẹn eepoogh ọghaaph ịlo a Jehova r’Ọmhar phọ ọdi, roḍeenhaan awe ọkar awe phọ rọoḅereghi bọ Ẹnhaan. . . . Esi ịduon phọ, oomo phọ ayira ọghiom ghisigh ọsighe rọḍogh phọ ayira ọmhoor ooseeny Ẹnhaan r’Uwo ẹmha phọ ayira.”

Ịdipho ạlha phọ 1925 resi bọ eekunha, abumor phọ umiteom ni iikolhobian ọbughe ạ Bẹtẹl a Brooklyn. Ạlha phọ 1926 kụ ịdi ookpomhoghan phọ omhiigh oboom oḍighi odoghoḍi aruutu dị bịdi kőḍighi ghan.