Jennésis

11 Mwen ka pwédyé, sové mwen, anba lanmen fwè mwen Isò. Paski mwen pè i pé vini ataké mwen, ich mwen èk manman yo osi. 13 Jakòb pasé nwit-la la. Apwé sa, i pwan adan zannimo’y kon an kado pou fwè’y Isò. 14 Dé san «200» fimèl kabwit, ven «20» bouk kabwit, dé san «200» fimèl mouton, ven «20» bélyé mouton, 15 Twant «30» fimèl kanmèl épi piti yo, kawant «40» bèf, dis «10» towo bèf, ven «20» fimèl bouwik èk dis «10» mal bouwik. 16 Apwé sa i bay sé sèvant li-a sé zannimo-a, yon twipo apwé lòt, èk i di yo: “Pwan douvan, janbé lawivyè-a èk kité an bon distans apwé chak twipo.” 17 Apwé sa i bay pwèmyé sèvant-lan konmand sala: “Si antouka Isò fwè mwen jwenn épi zòt èk i mandé zòt: ‘Ki moun ki mèt zòt, ki koté zòt ka alé, èk sé zannimo-a ki douvan zòt-la, ki moun ki mèt yo?’ 18 Mi sé sa ou ni pou di’y: ‘Yo sé sa Jakòb sèvant ou-a. Sa sé an kado i voyé ba ou senyè mwen Isò, èk Jakòb dèyè nou ka vini!’” 19 Apwé, i bay dézyenm-lan, twazyenm-lan, èk tout lòt moun ki té ka maché dèyè sé twipo-a konmand sala: “Sé sa zòt ni pou di Isò lè zòt jwenn épi’y. 20 Èk di’y osi: ‘Mi sèvant ou Jakòb ka vini dèyè nou.’” Paski Jakòb di an lidé’y: ‘Si mwen voyé an kado bay Isò pou dousi’y, lè’y jwenn épi mwen pitèt i kay byen wisivwè mwen.’