Jennésis

33 Bon, lè Jakòb lévé zyé’y, èk i wè Isò ka vini épi kat san «400» nonm, i sépawé sé manmay-la anpami Liya, Rétjèl, èk sé dé «2» sèvant yo-a. 2 I mété sé dé «2» sèvant-lan épi sé ich yo-a douvan. I mété Liya èk sé ich li-a apwé, èk i mété Rétjèl èk Jozèf dèyè yo. 3 Apwé sa, Jakòb alé douvan yo. Èk kon i té ka apwoché fwè’y, i bésé tèt li byen ba sèt «7» fwa. 4 Mé Isò pwan kouwi vin jwenn Jakòb, i anbwasé’y èk i bo’y, èk yo pwan hélé. 5 Lè Isò lévé zyé’y, èk i wè sé madanm-lan èk sé manmay-la, i mandé: “Ki moun ki sé moun sala ki épi’w-la?” Èk Jakòb wéponn li: “Yo sé sé manmay-la Bondyé bay sèvant ou-a.” 6 Lè sala, sé sèvant-lan èk sé ich yo-a pwézanté kò yo, èk yo bésé tèt yo byen ba douvan’y. 7 Liya èk sé ich li-a osi pwézanté kò yo, èk yo bésé tèt yo byen ba douvan’y. Apwé sa, Jozèf épi Rétjèl pwézanté kò yo, èk yo bésé tèt yo byen ba douvan’y. 8 Kon sa Isò mandé: “Pouki ou voyé tout sé moun sala èk sé zannimo sala?” Jakòb wéponn li: “Pou mwen sa jwenn favè an zyé’w, senyè mwen.” 9 Épi Isò di: “Mwen ni an chay byen, fwè mwen. Ou sa tjenn sa’w.” 10 Kanmenm, Jakòb di’y: “Non, souplé. Si mwen ni favè an zyé’w, ou ni pou pwan kado sala mwen pòté ba’w, pas mwen pòté’y pou mwen sa wè fidjay ou. Èk kon mwen wè’w-la, sé konmsi mwen wè fidjay Bondyé, paski ou wisivwè mwen épi bwa’w gwan ouvè. 11 Tanpwi souplé, pwan kado sala kon an bennédiksyon mwen pòté ba’w, paski Bondyé ja benni mwen èk mwen ni tout sa mwen bizwen.” Èk Jakòb kontiné plédé épi’y, jis tan i aksèpté sé kado-a. 20 Apwé sa Jakòb fè an lotèl èk kwiyé’y Bondyé, Bondyé Izwayèl-la.