Jennésis

39 Désandan Ichmayèl mennen Jozèf Éjip. Épi Pòtifa, yon Éjipsyen ki té on ofisyé an kay Féro, èk ki té chèf sé gad-la, ganyen Jozèf an lanmen yo. 2 Mé Jéhova té épi Jozèf. A kòz di sa, tout bagay té ka maché byen ba’y. Èvèk Pòtifa, mèt li, fè’y wèskonsab tout kay li. 3 Pòtifa, wè Jéhova té épi Jozèf èk Jéhova té ka benni tout sa Jozèf té ka fè. 4 Pòtifa té vwéman enmen Jozèf, èk i té fè’y vini sèvant pèsonnèl li. Konsa, i fè Jozèf wèskonsab kay li èk tout bagay i té ni. 5 Dépi Pòtifa mété Jozèf wèskonsab kay li èk tout bagay i té ni, Jéhova kontiné benni kay Pòtifa a kòz di Jozèf. Èvèk Jéhova benni tout sa Pòtifa té ni an kay li èk an jaden’y. 6 Alafen Pòtifa kité tout sa’y té ni an lanmen Jozèf, èvèk sèl bagay-la i té konsèné épi sété manjé-a i té ka manjé. An plis di sa, Jozèf té vini on bèl jenn nonm ki té ni on bèl kò. 7 Apwé sé bagay sala, madanm Pòtifa, koumansé ni zyé’y asou Jozèf èk i di Jozèf: “Kouché épi mwen.” 8 Mé Jozèf wifizé, épi i di madanm mèt li: “Mèt mwen pa ka twakasé tèt li épi anyen ki an kay li, paski i mété mwen wèskonsab tout sa’y ni. 9 La pa ni pyèsonn an kay sala ki ni pli lotowité pasé mwen. Mèt mwen ban mwen lotowité asou tout bagay èk asou tout moun an kay li apa di ou, paski ou sé madanm li. Ki mannyè mwen sa fè gwo movèzté sala èk péché kont Bondyé?” 10 Alò, jou apwé jou madanm-lan té ka palé épi Jozèf, mé Jozèf pa janmen dakò pou kouché épi’y, ében pasé tan épi’y. 11 Mé yon jou, lè Jozèf alé an kay-la pou fè twavay li, la pa té ni pyès sèvant an kay-la. 12 Konsa, madanm Pòtifa hédi had Jozèf èk i di’y: “Kouché épi mwen!” Mé Jozèf kité had li an lanmen’y èk i pwan kouwi déwò. 13 Lè’y wè Jozèf kité had-la an lanmen’y èk kouwi déwò, 14 i koumansé kwiyé sé nonm-lan ki té ka twavay lakay li byen fò èk i di yo: “Gadé sa! Mawi mwen mennen nonm Hibrou sala isi-a pou pwan nou sèvi wizib! I vini pou kouché épi mwen mé mwen koumansé hélé fò. 15 Èvèk lè’y tann mwen ka hélé byen fò, i kité had li bò mwen èk i kouwi dèwò.” 16 Apwé sa, madanm-lan mété had Jozèf bò’y jistan mèt Jozèf viwé lakay li. 17 Épi madanm-lan di mawi’y menm bagay-la. I di’y: “Sèvant Hibrou-a ou mennen ban nou-an vini pou pwan mwen sèvi wizib. 18 Mé lè mwen koumansé hélé byen fò i kité had li bò mwen èk i kouwi dèwò.” 19 Kon mèt Jozèf tann madanm li di: “Mi sé sa sèvant ou-a fè mwen,” i lévé faché. 20 Konsa mèt Jozèf pwan Jozèf èk i mété’y an pwizon-an koté yo té ka mété pwizonnyé wa-a, èk Jozèf wété an pwizon-an. 21 Mé Jéhova té toujou épi Jozèf, i té ka kontiné moutwé’y lanmityé fidèl, èk i té fè Jozèf ni favè an zyé chèf pwizon-an. 22 Konsa chèf pwizon-an mété Jozèf wèskonsab tout sé pwizonnyé-a. Èk Jozèf té wèskonsab tout twavay ki té ka fèt an pwizon-an. 23 Chèf pwizon-an pa té ka gadé anyen Jozèf té wèskonsab pou, paski Jéhova té épi Jozèf èk Jéhova té ka benni tout sa Jozèf té ka fè.