Dènyé Diskasyon Épi Moun Ki Vlé Batizé

Souvan batenm ka pwan plas adan asanblé èben konvansyon Témwen Jéhova. An finisman diskou batenm-lan, fwè-a kay mandé moun ki kay batizé pou doubout èk wéponn dé kwèsyon sala adan an vwa ki fò:

1. Ès ou ja wépanti hòd péché’w, dèdiké lavi’w pou Jéhova èk aksèpté Jézi kon moun-lan Jéhova ka sèvi pou ban nou salvasyon?

2. Ès ou konpwann ki, batenm ou kay idantifyé’w kon an Témwen Jéhova èk ou sé an manm adan ògannizasyon Jéhova?

Lè sé moun-lan ki ka batizé wéponn “Wi” pou sé kwèsyon sala, yo ka ‘tèstifyé épi bouch [yo]’ ki, yo ja mété lafwa an wanson-an èk yo ja dèdiké lavi yo bay Jéhova. (Ronm 10:9, 10) Sé moun-lan ki kay batizé sipozé pwédyé èk mèdité asou sé kwèsyon sala andavans, pou yo sa wéponn sé kwèsyon-an épi tout tjè yo.

Ès ou ja pwédyé èk di Jéhova ou dèdiké lavi’w pou li, èk ou pwonmèt ou kay adowé’y sèlman, èk ou kay fè divwa’y pli enpòtan bagay-la an lavi’w?

Ès ou vwéman kwè ou sipozé batizé asou pwèmyé òpòtyounité-a?

An ki mannyè moun ki ka batizé sipozé abiyé lè yo ka batizé? (1 Tim. 2:9, 10; Jan 15:19; Filip. 1:10)

Nou sipozé abiyé épi “had ki pwòp épi wèspèktab.” Alò, nou ka moutwé nou ja ‘fè lidé nou pou swiv Bondyé.’ Anfen, moun ki ka batizé pa sipozé mété had ki pa wèspèktab èben mété had ki ni ékwiti asou’y èben had ki ni pòtwé. Yo sipozé abiyé kò yo épi had ki pwòp, ki nèt, ki an bon gou èk ki apwopwiyab pou lokazyon-an.

Ki mannyè an moun ki ka batizé sipozé konpòté kò’y? (Louk 3:21, 22)

Batenm Jézi sé ègzanp-lan pou batenm Kwityen jòdi. Jézi té konpwann ki, batenm sé an bagay sèwyé èk I té moutwé sa an atitid li èk aksyon’y. Alò, plas batenm-lan sé pa an plas pou fè blag ki pa apwopwiyab, pou jwé, pou najé, èben pou fè népòt lòt bagay ki pa kay moutwé wèspé pou lokazyon-an. Osi, apwé an kwityen fini batizé I pa nésésè pou’y fè konmsi I ganyen an gwo viktwa. Jou batenm sé an lokazyon pou lajwa, mé nou sipozé moutwé lajwa sala adan an mannyè ki wèspèktab.

Lè ou atandé mitin wèglé èk ou ka asosiyé épi kongwigasyon-an, ki mannyè sa kay édé’w tjenn dèdikasyon’w pou Jéhova?

Apwé ou batizé pouki I enpòtan pou ou kontiné fè létid pèsonnèl ou èk pou ou pwéché wèglé?

DIWÈKSYON POU SÉ ANSYEN-AN AN KONGWIGASYON-AN

Lè an pwoklanmatè ki p’òkò batizé di I vlé batizé, sé ansyen-an sipozé ankouwajé’y pou wivizé “Kwèsyon Pou Moun Ki Vlé Batizé,” ki asou paj 12-49 an ti liv sala. Osi, I ni pou li sèksyon-an “Yon Konmisyon Pou An Pwoklanmatè Ki P’òkò Batizé,” ki ka koumansé asou paj 7. Sèksyon sala ka èspliké mannyè-a I sa pwépawé pou sé diskasyon-an épi sé ansyen-an. Pwoklanmatè-a ki p’òkò batizé sa sèvi bagay I menm matjé pou fè’y chonjé èk I sa tjenn piblikasyon sala ouvè diwan sé diskasyon-an. Kanmenm, I pa nésésè pou yon moun wivizé sé kwèsyon-an épi pwoklanmatè-a avan sé diskasyon-an épi sé ansyen-an.

Népòt moun ki vlé batizé sipozé enfòmé koòdinatè sé ansyen-an. Apwé moun-lan ki vlé batizé ja li “Kwèsyon Pou Moun Ki Vlé Batizé,” koòdinatè sé ansyen-an ni pou mandé moun-lan si I ja fè an dèdikasyon pèsonnèl an lapwiyè pou Jéhova pou fè divwa’y. Si moun-lan di I ja fè an dèdikasyon, koòdinatè sé ansyen-an kay fè awanjman pou dé ansyen diskité épi moun sala sèksyon-an “Kwèsyon Pou Moun Ki Vlé Batizé.” An diféwan ansyen ni pou fè chak pa. I pa nésésè pou sé ansyen-an èspéwé jis lè yo anonsé an asanblé èben an konvansyon avan yo ni sé diskasyon sala.

Sé dé pa-a sa fèt an dé sèsyon. Chak sèsyon sa diwé pou yon nèditan, mé sé ansyen-an sa pwan pli tan si sa nésésè. Chak sèsyon sipozé ouvè èk fèmé épi lapwiyè. Lè yo ka diskité sé kwèsyon-an, ni pwoklanmatè-a ni sé ansyen-an pa sipozé fè’y adan an mannyè ki pwésé. Sé ansyen-an ki ni pou fè sé diskasyon sala, ni pou gadé’y kon yonn an sé bagay-la ki pli enpòtan an sa yo ni pou fè.

I pli mèyè pou wivizé sé kwèsyon-an épi chak pwoklanmatè pa kò yo, pito épi an gwoup. Lè sé ansyen-an mandé pwoklanmatè-a pou wéponn chak kwèsyon, sa kay édé yo wè si moun-lan konpwann lavéwité-a byen asé, èk yo kay konnèt si I pawé pou batenm. Osi, si pwoklanmatè-a pa adan an gwoup, sa kay fè’y pli ézé pou I èspwèsé kò’y. Sé ansyen-an pé diskité sé kwèsyon-an épi an mawi èk madanm ansanm.

Lè an pwoklanmatè ki vlé batizé sé an sésé, ansyen-an sipozé tjenn diskasyon sala adan an mannyè pou moun sa wè yo, mé pa pou moun tann yo. Si I nésésè pou ansyen-an pwan an lòt moun épi’y, I sipozé pwan an ansyen èben an sèvant ministiriyal. Lòt paragraf-la kay moutwé sa kay dépan asou sèksyon-an yo kay wivizé épi sésé-a.

An kongwigasyon ki pa ni djè ansyen, sa sèvi sèvant ministiriyal ki kwalifyé pou wivizé sèksyon-an “Pwèmyé Pa​—Sa Kwityen Ka Kwè Adan,” épi pwoklanmatè-a. Sé sèlman sé ansyen-an ki sipozé konsidiwé “Dézyenm Pa​—Lavi On Kwityen.” Si kongwigasyon-an pa ni asé fwè ki kwalifyé, yo sa fè kontak épi ansyen-an pou sékyout-la pou I sa wè si lòt kongwigasyon sa bay asistans.

Lè moun-lan ki vlé batizé-a anba laj, pawan’y sipozé la pou sé sèsyon-an si yo sé Témwen Jéhova. Mé si pawan’y pa sa atandé, dé ansyen (èben yon ansyen èk yon sèvant ministiriyal, silon sèksyon-an) sipozé fè chak sé sèsyon-an épi’y.

Sé fwè-a kay fè asiwé moun-lan ki vlé batizé konnèt lavéwité-a ki an Bib-la asé byen. Osi, yo kay vlé fè asiwé moun-lan enmen lavéwité-a èk I ni wèspé pou ògannizasyon Jéhova. Si moun-lan pa konpwann lavéwité-a asé byen, sé ansyen-an kay fè awanjman pou I wisivwè èd pou I sa kwalifyé pou batenm pli ta. Adan pwoklanmatè pé bizwen tan pou dévlopé pli apwésiyasyon pou minis-la, èben yo pé bizwen tan pou sipòté èk moutwé wèspé pou awanjman ògannizasyon-an. Sé ansyen-an kay désidé ki kantité tan yo kay sèvi asou chak sèsyon pou konnèt si moun-lan pawé pou batenm. Magwé yo kay sèvi pli tan asou sèten kwèsyon, yo sipozé mandé moun-lan tout sé kwèsyon-an.

Apwé sé ansyen-an fini wivizé toulédé sèksyon-an, yo kay jwenn pou désidé si moun-lan pawé pou batenm. Pou chak moun, sé ansyen-an kay konsidiwé abilité yo, sitiwasyon yo, èk bagay yo ja èspéyansé an lavi yo. Sa sé ansyen-an vlé konnèt sé, si moun-lan ja dévlopé an bon wilasyon épi Jéhova èk si I konnèt lavéwité-a asé byen. Épi lanmityé’w èk èd ou, sé moun-lan ki kay batizé kay byen pwépawé pou akonpli asaynman enpòtan yo pou pwéché bon nouvèl-la.

Apwé sa, yonn èben toulédé sé ansyen-an kay jwenn épi moun-lan pou di’y si I kwalifyé pou batenm. Si moun-lan kwalifyé, sé ansyen-an kay wivizé épi’y sèksyon-an “Dènyé Diskasyon Épi Moun Ki Vlé Batizé.” Sèksyon sala asou paj 51-53. Si pwoklanmatè-a p’òkò fini létid li an sé liv-la ​​Apwann–Sé Wézimé-a èk Remain in God’s Love, sé ansyen-an kay ankouwajé’y pou kontiné létid li apwé I batizé. Di pwoklanmatè-a zòt kay ékwi dat batenm li èk non’y asou Rèkòd Kongwigasyon-an Pou Pwoklanmatè. Osi, di pwoklanmatè-a wézon-an zòt ka pwan enfòmasyon pèsonnèl sala, sé pou édé ògannizasyon-an kontiné gadé apwé aktivité Témwen Jéhova oliwon latè-a. Kon sa, sa kay édé’y patisipé an aktivité kongwigasyon-an awanjé, èk pou’y wisivwè ankouwajman èk diwèksyon hòd sé ansyen-an. Osi, sé ansyen-an sa di sé pwoklanmatè nèf-la ki, népòt enfòmasyon pèsonnèl yo anmasé, Global Data Protection Policy of Jehovah’s Witnesses kay pwotéjé’y. Ou sa twapé policy sala asou jw.org. Diskasyon sala sa pwan dis minit èben mwens.

Yon lanné apwé pwoklanmatè-a batizé dé ansyen sipozé jwenn épi’y pou bay ankouwajman èk sijèsyon ki sa édé’y. Yonn adan sé ansyen-an sipozé ansyen-an pou gwoup li. Lè pwoklanmatè-a anba laj, pawan’y sipozé la si yo sé Témwen Jéhova. Mitin sala sipozé ni an pil lanmityé èk ankouwajman. Sé ansyen-an kay diskité épi’y mannyè I ja fè pwogwé spiwitwèl. Yo kay osi bay sijèsyon asou diféwan mannyè I sa tjenn an bon lakoutim lè’y vini pou: (1) létid pèsonnèl li (2) pou li Bib-la touléjou (3) pou létid fanmi’y (4) pou mannyè I sa atandé èk patisipé an mitin-lan wèglé èk (5) mannyè I sa patisipé an minis-la toulé simenn. (Èfés. 5:15, 16) Si pwoklanmatè-a p’òkò fini létid li an sé liv-la ​​Apwann–Sé Wézimé-a èk Remain in God’s Love, sé ansyen-an kay fè awanjman pou an lòt pwoklanmatè édé’y fè sa. Sé ansyen-an sipozé konplimanté pwoklanmatè-a épi lanmityé. Konsèy èk sijèsyon asou yonn dé bagay bon asé.