Gidiyonn Bat Sé Midiyonnayt-la

Apwé on tan, jan Izwayèl tounen do yo asou Jéhova ankò, èk yo koumansé adowé fo dyé. Konsa, Jéhova ladjé yo an lanmen jan Midiyann. Èk, pou sèt «7» lanné, jan Izwayèl té minab anba jan Midiyann. Jan Midiyann té ka vòlè zannimo jan Izwayèl, èk yo té ka détwi tout bagay jan Izwayèl té ka planté an jaden yo. Anfen, bagay té tèlman mové jan Izwayèl té ni pou séwé an kav, èk an sé montany-lan. Konsa, yo sipliyé Jéhova pou èd, èk Jéhova wéponn yo. I voyé on nanj pou palé épi on jenn nonm yo té ka kwiyé Gidiyonn. Nanj-lan di Gidiyonn: ‘Jéhova chwazi’w pou’w vini on majò sòlda.’ Mé Gidiyonn di nanj-lan: ‘Mwen pa anyen. Ki mannyè mwen kay sa sové pèp Izwayèl?’

Kanmenm, Gidiyonn té vlé sav si Jéhova té vwéman chwazi’y, pou sové pèp Izwayèl. Konsa, mi sé sa i fè. I mété mòso lenn atè-a, èk i di Jéhova: ‘Denmen bonmaten, si séwen-an mouyé lenn-lan, èk tè-a wèsté sèk, mwen kay sav ou vlé mwen sové pèp Izwayèl.’ Lè Gidiyonn lévé byen bonnè li denmen, i alé gadé. Èk i wè, tè-a té sèk kon tan kawenm, mé mòso lenn-lan té mouyé an twanp! Anfen, lè Gidiyonn tòd mòso lenn-lan, glo-a ki sòti adan’y té asé pou plen on gwo bonm. Mé Gidiyonn di Jéhova: ‘Tanpwi souplé, kité mwen fè on lòt tès. Kou sala, kité lenn-lan wèsté sèk, èk fè séwen-an mouyé tè-a.’ Ében, Jéhova fè ègzaktiman sa Gidiyonn té mandé’y pou fè-a. Lè Gidiyonn wè sa, finalman i té asiwé Jéhova té chwazi’y pou délivwé pèp li. Konsa, i sanblé sòlda’y, èk yo pwépawé pou yo alé goumen épi jan Midiyann.

Jéhova di Gidiyonn: ‘Mwen kay ba’w laviktwa asou Midiyann. Mé kon’w ni tout sé sòlda sala, pitèt zòt kay kwè sé fòs zòt ki fè zòt ganyen batay-la. Konsa, di sé sòlda-a, népòt di yo ki pè, viwé lakay yo.’ Lè Gidiyonn di yo sa, venn dé mil «22,000» sòlda witounen lakay yo. Èk dis mil «10,000» wèsté épi Gidiyonn. Mé Jéhova di Gidiyonn, ‘Dis mil «10,000» sòlda-a twòp toujou. Mennen yo bò lawivyè-a, di yo bwè dlo, èk gadé pou’w wè mannyè yo ka bwè dlo-a. Chwazi tout sé sòlda-a ki ka véyé pou lèlmi-an paditan yo ka bwè dlo, èk kité sé lézòt-la witounen lakay yo.’ Ében, sé sèlman twa san «300» sòlda ki té ka véyé pou lèlmi-a paditan yo té ka bwè dlo-a. Èk lawmé Midiyann té on gwo lawmé. Yo té ni yon san twant senk mil «135,000» sòlda. Mé, Jéhova di Gidiyonn, li épi twa san «300» nonm-lan té kay asé pou bat lawmé Midiyann.

Swè sala, Jéhova di Gidiyonn: ‘I lè pou’w ataké jan Midiyann!’ Konsa, Gidiyonn bay chak sòlda on kòn, èk on gwo jè ki té ni on flanbo andidan’y. Èvèk i di yo: ‘Gadé mwen, èk fè ègzaktiman sa zòt wè mwen fè.’ Lè sala, Gidiyonn kòné kòn-lan i té ni-an, i kwazé jè-a, i lévé flanbo’y an lézè-a, èk i hélé: ‘Sab Jéhova épi sab Gidiyonn!’ Twa san «300» nonm-lan ki té épi’y-la fè menm bagay-la. Lè sé sòlda Midiyann-lan tann son-an, èk yo wè difé sé flanbo-a, yo té tèlman pè yo pa té sav ki wout pou pwan. Konsa, yo koumansé kouwi toupatou kon fonmi fou. Èk kon yo té ka kouwi, sé kon sa yo té ka ataké yonn a lòt. Wi, Jéhova té sové pèp li ankò.