Lison Nou Sa Apwann An Liv Wévélasyon

1-2. Pouki nou sipozé antéwésé an liv Wévélasyon?

IMAJINÉ ou ka gadé yonndé pòtwé. An sé pòtwé sala, la pa ni pyèsonn ou konnèt. Mé, pou yon mouman, ou fiksé asou yonn (1) an sé pòtwé-a. Pouki? Sé paski ou an pòtwé sala. Lè’w ka gadé pòtwé-a, ou ka katjilé ki koté, èk ki lè yo pwan pòtwé sala. Osi, ou ka gadé pou wè si la ni pyès lòt moun ou konnèt an pòtwé-a. Pòtwé sala enpòtan pou ou.

² Ében nou sa di, liv Wévélasyon menm kon pòtwé sala pou dé wézon. Pwèmyéman, liv sala té ékwi pou nou. An Wévélasyon 1:1 i di: “Mi vizyon-an Bondyé bay Jézi Kwi pou’y té moutwé sé sèvant li-a sé bagay-la ki ni pou fèt touswit-la.” Konsa, sa ki ékwi an liv Wévélasyon sé pa pou tout moun an latè-a, mé sé pou nou, paski nou ka sèvi Jéhova. Alò, nou pa sipwi pou konnèt nou ka pwan pa an sé pwofèsi-a an liv Wévélasyon kon yo ka akonpli. Anfen, lè nou li liv Wévélasyon, nou sa di nou ka li konsèné bagay ki kay ni an éfé asou lavi nou.

3-4. Silon Wévélasyon 1:10, ki tan sé pwofèsi-a ki an liv Wévélasyon té kay akonpli? Èk ki éfé sa sipozé ni asou chak di nou?

³ Dézyenm wézon-an nou sipozé antéwésé an liv Wévélasyon, ni pou fè épi lè-a sé pwofèsi-a té kay akonpli. Sé zapòt Jan ki té ékwi liv Wévélasyon èk i di nou ki lè sé pwofèsi-a an liv Wévélasyon té kay akonpli. An Wévélasyon 1:10 i di: “Asou jou Senyè-a, Lèspwi Bondyé vini anlè mwen.” Lè zapòt Jan té ékwi sé pawòl sala owon lanné katwèven sèz (96) an épòk nou, “jou Senyè-a” té lwen. (Maf. 25:14, 19; Louk 19:12) Mé silon pwofèsi Bib, jou Senyè-a koumansé an lanné mil nèf san katòz (1914), lè Jézi vini Wa an syèl. Dépi lanné sala, pwofèsi an liv Wévélasyon, ki ni pou fè épi pèp Jéhova, koumansé akonpli. Wi, nou ka viv an “jou Senyè-a”!

⁴ Paski nou ka viv an tan sala ki byen èksité, nou bizwen bay bon antansyon pou konsèy-la ki ékwi an Wévélasyon 1:3. I di: “Pa dé bon i bon pou moun-an ki li liv sala. Pa dé bon i bon pou tout moun ki kouté sé pawòl sala ki sòti an bouch Bondyé-a, èk pou tout moun ki obéyi tout sa ki ékwi an liv sala! Tan-an ka vini touswit lè sé bagay sala kay fèt.” Konsa, nou ni pou “li, kouté,” èk “obéyi” tout sa ki ékwi an liv Wévélasyon. Apwézan, annou konsidiwé déotwa an sé bagay-la nou ni pou obéyi an liv Wévélasyon.

FÈ ASIWÉ ADOWASYON’W AKSÈPTAB POU JÉHOVA

5. Ki mannyè liv Wévélasyon ka moutwé i enpòtan pou fè asiwé Jéhova ka aksèpté adowasyon nou?

⁵ Dépi an pwèmyé chapit-la an liv Wévélasyon, nou apwann, Jézi byen konnèt tout sa ki ka fèt an sé kongwigasyon-an. (Wév. 1:12-16, 20; 2:1) Sé konmisyon-an Jézi té voyé bay sé sèt kongwigasyon-an an Asia Minor ka konfimé sa. Paski an sé konmisyon sala, Jézi té bay sé Kwityen-an an pwèmyé syèk-la diwèksyon ki té byen klè, pou édé yo fè asiwé Jéhova té kay aksèpté adowasyon yo. Mé, sé konmisyon sala sé pou tout sèvant Jéhova. Kisa ki lison-an pou nou? Lison-an sé sa, Mèt nou, Jézi Kwi, konnèt si nou ni an bon wilasyon épi Jéhova. Nou anba diwèksyon’y. I ka djidé nou, i ka pwotéjé nou, èvèk i ka wè tout bagay. Konsa, i konnèt kisa nou bizwen fè pou kontiné ni an bon wilasyon épi Jéhova. Ki diwèksyon Jézi té bay, nou ni pou obéyi jòdi-jou?

6. (a) Silon sa Jézi di an Wévélasyon 2:3, 4, ki pwòblenm kongwigasyon-an an Èfésòs té ni? (b) Ki lison nou apwann an sa Jézi di kongwigasyon-an an Èfésòs?

⁶ Li Wévélasyon 2:3, 4. Sé pa pou nou kité anyen afébli lanmityé nou pou Jéhova. Jézi té di kongwigasyon -an Èfésòs, yo té ka andiwé èk yo kontiné sèvi Jéhova magwé yo té ni difikilté. Mé osi, i di yo, yo pa té ni lanmityé-a yo té ni avan. Konsa, yo té bizwen fòtifyé lanmityé yo pou Bondyé. Si yo pa té fè sa, Jéhova pa té kay aksèpté adowasyon yo. Menm kon kongwigasyon-an Èfésòs, nou ni pou andiwé, mé nou ni pou fè pli pasé sa. Nou ni pou fè asiwé nou ka andiwé pou bon wézon-an. Paski Dyé nou Jéhova pa sèlman antéwésé an sa nou fè, i osi antéwésé an wézon-an nou ka fè’y. Jéhova vlé nou adowé’y paski nou enmen’y, èk paski nou ka apwésyé’y.—Pwov. 16:2; Mak 12:29, 30.

7. (a) Silon sa Jézi di an Wévélasyon 3:1-3, ki pwòblenm kongwigasyon-an an Sadis té ni? (b) Kisa nou bizwen fé?

⁷ Li Wévélasyon 3:1-3. Nou ni pou kontiné fè tout sa nou pé an sèvis Jéhova. Kongwigasyon-an an Sadis té ni an diféwan pwòblenm. Magwé yo té ka fè tout sa yo té pé an sèvis Jéhova an koumansman-an, apwézan yo pa té mélé épi sa yo té ka fè an sèvis Jéhova. Konsa Jézi di yo, pou “lévé an sonmèy.” Ki lison nou apwann an sa? Ében, nou asiwé Jéhova pa kay janmen obliyé twavay-la nou fè ba li. (Hib. 6:10) Mé sé pa pou nou kwè, paski nou té ka fè tout sa nou té pé an sèvis Jéhova an tan pasé, nou pa bizwen fè tout sa nou pé an sèvis li apwézan. Menm si santé nou, ében sitiwasyon nou apwézan pa ka pèwmité nou pou fè tout sa nou tè ka fè avan, nou ni pou kontiné fè tout sa nou pé an “twavay Senyè-a,” èk nou ni pou kontiné tjenbé fò jis ou bout-la.—1 Kòr. 15:58; Maf. 24:13; Mak 13:33.

8. Kisa nou apwann an sa Jézi té di kongwigasyon-an an Léyodisiya, an Wévélasyon 3:15-17?

⁸ Li Wévélasyon 3:15-17. Nou ni pou zélé an adowasyon nou pou Jéhova, èk nou ni pou adowé Jéhova épi tout tjè nou. Jézi moutwé, la té ni an diféwan pwòblenm an kongwigasyon-an an Léyodisiya. Yo pa té, “ni cho ni fwèt” an adowasyon yo pou Jéhova. Jézi di yo, yo té adan an kondisyon ki té “mizéwab,” paski yo pa té antéwésé an adowasyon ki pi. Yo té bizwen vini zélé pou Jéhova, èvèk zélé pou adowasyon ki pi. (Wév. 3:19) Ki lison nou apwann an sa? Ében, si nou wè nou pa zélé an sèvis Jéhova mannyè nou té yé avan, nou bizwen dévlopé pli apwésiyasyon pou tout sé bon bagay-la Jéhova épi ògannizasyon’y ka ban nou. (Wév. 3:18) Sé pa pou nou janmen kité dézi-a pou ni an lavi ki konfòtab, distwé nou èk anpéché nou tjenn adowasyon Jéhova pwèmyé an lavi nou.

9. Silon sa Jézi té di sé kongwigasyon-an an Pèganmòs épi Tayatayra, kisa nou ni pou évité?

⁹ Nou ni pou widjèkté enstwiksyon apòsta. Jézi kowijé adan sé Kwityen-an an Pèganmòs, paski yo té ka ankouwajé divizyon an kongwigasyon-an. (Wév. 2:14-16) Èk i félisité adan sé Kwityen-an an Tayatayra paski yo pa té ni anyen pou fè épi sé “gwo sigwé Satan-an.” Èvèk i ankouwajé yo pou “kontiné tjenbé” konfyans-lan yo té ni an lavéwité-a. (Wév. 2:24-26) Kwityen an kongwigasyon-an ki té fèb, èk ki té koumansé swiv fò lésisyon, té bizwen wépanti. Alò, kisa nou menm ni pou fè jòdi? Nou ni pou widjèkté tout enstwiksyon ki pa ka dakò épi katjil Jéhova. Sé apòsta-a pé “fè akwèdi yo ka swiv Bondyé” mé aksyon yo ka “moutwé sé pa Bondyé ki ka kondwi lavi yo.” (2 Tim. 3:5) Konsa, si nou étidyé Pawòl Bondyé, i kay pli alèz pou nou idantifyé enstwiksyon ki fò, épi pou widjèkté yo.—2 Tim. 3:14-17; Joud 3, 4.

10. Ki lòt lison nou sa apwann an sa Jézi té di sé kongwigasyon-an an Pèganmòs épi Tayatayra?

¹⁰ Nou ni pou widjèkté tout bagay ki ni pou fè épi imowalité. La té ni on lòt pwòblenm an kongwigasyon Pèganmòs épi an kongwigasyon Tayatayra. Jézi kowijé adan sé Kwityen-an an sé dé kongwigasyon sala, paski yo pa té ka widjèkté imowalité. (Wév. 2:14, 20) Kisa ki lison-an pou nou? Jéhova pa kay aksèpté pou nou fè bagay ki imowal, menm si nou ka sèvi’y pou plizyè lanné, ében nou ni an chay pwivilaj an kongwigasyon-an. (1 Sm 15:22; 1 Pita 2:16) Jéhova vlé nou swiv tout pwensip mowal li an lavi nou, menm si moun an latè-a ka fè sa yo vlé.—Èfés. 6:11-13.

11. Kisa nou apwann an sa nou ja diskité? (Gadé bwèt-la ki ni tit-la “Lison Pou Nou Jòdi.”)

¹¹ Kisa nou apwann an sa nou ja diskité? Mi déotwa bagay nou ja apwann: Nou ni pou fè asiwé Jéhova ka aksèpté adowasyon nou. Èk si la ni an bagay nou ka fè ki pé anpéché Jéhova aksèpté adowasyon nou, nou bizwen fè chanjman la menm, pou nou sa twapé favè Jéhova. (Wév. 2:5, 16; 3:3, 16) Ki lòt lison nou sa apwann an sa Jézi té di sé kongwigasyon-an?

NOU NI POU PWÉPAWÉ POU ANDIWÉ ANBA PÈSIKASYON

12. Kisa nou sa apwann an sa Jézi té di sé kongwigasyon-an an Smèna épi an Filadèlfiya? (Wévélasyon 2:10)

¹² Apwézan, annou konsidiwé sa Jézi té di sé kongwigasyon-an an Smèna épi an Filadèlfiya. I di yo, sé pa pou yo pè pèsikasyon paski Jéhova kay benni yo si yo wèsté fidèl. (Li Wévélasyon 2:10; 3:10) Kisa ki lison-an pou nou? Lison-an sé sa, nou kay èspéyansé pèsikasyon, èk nou sipozé pawé pou andiwé anba’y. (Maf. 24:9, 13; 2 Kòr. 12:10) Pouki i enpòtan pou nou chonjé sa?

13-14. Ki mannyè sa ki fèt an Wévélasyon chapit 12 ka afèkté pèp Jéhova?

¹³ Liv Wévélasyon ka di nou, pèp Bondyé té kay èspéyansé pèsikasyon an “jou Senyè-a.” Wi, nou ka viv an tan sala. Wévélasyon chapit 12 di, la té ni ladjé an syèl touswit apwé Jézi vini Wa an Wéyòm Bondyé. Jézi épi sé nanj li-a goumen kont Satan épi sé zèlèv li-a. (Wév. 12:7, 8) Satan épi sé zèlèv li-a pèd batay-la. Èvèk Jézi jété Satan épi sé zèlèv li-a asou latè-a. Annékòz di sa, latè-a ni an chay pwòblenm èvèk soufwans. (Wév. 12:9, 12) Mé, ki éfé sa ni asou sèvant Jéhova?

¹⁴ Liv Wévélasyon ka di nou sa Satan ka fè apwézan. Kon i pa sa alé an syèl ankò, i ka pasé tout waj li asou lèwèstan sé fwè-a ki annonté-a. Sé yo ki ka wépwézanté Wéyòm Bondyé asou latè-a. Èk silon Wévélasyon 12:17, “sé yo ki té ka obéyi konmandman Bondyé, épi sé yo ki té kwè pawòl Jézi”. (Wév. 12:17; 2 Kòr. 5:20; Èfés. 6:19, 20) Ki mannyè pwofèsi sala ja akonpli?

15. Sé “dé tèmwen-an” an Wévélasyon chapit 11 ka wépwézanté ki moun? Kisa ki wivé sé “dé tèmwen-an”?

¹⁵ Satan pousé lèlmi Bondyé pou ataké sé fwè annonté-a ki té ka pwan douvan an twavay pwèchman-an. Sé “dé tèmwen-an” yo tjwé-a an Wévélasyon chapit 11, ka wépwézanté sé fwè annonté-a ki té ni gwo wèskonsabilité an ògannizasyon-an a lè sala.b (Wév. 11:3, 7-11) An lanné mil nèf san dizwit (1918), yo akizé ywit an sé fwè sala asou plent ki té fò. Yo kondanné yo, èk yo voyé chak di yo an pwizon pou plizyé lanné. Pou lapéti sa, an chay moun té ka kwè twavay sé annonté-a té doubout.

16. Kisa moun pa té ka èspéyé, ki fèt an lanné mil nèf san diznèf (1919), èk kisa Satan ka fè dépi tan sala?

¹⁶ Mé, pwofèsi-a an Wévélasyon chapit 11 té osi di, apwé an ti tan pasé, sé “dé tèmwen-an” té kay viwé vivan. Pwofèsi sala akonpli adan an mannyè moun pa té ka èspéyé, apipwé yon lanné apwé sé fwè-a té alé an pwizon. An mwa Mas lanné mil nèf san diznèf 1919, yo ladjé sé fwè-a sòti an pwizon. Épi pli ta, yo tiwé tout plent ki té fèt kont yo. La menm, sé fwè-a viwé pwan douvan an twavay pwèchman-an. Mé, sa pa fè Satan doubout ataké pèp Bondyé. Dépi tan sala, Satan ja annékòz an chay pèsikasyon kon an “lawivyè gwo” asou pèp Jéhova. (Wév. 12:15) Konsa, nou tout ni pou “doubout fò,” épi kontiné kwè an Senyè-a.—Wév. 13:10.

FÈ TOUT SA OU PÉ AN TWAVAY-LA BONDYÉ BAN NOU POU FÈ-A

17. Magwé Satan pa ka doubout ataké pèp Jéhova, ki moun ki ja édé yo?

¹⁷ Wévélasyon chapit 12 ka moutwé, pèp Bondyé té kay wisouvwè èd yo pa té ka èspéyé. Sé konmsi latè-a “bwè tout dlo” “lawivyè” pèsikasyon-an. (Wév. 12:16) Èk sé sa ègzaktiman ki té fèt. Délè sa ki asou fasad Satan ka twavay an favè pèp Bondyé. Pou ègzanp, pèp Jéhova ja ganyen plizyè kés an lodyans, ki ba yo tak libèté. Ki mannyè yo ka sèvi libèté sala? Yo ka sèvi tout òpòtyounité yo ni, pou fè twavay-la Jéhova ba yo pou fè-a. (1 Kòr. 16:9) Kisa yo ni pou fè an twavay sala?

18. Ki twavay enpòtan nou ni pou fè an sé dènyé jou sala?

¹⁸ Jézi té di, pèp li té kay pwéché “Bon Nouvèl-la [di Wéyòm Bondyé] toupatou an latè-a” avan tan-an bout. (Maf. 24:14) Sa sé twavay-la ki pli enpòtan an sé dènyé jou sala. Lè pèp Jéhova ka pwéché, yo ka wisouvwè sipò sé nanj-lan. Paski, an Wévélasyon 14:6, zapòt Jan té wè yon nanj “ka mennen an konmisyon ki kay vwé pou tout tan bay sé moun-an ki an latè-a. Nanj-lan di [Bon Nouvèl-la] bay tout nasyon, tout lafanmi, moun ki ka palé tout diféwan langaj, épi moun ki an tout péyi.”

19. Ki lòt konmisyon moun ki enmen Jéhova ni pou déklawé?

¹⁹ Mé Bon Nouvèl di Wéyòm-lan, sé pa sèl konmisyon-an pèp Bondyé ni pou déklawé. Yo osi ni pou sipòté twavay sé nanj-lan ki mansyonnen an Wévélasyon chapit 8 pou chapit 10. Sé nanj sala ka annonsé diféwan modisyon ki kay tonbé asou moun ki widjèkté Wéyòm Bondyé. Konsa, Tèmwen Jéhova osi ka déklawé konmisyon jijman sala, ki menm kon “lapli laglas épi difé.” Konmisyon jijman sala ka fè tout moun konnèt, Jéhova kay détwi sistenm Satan. (Wév. 8:7, 13) Nou ni pou pwéché Bon Nouvèl Wéyòm Bondyé pou fè moun konnèt bout-la pwé. Mannyè sala yo kay sa fè chanjman an lavi yo, pou yo pa wisouvwè waj Jéhova. (Zèf. 2:2, 3) Mé, nou bizwen kouwaj pou di moun konmisyon sala ki pa popilè. Èk diwan Gwan Twibilasyon-an, dènyé konmisyon jijman-an kay fè moun pli anwajé.—Wév. 16:21.

OBÈYI PAWÒL KI AN PWOFÈSI SALA

20. Kisa nou kay konsidiwé an dé lòt atik-la?

²⁰ Nou bizwen “obéyi” sé pawòl-la ki an pwofèsi sala, paski sa ki ékwi an liv Wévélasyon kay ni an éfé asou nou. (Wév. 1:3) Mé ki mannyè nou sa andiwé anba pèsikasyon, èk an menm lè-a kontiné pwéché épi kouwaj? La ni dé (2) bagay ki sa fòtifyé lafwa nou. Pwèmyéman, sa nou li an liv Wévélasyon konsèné lèlmi Bondyé. Èk dézyenman, sé bennédiksyon-an nou kay wisouvwè si nou wèsté fidèl. Nou kay konsidiwé sé sijé sala an dé (2) lòt atik-la.