SIJÉ POU LÉTID 20
Sa Liv Wévélasyon Di Ki Kay Wivé Lèlmi Bondyé
“Sé vyé lèspwi-a fè sé wa latè-a asanblé kò yo ansanm an plas-la yo ka kwiyé Anmagèdonn-an an langaj sé Jwif-la.”—WÉV. 16:16.
CHANSON 150 Chaché Pou Jéhova, I Kay Sové’w
SA NOU KAY DISKITÉ AN ATIK SALAa
1. Kisa liv Wévélasyon di konsèné pèp Bondyé?
LIV Wévélasyon ka fè nou konnèt Wéyòm Bondyé ja établi an syèl, épi Satan pa sa alé an syèl ankò. (Wév. 12:1-9) A kòz di sa, la ni lapé an syèl, mé difikilté pou nou ki asou latè-a. Pouki? Paski, sé asou latè-a Satan yé, èk i ka fiksé tout waj li asou pèp Jéhova.—Wév. 12:12, 15, 17.
2. Kisa ki kay édé nou wèsté fidèl pou Jéhova?
2 Kisa ki kay édé nou wèsté fidèl menm si Satan ka ataké nou? (Wév. 13:10) Yon bagay ki sa édé nou, sé lè nou konnèt kisa Bib-la di ki kay fèt an tan pwochen. Pou ègzanp, an liv Wévélasyon, zapòt Jan ka dékwi déotwa an sé bennédiksyon-an nou kay enjwi touswit. Yonn (1) an sé bennédiksyon-an sé sa, Jéhova kay détwi tout lèlmi’y. Apwézan, annou ègzanminé mannyè liv Wévélasyon ka dékwi lèlmi Bondyé, épi sa ki kay wivé yo.
LIV WÉVÉLASYON KA SÈVI SENBÒL POU DÉKWI LÈLMI BONDYÉ
3. Mansyonnen déotwa senbòl ki an liv Wévélasyon.
3 Wévélasyon 1:1 ka di nou, enfòmasyon-an ki an liv Wévélasyon sé on vizyon. Sa vlé di, sa nou li an liv Wévélasyon sé senbòl. Pou ègzanp, liv Wévélasyon ka palé konsèné déotwa bèt mové. Mé sa sé senbòl ki ka dékwi lèlmi Bondyé. Pwèmyéman, la té ni “an bèt mové ki té lévé sòti an lanmè-a.” Bèt sala té ni “sèt (7) tèt épi dis (10) kòn.” (Wév. 13:1) Apwé sa, la té ni “an lòt bèt mové ki lévé sòti an latè-a.” Sala té ka palé kon an gwo sèpan èk “i té ka jis fè difé sòti an syèl désann asou latè-a.” (Wév. 13:11-13) Twazyenm bèt mové-a sété “an gwo bèt ki wouj,” épi an fanm vyé lavi té asid asou’y. Sé twa bèt mové sala ka wépwézanté lèlmi Dyé Jéhova. Sé pa jòdi sé lèlmi sala ka goumen kont Jéhova épi kont Wéyòm li. Alò, i byen enpòtan pou nou konnèt ki moun sé lèlmi sala yé.—Wév. 17:1, 3.
KAT GWO BÈT
Yo ‘sòti an lanmè-a.’ (Dann. 7:1-8, 15-17) Yo ka wépwézanté gouvèdman latè-a ki té ni gwo enflouwans asou pèp Jéhova dépi an tan pwofèt Dannyèl (Gadé paragraf 4, 7)
4-5. Ki mannyè Dannyèl 7:15-17 ka édé nou pou konpwann kisa sé senbòl sala vlé di?
4 Mé avan nou apwann ki moun sé lèlmi sala yé, nou ni pou konpwann kisa sé senbòl-la vlé di. Pli mèyè mannyè-a pou konpwann sa sé senbòl-la vlé di, sé pou ègzanminé sa Bib-la ka di. Paski, la ni lòt liv an Bib-la ki ka èspliké an chay an sé senbòl-la ki an liv Wévélasyon. Pou ègzanp, pwofèt Dannyèl té ni an wèv, koté i té wè ‘kat gwo bèt sòti an lanmè-a.’ (Dann. 7:1-3) Liv Dannyèl ka di nou a klè, sé kat (4) gwo bèt sala ka wépwézanté kat (4) ‘wa’, ében gouvèdman. (Li Dannyèl 7:15-17.) Èsplikasyon sala ka édé nou konpwann ki, sé bèt mové-a ki mansyonnen an liv Wévélasyon ka osi wépwézanté sé gouvèdman latè-a.
5 Apwézan, annou ègzanminé déotwa an sé senbòl-la ki an liv Wévélasyon. Èk kon nou fè sa nou kay wè mannyè Bib-la ka édé nou pou idantifyé sa sé senbòl sala vlé di. Nou kay koumansé épi sé bèt mové-a. Pwèmyéman, nou kay idantifyé kisa yo ka wépwézanté. Apwé sa, nou kay wè kisa ki kay wivé yo. Èk finalman, nou kay konsidiwé kisa sé bagay sala ni pou fè épi nou.
NOU VINI KONNÈT KI MOUN LÈLMI BONDYÉ YÉ
BÈT MOVÉ-A KI NI SÈT TÈT
I sòti an lanmè-a èk i ni sèt (7) tèt, dis (10) kòn, épi dis (10) kouwonn. (Wév. 13:1-4) I ka wépwézanté tout gouvèdman ki ja donminé lézòm asou latè-a. Sé sèt (7) tèt-la ka wépwézanté sèt (7) gouvèdman ki té ni gwo enflouwans asou pèp Bondyé (Gadé paragraf 6-8)
6. Kisa bèt mové-a ki ni sèt (7) tèt-la an Wévélasyon 13:1-4 ka wépwézanté?
6 Kisa bèt mové-a ki ni sèt (7) tèt-la ka wépwézanté? (Li Wévélasyon 13:1-4.) Òbzòvé, bèt-la ki ni sèt tèt-la té menm kon on chat tig. Pat li té ka sanm pat bè, djòl li té menm kon djòl lyon, épi i té ni dis kòn. Sé kat (4) gwo bèt-la ki mansyonnen an Dannyèl chapit 7 ni sé menm bagay sala. Mé an liv Wévélasyon, sé yon bèt mové ki ni tout sé bagay sala. Zapòt Jan té osi di, bèt-la ki ni sèt (7) tèt-la ka “kondwi tout moun ki an tout lafanmi, an tout péyi, moun ki ka palé tout diféwan langaj, épi moun ki an tout nasyon ki an latè-a.” (Wév. 13:7) Konsa, bèt sala pa ka wépwézanté yon gouvèdman. I ni pli pouvwa pasé sa. Bèt sala ki ni sèt (7) tèt-la ka wépwézanté tout sé gouvèdman-an asou latè-a ki ja donminé lézòm, ni an tan pasé épi apwézan.b—Éklé. 8:9.
7. Kisa chak tèt asou bèt mové-a ka wépwézanté?
7 Kisa chak tèt an sé sèt (7) tèt-la ka wépwézanté? Wévélasyon chapit 17, ka édé nou twapé wépons-lan pou kwèsyon sala, paski i ka palé konsèné imaj bèt sèt tèt-la, ki mansyonnen an Wévélasyon chapit 13. Pou ègzanp, Wévélasyon chapit 17 di, sé sèt (7) tèt-la ka wépwézanté sèt (7) wa. Épi Wévélasyon 17:10 di: “Senk an sé wa sala pa la ankò. Yonn ka kondwi toujou èk la ni yonn ki p’òkò vini. Lè i vini, i kay kondwi pou an ti tak tan tousèl.” Anpanmi tout sé gouvèdman-an Satan ja sèvi, la té ni sèt gouvèdman nou sa konpawé épi “tèt,” paski yo té ni an chay pouvwa. Sé gouvèdman sala té ka kondwi an chay péyi an latè-a, èk yo té ni gwo enflouwans asou pèp Bondyé. An tan zapòt Jan, senk (5) an sé gouvèdman sala té ja tonbé. Sa sété: Éjip, Assyria, Babilonn, Medo-Persia, épi Gris. Lè zapòt Jan wisouvwè vizyon-an ki ékwi an liv Wévélasyon, sizyenm gouvèdman-an té ka kondwi toujou. Sa sété gouvèdman Ronm. Bon. Ki péyi ki té kay vini sètyenm èk dènyé gouvèdman-an, ében dènyé tèt la?
8. Ki gouvèdman sètyenm tèt bèt mové-a ka wépwézanté?
8 Apwézan, annou wè mannyè sé pwofèsi-a an liv Dannyèl ka édé nou pou idantifyé sètyenm gouvèdman-an. Sa vlé di, dènyé tèt bèt mové-a. Ki gouvèdman ki ni an chay pouvwa èk ki ka kondwi an chay péyi diwan dènyé tan-an, sa sé diwan “jou Senyè-a”? (Wév. 1:10) Langlitè épi Lanméwik mété tèt yo ansanm pou fòmé yon gouvèdman. An Annglé, nou ka kwiyé gouvèdman sala Anglo-American World Power. Alò, nou sa di, gouvèdman sala, Anglo-American World Power, sé sètyenm gouvèdman-an, ében sètyenm tèt bèt mové-a ki mansyonnen an Wévélasyon 13:1-4.
AN BÈT MOVÉ KI NI DÉ KÒN MENM KON AN TI MOUTON
I “lévé sòti an latè-a” épi “i ka palé menm kon an gwo sèpan.” I ka fè “difé sòti an syèl désann asou latè-a” èk i ka fè miwak kon “fò pwofèt-la.” (Wév. 13:11-15; 16:13; 19:20) Menm kon an bèt mové ki ni dé kòn, épi yon fò pwofèt, gouvèdman Anglo-America ka kwennen moun asou latè-a. Yo ka di yo, pou fè an “imaj” bèt mové-a ki ni sèt (7) tèt-la épi dis (10) kòn-lan (Gadé paragraf 9)
9. Kisa bèt mové-a ki “ni dé kòn menm kon an ti mouton” ka wépwézanté?
9 Wévélasyon chapit 13 ka osi fè nou konnèt, sètyenm tèt sala, Anglo-American World Power, ka fè menm kon on bèt mové ki “ni dé kòn menm kon an ti mouton, épi i té ka palé menm kon an gwo sèpan.” Bèt mové sala “fè an chay miwak. I té ka jis fè difé sòti an syèl désann asou latè-a douvan tout moun.” (Wév. 13:11-15) Wévélasyon chapit 16 épi chapit 19 ka kwiyé bèt mové sala, “fo pwòfèt-la.” (Wév. 16:13; 19:20) Pwòfèt Dannyèl té osi moutwé gouvèdman Anglo-American World Power té ‘kay détwi adan an mannyè èstòdinè.’ (Dann. 8:19, 23, 24, ftn.) Èk sé sa menm ki té fèt diwan dézyenm gwo ladjè-a. Siyantis hòd Lanméwik épi Langlitè vini ansanm pou fè dé (2) bonm-lan yo té sèvi an pacific-la pou doubout dézyenm ladjè-a. Donmaj-la sé dé (2) bonm sala té annékòz té èstòdinè. Plizyè milyon moun pèd lavi yo an ladjè sala. Sé konmsi gouvèdman Anglo-American World Power, té “fè difé sòti an syèl désann asou latè-a.”
AN GWO BÈT WOUJ
Yon fanm vyé lavi, Gwan vil Babilonn-an asid, asou gwo bèt wouj-la. Yo dékwi bèt mové sala kon ywityenm wa-a. (Wév. 17:3-6, 8, 11) An koumansman-an, fanm vyé lavi-a ka kontwolé bèt mové-a, mé pli ta bèt mové-a détwi fanm vyé lavi-a. Fanm vyé lavi-a ka wépwézanté tout fò wilizyon ki an latè-a. Jòdi, bèt mové-a ka wépwézanté ògannizasyon Nasyon Ini. Òbjèktiv ògannizasyon sala, sé pou fè défans tout sistèm pòlitik ki an latè-a (Gadé paragraf 10, 14-17)
10. Kisa “imaj” bèt mové-a ka wépwézanté? (Wévélasyon 13:14, 15; 17:3, 8, 11)
10 Apwé sa, liv Wévélasyon ka palé konsèné on lòt bèt mové. Bèt mové sala té pwèskè menm kon bèt mové-a ki ni sèt (7) tèt-la. Sèl diféwans ant yo sé koulè-a. Bèt mové sala té wouj. Yo ka kwiyé’y “imaj pwèmyé bèt-la,” èk yo di sé li ki “ywityenm wa-a.”c (Li Wévélasyon 13:14, 15; 17:3, 8, 11.) Silon liv Wévélasyon, “wa sala” té vivan. Pli ta i pa té vivan ankò. Èk apwé on lè, i té kay viwé lévé. Enfòmasyon sala ka fè nou chonjé sa ki té wivé ògannizasyon Nasyon Ini. An koumansman-an, yo té ka kwiyé’y asosiyasyon sé nasyon-an, sa sé, League of Nations an Anglé. Diwan dézyenm gwo ladjè-a ògannizasyon sala dispawèt. Sa vlé di i pa té ka ègzisté ankò. Mé pli ta i pawèt ankò. Èk kou sala yo koumansé kwiyé’y ògannizasyon Nasyon Ini. Sa sé menm non-an i ni jis jòdi. Objèktiv ògannizasyon sala, sé pou fè défans tout sistèm pòlitik ki an latè-a!
11. Kisa sé gouvèdman-an ka fè, èk pouki nou pa ni pyès wézon pou pè yo?
11 Sé gouvèdman sala ka sèvi mansonj pou fè moun opozé Jéhova épi pèp li. Sé konmsi yo ka “kwiyé tout sé wa-a ki an latè-a pou fè yo asanblé adan an sèl plas pou fè ladjè” kont Jéhova. Bib-la ka kwiyé ladjè sala Anmagèdonn. (Wév. 16:13, 14,16) Mé nou pa kay ni pyès wézon pou pè. Paski Dyé nou Jéhova kay pwan aksyon byen vit pou sové tout moun ki ka sipòté Wéyòm li.—Izik. 38:21-23.
12. Kisa ki kay wivé tout sé bèt mové-a?
12 Kisa ki kay wivé tout sé bèt mové-a? Wévélasyon 19:20 ka di nou kisa ki kay wivé yo. I di: “Yo pwan bèt-la pwizonnyé, ansanm èk fo pwòfèt-la ki té ka fè tout sé miwak-la an pwézans bèt-la. Sété épi sé miwak sala i té ka kwennen sé moun-an ki té ni mak bèt-la épi ki té ka adowé imaj bèt-la. Yo pwan bèt-la épi fo pwòfèt-la èk yo jété yo tou vivan an létan difé-a koté souf ka bwilé-a.” Alò, paditan yo “tou vivan,” sa vlé di paditan sé gouvèdman sala ka kondwi, Jéhova kay détwi yo pou tout tan.
13. Ki difikilté sé gouvèdman-an ka mennen asou Kwityen?
13 Kisa sa vlé di pou nou? Paski nou sé Kwityen, nou ni pou wèsté fidèl pou Jéhova épi Wéyòm li. (Jan 18:36) Pou wèsté fidèl, nou pa sa mélé kò nou an zafè pòlitik latè-a. Mé i pa toujou ézé pou fè sa, paski sé gouvèdman-an vlé nou sipòté yo, ni pa pawòl nou, èk pa aksyon nou. Moun ki ka sipòté sé gouvèdman-an ka wisouvwè mak bèt mové-a. (Wév. 13:16, 17) Mé, népòt moun ki ni mak sala kay pèd favè Jéhova, èk yo pa kay wisouvwè lavi étonnèl. (Wév. 14:9, 10; 20:4) Alò, i byen enpòtan pou nou pa mélé kò nou an zafè pòlitik latè-a, menm si sé gouvèdman-an ka ban nou chalè pou fè nou sipòté yo.
BONDYÉ KAY PINI GWO FANM VYÉ LAVI-A
14. Kisa zapòt Jan té wè an Wévélasyon 17:3-5 ki té sipwi’y an chay?
14 Zapòt Jan mansyonnen an lòt bagay i té wè ki té fè’y “sipwi an chay.” Kisa i té wè? I té wè yon fanm asid asou yonn an sé bèt mové-a. (Wév. 17:1, 2, 6) Yo di, fanm sala sé an “gwo fanm vyé lavi.” Yo té ka kwiyé’y, “Gwan vil Babilonn-an,” épi fanm sala té ka “kouché” épi “sé wa latè-a.”—Li Wévélasyon 17:3-5.
15-16. Kisa ki “Gwan vil Babilonn-an,” èk ki mannyè nou sav sa?
15 Kisa ki “Gwan vil Babilonn-an?” Fanm-lan ki ni non-an, “Gwan vil Babilonn-an,” pa sa wépwézanté sé gouvèdman-an. Nou sav sa paski, silon liv Wévélasyon, i ka kouché épi sé wa latè-a. (Wév. 18:9) Osi, i asid asou bèt mové-a. Sa vlé di, i ka éséyé pou kondwi sé gouvèdman-an. Èk nou sav i pa sa wépwézanté sé gwo biznis latè-a, paski silon liv Wévélasyon, sé machann latè-a kay pléwé “lè yo wè sa ki wivé Gwan vil Babilonn-an.”—Wév. 18:11, 15, 16.
16 Délè, lè Bib-la sèvi èkspwèsyon-an “fanm vyé lavi,” i ka palé konsèné moun ki ka di yo ka adowé Bondyé, mé an menm di tan-an yo ka adowé fò dyé. Ében yo ka moutwé an diféwan mannyè yo sé kanmawad épi latè-a. (1 Kw. 5:25; Jémz 4:4) Asou lòt lanmen-an, Bib-la ka sèvi èkspwèsyon-an “fi ki pa janmen kouché épi an misyé,” lè’y ka palé konsèné moun ki ka wèsté fidèl pou Bondyé. (2 Kòr. 11:2; Wévé. 14:4) Babilonn an tan lontan sété an vil ki té plen épi fò dyé èk fò adowasyon. Konsa, Gwan vil Babilonn-an ni pou wépwézanté tout kalité fò adowasyon. Anfen, i ka wépwézanté tout wilizyon ki fò an latè-a.—Wév. 17:5, 18; Gadé atik sala asou jw.org “What Is Babylon the Great?”
17. Kisa ki kay wivé Gwan vil Babilonn-an?
17 Kisa ki kay wivé Gwan vil Babilonn-an? Wévélasyon 17:16, 17 ka ban nou wépons-lan pou kwèsyon sala. I di: “Dis kòn sala ou wè-a ansanm èk bèt-la kay hayi fanm vyé lavi-a, épi yo kay pwan tout sa i ni èk yo kay kitéʼy touni. Yo kay manjé vyann ki anlè kòʼy épi yo kay détwiʼy nèt épi difé. Sé Bondyé ki mété an tjè dis wa sala pou yo fè sa i té ja ni plan pou fè dépi lontan.” Wi, Jéhova kay motivé sé nasyon-an pou sèvi bèt wouj mové-a, sa vlé di, ògannizasyon Nasyon Ini, pou ataké fò wilizyon an latè-a. Yo kay détwi tout fò wilizyon konplètman.—Wév. 18:21-24.
18. Ki mannyè nou sa moutwé nou pa ka sipòté Gwan vil Babilonn-an an pyès kalité mannyè?
18 Kisa sa vlé di pou nou? Nou ni pou kontiné adowé Jéhova an mannyè-a ki “dwèt èk nèt” an zyé’y.” (Jémz 1:27) Sé pa pou nou janmen kité Gwan vil Babilonn-an enflouwansé nou épi sé fò enstwiksyon’y-la èk sé sélébwasyon’y-la ki bazé asou fò enstwiksyon. Osi, nou pa sa adòpté sé vyé pwatik li-a, tèl kon imowalité, èk lòt vyé pwatik ki ni pou fè épi tjenbwa. Èk i byen enpòtan pou nou kontiné pwéché, èk vèti moun pou yo sòti an Gwan vil Babilonn-an. Paski si yo pa sòti an fò wilizyon, Bondyé kay wè yo koupab menm kon Gwan vil Babilonn-an. Èvèk modisyon-an ki kay tonbé anlè’y-la kay tonbé asou yo tou.—Wév. 18:4.
JIJMAN-AN KI KAY VINI ASOU PLI GWO LÈLMI BONDYÉ
GWO SÈPAN WOUJ-LA
Satan ka bay bèt mové-a pouvwa ében lotowité. (Wév. 12:3, 9, 13; 13:4; 20:2, 10) Satan sé pli gwo lèlmi Jéhova, èk i kay an pwizon pou yon mil (1,000) lanné. Apwé sa, yo kay jété Satan an “létan difé-a koté ki ni souf ka bwilé-a” (Gadé pawagwaf 19-20)
19. Ki moun ki ‘gwo sèpan wouj-la’?
19 Liv Wévélasyon ka osi palé konsèné “an gwo sèpan wouj.” (Wév. 12:3) Gwo sèpan sala ka goumen kont Jézi épi sé nanj li-a. (Wév. 12:7-9) Osi, i ka ataké pèp Bondyé. Épi sé li menm ki ka bay bèt mové-a, ében sé gouvèdman-an latè-a, pouvwa. (Wév. 12:17; 13:4) Ki moun ki gwo sèpan sala? Gwo sèpan sala sé yonn-lan yo “ka kwiyé Satan ében Denmou-an.” (Wév. 12:9; 20:2) Sé li ki ka kondwi tout lèlmi Jéhova.
20. Kisa ki kay wivé gwo sèpan-an?
20 Kisa ki kay wivé gwo sèpan wouj-la? Wévélasyon 20:1-3 ka di nou, an nanj kay anchennen Satan, èk i kay jété’y an gwo twou-a ki pa ni bout-la. Gwo twou sala kay menm kon an pwizon pou Satan. I kay wèsté an pwizon sala pou yon mil (1000) lanné. Diwan tan sala i pa kay sa kwennen sé nasyon latè-a pou jis tan mil lanné sala bout. Finalman, yo kay ladjé Satan épi sé zèlèv li-a an létan difé-a ki ni souf ka bwilé-a. Sa vlé di yo kay détwi’y pou tout tan. (Wév. 20:10) Mi an bèl tan sa kay yé, lè Satan épi sé zèlèv li-a pa kay la ankò!
21. Pouki, sa nou li an liv Wévélasyon sipozé ban nou tjè kontan?
21 Kon nou konpwann sé senbòl-la ki an liv Wévélasyon, sa ka ankouwajé nou an chay! Paski, nou pa sèlman apwann ki moun lèlmi Bondyé yé, mé nou osi apwann kisa ki kay wivé yo. Wi, “pa dé bon i bon pou moun-lan ki li liv sala épi pou tout moun ki kouté sé pawòl sala ki sòti an bouch Bondyé-a”! (Wév. 1:3) Mé, apwé Bondyé détwi tout lèlmi’y, ki bennédiksyon sèvant li kay enjwi? Nou kay diskité sijé sala an lòt atik-la.
CHANSON 23 Jéhova Koumansé Kondwi
a Liv Wévélasyon ka sèvi senbòl pou idantifyé lèlmi Bondyé, épi liv Dannyèl ka édé nou konpwann kisa sé senbòl sala vlé di. An atik sala, nou kay konpawé déotwa an sé pwofèsi-a ki an liv Dannyèl épi déotwa pwofèsi an liv Wévélasyon, ki kon yo. An mannyè sala nou kay sa idantifyé lèlmi Bondyé. Apwé, nou kay konsidiwé kisa ki kay wivé sé lèlmi sala.
b An lòt bagay ki ka fè nou konnèt bèt mové-a ki ni sèt (7) tèt-la ka wépwézanté tout gouvèdman, sé sa, bèt-la ni “dis kòn.” Èk byen souvan, Bib-la ka sèvi limowo dis (10) lè’y ka palé konsèné an bagay ki konplèt. Sa vlé di, an bagay ki pa ka mantjé anyen.
c Pwèmyé bèt mové-a té ni kouwonn asou chak kòn, mé imaj li pa ni pyès kouwonn. (Wév. 13:1) Sé paski imaj-la sòti an sé sèt (7) lòt wa-a, konsa i ka dépan asou sé lòt tèt-la pou ba’y pouvwa.—Gadé atik sala asou jw.org “What Is the Scarlet-Colored Beast of Revelation Chapter 17?”