Liv Wévélasyon—Kisa I Vlé Di Pou Nou An Tan Pwochen

1. Ki disizyon ki enpòtan tout moun ni pou fè?

AN tan nou, moun ni an disizyon ki enpòtan pou fè. Ès yo kay sipòté Jéhova kon Moun-lan ki ni dwa-a pou kondwi latè-a? Ében ès yo kay sipòté lèlmi Jéhova, Satan Denmou-an? Ou pa sa sipòté toulé dé. Népòt disizyon ou, fè kay ni an éfé asou lavi’w pou vini. (Maf. 25:31-33, 46) Diwan “gwo soufwans-lan,” moun kay jwenn lavi, ében yo kay péwi.—Wévé. 7:14; 14:9-11; Izik. 9:4, 6.

2. (a) Kisa Hibrou 10:35-39 ka ankouwajé nou pou fè? (b) Ki mannyè liv Wévélasyon sa édé nou pou fè sa?

² Li Hibrou 10:35-39. Si ou ja désidé pou sipòté kondwit Jéhova, sa bon. Konsa apwézan, ou sa édé lézòt pou fè menm disizyon sala. Alò, ou sa sèvi enfòmasyon-an ki an liv Wévélasyon pou édé yo. Liv Wévélasyon ka di nou sa ki kay wivé moun ki ka opozé Jéhova. Mé, i ka di nou osi, sé bennédiksyon-an, moun ki sipòté kondwit Jéhova kay wisouvwè. Lè nou konsidiwé enfòmasyon-an ki an liv Wévélasyon, i kay édé nou pou fòtifyé lafwa nou, épi pou kontiné sèvi Jéhova. Konsa, nou sa sèvi sa nou ja apwann, pou édé lézòt pou yo sa fè bon disizyon, épi pou kontiné sèvi Jéhova.

3. Kisa nou kay konsidiwé an atik sala?

³ An atik sala, nou kay konsidiwé déotwa kwèsyon. Pou ègzanp, kisa moun ki sipòté kondwit Jéhova kay wisouvwè? Osi, asou lòt lanmen-an, kisa ki kay wivé moun ki sipòté gwo bèt wouj-la ki mansyonnen an liv Wévélasyon?

KISA KI KAY WIVÉ MOUN KI FIDÈL POU JÉHOVA

4. Ki gwoup zapòt Jan wè épi Jézi an syèl?

⁴ Adan an vizyon, zapòt Jan wè dé gwoup ki ka sipòté kondwit Jéhova. Épi yo wisouvwè lavi étonnèl. Pwèmyé gwoup la ni, yon san kawant kat mil (144,000). (Wévé. 7:4) Yo sòti an latè-a épi yo fòmé an gouvèdman ében an Wéyòm épi Jézi an syèl. Ansanm épi Jézi, yo ka kondwi latè-a. (Wévé. 5:9, 10; 14:3, 4) An vizyon-an, zapòt Jan wè yo ka doubout épi Jézi asou Mòn Zayonn. Sa vlé di, an syèl.—Wévé. 14:1.

5. Kisa ki kay wivé lèwèstan yon san kawant kat mil-la (144,000)?

⁵ Dépi tan sé zapòt-la pou wivé tan nou, Jéhova ja chwazi plizyè mil moun pou fòmé san kawant kat mil-la (144,000). (Louk 12:32; Ronm 8:17) Kanmenm, zapòt Jan vini konnèt, sé an ti gwoup an limowo sala ki té kay wèsté vivan asou latè-a, diwan sé dènyé jou-a. Avan gwo soufwans-lan koumansé, ti gwoup sala kay wisouvwè “stanp” Jéhova. Sa vlé di, Jéhova kay ba yo asiwans-lan, yo ni favè’y. (Wévé. 7:2, 3; 12:17) Diwan gwo soufwans-lan, ti gwoup sala kay jwenn ansanm épi lèwèstan yon san kawant kat mil-la (144,000), ki an syèl. Épi yo kay kondwi épi Jézi an Wéyòm Bondyé.—Maf. 24:31; Wévé. 5:9, 10.

6-7. (a) Ki lòt gwoup zapòt Jan té wè, épi kisa nou sa apwann konsèné gwoup sala? (b) Pouki nou tout sipozé antéwésé an Wévélasyon chapit 7?

⁶ Apwé zapòt Jan wè gwoup sala an syèl, i wè an “gwan popilas moun”. Kanmenm, Bib-la pa mansyonnen konmen moun ki an gwoup sala. (Wévé. 7:9, 10) Mé nou apwann, gwoup sala sé moun “ki ja pasé anba gwo soufwans-lan. Yo ja soufè an chay épi yo ja lavé had yo an san Ti Mouton-an. Sé pou sa gòl yo blan kon sa”. (Wévé. 7:14) Apwé yo pasé anba gwo soufwans-lan, yo kay enjwi lavi asou latè-a pou tout tan.—Sam 37:9-11, 27-29; Pwov. 2:21, 22; Wévé. 7:16, 17.

⁷ Konsa, ki Jéhova chwazi nou pou viv an syèl, ében pou viv asou latè-a, ès nou ka wè kò nou an sa ki ékwi an Wévélasyon chapit 7? Mi an bèl tan sa kay yé pou tout sèvant Jéhova! Nou kay si tèlman kontan, paski nou sipòté kondwit Jéhova. Ki lòt bagay nou sa apwann an liv Wévélasyon konsèné gwo soufwans-lan?—Maf. 24:21.

KISA KI KAY WIVÉ MOUN KI ALÉ KONT JÉHOVA

8. Ki mannyè gwo soufwans-lan kay koumansé, épi kisa majòwité moun kay fè?

⁸ Kon nou té apwann an atik-la avan, sé gouvèdman latè-a kay alé kont Gwan vil Babilonn-an, sa vlé di, tout fò wilizyon. (Wévé. 17:16, 17) Èk sé sa ki kay koumansé gwo soufwans-lan. Lè sa fèt, ès an chay moun kay désidé pou adowé Jéhova? Non, sa pa kay fèt. Anfen, Wévélasyon chapit 6 moutwé, moun kay chaché pwotèksyon hòd sé gouvèdman latè-a, épi gwo biznis. Paski yo wifizé pou sipòté Wéyòm-lan, Jéhova kay konsidiwé yo lèlmi’y.—Louk 11:23; Wévé. 6:15-17.

9. Ki mannyè moun kay wè, pèp Jéhova diféwan épi lézòt diwan gwo soufwans-lan, épi kisa ki kay wivé yo?

⁹ Diwan tan difisil gwo soufwans-lan, tout moun kay wè, pèp Jéhova diféwan. Paski yo sé sèl gwoup moun asou latè-a, ki kay kontiné sèvi Jéhova, épi wifizé sipòté bèt mové-a. (Wévé. 13:14-17) Paski yo sé sèl gwoup moun ki kontiné adowé Jéhova, sa kay fè moun ki kont Jéhova vini anwajé. An wézilta di sa, an gwoup nasyon kay ataké pèp Jéhova, oliwon latè-a. Bib-la ka kwiyé gwoup nasyon sala, Gòg ki sòti péyi Magòg.—Izik. 38:14-16.

10. Silon Wévélasyon 19:19-21, kisa Jéhova kay fè lè Gòg di Magòg ataké sèvant li?

¹⁰ Kisa Jéhova kay fè lè Gòg di Magòg ataké sèvant li? I di nou, i kay ‘vini byen faché’. (Izik. 38:18, 21-23) Wévélasyon chapit 19 di nou sa ki kay fèt apwé. Jéhova kay voyé gason’y pou fè défans pèp li, épi pou détwi tout lèlmi’y. Sé nanj-lan épi yon san kawant kat mil-la (144,000), kay édé Jézi goumen batay sala. (Wévé. 17:14; 19:11-15) Tout moun épi tout ògannizasyon ki kont Jéhova asou latè-a, kay détwi an batay sala.—Li Wévélasyon 19:19-21.

APWÉ LADJÈ-A, LA KAY NI AN MAWIYAJ

11. Ki bagay ki pli enpòtan liv Wévélasyon di ki kay fèt?

¹¹ Imajiné djèwté-a sèvant Jéhova ka ni, lè yo wè Bondyé sové yo asou latè-a, mé i détwi tout lèlmi’y. Magwé la kay ni an chay djèwté an syèl lè Gwan vil Babilonn-an détwi, la kay an lòt bagay ki kay mennen pli djèwté. (Wévé. 19:1-3) Sa sé bagay-la ki pli enpòtan an liv Wévélasyon, mawiyaj “Ti mouton-an”.—Wévé. 19:6-9.

12. Silon Wévélasyon 21:1, 2, ki tan mawiyaj Ti Mouton-an kay pwan kou?

¹² Ki tan mawiyaj sala kay pwan kou? Tout an yon san kawant kat mil-la (144,000) kay an syèl avan ladjè Anmagèdonn-an koumansé. Mé sé pa a lè sala mawiyaj Ti Mouton-an kay pwan kou. (Li Wévélasyon 21:1, 2.) Mawiyaj Ti Mouton-an kay pwan kou apwé ladjè Anmagèdonn-an, lè Bondyé ja détwi tout lèlmi’y.—Sam 45:3, 4, 13-17.

13. Kisa mawiyaj Ti Mouton-an vlé di pou Jézi, épi san kawant kat mil-la (144,000)?

¹³ Kisa mawiyaj Ti Mouton-an vlé di pou Jézi, épi san kawant kat mil-la (144,000)? Menm kon an mawiyaj ka mennen an nonm épi an fanm ansanm, sé menm mannyè-a mawiyaj Ti Mouton-an ka mennen Jézi épi san kawant kat mil-la (144,000) ansanm, adan an mannyè senbolik. Mawiyaj sala kay établi gouvèdman nèf-la, ki kay kondwi latè-a pou yon mil (1,000) lanné.—Wévé. 20:6.

KISA AN BÈL VIL ÈSTÒDINÈ NI POU FÈ ÉPI’W

14-15. Wévélasyon chapit 21 ka konpawé san kawant kat mil-la (144,000) épi kisa? (Gadé pòtwé-a ki asou kouvèti-a.)

¹⁴ Wévélasyon chapit 21 ka konpawé san kawant kat mil-la (144,000) pou an bèl vil èstòdinè yo ka kwiyé, “Jérouzalèm nèf-la”. (Wévé. 21:2, 9) Fondasyon vil sala sé douz (12) wòch ki “ni non douz zapòt Ti Mouton Bondyé-a” ékwi asou yo. Pouki zapòt Jan té antéwésé an sa i wè-a? Paski, i wè non’y ékwi asou yonn (1) an sé wòch sala. Ah, sa sété an gwo lonnè pou li!—Wévé. 21:10-14; Èfés. 2:20.

¹⁵ Vil senbolik sala, pa té ka sanm pyès lòt vil. Lawi vil-la té fèt èk bon lò. Douz (12) bayè vil-la té fèt èk bèl bijou. Èk fondasyon épi bawad vil-la té ni tout diféwan koulè wòch ki chè an chay. Londjè’y, hòtè’y, épi gwandè’y té menm mizi-a. (Wévé. 21:15-21) Mé magwé i té ni tout sa, akonmsi an bagay té ka mantjé. Noté sa zapòt Jan di: “Mwen pa wè pyès kay yo ka adowé Bondyé an vil sala. Bondyé Senyè-a, ki ni tout pouvwa-a, épi Ti Mouton-an toujou la, kon sa pyèsonn pa bizwen pyès kay pou adowé yo. Vil sala pa bizwen klèté sòlèy-la ében lalin-an paski klèté Bondyé ka kléwé la, épi sé Ti Mouton-an ki lanp vil-la.” (Wévé. 21:22, 23) Sé manm Jérouzalèm nèf-la kay épi Jéhova. (Hib. 7:27; Wévé. 22:3, 4) Konsa, Jéhova épi Jézi sé tanp an vil sala.

16. Diwan mil (1,000) lanné-a Wéyòm Bondyé ka kondwi, ki bennédiksyon lézòm kay wisouvwè?

¹⁶ Lè sé annonté -a katjilé asou vil sala, yo ka ni an chay djèwté. Mé, moun ki ni èspwa pou viv asou latè-a osi antéwésé an vil sala. Diwan mil (1,000) lanné-a Wéyòm Bondyé ka kondwi, Jérouzalèm nèf-la kay mennen an chay bennédiksyon bay lézòm. Zapòt Jan té wè sé bennédiksyon sala ka kouwi, menm kon an “lawivyè dlo ki ka bay moun lavi étonnèl. Asou toulé dé bòdaj lawivyè-a ni pwé bwa-a ki ka bay lavi étonnèl-la. Épi yo ka sèvi fè’y li pou djéwi sé nasyon-an”. (Wévé. 22:1, 2) Diwan tan sala, tout lézòm ki vivan kay ni chans-lan pou wisouvwè sé bennédiksyon sala. Mizi an mizi, tout lézòm ki obéyisan kay vini pawfé. La pa kay ni maladi, la pa kay ni penn, èk pyèsonn pa kay pléwé a kòz di lapenn.—Wévé. 21:3-5.

17. Silon Wévélasyon 20:11-13, ki moun ki kay wisouvwè bennédiksyon diwan mil (1,000) lanné kondwit Wéyòm-lan?

¹⁷ Ki konpanni moun ki kay wisouvwè sé bèl bennédiksyon sala? Pwèmyé konpanni moun ki kay enjwi sé bennédiksyon sala, sé gwan latilyé-a ki jwenn sové diwan Anmagèdonn, épi ich yo ki fèt an latè nèf-la. Mé, Wévélasyon chapit 20 osi pwonmèt, lé mò kay wésisité. (Li Wévélasyon 20:11-13.) Ni moun fidèl ki mò an tan lontan, èk moun ki té mové èk pa té ni chans-lan pou konnèt Jéhova, kay wésisité. (Twav. 24:15; Jan 5:28, 29) Mé, ès sa vlé di, tout moun ki mò kay wésisité diwan mil (1,000) lanné-a? Non. Moun ki té ni chans-lan pou vini konnèt Jéhova avan yo mò, mé yo wifizé fè sa, pa kay wésisité. Yo té ni chans-lan, mé yo moutwé yo pa té méwité pou viv an pawadi-a.—Maf. 25:46; 2 Tèsa. 1:9; Wévé. 17:8; 20:15.

DÈNYÉ TÈS-LA

18. An ki sitiwasyon lézòm kay yé lè mil (1,000) lanné-a bout?

¹⁸ Lè mil (1,000) lanné-a bout, tout moun ki asou latè-a kay pawfé. Péché-a nou éwityé hòd Adanm, pa kay ni pyès éfé asou nou ankò, paski nou kay pawfé an bout mil (1,000) lanné-a.— Ronm 5:12; Wévé. 20:5.

19. Pouki dènyé tès-la enpòtan?

¹⁹ Nou sav Jézi té wèsté fidèl pou Jéhova menm si Satan té mété’y anba tès. Mé, ès tout lézòm ki pawfé kay sa fè menm kon Jézi, lè Satan mété yo anba tès? Chak moun kay sa wéponn kwèsyon sala, an bout mil (1,000) lanné-a, lè Satan sòti an pwizon’y-lan. (Wévé. 20:7) Moun ki wèsté fidèl diwan tan sala kay wisouvwè lavi étonnèl, èk yo kay enjwi libèté ki wéyal. (Ronm 8:21) Mé moun ki wébèl kont Jéhova, kay jwenn détwi ansanm épi Satan épi sé zèlèv li-a.—Wévé. 20:8-10.

20. Ki mannyè ou ka santi kò’w, lè ou li sé pwofèsi-a ki an liv Wévélasyon?

²⁰ Ki mannyè ou ka santi kò’w kon nou konsidiwé sé pwofèsi-a an liv Wévélasyon? Ès i pa an plézi lè’w imajiné kò’w an sé bèl pwofèsi sala? San dout, sa ka motivé’w pou ankouwajé lézòt pou adowé Jéhova. (Wévé. 22:17) Èk osi, i ka pousé nou pou di: “Amèn. Vini, Senyè Jézi,” vini.—Wévé. 22:20.