La Pa Ni Pyèsonn Ki Ka Padonnen Menm Kon Jéhova

1. Kisa Wa Solomon té enstwi nou an Ékléziyastis 7:20?

WA Sòlomonn té ékwi: “La pa ni pyèsonn asou latè-a ki jis èk ki ka toujou fè sa ki bon èk ki pa ka janmen péché.” (Éklé. 7:20) Pawòl sala sé lavéwité! Paski nou tout ka fè péché. (1 Jan 1:8) Konsa, nou tout bizwen pawdonnasyon Bondyé èk pawdonnasyon lòt moun.

2. Koumannyè ou ka santi lè on bon jan’w padonnen’w?

² San dout, ou ka chonjé lè’w té ofwansé on bon jan’w. Èvèk paski ou pa té vlé pèdi’y kon on bon jan, ou mandé’y pou padonnen’w. Alò, koumannyè ou ka santi lè on bon jan’w padonnen’w? Sa té soulajé’w, ès pa? Èk sa té fè’w kontan osi!

3. Kisa nou kay diskité an atik sala?

³ Nou vlé ni Jéhova pou pli bon jan nou, mé délè nou ka di ében fè bagay ki ka ofwansé’y. Pouki nou asiwé Jéhova kay padonnen nou? Ki diféwans la ni ant mannyè Jéhova ka padonnen èk mannyè nou ka padonnen? Èk ki moun Jéhova ka padonnen?

JÉHOVA PAWÉ POU PADONNEN

4. Pouki nou asiwé Jéhova pawé pou padonnen moun?

⁴ Bib-la ka ban nou asiwans-lan ki, Jéhova pawé pou padonnen moun. Lè Jéhova té ka di Moziz konsèné kò’y asou Mòn Saynay, i sèvi an nanj pou palé bay Moziz. Nanj-lan di: ‘Jéhova, Jéhova, an Dyé ki plen mizéwikòd èk konpasyon, i pa ka faché vit èk i plen lanmityé fidèl èk lavéwité, i ka moutwé plizyè mil moun lanmityé fidèl, i ka pawdonnen lèwè, bagay moun fè ki pa bon, èk péché.’ (Ègz. 34:6, 7) Wi, Jéhova sé on Dyé ki janti èk ki ni mizèwikòd, èk i toujou pawé pou padonnen moun ki wépanti.​—Néhi. 9:17; Sam 86:15.

5. Paski Jéhova konnèt tout bagay konsèné nou, silon Sam 103:13, 14 kisa sa ka pousé’y pou fè?

⁵ Paski Jéhova fè nou, la pa ni anyen i pa konnèt konsèné nou. Imajiné sa! Jéhova konnèt tout ti détay konsèné tout moun ki asou latè-a. (Sam 139:15-17) Konsa, i konnèt tout défo nou éwityé hòd pawan nou. An plis di sa, i konnèt tout sa nou té èspéyansé an lavi nou ki ka fè nou mannyè-a nou yé jòdi. Alò, paski Jéhova konnèt nou byen, kisa sa ka pousé’y pou fè? Sa ka pousé’y pou moutwé nou mizéwikòd.​—Sam 78:39; li Sam 103:13, 14.

6. An ki mannyè Jéhova ja moutwé i vwéman vlé padonnen moun?

⁶ Jéhova ja moutwé i vwéman vlé padonnen moun. I konnèt, paski Adanm té dézobéyi, nou tout ka péché èk mò. (Ronm 5:12) Konsa, la pa ni anyen nou té sa fè pou libéwé kò nou èk lòt moun hòd péché èk lanmò. (Sam 49:7-9) Kanmenm, Bondyé nou ja moutwé konpasyon èk i fè awanjman pou libéwé nou. Kisa’y té fè? Kon Jan 3:16 di, Jéhova té voyé sèl gason’y-lan pou mò ban nou. (Maf. 20:28; Ronm 5:19) Jézi mò an plas nou pou libéwé tout moun ki mété lafwa an li. (Hib. 2:9) Pa dé lapenn Jéhova té an lapenn pou wè sèl gason’y-lan soufè èvèk mò! Mé lavéwité-a sé sa, Jéhova pa té kay kité gason’y mò si’y pa té vlé padonnen nou.

7. Ki moun an Bib-la Jéhova té padonnen?

⁷ Bib-la plen ègzanp moun Jéhova té padonnen. (Èfés. 4:32) Ki moun ki ka vini an lidé’w? Pitèt ou ka chonjé Wa Mannasa. Nonm méchan sala té péché kont Jéhova an plizyè mové mannyè. I té pwan douvan an adowasyon fo èk i té enkouwajé moun pou adowé fo dyé osi. I tjwé ich li, i ofè yo kon sakwifis pou fo dyé. I jis mété on imaj fo dyé an tanp Jéhova. Mi sa Bib-la di konsèné Mannasa: ‘I té fè an pil mové bagay an zyé Jéhova, pou ofwansé’y.’ (2 Kw. 33:2-7) Mé, lè Mannasa té wépanti Jéhova padonnen’y. Jéhova té jis fè’y vini wa ankò. (2 Kw. 33:12, 13) Pitèt ou ka chonjé Wa David osi. I té fè sa ki mové an zyé Jéhova, i té fè adiltè èk i té tjwé yon moun. Mé Jéhova té padonnen David, lè’y dakò i té péché kont Jéhova èk i wépanti. (2 Sm 12:9, 10, 13, 14) Wi, nou ni asiwans-lan ki, Jéhova vwéman vlé padonnen moun. Apwézan, nou kay wè sé diféwans-lan ant mannyè Jéhova ka padonnen èk mannyè moun ka padonnen.

MANNYÈ JÉHOVA KA PADONNEN DIFÉWAN ÉPI MANNYÈ MOUN KA PADONNEN

8. Pouki Jéhova sé pli mèyè jij-la?

⁸ Jéhova sé ‘jij tout latè-a’. (Jen. 18:25) On bon jij sipozé konnèt lwa-a byen. Épi sé kon sa Jéhova yé. Jéhova sé jij nou. Épi i byen konpwann lwa-a, paski, sé li ki ka ban nou lwa pou swiv. Èk osi, la pa ni pyèsonn ki konnèt sa ki bon épi sa ki mové, pli mèyè pasé Jéhova. (Izay. 33:22) Bon. Kisa ankò on bon jij sipozé konnèt? Avan on bon jij fè on disizyon i sipozé konnèt tout sé détay-la. Jéhova konnèt tout sé détay-la kouman! Konsa Jéhova sé vwéman pli mèyè jij-la.

9. Kisa Jéhova konnèt ki ka édé’y désidé si sé pou padonnen on moun opa?

⁹ Jij lézòm, pa toujou ni tout sé détay-la adan a kés, mé, Jéhova konnèt tout sé détay-la an népòt kés ki vini douvan’y. (Jen. 18:20, 21; Sam 90:8) Osi, jij lézòm ka jijé asou sa yo tann ében sa yo wè. Mé, Jéhova pa kon sa. I konnèt labitid nou èk kawaktè nou. I konnèt mannyè nou lévé, i konnèt ki kalité endikasyon nou wisivwè, èk i jis konnèt sa ki an tjè nou épi an lidé nou. Konsa, i ka konpwann pouki moun ka fè sèten bagay, èk kisa ki sa enflouwansé sa yo ka fè. Pyèsonn pa sa séwé anyen hòd Jéhova. (Hib. 4:13) Alò, lè Jéhova padonnen nou, sé paski i konnèt tout sé détay-la.

10. Pouki nou sa di jijman Jéhova toujou jis èk dwèt? (Ditonronnonmi 32:4)

¹⁰ Jijman Jéhova toujou jis épi dwèt, paski, i pa ni pwéféwans pou pyèsonn. Jéhova pa ka janmen padonnen on moun paski moun-lan bèl, i wich, i ni gwo pozisyon, ében paski i ni an chay abilité. (1 Sm 16:7; Jémz 2:1-4) Pyèsonn pa sa fòsé ében péyé Jéhova pou fè on disizyon. (2 Kw. 19:7) Osi, Jéhova pa ka kité waj ében santiman pousé’y pou fè on disizyon. (Ègz. 34:7) Alò, i a klè, Jéhova sé pli mèyè jij-la nou sa janmen ni, paski, i ka konpwann tout bagay konsèné nou, épi sitiwasyon nou.​—Li Ditonronnonmi 32:4.

11. Pouki nou sa di la ni on diféwans ant pawdonnasyon Jéhova épi pawdonnasyon lézòm?

¹¹ Sé moun-lan ki té ékwi pwèmyé pa-a an Bib-la té konnèt pawdonnasyon Jéhova té diféwan épi pawdonnasyon lézòm. Délè, lè sé moun sala té ka palé konsèné pawdonnasyon Jéhova, yo té ka sèvi on mo pawòl an langaj Hibrou. Mé, mo pawòl sala té ka sèlman dékwi mannyè Bondyé ka padonnen lézòm. Yo pa janmen sèvi mo pawòl sala pou dékwi mannyè lézòm ka padonnen yonn a lòt. Lè on moun péché èk i wépanti, sé sèlman Jéhova ki ni pouvwa-a pou padonnen’y konplètman. Mé, kisa ki ka fèt lè Jéhova pawdonnen nou?

12-13. (a) Lè Jéhova padonnen on moun, ki mannyè moun sala ka santi? (b) Apwé Jéhova padonnen nou, ès i kay tjenbé péché sala kont nou ében pini nou pou menm péché sala ankò?

¹² Lè nou aksèpté pawdonnasyon Jéhova, sa ka ‘wéfwéchi lèspwi’ nou. Osi, nou ka ni lapé an tjè nou èk an lidé nou, èk nou ka ni on konsyans ki nèt. Sé sèlman lè Jéhova padonnen nou, nou ka santi kon sa. (Twav. 3:19, 20) An plis di sa, lè Jéhova padonnen nou, nou ka vini bon jan’y ankò, sé konmsi nou pa té janmen péché.

¹³ Apwé Jéhova padonnen nou, i pa kay janmen tjenbé péché-a kont nou, ében pini nou ankò pou menm péché-a. (Izay. 43:25; Jér. 31:34) Lè Jéhova padonnen nou, sé konmsi i pwan péché nou èk i jété’y lwen, “menm kon koté sòlèy-la ka lévé-a lwen koté i ka kouché-a.”b (Sam 103:12) Pawdonnasyon Jéhova vwéman bèl. Konsa, lè nou katjilé asou sa, sa ka pousé nou pou wimèsyé Jéhova épi wèspèkté’y.(Sam 130:4) Mé, ki moun Jéhova kay pawdonnen?

KI MOUN JÉHOVA KA PADONNEN?

14. Kisa Jéhova ka sèvi pou fè disizyon-an pou padonnen on moun?

¹⁴ Kon nou ja apwann, disizyon Jéhova pou padonnen on moun pa bazé asou si péché moun-lan gwav opa. Osi nou ja apwann, Jéhova ka sèvi nòlaj li kon Kwéyatè nou, Jij nou, èk Moun-lan ki ka ban nou lwa, lè’y ka désidé si sé pou padonnen nou. Mé, ki diféwan bagay Jéhova ka gadé pou lè’y ka désidé si sé pou padonnen nou opa?

15. Silon Louk 12:47, 48, kisa Jéhova ka konsidiwé avan’y padonnen on moun?

¹⁵ Yon bagay Jéhova ka konsidiwé avan’y padonnen on moun, sé si moun-lan té sav si sa’y té fè-a pa té bon. Jézi té fè pwen sala byen klè an Louk 12:47, 48. (Li’y.) Lè on moun sav Jéhova hayi bagay-la i vlé fè-a, èk i fè’y, sa sé on péché ki byen gwav. Pitèt Jéhova pa kay padonnen moun sala. (Mak 3:29; Jan 9:41) Kanmenm, délè nou sav sa nou té fè-a pa bon. Konsa, ès Jéhova kay padonnen nou? Mé wi! Paski la ni on lòt bagay Jéhova ka konsidiwé avan’y padonnen on moun.

16. (a) Kisa i vlé di pou wépanti? (b) Pouki i enpòtan pou nou wépanti si nou vlé Jéhova pawdonnen nou?

¹⁶ A lòt bagay Jéhova ka konsidiwé avan’y désidé pou pawdonnen on moun, sé si moun-lan vwéman wépanti. Mé, kisa i vlé di pou wépanti? Pou wépanti vlé di, moun-lan chanjé katjil li, i chanjé atitid li èben i chanjé sé bagay-la i ka fè-a. Pou wépanti osi vlé di, moun-lan wigwété èk i an lapenn pou sé mové bagay-la i té fè-a èk pou sé bon bagay-la i pa té fè lè’y té ni òpòtunité-a pou fè yo. On moun ki wépanti, pa sèlman an lapenn pou sé mové bagay-la i té fè-a, mé osi, i an lapenn paski i kité wilasyon’y épi Jéhova vini fèb. Èk sé sa ki té annékòz li pou fè sé mové bagay-la i té fè-a. Ou pé chonjé, ni Wa Mannasa épi Wa David, té fè péché ki té byen gwav. Mé, Jéhova pawdonnen yo paski yo té wépanti. (1 Wa 14:8) Wi, Jéhova ni pou wè pwèv ki, nou wépanti, pou’y sa pawdonnen nou. Mé i pa asé pou nou annèk santi lapenn pou sé mové bagay-la nou té fè-a. Nou ni pou pawé pou pwan aksyon.c Kanmenm, la ni on lòt bagay Jéhova ka konsidiwé avan i pawdonnen on moun.

17. (a) Kisa i vlé di pou tounen hòd péché nou? (b) Pouki i enpòtan pou nou tounen hòd péché nou? (Izaya 55:7)

¹⁷ On lòt bagay Jéhova ka konsidiwé avan i pawdonnen nou, sé si nou tounen hòd péché nou. Pou tounen hòd péché vlé di, moun-lan doubout fè sé mové bagay-la i té ka fè-a, épi i koumansé viv lavi’y mannyè-a Jéhova vlé moun viv lavi yo. (Li Izaya 55:7.) Moun-lan osi ni pou change mannyè i ka katjilé, èk kité katjil Jéhova djidé katjil li. (Ronm 12:2; Èfés. 4:23) Osi, moun-lan ni pou fè lidé’y pou doubout mové katjil li, èk mové aksyon’y. (Kòl. 3:7-10) Mé chonjé, sé lafwa nou an sakwifis Jézi ki ka fè Jéhova pawdonnen nou, épi éfasi péché nou. Gwanmèsi sakwifis Jézi, Jéhova kay pawdonnen nou lè’y wè nou doubout fè sé mové bagay-la nou té ka fè-a.​—1 Jan 1:7.

NI KONFYANS JÉHOVA KAY PAWDONNEN’W

18. Kisa nou ja konsidiwé konsèné pawdonnasyon Jéhova?

¹⁸ Annou wivizé sé pli gwo pwen-an nou ja konsidiwé an atik sala. La pa ni pyèsonn ki ka pawdonnen kon Jéhova. Pouki nou sa di sa? Pwèmyéman, Jéhova toujou pawé pou pawdonnen. Dézyenman, la pa ni pyèsonn ki konnèt nou kon Jéhova. Paski i konnèt tout bagay konsèné nou, i ka sav si nou vwéman wépanti. Twazyenman, lè Jéhova pawdonnen nou, i ka éfasi péché nou. Sé konmsi, nou pa té janmen péché. Konsa, konsyans nou ka nèt, èk nou ka ni on bon wilasyon épi’y.

19. Magwé nou pa pawfé, èk nou ka fè lèwè èk péché, pouki nou sa ni lajwa?

¹⁹ Paski nou pa pawfé nou ka fè lèwè èk péché. Kanmenm, i sa soulajé nou lè nou li pawòl-la an liv Insight on the Scriptures, Vòlim 2, paj 771. La, i di: “Jéhova sé on Dyé ki plen mizèwikòd, èk i konnèt sèvant li fèb. Alò, sèvant Bondyé pa ni pou toujou santi twis paski yo ka fè péché èk fè lèwè. (Sam 103:8-14; 130:3) Konsa, si yo fè tout sa yo pé pou viv adan on mannyè ki kay plè Bondyé, yo kay ni lajwa. (Filp. 4:4-6; 1 Jan 3:19-22).” Sa vwéman ka ankouwajé nou!

20. Kisa nou kay konsidiwé an lòt atik-la?

²⁰ Nou vwéman apwésyé Jéhova sé on Dyé ki pawé pou pawdonnen nou lè nou wépanti. Kanmenm, koumannyè nou sa swiv ègzanp Jéhova an mannyè i ka pawdonnen? Ki mannyè nou sa pawdonnen menm kon Jéhova? Mé, ki lòt diféwans la ni ant mannyè nou ka pawdonnen, èk mannyè Jéhova ka pawdonnen? Èk pouki i enpòtan pou konpwann sé diféwans-lan? Lòt atik-la kay wéponn sé kèstyon sala.