Kisa Pawdonnasyon Jéhova Vlé Di Pou Chak Di Nou?

1. Pouki i pa toujou ézé pou konpwann kisa’y vlé di, lè yon moun di i pawdonnen on lòt moun?

“MWEN PAWDONNEN’W.” Sa sé on bèl bagay pou tann. Mé ès ou vwéman konnèt kisa sé mo pawòl sala vlé di? Pou ègzanp, annou di ou fè ében di on bagay ki blésé tjè on moun, èk moun-lan di’w i pawdonnen’w. Sa bon. Mé, kisa sa vlé di? Ès moun-lan di’w sa paskè i pawdonnen’w konplètman, èk wilasyon zòt pa chanjé? Ében ès i di’w sa senpliman paski i pa vlé palé épi’w ankò? Ou pa sav. Konsa vwéman, i pa toujou ézé pou konpwann kisa’y vlé di, lè yon moun di i pawdonnen on lòt moun.

2. Kisa Bib-la ka di nou konsèné pawdonnasyon Jéhova? (Gadé nòt-la an bout paj-la osi.)

² Pawdonnasyon Jéhova sé on bagay ki èstòdinè. Wi, la pa ni pyèsonn ki sa pawdonnen mannyè-a Jéhova ka pawdonnen. Mi sé sa Bib-la ka di konsèné Jéhova: “Ou ka pawdonnen adan on mannyè ki konplèt, sé pou sa moun ni wèspé pou ou.”a (Sam 130:4) Konsa, la ni on gwo diféwans ant mannyè-a nou ka pawdonnen yonn a lòt, èk mannyè-a Jéhova ka pawdonnen nou. Anfen, an sèksyon Bib-la yo ka kwiyé Vyé Tèstanman-an, délè yo ka sèvi on mo pawòl an langaj Hibrou pou dékwi pawdonnasyon Jéhova. Mé yo pa ka janmen sèvi mo pawòl sala lè yo ka palé konsèné yon moun ka pawdonnen on lòt moun. Konsa, lè’y vini pou pawdonnasyon, sé sèlman Jéhova ki sa moutwé nou kisa pawdonnasyon vwéman vlé di.

3. Ki diféwans la ni ant pawdonnasyon Jéhova épi pawdonnasyon lézòm? (Izaya 55:6, 7)

³ Lè Jéhova pawdonnen on moun, i ka éfasi péché-a yo fè-a konplètman. Sa vlé di, i ka fè péché-a dispawèt. Konsa, moun-lan sa kontiné pou ni on bon wilasyon épi’y. Lézòm pa sa janmen pawdonnen an mannyè sala. Asiwé ou kay dakò, nou pa sa fini wimèsyé Jéhova, paski i ka toujou pawdonnen nou.​—Li Izaya 55:6, 7.

4. Ki mannyè Jéhova ka édé nou pou konpwann kisa pawdonnasyon vwéman vlé di?

⁴ Bon, lavéwité-a sé sa, nou pa sa pawdonnen an menm mannyè-a Jéhova ka pawdonnen, paskè nou pa pawfé. Mé, Jéhova ka sèvi bèl ti ilistwasyon an Bib-la, pou édé nou konpwann kisa pawdonnasyon vwéman vlé di. Konsa an atik sala, nou kay ègzanminé yonndé an sé ilistwasyon sala. Èvèk sa kay édé nou pou konpwann mannyè Jéhova ka éfasi péché nou èk édé nou pou ni on bon wilasyon épi’y ankò, lè nou wépanti pou sé bagay-la nou fè ki pa bon-an. Osi, kon nou ègzanminé sé ilistwasyon-an, nou kay wè mannyè Papa nou Jéhova, ka twété nou épi tèlman jantiyès èk konpasyon. Èvèk sa kay édé nou pou fòtifyé lanmityé nou pou Jéhova. Osi, i kay édé nou pou dévlopé pli apwésiasyon pou pawdonnasyon’y.

JÉHOVA KA JÉTÉ PÉCHÉ NOU

5. Lè Jéhova pawdonnen nou, sé konmsi i fè kisa?

⁵ An Bib-la, souvan yo ka konpawé péché épi on chay ki byen lou. Pou ègzanp, mi sé sa Wa David té di konsèné sé péché-a i tè fè-a: ‘Péché mwen mouté pli ho pasé tèt mwen. Yo menm kon on chay ki lou; yo twòp pou mwen pòté.’ (Sam 38:4) Mé Bib-la ka moutwé, dépi on moun wépanti, Jéhova ka pawdonnen péché’y. (Sam 25:18; 32:5) An langaj Hibrou, èkspwèsyon-an yo sèvi pou “pawdonnen” vlé di, pou “lévé” on bagay, ében pou “chayé’y alé.” Konsa lè nou fè sa ki pa bon, konsyans nou ka bat nou. Èk sa ka fè nou santi akwèdi nou ni on chay ki twò lou asou zépòl nou. Mé lè Jéhova pawdonnen nou, sé konmsi i pwan chay-la ki asou zépòl nou-an, èk i pòté’y alé.

6. Lè Jéhova pawdonnen nou, ki otan lwen i ka mété péché nou?

⁶ Annou gadé on lòt bèl ilistwasyon ki ka édé nou pou konpwann ki otan lwen, Jéhova ka mété péché nou. Sam 103:12 ka di: “Menm kon koté sòlèy-la ka lévé-a lwen koté i ka kouché-a, sé menm otan lwen [Jéhova ka mété péché] nou.” Vwéman, sòlèy-la pa sa janmen lévé menm koté-a i ka kouché-a. Konsa ilistwasyon sala vlé di, lè Jéhova pawdonnen nou pou on péché, i ka pwan péché-a èk i ka mété’y pli lwen pasé nou sa imajiné. Sa ka ban nou asiwans-lan ki, Jéhova ka pawdonnen nou konplètman. Ès ou pa byen kontan pou konnèt sa!

7. Silon Bib-la, lè Jéhova pawdonnen nou, kisa’y ka fè épi péché nou? (Mayka 7:18, 19)

⁷ Wi, Bib-la ka moutwé, lè Jéhova pawdonnen nou, i ka mété péché nou byen lwen nou. Mé ès Jéhova ka kontiné chonjé sé péché sala? Mé non! Mi sé sa Wa Hèzikaya té di konsèné Jéhova: ‘Ou jété tout péché mwen dèyè do’w.’ (Izay. 38:9, 17) Ilistwasyon sala ka moutwé, lè on moun wépanti, Jéhova ka jété péché yo, èk i pa ka gadé sé péché sala ankò. Bib-la ka sèvi on lòt bèl ilistwasyon pou fè menm pwen sala an Mayka 7:18, 19. (Li’y.) An ilistwasyon sala, Jéhova ka jété péché nou an fon lanmè-a. An tan lontan, si on bagay té tonbé an fon lanmè-a, ou sav ou pa té kay janmen jwenn bagay sala ankò. Ében lè Jéhova pawdonnen nou, i ka jété péché nou si tèlman lwen, sé akwèdi yo pèd. Konsa, Jéhova pa kay chonjé sé péché sala ankò.

8. Kisa nou ja apwann an atik sala?

⁸ Bon, nou ja diskité yonndé bèl ti ilistwasyon ki ka moutwé, Jéhova ka pawdonnen nou konplètman. Konsa nou pa ni pou santi koupab pou péché Jéhova ja pawdonnen nou pou. Anfen, nou sa jis ni tjè kontan, paskè kon Wa David té di: “Sé moun-an Bondyé ja pawdonnen pou tout sé mové bagay-la yo ka fè-a, épi i ja tiwé péché yo-a, kontan an chay. Wi, nonm-lan Bondyé pa ka matjé péchéʼy-la kontan an chay.” (Ronm 4:6-8) Mésyé, sé sa ou ka kwiyé pawdonnasyon ki wéyal!

JÉHOVA KA ÉFASI PÉCHÉ NOU

9. Ki ilistwasyon Bib-la ka sèvi pou moutwé nou, Jéhova ka pawdonnen nou konplètman?

⁹ La ni lòt bèl ti ilistwasyon Jéhova ka sèvi an Bib-la pou édé nou konpwann, mannyè i ka éfasi péché moun ki wépanti. Èvèk Jéhova ka fè sa, gwanmèsi wanson sakwifis Jézi. Mi yon ègzanp. Lè on moun wépanti, Bib-la ka di, Jéhova lavé péché moun sala. (Sam 51:7; Izay. 4:4; Jér. 33:8) Sa sé menm pwen-an Jéhova té ka fè, lè’y té di pèp li: ‘Menm si péché zòt pli wouj pasé san, mwen kay fè yo vini blan kon lannèj. Menm si yo kon on twèl ki byen taché an wouj, yo kay vini blan kon lenn mouton.’ (Izay. 1:18) Bon, tout moun sav, sé pa dé twaka ou kay ni si’w ka éséyé pou tiwé on tach wouj asou on moso twèl ki blan. Anfen, pitèt ou pa kay janmen éwisi tiwé tach-la. Mé an ilistwasyon sala Jéhova ka pwonmèt, menm si péché nou byen mové, kon an tach wouj asou twèl blan, i kay tiwé tach péché nou, èk i kay fè “twèl-la” viwé blan kon lenn mouton. Sa vlé di, lè Jéhova pawdonnen on moun, i ka éfasi péché yo nèt. Wi, i ka nétwayé yo. Konsa, moun sala ka vini pwòp an zyé Bondyé ankò. Mi on bèl asiwans!

10. Ki lòt ilistwasyon Jéhova ka sèvi pou moutwé i ka pawdonnen nou konplètman?

¹⁰ Kon nou té èspliké an atik-la avan sala, Bib-la ka konpawé péché épi on dèt nou ka dwé Jéhova. (Maf. 6:12; Louk 11:4) Èk chonjé, nou ka toujou fè péché paskè nou pa pawfé. Konsa chak fwa nou fè on péché, sé akwèdi nou ka antwé pli fon an dèt. Wi, nou ka dwé Jéhova on gwo dèt! Èvèk sa sé on dèt nou té kay ni pou péyé, paskè nou sipozé péyé pou péché nou. Mé lè Jéhova pawdonnen nou, sé konmsi i ka di nou, nou pa ka dwé’y ankò. Èk Jéhova pa kay mandé nou pou péyé pou péché i ja pawdonnen nou pou. Ès bèl ti ilistwasyon sala pa ka soulajé’w, èk ba’w tjè kontan? Mé wi, i ka fè’w santi léjè. Sé akwèdi ou té ni on gwo dèt asou kont ou, èvèk on moun péyé tout dèt-la ba’w.

11. Lè Bib-la di, Jéhova ka “éfasi” péché moun ki wépanti, kisa sa vlé di? (Twav. 3:19)

¹¹ On lòt bagay Bib-la ka di nou sé sa, lè Jéhova pawdonnen nou, i ka éfasi péché nou. (Li Twav. 3:19 NWT.) Katjilé asou sa. Si’w fini péyé on dèt ou té ka dwé bank-lan, dènyé bagay-la ou kay wè asou wakont ou sé on zéwo, paskè ou pa ka dwé yo ankò. Mé, bank-la sa di’w ki kantité lajan ou té péyé yo, paskè yo ni enfòmasyon-an toujou. Mé lè’w éfasi on bagay, sa vlé di ou pa sa wè bagay sala ankò. Konsa lè Bib-la di, Jéhova ka éfasi péché moun ki wépanti, sa vlé di i ka pawdonnen yo tèlman konplètman, péché-a pa la ankò. Anfen, sé akwèdi moun-lan pa té janmen fè sé péché sala. Pa dé kontan nou kontan, pou konnèt sa!​—Sam 51:9.

12. Kisa nou ka apwann an ilistwasyon-an konsèné gwo nwaj-la?

¹² La ni on lòt bèl ilistwasyon Jéhova ka sèvi pou moutwé nou kisa i ka fè épi péché moun ki wépanti. Jéhova di: “Mwen kay éfasi sé mové bagay-la ou fè-a, akwèdi mwen mété yo dèyè on nwaj. Èk mwen kay fè péché’w dispawèt akwèdi mwen kouvè yo épi on gwo nwaj.’ (Izay. 44:22) Sa vlé di, lè Jéhova pawdonnen nou, sé akwèdi i ka sèvi on gwo nwaj pou séwé sé péché-a nou fè-a. Konsa, nou pa ka wè sé péché sala ankò, èvèk Jéhova pa ka wè yo non plis.

13. Kisa nou apwann an sé bèl ilistwasyon-an nou ja konsidiwé-a?

¹³ Bon, kisa nou apwann an sé bèl ilistwasyon-an nou ja konsidiwé-a? Ében i bon pou nou chonjé, wanson sakwifis Jézi ka péyé pou dèt péché nou konplètman. Èk lè Jéhova pawdonnen nou, i ka éfasi péché nou tèlman konplètman, sé akwèdi nou pa té janmen fè péché-a. Wi, dépi nou wépanti, nou kay twapé pawdonnasyon-an Jéhova ka bay—pawdonnasyon-an ki wéyal. Konsa, nou pa ni pyès wézon pou kontiné santi koupab pou péché Jéhova ja pawdonnen nou pou.

LÈ JÉHOVA PAWDONNEN NOU I KA AKSÈPTÉ NOU KON JAN’Y ANKÒ

14. Pouki nou sa ni konfyans ki, Jéhova kay pawdonnen nou konplètman? (Gadé sé pòtwé-a osi.)

¹⁴ Kon nou ja wè, Jéhova ka pawdonnen nou adan on mannyè ki konplèt. Konsa nou pa ni pou kontiné santi koupab. Èvèk nou pa ni pou kwè, Jéhova faché épi nou ében i ka annèk gadé pou lokasyon pou’y pini nou, paskè i pa kay janmen fè sa. Mé, pouki nou sa asiwé Jéhova kay pawdonnen nou konplètman? Ében, mi sé sa Jéhova té di pwofèt Jérémaya konsèné sé péché-a jan Izwayèl té ka fè-a: ‘Mwen kay pawdonnen lèwè yo, èk mwen pa kay chonjé péché yo ankò.’ (Jér. 31:34) Èk zapòt Pòl té fè menm pwen sala lè’y té ka palé konsèné mannyè Jéhova té kay pawdonnen pèp li. (Hib. 8:12) Mé vwéman, kisa sa vlé di?

15. Lè Jéhova di i pa kay chonjé péché nou, kisa sa vlé di?

¹⁵ Délè, an Bib-la, mò pawòl-la “chonjé” vlé di, pou pwan aksyon, ében pou fè on bagay. Mi yon ègzanp. Yonn an sé kwiminèl-la ki té ka pann bò Jézi té di’y: “Jézi, chonjé mwen lè ou kay vini kon wa!” (Louk 23:42, 43) Nonm sala pa té ka mandé Jézi pou annèk tjenn li an lidé. I té ka mandé Jézi pou fè on bagay ba’y. Èk wépons Jézi ka moutwé, i té kay pwan aksyon. Wi, i té kay wésisité nonm-lan. Konsa, lè Jéhova di i pa kay chonjé péché nou ankò, sa vlé di dépi i pawdonnen nou, i pa kay janmen pini nou pou sé menm péché sala ankò.

16. Ki ilistwasyon Bib-la ka sèvi pou édé nou konpwann mannyè nou ka santi lè Jéhova pawdonnen nou?

¹⁶ Bib-la ka sèvi on bèl ilistwasyon pou édé nou konpwann mannyè-a nou ka santi lè Jéhova pawdonnen nou. Bagay-la sé sa, nou tout sé péchè. Anfen, kon Bib-la ka di, nou “èslav [anba] péché.” Mé, Jéhova “libéwé [nou] anba péché.” (Ronm 6:17, 18; Wév. 1:5) Wi, lè Jéhova pawdonnen nou, nou ka kontan èk nou ka santi lib, menm kon on moun ki té èslav, èk yo libéwé’y.

17. Pouki nou sa di, pawdonnasyon Jéhova ka djéwi nou? (Izaya 53:5)

¹⁷ Li Izaya 53:5. An ilistwasyon sala, Bib-la ka konpawé sitiwasyon nou kon péchè, épi on mové maladi. Mé gwanmèsi wanson-an Jéhova épi Jézi potjiwé-a, nou sa twapé djéwizon. (1 Pita 2:24) Wi, lè nou fè péché nou ka donmajé wilasyon nou épi Jéhova. Mé wanson sakwifis Jézi ka fè’y posib pou Jéhova pawdonnen nou, èk pou nou sa ni on bon wilasyon épi’y ankò. Vwéman, sé pa dé tjè kontan sa ka ban nou! I ka fè nou santi akwèdi nou té ka soufè épi on mové maladi, èk on moun djéwi nou.

KISA PAWDONNASYON JÉHOVA VLÉ DI POU NOU

18. Kisa nou apwann an sé ilistwasyon-an nou konsidiwé konsèné pawdonnasyon Jéhova? (Osi, gadé enfòmasyon-an ki anba sijé-a “Mannyè Jéhova Ka Pawdonnen.”)

¹⁸ Bon, an atik sala nou ègzanminé déotwa bèl ilistwasyon konsèné pawdonnasyon Jéhova, èvèk nou apwann bèl lison ki ka touché tjè nou. Pou ègzanp, nou apwann Jéhova ka pawdonnen nou konplètman, èk nou sa asiwé i pa kay pini nou pou sa’y ja pawdonnen nou pou. Konsa, nou sa ni on bon wilasyon épi Papa nou ki an syèl. An menm di tan-an, nou ni pou chonjé, pawdonnasyon Jéhova sé on kado nou pa méwité. Sé paski Jéhova enmen nou si tèlman, i ka pawdonnen nou.​—Ronm 3:24.

19. (a) Ki mannyè nou sipozé gadé pawdonnasyon Jéhova? (Ronm 4:8) (b) Kisa nou kay diskité an lòt atik-la?

¹⁹ Li Ronm 4:8. Vwéman, sé pa dé apwésyé nou sipozé apwésyé pawdonnasyon Jéhova! (Sam 130:4) Mé, avan Jéhova sa pawdonnen nou, la ni on bagay ki byen enpòtan nou ni pou fè. Mi sé kon sa Jézi té mété’y: ‘Si’w pa pawdonnen moun lè yo péché kont ou, Papa’w pa kay pawdonnen’w lè ou fè sa ki pa bon.’ (Maf. 6:14, 15 NWT) Konsa i a klè, nou bizwen imité Jéhova, èk pawdonnen lézòt. Mé, ki mannyè nou sa fè sa? Nou kay diskité wépons-lan pou kwèstyon sala an lòt atik-la.