Pouki Nou Ka Apwésyé Pawdonnasyon Jéhova?

1-2. Pouki nou sa di, nou adan on sitiwasyon menm kon jenn nonm-lan nou mansyonnen-an an pawagwaf 1?

IMAJINÉ sitiwasyon sala: On jenn nonm lévé adan on fanmi ki té ni an chay lajan. Mé yon jou, manman’y épi papa’y mò sibitman, adan on aksidan. San dout, nouvèl sala kasé tjè gason-an. Mé, i twapé lòt mové nouvèl asou sa. I vini konnèt, pawan’y té gaspiyé tout lajan-an yo té ni-an, èvèk yo mété kò yo anba gwo dèt. Konsa apwézan, pito i éwityé on patjé lajan, sa pawan’y kité ba’y sé on gwo dèt. Anfen, dèt-la si tèlman gwo, gason-an pa kay sa janmen fini péyé’y. Èk an plis di sa, sé moun-lan pawan’y té ka dwé-a vlé lajan yo la menm.

² Adan on sans, nou sa di nou adan on sitiwasyon menm kon jenn nonm sala, paskè pwèmyé pawan nou Adanm épi Èv, té pawfé. Èk yo té ka viv adan on bèl pawadi. (Jen. 1:27; 2:7-9) Konsa, yo té sa enjwi on bèl lavi pou tout tan. Mé, lè yo dézobéyi Bondyé, tout bagay chanjé. Yo vini péchè, yo pèd bèl pawadi-a yo té ni-an, èk yo pèd òpòtyounité-a pou viv pou tout tan. Èvèk kisa yo kité bay ich yo? Bib-la ka di nou: “Sé yon nonm [Adanm] ki mennen péché an latè sala, épi péchéʼy mennen lanmò. Bon, kon tout moun ja péché-a, . . . tout moun oblijé mò.” (Ronm 5:12) Wi, sa Adanm épi Èv kité ban nou sé péché, èvèk péché ka mennen lanmò. Péché-a nou éwityé hòd Adanm-lan menm kon on gwo dèt. On dèt nou pyès pa sa janmen fini péyé.​—Sam 49:8.

3. Pouki Bib-la ka konpawé péché épi on “dèt”?

³ Wi, Bib-la ka konpawé péché épi on dèt. (Maf. 6:12; Louk 11:4 Maf. 18:32-35) Mé pouki? Ében lè nou péché, sé konmsi nou ka dwé Jéhova on dèt, paskè nou sipozé péyé pou péché nou. Èk Jéhova ni tout dwa pou mandé nou pou péyé dèt sala. Mé, pèyman-an pou péché sé lanmò. Konsa, si Jéhova pa té fè’y posib pou nou twapé pawdonnasyon, nou té kay ni pou mò, pou péyé pou péché nou. Èk, nou té kay mò san pyès èspwa pou viv ankò.​—Ronm 6:7, 23.

4. (a) Si nou pa té twapé èd, kisa ki té kay wivé nou? (Sam 49:7-9) (b) An Bib-la, kisa mo pawòl-la “péché” vlé di? (Osi, gadé enfòmasyon-an ki anba sijé-a: “Péché.”)

⁴ Konsa, ès i posib pou nou twapé tout sa Adanm épi Èv té pèdi-a? Ében, nou pa té kay sa janmen fè sa pa kò nou. (Li Sam 49:7-9.) Wi, si nou pa tè twapé èd, nou pa té kay ni èspwa-a pou viv pou tout tan, èvèk nou pa té kay ni èspwa wézèwèksyon-an nonplis. Anfen lè nou mò, nou té kay menm kon sé zannimo-a. Sa vlé di, nou pa té kay ni pyès èspwa pou viv ankò.​—Éklé. 3:19; 2 Pita 2:12.

5. Pou édé nou péyé dèt péché-a Adanm kité ban nou-an, kisa Papa nou Jéhova fè? (Gadé pòtwé-a.)

⁵ Bon, katjilé asou jenn nonm-lan nou té mansyonnen an paragraf yonn-lan. Ki mannyè ou kwè i té kay santi, si on nonm ki byen wich ofè pou péyé dèt-la ba’y? San dout, jenn nonm sala té kay aksèpté sa épi bon tjè, èvèk i té kay moutwé an chay apwésiasyon. An menm mannyè-a, pou édé nou péyé dèt péché-a nou éwityé hòd Adanm-lan, Papa nou Jéhova ban nou on bèl kado. Konsèné bèl kado sala, mi sé sa Jézi di: “Bondyé té tèlman enmen sé jan latè-a, i bay sèl Gasonʼy-lan pou yo. [Konsa] tout moun ki kwè an li pa kay pèd lavi yo, mé yo kay ni lavi étonnèl.” (Jan 3:16) Èvèk bèl kado-a Jéhova ban nou-an ka osi fè’y posib pou nou ni an bon wilasyon épi Papa nou ki an syèl.

6. Kisa nou kay diskité an atik sala, èk pouki?

⁶ Mé, kisa nou ni pou fè pou nou sa twapé pawdonnasyon pou péché nou, èk lòt bennéfis hòd bèl kado-a Jéhova ban nou-an? Pou wéponn kwèstyon sala, Bib-la ka palé konsèné bagay tèl kon vini jan épi Bondyé ankò, pawdonnasyon, wanson, délivwans, èk vini dwèt an zyé Bondyé. An atik sala, nou kay diskité kisa chak sé bagay sala vlé di. Èvèk kon nou mèdité asou enfòmasyon sala, apwésiasyon nou pou pawdonnasyon Jéhova kay agwandi.

ÒBJÈKTIV-LA: POU ÉDÉ NOU VINI JAN ÉPI BONDYÉ ANKÒ

7. (a) Apa di lavi étonnèl, kisa ankò Adanm épi Èv pèdi? (b) Kon nou sé désandan Adanm épi Èv, ki mannyè nou té sa vini jan épi Bondyé? (Ronm 5:10, 11)

⁷ Kon nou ja mansyonnen an paragraf 2, lè Adanm épi Èv péché, yo pèdi bèl òpòtyounité-a yo té ni pou viv pou tout tan. Apa di sa, yo osi pèdi bèl wilasyon-an yo té ni épi Papa yo Jéhova, paskè avan yo péché, yo té pa an fanmi Bondyé. (Louk 3:38) Mé lè yo dézobéyi Jéhova, i tiwé yo an fanmi’y. Èvèk tout sa té fèt avan yo té fè ich. (Jen. 3:23, 24; 4:1) Konsa, pyès désandan Adanm pa té sa vini jan épi Jéhova pa kò yo. Pou nou té sa vini jan épi Bondyé ankò, nou té bizwen èd. (Li Ronm 5:10, 11.) Moun ki ka fè wichach asou sé bagay sala di, mo pawòl-la yo sèvi an langaj Gwik pou èkspwèsyon-an “vini jan Bondyé ankò” vlé di, “pou fè jan épi on moun ki té lèlmi’w.” Konsa, kon nou sé désandan Adanm, nou tout té bizwen èd pou nou sa dévlopé on bon wilasyon épi Bondyé, èk vini jan’y. Mé i bon pou chonjé, sé Jéhova ki pwan démach pou fè’y posib pou nou sa vini jan’y ankò. Ki mannyè i fè sa?

AWANJMAN-AN: POU NOU SA TWAPÉ PAWDONNASYON

8. Kisa Jéhova fè, pou nou sa ni on bon wilasyon épi’y ankò?

⁸ Pou fè’y posib pou nou twapé tout sa Adanm té pèdi-a, èk pou nou sa ni on bon wilasyon épi Bondyé ankò, Jéhova mété on bèl awanjman an plas. Wi, i ban nou on bagay ki té ni menm valè-a épi sa Adanm té pèdi-a. Pòsyon Bib-la ki té ékwi an langaj Gwik, ka osi palé konsèné mannyè-a Jéhova fè’y posib pou on moun sa vini jan’y ankò, èk enjwi on bon wilasyon épi’y.—(Ronm 3:25).

9. Ki awanjman Jéhova té mété an plas pou fè’y posib pou jan Izwayèl twapé pawdonnasyon pou péché yo?

⁹ Jéhova té mété yon awanjman an plas pou fè’y posib pou jan Izwayèl twapé pawdonnasyon pou péché yo, épi pou yo sa ni on bon wilasyon épi’y. Yon jou chak lanné, jan Izwayèl té ni on sélébwasyon spésyal yo té ka kwiyé, Jou Pawdonnasyon Pou Péché. Jou sala, chèf Pwèt-la té ka ofè sakwifis zannimo pou sé moun-lan twapé pawdonnasyon pou péché yo. Kanmenm, sakwifis zannimo pa té sa vwéman kouvè péché sé moun-lan, paskè lavi lézòm ni otan pli valè pasé lavi zannimo. Mé, dépi jan Izwayèl té ofè sé sakwifis-la yo té sipozé ofè-a pou moutwé yo té wépanti hòd péché yo, Jéhova té pawé pou pawdonnen yo pou péché yo. (Hib. 10:1-4) On lòt bagay sé sa, sé sakwifis-la yo té ka ofè-a té ka édé yo pou chonjé, yo sété péchè, èvèk yo té bizwen on bagay ki té ni pli valè pasé sakwifis zannimo, pou kouvè péché yo konplètman.

10. Pou lézòm sa twapé pawdonnasyon pou péché yo, kisa Jéhova fè?

¹⁰ Pou lézòm sa twapé pawdonnasyon pou péché yo, Jéhova fè awanjman pou Gason’y Jézi, “ofè kòʼy kon yon sakwifis yon sèl kou, [pou’y] té pawdonnen péché an pil moun.” (Hib. 9:28) Wi, Jézi bay lavi’y kon yon wanson pou “sové an chay moun.” (Maf. 20:28) Mé, kisa ki wanson-an?

WANSON-AN: PWI-A JÉHOVA PÉYÉ POU NOU SA TWAPÉ PAWDONNASYON

11. (a) Pouki on wanson té nésésè? (b) Ki kalité moun ki té kay sa péyé wanson-an?

¹¹ Silon Bib-la, pou nou sa twapé pawdonnasyon pou péché nou èk vini jan épi Bondyé, Jéhova désidé, yon wanson té nésésè. Mé kisa ki wanson-an ki té kay fè’y posib pou lézòm twapé sa Adanm té pèdi-a? Ében chonjé, lè Adanm épi Èv péché, yo pèdi lavi pawfé-a yo té ni-an, èvèk yo osi pèdi òpòtyounité-a yo té ni pou viv pou tout tan. Konsa, pou nou sa vini pawfé èk viv pou tout tan, wanson-an té kay ni pou égal épi sa yo té pèdi-a. (1 Tim. 2:6) Alò, sèl mannyè on nonm té kay sa péyé wanson-an sé (1) si’y té pawfé; (2) si’y té sa viv pou tout tan asou latè-a; èk (3) si’y té pawé pou bay lavi pawfé’y kon yon sakwifis pou sové nou. Wi, sa sé sèl mannyè, lavi moun sala té kay sa péyé pou, ében wiplasé sa Adanm té pèdi-a.

12. Pouki Jézi té sa bay lavi’y pou péyé wanson-an?

¹² Apwézan, annou konsidiwé twa (3) wézon pouki Jézi té sa bay lavi’y pou péyé wanson-an. (1) I té pawfé. Jézi té fèt kon on nonm ki té pawfé, èk “i pa janmen péché.” (1 Pita 2:22) (2) Kon’y té pawfé, i té sa viv asou latè-a pou tout tan. Èk (3) i té pawé pou mò èk bay lavi pawfé-a i té ni-an pou sové nou. (Hib. 10:9, 10) Wi, Jézi sété on nonm ki té pawfé, menm kon Adanm té pawfé avan’y péché. (1 Kòr. 15:45) Konsa lè’y mò, lavi’y péyé pwi-a ki té nésésè pou wiplasé sa Adanm té pèdi-a. (Ronm 5:19) An mannyè sala, Jézi vini “dènyé Adanm-lan.” Wi, la pa ni pyès wézon pou on lòt moun vini péyé pou sa Adanm té pèdi-a. Kon lévanjil-la di, “Jézi Kwi ofè yon sèl sakwifis pou péché, èk sakwifis sala té asé pou tout tan.”​—Hib. 7:27; 10:12.

13. Kisa ki ka fè’y posib pou nou ni on bon wilasyon épi Bondyé?

¹³ Bon, kisa ki ka fè’y posib pou nou ni on bon wilasyon épi Bondyé? Ében, pou lézòm té sa ni an bon wilasyon épi Bondyé ankò, i té ni pou pawdonnen péché yo. Wanson-an sé awanjman-an Jéhova mété an plas pou fè’y posib pou’y pawdonnen nou. Èvèk san Jézi, ében lavi’y, ka wépwézanté pwi-a i péyé pou wanson-an.​—Èfés. 1:7; Hib. 9:14.

WÉZILTA-A: DÉLIVWANS ÈK VINI DWÈT AN ZYÉ BONDYÉ

14. Kisa nou kay diskité, èk pouki?

¹⁴ Mé, ki bennéfis nou ka twapé an sa Jéhova fè ban nou-an? Ében, Bib-la ka sèvi plizyè èkspwèsyon pou palé konsèné sé bennéfis-la nou ka twapé-a. Dé (2) an sé èkspwèsyon sala ka édé nou pou konpwann sé bennéfis-la chak di nou sa twapé, hòd pawdonnasyon Jéhova. Konsa, nou kay diskité kisa sé dé (2) èspwèsyon sala vlé di, pou nou wè adan sé bennéfis-la chak di nou sa twapé.

15-16. (a) Wanson-an ka délivwé, ében libéwé nou anba kisa? (b) Ki mannyè nou ka santi pou konnèt nou sa twapé délivwans anba péché épi lanmò?

¹⁵ Bib-la ka moutwé, wanson-an ka délivwé, ében libéwé nou. Mi sé konsa zapòt Pita èspliké’y. I di: “Paski zòt sav Bondyé té ni pou péyé an pwi pou i té sa tiwé [ében libéwé] zòt, anba vyé kalité lavi sala zòt éwityé pa lanmen ayèl zòt-la. Épi pwi-a i péyé-a sé pa bagay ki ka péwi kon lò épi dajan, mé sé épi lavi Jézi, ki té chè pasé pyès bagay ki janmen ni. Jézi bay laviʼy menm kon an ti mouton ki pa té ni pyès kalité défo adanʼy.”​—1 Pita 1:18, 19.

¹⁶ Wanson sakwifis Jézi, ka fè’y posib pou nou twapé délivwans anba péché épi lanmò, dé (2) bagay ki ka annékòz an chay soufwans pou tout moun. (Ronm 5:21) Wi, sa ki ka libéwé nou sé lavi Jézi, ében san’y—on bagay ki si tèlman valowab. Sé sa ki fè nou pa sa janmen fini wimèsyé Jéhova épi Jézi, pou tout sa yo ka fè ban nou.​—1 Kòr. 15:22.

17-18. (a) Kisa’y vlé di, pou vini dwèt an zyé Bondyé? (b) Lè Jéhova fè nou vini dwèt an zyé’y, ki bennéfis sa ka pòté nou?

¹⁷ Lè Bib-la di, Bondyé fè nou vini dwèt an zyé’y, sa vlé di, i pawdonnen péché nou. Mé tout kalité péché ka déplè Jéhova, èvèk la pa ni anyen nou sa fè pa kò nou, pou fè Jéhova pawdonnen nou. Wézon-an i ka pawdonnen nou, sé paski nou ka moutwé nou ni lafwa an sa i épi Jézi fè pou péyé wanson-an. Konsa, lè Jéhova pawdonnen nou, sa pa vlé di i ka fè on bagay ki pa jis.​—Ronm 3:24; Gal. 2:16.

¹⁸ Bon, lè Jéhova fè nou vini dwèt an zyé’y, ki bennéfis sa ka pòté nou? Ében Bondyé ja chwazi on ti gwoup moun anpanmi sé moun-lan i fè vini dwèt an zyé’y-la, pou kondwi épi Jézi an syèl. Èk i ka kwiyé sé moun-lan ki an ti gwoup sala, ich li. (Titòs 3:7; 1 Jan 3:1) I ka pawdonnen péché yo konplètman. Anfen, an zyé Jéhova sé konmsi yo pa té janmen péché. Konsa, yo kwalifyé pou kondwi an Wéyòm-lan. (Ronm 8:1, 2, 30) Lèwèstan sé moun-lan Bondyé fè vini dwèt an zyé’y-la, ni èspwa-a pou viv asou latè-a pou tout tan. Jéhova ka pawdonnen péché yo, èvèk i ka édé yo pou vini jan’y. (Jémz 2:21-23) Èk lè’y vini pou gwan latilyé-a ki kay chapé anba Anmagèdonn, yo pé pa janmen mò. (Jan 11:26) Osi, Bondyé pwonmèt, i kay wésisité lé mò—ni sa ki “bon,” ni sa ki “mové.” (Twav. 24:15; Jan 5:28, 29) Konsa finalman, Jéhova kay libéwé tout sèvant fidèl li ki asou latè-a, èk yo kay vini “ich” li.” (Ronm 8:21) Wi, wanson-an kay fè’y posib pou nou vini pawfé, èk pou nou vini ich Papa nou Jéhova, ankò. Mi on bèl bennédiksyon nou kay wisouvwè, gwanmèsi awanjman-an Jéhova mété an plas, pou nou sa twapé pawdonnasyon pou péché nou!

19. Nou té adan on mové sitiwasyon, mé gwanmèsi Jéhova épi Jézi, ki mannyè sa chanjé? (Osi, gadé enfòmasyon-an ki anba sijé-a “Pawdonnasyon Jéhova.”)

¹⁹ Lavéwité-a sé sa, nou té adan on mové sitiwasyon, menm kon jenn nonm-lan nou té mansyonnen pli bonnè-a. Sa sé menm jenn nonm-lan ki té pèd tout bagay, èk ki té éwityé gwo dèt-la i pa té kay sa janmen fini péyé-a. Mé gwanmèsi Jéhova, nou twapé èd, èk sitiwasyon nou chanjé. Wi, Jéhova fè yon awanjman pou nou sa twapé pawdonnasyon pou péché nou, èvèk Jézi péyé pwi-a pou wanson-an. Konsa, lafwa nou an sakwifis Jézi Kwi ka libéwé nou hòd péché épi lanmò. Èk lè Jéhova pawdonnen nou, i ka éfasi péché nou tèlman konplètman, sé akwèdi nou pa té janmen péché. Mé, sa ki ka fè nou pli kontan sé sa, wanson-an ka fè’y posib pou nou ni on bon wilasyon épi Jéhova, Papa nou ki an syèl.

20. Kisa nou kay diskité an lòt atik-la?

²⁰ Kon nou mèdité asou sa Jéhova épi Jézi ja fè ban nou, tjè nou ka vini plen épi apwésiasyon pou yo. Nou ka santi nou pa sa janmen fini wimèsyé yo. (2 Kòr. 5:15) Èk vwéman, si Jéhova épi Jézi pa té édé nou, nou pa té kay ni pyès èspwa. Mé, kisa pawdonnasyon Jéhova vlé di pou chak di nou? Nou kay diskité sa an lòt atik-la.