Sé Bennédiksyon-an Nou Ka Enjwi Paski Jéhova Enmen Nou

1. Kisa nou sa fè pou bay Jéhova tjè kontan?

IMAJINÉ ou bay an moun ou enmen an bèl kado, tèl kon an pè soulyé. I bèl toubonnman, èk i sa pwan ni sòlèy ni lapli! Mé si moun-lan pa janmen sèvi bèl soulyé sala, sa té kay vwéman dézapwenté’w. Ès pa? Okontwè, si moun-lan moutwé apwésiyasyon, èk i byen sèvi pè soulyé-a, sa té kay ba’w tjè kontan. Bon, an menm mannyè-a, Jéhova enmen nou si tèlman, i voyé Gason’y pou mò pou sové nou. Alò i ka bay Jéhova an chay tjè kontan lè nou moutwé apwésiyasyon nou pou bèl kado sala!​—Jan 3:16; Ronm 5:7, 8.

2. Kisa nou kay diskité an atik sala?

² Kanmenm, kon sé lanné-a ka pasé, nou pé koumansé pèd apwésiyasyon nou pou bèl kado sala, wanson-an. Èk si sa janmen wivé nou, sa té kay menm kon an moun ki wisivwè an bèl kado, mé i mété’y adan an plas koté i pa ka wè’y, jijéwè pou katjilé asou’y. Bon, pou sa pa wivé nou, nou vlé toujou tjenn an lidé nou sa Bondyé èk Jézi Kwi ha fè ban nou. Èvèk atik sala kay édé nou pou fè sa. Konsa, nou kay diskité mannyè nou ka twapé bennéfis hòd wanson-an apwézan, èk mannyè nou sa twapé bennéfis hòd li an tan pou vini. Èk osi, nou kay diskité sé diféwan bagay-la nou sa fè pou moutwé nou ka apwésyé lanmityé Jéhova, èspwèsman an sé simenn-lan avan èk apwé Mémoriyal-la.

MANNYÈ NOU KA TWAPÉ BENNÉFIS HÒD WANSON-AN APWÉZAN

3. Mansyonnen yon mannyè nou ka twapé bennéfis hòd wanson-an apwézan.

³ Wi, nou ha ka twapé bennéfis hòd wanson-an. Pou ègzanp, pou lapéti wanson-an, Jéhova ka pawdonnen péché nou. Bon, Jéhova pa oblijé fè sa, mé ofon tjè’y i vlé fè’y. Anfen, an Sam 86:5, Wa David di Jéhova: ‘Paski ou, Dyé Jéhova, ou bon èk ou pawé pou pawdonnen.’​—Sam 103:3, 10-13.

4. Bay ki moun Jéhova potjiwé wanson-an? (Louk 5:32; 1 Timòfi 1:15)

⁴ Bon, adan di nou pitèt ka santi nou pa méwité pawdonnasyon Jéhova. Anfen, nou pyès pa méwité’y. Pou ègzanp, zapòt Pòl di: “Mwen pa menm méwité pou moun kwiyé mwen an zapòt paski mwen fè [kongwigasyon] Bondyé-a soufè.” Mé magwé sa, i osi di: “Sé lagwas Bondyé ki fè mwen sa mwen yé-a.” (1 Kòr. 15:9, 10) Mé pouki Jéhova ka pawdonnen nou lè nou wépanti hòd péché nou? Ében, Jéhova ka pawdonnen nou paski i enmen nou, èk pa paski nou méwité sa. Alò si’w ka santi twis paski ou ka kwè ou pa méwité pawdonnasyon Jéhova, toujou chonjé, Jéhova pa té voyé Gason’y pou mò bay moun ki pawfé. Non, i voyé Gason’y pou mò pou sové moun ki ka santi twis pou lapéti péché yo, èk yo vlé chanjé.​—Li Louk 5:32; 1 Timòfi 1:15.

5. Ès Jéhova oblijé pawdonnen péché nou? Pouki ou ka di sa?

⁵ Bon. Menm si nou ha sèvi Jéhova pou plizyè lanné, nou pa janmen vlé kwè Jéhova oblijé pawdonnen péché nou. Sé vwé, Jéhova ka apwésyé tout sé bon bagay-la nou ja fè ba li. (Hib. 6:10) Kanmenm, Jéhova ban nou wanson-an kon an kado, èk pa kon an pèyman pou sé bon bagay-la nou ja fè ba li. Konsa, si nou ni an lidé nou, nou méwité pawdonnasyon Jéhova pou lapéti sé bon bagay-la nou ja fè ba li, nou ka fè an gwo lèwè. Anfen, si nou ka kwè sa, sé konmsi nou ka di Jézi pa té ni pou mò ban nou.​—Gadé Galécha 2:21.

6. Pouki zapòt Pòl té twavay wèd an sèvis Jéhova?

⁶ Zapòt Pòl té sav Jéhova pa té oblijé pawdonnen péché’y menm si i té ka twavay wèd an sèvis li. Alò, pouki i té twavay si tèlman wèd an sèvis Jéhova? Ében i té fè sa pou moutwé ki otan i té ka apwésyé jantiyès-la èk mizéwikòd-la Jéhova té moutwé’y. (Èfés. 3:7) Bon. Menm kon zapòt Pòl, nou pa ka kwè nou méwité mizéwikòd Jéhova. Mé nou ka twavay wèd an sèvis li, paski nou ka apwésyé mizéwikòd-la i ka moutwé nou.

7. An ki lòt mannyè nou ka twapé bennéfis hòd wanson-an apwézan? (Ronm 5:1; Jémz 2:23)

⁷ Bon, an lòt mannyè nou ka twapé bennéfis hòd wanson-an apwézan, sé sa; nou sa ni an bon wilasyon épi Jéhova.a Bon kon nou té diskité an atik-la avan, lè nou té fèt nou pa té ni an wilasyon épi Bondyé. Kanmenm, pou lapéti wanson-an nou sa “viv an lapé épi Bondyé” èk nou sa vansé pwé’y.​—Li Ronm 5:1; Jémz 2:23.

8. Pouki nou ni pou wimèsyé Jéhova pou bèl pwivilaj-la nou ni pou palé ba li an lapwiyè?

⁸ Paski nou ni an bon wilasyon épi Jéhova, nou ni bèl pwivilaj-la pou palé ba li an lapwiyè. Wi, Jéhova ka kouté lapwiyè nou. Èk pa sèlman sé lapwiyè-a sé fwè-a ka di an sé mitin nou-an, mé osi lè nou ka pwédyé pa kò nou. Osi, lè nou pwédyé nou ka ni mwens tèt cho. Èk an plis di sa, lapwiyè sa fòtifyé wilasyon nou épi Bondyé. (Sam 65:2; Jémz 4:8; 1 Jan 5:14) Anfen, padan Jézi té asou latè-a i té ka toujou pwédyé bay Jéhova, paski i té asiwé Papa’y té ka kouté’y èk lapwiyè té kay tjenn wilasyon’y épi Papa’y byen fò. (Louk 5:16) Wi, nou ka wimèsyé Jéhova pou wanson-an, paski kado sala ka fè’y posib pou nou vini jan’y, èk jis palé ba li an lapwiyè!

NOU SA NI AN BÈL LAVI AN TAN POU VINI GWANMÈSI WANSON-AN

9. Gwanmèsi wanson-an, ki bennéfis sèvant fidèl Bondyé kay enjwi an tan pou vini?

⁹ Bon. Gwanmèsi wanson-an, sèvant Bondyé ki wèsté fidèl kay enjwi an chay bennéfis. Pou ègzanp, Bondyé kay ba yo lavi étonnèl. Kanmenm, an chay moun pa ka kwè nou sa viv pou tout tan, paski tout moun ka mò. Mé chonjé, si Adanm pa té péché tout moun té kay viv pou tout tan. Alò, menm si i wèd pou kwè nou sa viv pou tout tan, nou vlé toujou chonjé Jéhova péyé an gwo pwi pou sa fèt. Wi, i voyé Gason’y pou mò pou nou sa ni lavi étonnèl.​—Ronm 8:32.

10. Kisa sé annonté-a èk sé lézòt sèvant Jéhova-a ka gadé pou an tan pou vini?

¹⁰ Magwé sé an tan pou vini nou kay enjwi lavi étonnèl, Jéhova vlé nou tjenn li an lidé apwézan. Pou ègzanp, sé annonté-a ka èspéwé bèl lavi-a yo kay enjwi an syèl, lè ansanm épi Jézi, yo kay kondwi latè-a. (Wév. 20:6) Èk sé lézòt sèvant Bondyé-a ka èspéwé bèl lavi-a yo kay enjwi an Pawadi asou latè-a san twistès, soufwans èk penn. (Wév. 21:3, 4) Bon. Si ou ni èspwa-a pou viv asou latè-a, chonjé, Jéhova fè lézonm pou viv asou latè-a. Konsa, menm si ou pa kay alé an syèl, lavi asou latè-a kay bèl toubonnman èk nou kay ni an chay djèwté.

11-12. Mansyonnen adan sé bennédiksyon-an nou kay enjwi an Pawadi. (Gadé sé pòtwé-a osi.)

¹¹ Bon. Imajiné sé bennédiksyon-an ou kay enjwi an Pawadi. Pou ègzanp, ou pa kay ni pyès tèt cho konsèné maladi èben lanmò. (Izay. 25:8; 33:24) Èk Jéhova kay ba’w tout sé bon bagay-la ou vlé. Bon, kisa ou vlé fè an Pawadi-a? Ès ou vlé apwann konsèné sé zannimo-a? Ès ou vlé apwann mannyè pou jwé mizik, èben ès ou vlé apwann mannyè pou pentiwé? An plis di sa, an Pawadi-a nou kay bizwen moun ki sa fè plan pou kay, èk pou bati kay. Osi, nou kay bouzwen moun pou planté manjé èk moun pou pwépawé manjé. An pa di sa, nou kay bouzwen moun pou fè zouti èk moun ki kay planté jaden flè èk otjipé yo. (Izay. 35:1; 65:21) Wi, lè nou ka viv pou tout tan, nou kay ni asé tan pou fè tout sé bagay sala èk an chay lòt bagay.

¹² Bon. Pa dé kontan nou kay kontan pou byen vini sé moun-lan Bondyé ka wésisité-a! (Twav. 24:15) Imajiné lajwa-a ou kay ni lè ou kay apwann pli konsèné Jéhova kon ou ka ègzanminé kwiyasyon’y. (Sam 104:24; Izay. 11:9) Èk jis pli bon pasé sé bagay-la nou ha mansyonnen-an, ou pa kay janmen péché. Alò, ou kay sa adowé Jéhova èk ou pa kay janmen ni pou mandé’y pou pawdonnasyon. Bon. Ès ou té kay vlé boukanté sa pou “an ti tak bon tan an péché” an sistèm sala? (Hib. 11:25) Awa! Èk sa sé paski bèl lavi sala otan pli bon pasé népòt bagay nou sa ni an latè sala! Èk chonjé, nou pa kay toujou ni pou èspéwé bèl Pawadi sala, paski toutalè i kay wivé. Wi, tout sé bagay sala kay fèt paski Jéhova enmen nou si tèlman i voyé Gason’y pou mò ban nou!

SA OU SA FÈ POU MOUTWÉ OU KA APWÉSYÉ LANMITYÉ JÉHOVA

13. Ki mannyè nou sa moutwé apwésiyasyon nou pou lanmityé Jéhova? (2 Kòrint 6:1)

¹³ Jéhova ha moutwé nou an chay lanmityé lè i voyé Gason’y pou mò ban nou. Konsa, ki mannyè nou sa moutwé apwésiyasyon nou pou lanmityé Jéhova? Ében nou sa fè sa lè nou fè sèvis li bagay-la ki pli enpòtan an lavi nou. (Maf. 6:33) Chonjé, “Jézi mò . . . kon sa nou pa kay viv bay kò nou ankò, mé bay sa ki mò-a épi wésisité-a.” (2 Kòr. 5:15) Wi, Jéhova ha moutwé nou an chay jantiyès èk mizéwikòd paski i pawdonnen péché nou. Alò lè nou fè tout sa nou pé an sèvis li, nou ka moutwé ki otan nou ka apwésyé lanmityé’y.​—Li 2 Kòrint 6:1.

14. Ki mannyè nou sa konfyé èk swiv diwèksyon Jéhova?

¹⁴ Bon. An lòt mannyè nou sa moutwé apwésiyasyon nou pou lanmityé Jéhova sé lè nou ka konfyé èk obéyi diwèksyon’y. Èk nou sa fè sa lè nou ni pou fè disizyon. Pou ègzanp, si ou ka katjilé konsèné gwo èdikasyon, èben si sé pou aksèpté an sèten twavay, ou kay konsidiwé kisa Jéhova vlé’w fè. (1 Kòr. 10:31; 2 Kòr. 5:7) Konsa, lè nou fè disizyon ki ka moutwé nou ka konfyé Jéhova, nou ka vansé pli pwé’y. Osi, lafwa nou an Jéhova èk èspwa nou pou viv pou tout tan ka vini pli fò.​—Ronm 5:3-5; Jémz 2:21, 22.

15. Ki mannyè nou sa moutwé apwésiyasyon nou pou lanmityé Jéhova diwan sézon Mémoriyal-la?

¹⁵ Bon. Mi an lòt bagay nou sa fè pou moutwé apwésiyasyon nou pou lanmityé Jéhova: Nou vlé fè tout sa nou pé an sé simenn-lan avan èk apwé Mémoriyal-la pou moutwé’y ki otan nou ka apwésyé wanson-an. An pa di pwépawasyon-an ou kay fè pou atandé Mémoriyal-la, ou sa osi envité lézòt pou atandé. (1 Tim. 2:4) Èk di yo sa ki kay fèt diwan Mémoriyal-la. An plis di sa, ou sa moutwé yo sé vidiyo-a Pou Ki Wézon Jézi Mò? èk Chonjé Lanmò Jézi. Osi, sé ansyen-an sipozé envité sé fwè èk sè-a ki doubout atandé mitin. Èk si adan sé fwè èk sè-a koumansé sèvi Jéhova ankò, pa dé kontan Jéhova èk tout sé sèvant li-a, ni an syèl ni asou latè-a kay kontan! (Louk 15:4-7) Konsa, lè nou atandé Mémoriyal-la, nou vlé fè asiwé nou byenvini pa sèlman yonn a lòt, mé èspwèsman moun ki ka atandé pou pwenmyé fwa-a èk fwè èk sè ki p’òkò atandé pou an chay tan. Wi, nou vlé fè yo santi konfòtab!​—Ronm 12:13.

16. Pouki i bon pou katjilé asou si nou sa fè pli an minis-la diwan sézon Mémoriyal-la?

¹⁶ Ès ou sa fè pli an minis-la an sé simenn-lan avan èk apwé Mémoriyal-la? Wi, si ou sa fè pli ou kay moutwé ki otan ou ka apwésyé sa Jéhova èk Jézi ha fè ba ou. Èk pli nou alé an pwédikasyon-an, sé pli nou kay wè mannyè Jéhova ka édé nou, èk nou kay ni pli konfyans an li. (1 Kòr. 3:9) Osi, fè asiwé pou li sé lévanjil-la pou Mémoriyal-la ki an ti liv-la, Examining the Scriptures Daily ében ki an Ti Liv Mitin Nou. Èk ou pé jis désidé pou fè wichach asou sé lévanjil sala.

17. Kisa ki ka ba Jéhova tjè kontan? (Gadé osi bwèt-la “Mannyè Ou Sa Moutwé Ou Ka Apwésyé Lanmityé Jéhova.”)

¹⁷ Sé vwé, sitiwasyon’w pitèt pa kay pèwmité’w pou fè tout sé bagay-la atik sala mansyonnen. Kanmenm, Jéhova pa ka konpawé sa ou ka fè épi sa lézòt moun ka fè. I ka wè lanmityé’w pou li. Èk i ka bay Jéhova an chay tjè kontan lè i wè’w ka moutwé apwésiyasyon’w pou bèl kado-a i ba’w, wanson-an.​—1 Sm 16:7; Mak 12:41-44.

18. Pouki nou ka apwésyé Jéhova èk Jézi Kwi si tèlman?

¹⁸ Jòdi, nou ka twapé pawdonnasyon pou péché nou, nou sé jan Jéhova, èk nou ni an bèl èspwa pou viv pou tout tan. Èk sèl wézon-an tout sé bèl bagay sala posib sé gwanmèsi wanson-an. Alò, nou vlé toujou moutwé Jéhova apwésiyasyon nou, paski i ban nou tout sé bennédiksyon sala. (1 Jan 4:19) Èk nou vlé moutwé Jézi apwésiyasyon nou osi, paski i enmen nou si tèlman, i bay lavi’y pou sové nou!​—Jan 15:13.