Kisa Sakwifis Lanmò Jézi Ka Enstwi Nou?

1. Pouki i bon pou atandé Mémoriyal Lanmò Jézi toulé lanné?

JÉHOVA ban nou on bèl kado lè i voyé gason’y pou mò ban nou. Épi nou sa di: “Mèsi Bondyé pou kado-a i ja ban nou-an”! (2 Kòr. 9:15) Alò, paski Jézi ba lavi’y ban nou, nou sa vini jan Jéhova, èk ni èspwa-a pou viv asou latè-a pou tout tan. Wi, Jéhova ka moutwé nou i vwéman enmen nou! Èk i bon pou nou moutwé apwésiyasyon pou sa. (Ronm 5:8) Bon. Jézi koumandé nou pou atandé mémoriyal lanmò’y toulé lanné pou nou pa pèd apwésiyasyon nou pou bèl kado sala, èk pou nou pa obliyé sa Jéhova èk Jézi té fè ban nou.​—Louk 22:19, 20.

2. Kisa nou kay diskité an atik sala?

² Lanné sala, Mémoriyal-la kay pwan kou Sanmdi, li 12 Avwi, 2025. San dout, nou tout ka fè plan pou atandé. I kay bon pou nou chak pwan an ti tan an sé simenn-lan avan èk apwé Mémoriyal-la pou mèdité, sa vlé di pou katjilé byen fon, asou sa Jéhova èk gason’y té fè ban nou. Bon. An atik sala, nou kay diskité sa wanson-ana, sa sé sakwifis lanmò Jézi, ka enstwi nou konsèné Jéhova èk gason’y. Épi lòt atik-la kay édé nou pou konpwann sé bennéfis-la nou ni a kòz di wanson-an èk mannyè nou sa moutwé apwésiyasyon nou pou’y.

KISA SAKWIFIS LANMÒ JÉZI KA ENSTWI NOU KONSÈNÉ JÉHOVA?

3. Ki mannyè lanmò yon nonm sa sové milyon di moun? (Gadé pòtwé-a osi.)

³ Wanson-an ka enstwi nou, Jéhova enmen jistis. (Dito. 32:4) Pouki nou ka di sa? Èben, sé paski lè Adanm dézobéyi Bondyé, ich li éwityé péché èk lanmò. (Ronm 5:12) Alò, pou tiwé nou anba péché èk lanmò, Jéhova voyé gason’y Jézi, pou potjiwé wanson-an. Mé ki mannyè lanmò yon moun ki té pawfé sa sové milyon di moun? Èben zapòt Pòl espliké an Ronm 5:19: “Menm kon an chay moun vini péchè paski yon nonm dézobéyi Bondyé, sé menm mannyè-a Bondyé kay mété an chay moun dwèt épiʼy paski yon nonm obéyiʼy.” (1 Tim. 2:6) Èben sa Pòl té ka di-a sé sa: yon nonm pawfé dézobéyi Bondyé èk sa annékòz tout moun pou vini péchè èk ka mò. Konsa, i pwan yon nonm pawfé ki obéyisan pou libéwé nou anba péché èk lanmò.

4. Pouki Jéhova pa té kité ich Adanm ki té obéyisan viv pou tout tan?

⁴ Ès Jéhova té vwéman ni pou voyé Jézi mò, pou nou sové? Ès i pa té kay pli mèyè si i té kité ich Adanm ki obéyisan viv pou tout tan? Pou an chay moun, sa té kay pli mèyè bagay-la pou fè. Mé pou Jéhova, sa pa té kay jis. Alò, paski Jéhova enmen jistis, i pa té kay janmen fèmen zyé’y asou péché gwav-la Adanm té fè-a, ki té annékòz tout désandan’y vini enpawfé.

5. Pouki nou asiwé Jéhova kay toujou fè sa ki dwèt?

⁵ Osi, si Jéhova pa té potjiwé wanson-an, èk i té kité désandan Adanm viv pou tout tan magwé yo té enpawfé, sa vlé di Jéhova té kay inyowé wèg li menm lè i vini pou sa ki dwèt èk sa ki mové. Épi annékòz di sa, moun té kay koumansé ni dout èk kwè Jéhova té kay inyowé wèg li népòt lè i vlé. Pou ègzanp, ès i té kay tjenn sé pwonmèt li-a pou tan ki ka vini? Ès Jéhova té kay vwéman fè sa i di i kay fè? Èben, nou pa bizwen ba kò nou mal tèt konsèné sé bagay sala. Pouki? Paski Jéhova té fè sa ki té jis menm si i té ni pou sakwifyé gason’y menm. Alò, nou sa asiwé, Jéhova kay toujou fè sa ki dwèt.

6. Pou ki lòt wézon Jéhova voyé gason’y pou mò ban nou? (1 Jan 4:9, 10)

⁶ Wanson-an ka osi moutwé nou sé pa dé enmen Jéhova enmen nou. (Jan 3:16; li 1 Jan 4:9, 10.) Wi, i voyé gason’y pou mò ban nou paski i enmen nou, i vlé nou viv pou tout tan, épi i vlé nou vini a manm an fanmi’y. Konsidiwé sa: Lè Adanm péché, i pa té sa wèsté on manm an fanmi Jéhova. Èk annékòz di péché Adanm, nou menm pa té on manm an fanmi Jéhova lè nou té fèt. Mé paski wanson-an té péyé an plen, tout moun ki ni lafwa an Bondyé èk ki ka obéyi’y sa vini a manm an fanmi’y. Anfen, dépi apwézan Jéhova sa pawdonnen péché nou, nou sa ni on wilasyon ki pwé épi’y, èk nou sa ni on wilasyon ki pwé épi sé fwè èk sè nou-a osi. Alò nou sa di, ‘Afòs Jéhova enmen nou!’ ​—Ronm 5:10, 11.

7. Ki mannyè soufwans Jézi ka édé nou pou konpwann ki kantité enmen Jéhova enmen nou?

⁷ Nou sa vini konpwann pli mèyè ki kantité enmen Jéhova enmen nou, lè nou katjilé konsèné pwi-a i té ni pou péyé pou potjiwé wanson-an. Satan di ‘dépi yon moun wè lanmò douvan’y’, i pa kay wèsté fidèl ba Jéhova. Konsa, pou moutwé Satan sé on mantè, Jéhova kité Jézi soufè avan i mò. (Jòb 2:1-5; 1 Pita 2:21) Kon Jéhova té ka gadé gason’y Jézi, i wè sé moun-lan té ka motjé’y. Épi i wè sé sòlda-a bat li; yo mété on kouwonn pikan asou tèt li, èk yo klouwé’y asou poto-a. Jéhova wè gason’y ka kontiné soufè jis an tan i mò. (Maf. 27:28-31, 39) Bon. Jéhova té sa anpéché tout sa fèt. Èk lè sé moun-lan té di: “Ében, annou gadé si Bondyé kay vini sovéʼy-la apwézan!”, Jéhova té sa sové’y. (Maf. 27:42, 43) Mé si Jéhova té fè sa, Jézi pa té kay péyé wanson-an, èk nou pa té kay ni pyès èspwa. Alò i kité gason’y soufè jis lè i mò.

8. Pouki nou asiwé Jéhova té santi lapenn, lè’y wè gason’y té ka soufè? Espliké. (Gadé pòtwé-a osi.)

⁸ Jéhova fè lézonm épi abilité-a pou ni imosyon. Épi Bib-la di, Jéhova fè nou an imaj li, sa vlé di, si nou menm ni imosyon, i menm ni imosyon! Konsa, nou pa sipozé katjilé paski Jéhova ni tout pouvwa, tjè’y pa ka janmen kasé. Anfen, an Sam 78:40, 41, Bib-la di, Jéhova ka santi ‘lapenn’. Alò, ki mannyè ou kwè Jéhova té ka santi lè i wè gason’y té ka soufè? Èben, annou konsidiwé wakont Abrahanm èvèk Ayzak. Jéhova té di Abrahanm pou ofè sèl gason’y, Ayzak, kon on sakwifis. (Jen. 22:9-12; Hib. 11:17-19) Nou sa annèk imajiné tout sé diféwan imosyon-an Abrahanm té ka santi. I oblijé té ka santi dékonpòté. Pitèt tjè’y té lou èk i té ka santi fèb lè i té ka pwépawé pou tjwé gason’y. An menm mannyè-a, nou sa imajiné kouman Jéhova té twis èk kouman tjè’y té kasé, lè i wè mannyè sé moun-lan té maltwété épi tjwé gason’y.​—Gadé vidéyo-la asou jw.org, Imitate Their Faith​—Abraham, Part 2.

9. Lè ou li Ronm 8:32, 38, 39, kisa ou ka apwann konsèné lanmityé Jéhova?

⁹ Wanson-an ka enstwi nou, la pa ni pyèsonn ki enmen nou pli pasé Jéhova. (Li Ronm 8:32, 38, 39.) Wi, Jéhova enmen nou pli pasé nou enmen kò nou. Bon. Ès ou vlé viv pou tout tan? Ès ou vlé Jéhova pawdonnen péché’w? Absoliman! Nou vlé sé bagay sala. Épi lavéwité-a sé, sé pa dé anvi Jéhova anvi pou fè sé bagay sala ba ou. Mé avan Jéhova sa fè sé bagay sala ba’w, kisa i ka mandé’w pou fè? Èben, Jéhova vlé nou tout pou moutwé apwésiyasyon pou bèl kado wanson-an, pou mété lafwa adan’y, èk pou obéyi’y. Vwéman, wanson-an ka moutwé ki otan enmen Jéhova enmen nou. Èk an latè nèf-la, nou kay apwann pli konsèné lanmityé Jéhova.​—Éklé. 3:11.

KISA SAKWIFIS LANMÒ JÉZI KA ENSTWI NOU KONSÈNÉ JÉZI MENM?

10. (a) Pouki Jézi té twakasé konsèné lanmò’y? (b) Ki mannyè sakwifis Jézi ka moutwé, Satan sé on mantè? (Gadé enfòmasyon-an anba “Sakwifis Jézi Té Moutwé, Satan Sé On Mantè.”)

¹⁰ Jézi mélé an pil épi wépitasyon Papa’y. (Jan 14:31) Épi i té twakasé paski yo té kay tjwé’y kon on kwiminèl, èk kon on moun ki té ka déwèspèkté non Jéhova. Épi akizasyon sala té kay mennen wipwòch asou non Papa’y. Èk sé pou wézon sala i pwédyé èk i di: “Papa mwen, si i posib, tiwé pòt soufwans sala douvan mwen.” (Maf. 26:39) Bon. Jézi wèsté fidèl pou Jéhova jis o lanmò’y. Épi sa bay pwèv ki, sa Satan té di konsèné Papa’y Jéhova pa té vwé.

11. Ki mannyè Jézi moutwé i ni an pil lanmityé pou moun? (Jan 13:1)

¹¹ Wanson-an ka osi enstwi nou, Jézi mélé an chay épi moun, sitou sé moun-lan ki ka swiv li. (Pwov. 8:31; li Jan 13:1.) Pou ègzanp, Jézi té sav adan an sé bagay-la i té ni pou fè asou latè-a té kay byen difisil, èspwèsman kalité soufwans-lan i té kay ni avan i mò. Mé Jézi fè tout sa; pa paski Jéhova té ba’y yon asaynman pou fè sa, mé paski i té enmen moun. Èk i moutwé sa, lè i té ka pwéché, enstwi èk édé yo. Jis swè-a avan i mò, i lavé pyé sé zapòt li-a, èk i enstwi, ankouwajé èk konfòté yo. (Jan 13:12-15) Osi, Jézi moutwé i enmen moun lè yo té klouwé’y asou poto-a. Ou wè, menm si i té ka soufè an chay, i pwan an ti moman pou bay on kwiminèl èspwa pou viv an pawadi-a. Épi anba tout soufwans sala, i mandé zapòt Jan pou pwan ka manman’y ba li. (Louk 23:42, 43; Jan 19:26, 27) Alò, Jézi moutwé i enmen moun, pa sèlman lè i mò pou yo, mé osi, pa mannyè-a i twété yo épi lanmityé, èk jantiyès.

12. Kisa Jézi ka fè apwézan?

¹² Jézi “mò pou i té sa kasé pouvwa péché pou bon.” (Ronm 6:10) Mé apwé i wésisité, sa pa vlé di i pa ka fè anyen ban nou ankò. Anfen, Jézi ka twavay pou fè asiwé nou kay jwenn bennéfis an sakwifis li. Konsidiwé sa i ka fè apwézan. I sé Wa nou. I sé Pli Ho Chèf Pwèt-la. Èk I sé tèt kongwigasyon-an. (1 Kòr. 15:25; Èfés. 5:23; Hib. 2:17) I ni wèskonsabilité-a pou asanblé sé annonté-a ki kay viv an syèl, èk gwan latilyé-a ki kay viv asou latè-a.b Sa sé on twavay ki kay fini fèt avan gwan twibilasyon-an bout. (Maf. 25:32; Mak 13:27) I osi ka édé sèvant fidèl-la pou ban nou sa nou bizwen pou nou wèsté fidèl pou Jéhova diwan dènyé tan-an. (Maf. 24:45) Épi paditan i ka kondwi nou diwan Mil Lanné-a, i kay kontiné fè bagay ki an bennéfis nou. Wi, lè Bib-la di Jéhova bay sèl gason’y pou nou, i pa té voyé pou i senpliman mò pou nou, mé pou’y fè an chay lòt bagay ban nou!

KONTINÉ APWANN KONSÈNÉ LANMITYÉ JÉHOVA ÈK JÉZI

13. Kisa ki sa édé’w pou kontiné apwann konsèné lanmityé-a Jéhova èk Jézi ni pou ou?

¹³ Si ou vlé kontiné apwann konsèné lanmityé-a Jéhova èk Jézi ni pou ou, ou sa mèdité asou sa yo ja fè ba ou. Pitèt ou sa fè sa an sé simenn-lan avan èk apwé Mémoriyal-la lanné sala. Ou sa fè éfò-a pou li sé liv-la, Mafyou, Mak, Louk èk Jan. Mé pa éséyé pou li twòp chapit yon sèl kou. Pito sa, pwan tan’w, èk gadé pou lòt wézon pouki nou sipozé enmen Jéhova èk Jézi. Épi, ou sa di lézòt sa ou té apwann an sé liv-la.

14. A ling épi Sam 119:97, ki mannyè nou sa kontiné pou apwann bagay nèf konsèné Jéhova, gason’y èk lanmityé yo pou nou? (Gadé pòtwé-a osi.)

¹⁴ Si ou an lavéwité-a pou an chay tan, ou pé katjilé, ‘Ès la ni anyen nèf mwen sa apwann konsèné jistis Jéhova, lanmityé’y èk wanson-an?’ Èben, lavéwité-a sé sa, nou kay toujou ni bagay nèf pou apwann konsèné sé sijé sala èk lòt sijé. Alò, kisa ou sa fè? Èben, ou sa li èk étidyé sé enfòmasyon-an ou ka jwenn an sé piblikasyon nou-a, ki bazé asou Bib-la. Lè ou li on pasaj an Bib-la, èk ou pa fini konpwann li, fè wichach. Épi diwan lajounen-an, mèdité asou sa ou apwann, épi sa enfòmasyon-an ka di’w konsèné Jéhova, gason,’y èk lanmityé yo pou ou.​—Li Sam 119:97.

15. Pouki i enpòtan pou nou kontiné li èk fè wichach an Bib-la? Ba yon ègzanp.

¹⁵ Pa santi dékouwajé lè ou li èben fè wichach an Bib-la èk ou pa jwenn anyen ki té entéwésan èben ou pa té konnèt avan. Adan on sans, ou menm kon on moun ki ka fouyé pou lò. Bon. Sa kay pwan an chay tan èk pasyans pou twouvé on ti moso lò. Mé lè ou kontiné fouyé, èk ou twapé on ti moso lò, menm si i piti, i ni an chay valè pou ou. An menm mannyè-a, i pé pwan tan pou ou twouvé on bagay ki entéwésan, èben ou pa té konnèt avan, an Bib-la. Mé i vo éfò-a; paskè sé bagay-la ou kay apwann an Bib-la ni twòp pli valè pasé lò! (Sam 119:127; Pwov. 8:10) Alò, kontiné li Bib-la, èk fè wichach pou ou apwann pli konsèné Jéhova èk Jézi.​—Sam 1:2.

16. Ki mannyè nou sa imité Jéhova èk Jézi?

¹⁶ Lè ou ka étidyé, gadé pou mannyè ou sa mété sa ou apwann an pwatik. Pou ègzanp, nou sa imité jistis Jéhova lè nou twété lézòt san pwéféwans. Osi, nou sa imité lanmityé-a Jézi ni pou Papa’y èk lézòt. Èk nou sa fè sa, lè nou pawé pou soufè pou lapéti Jéhova; èvèk lè nou fè tout sa nou pé pou édé fwè èk sè nou, menm si i difisil pou nou. Èk mi on lòt mannyè nou sa imité Jézi. Jézi té pwéché bay moun. Konsa, sé pou nou pwéché bay lézòt pou yo vini konnèt sé bèl bagay-la Jéhova ja fè ba nou èk pou yo moutwé lafwa an wanson-an.

17. Kisa nou kay diskité an lòt atik-la?

¹⁷ Lè nou kontiné apwann konsèné wanson-an, nou kay enmen Jéhova épi Jézi pli. Èk yo osi kay vini enmen nou plis. (Jan 14:21; Jémz 4:8) Alò, annou kontiné sèvi Bib-la èk sé piblikasyon nou-a pou apwann pli konsèné wanson-an. Bon. An lòt atik-la, nou kay apwann konsèné sé bennédiksyon-an nou ni-a paski Jézi mò pou nou. Èk nou kay apwann ki mannyè nou sa moutwé apwésiyasyon pou lanmityé Jéhova.