“Sé Pouʼw Ni Konfyans An [Jéhova]”

1. (a) Ki bèl èspwa Jéhova ban nou? (b) Koumannyè nou sa moutwé nou “ni konfyans an [Jéhova]”?

JÉHOVA bay tout moun ki enmen’y an bèl èspwa. I pwonmèt touswit i kay mennen an bout pou maladi, lapenn, épi lanmò. (Wévé. 21:3, 4) Osi i pwonmèt, moun “ki ka abésé kò yo”, èk ki ni konfyans an li kay enjwi pawadi asou latè-a. (Sam 37:9-11) Èk i kay fè’y posib pou nou ni on bon wilasyon épi’y, yonn ki kay otan pli mèyè pasé wilasyon-an nou ni épi’y apwézan. Mi an bèl èspwa! Pouki nou sa kwè Jéhova kay fè tout sa i pwonmèt? Nou sa kwè sa, paski Jéhova ka toujou fè sa i di i kay fè. Konsa, nou ni bon wézon pou “ni konfyans an [Jéhova]”.b (Sam 27:14) Lè nou ni djwèté, épi nou ka moutwé pasyans kon nou ka èspéyé Jéhova pou fè tout sa’y pwonmèt, nou ka moutwé nou ni konfyans an li.—Izay. 55:10, 11.

2. Kisa Jéhova ja fè an tan nou?

² Jéhova ja moutwé i ka tjenn tout pwonmèt li. Annou gadé on bèl ègzanp. An liv Wévélasyon Jéhova pwonmèt ki, an tan nou, la kay ni on “gwan popilas moun”. “Yo sòti an tout nasyon, an tout lafanmi, an tout péyi. Yo té ka palé tout diféwan langaj ki an latè-a.” (Wévé. 7:9, 10) Magwé gwan popilas sala ni nonm, fanm, èk manmay ki sòti oliwon latè-a, yo sé yon fanmi ki ka adowé Jéhova an lilyon. (Sam 133:1; Jan 10:16) Osi yo ka fè gwo éfò pou pwéché, èk yo toujou pawé pou di moun konsèné èspwa pawadi-a. (Maf. 28:19, 20; Wévé. 14:6, 7; 22:17) Si’w anpami gwan popilas sala, san doubt, ou ka chéwi èspwa-a ou ni pou tan ki ka vini.

3. Kisa Satan vlé fè?

³ Satan pa vlé’w ni èspwa pou tan ki ka vini. I vlé’w kwè Jéhova pa mélé épi’w èk Jéhova pa vlé tjenn sé pwonmèt li-a. Si nou fè Satan détwi èspwa nou, nou kay pèdi konfyans nou an Jéhova, èk pitèt nou kay jis doubout sèvi Jéhova. Kon nou kay wè an atik sala, Satan té vlé détwi èspwa Jòb, èk i té vlé’y doubout sèvi Jéhova.

4. Kisa nou kay konsidiwé an atik sala? (Jòb 1:9-12)

⁴ An atik sala nou kay ègzanminé mannyè Satan té éséyé fòsé Jòb pou doubout sèvi Jéhova. (Li Jòb 1:9-12.) Nou kay osi diskité kisa nou sa apwann an ègzanp Jòb. An plis di sa, nou kay wè pouki i enpòtan pou chonjé ki, Bondyé enmen nou épi i kay fè tout sa i pwonmèt pou fè.

SATAN KA ÉSÉYÉ POU DÉTWI ÈSPWA JÒB

5-6. Kisa Jòb té èspéyansé?

⁵ Jòb té ni on bon lavi. I té ni on bon wilasyon épi Jéhova. I té ni on bèl fanmi, èk i té wich. (Jòb 1:1-5) Mé an yon jou, Jòb pèdi pwèskè tout bagay i té ni. Pwèmyéman, i pèdi tout wichès li. (Jòb 1:13-17) Apwé sa, tout zanfan’y mò. Pou on ti mouman, katjilé asou kantité lapenn-lan Jòb té ni. Lè yon manmay mò, sa ka kwazé tjè pawan’y. Konsa imajiné mannyè Jòb épi madanm li té ka santi, lè yo tann tout dis zanfan yo mò ansanm. Nou sa konpwann pouki Bib-la di nou lè Jòb tann nouvèl-la i déchiwé had li épi i ladjé kò’y atè-a!—Jòb 1:18-20.

⁶ Apwé, Satan fwapé Jòb épi on mové maladi. (Jòb 2:6-8; 7:5) Mé avan sa, tout moun an konmin-lan té ka wèspèkté Jòb. Yo té ka alé oti Jòb lè yo té bizwen konsèy. (Jòb 31:18) Mé apwézan, pyèsonn pa té vlé ni anyen pou fè épi Jòb. Sé fwè Jòb-la, épi sé bon jan’y-la widjèkté’y. Jis sé sèvant li-a ki tounen do yo asou’y!—Jòb 19:13, 14, 16.

7. (a) Ki moun Jòb kwè ki té ka fè’y soufè, mé kisa i wifizé pou fè? (b) Ki mannyè on kwityen sa èspéyansé on sitiwasyon menm kon sa nou ka wè an pòtwé-a?

⁷ Satan té vlé Jòb kwè i té ka soufè paski Jéhova té faché épi’y. Pou ègzanp, lè sé dis zanfan Jòb-la té adan an kay ka enjwi on wipa ansanm, Satan sèvi on gwo van pou kwazé kay-la. (Jòb 1:18, 19) Osi, i fè difé sòti an syèl pou détwi zannimo Jòb èk sé sèvant-la ki té ka otjipé yo-a. (Jòb 1:16) Paski van-an épi difé-a sòti an syèl, Jòb té ka kwè sété Jéhova ki té voyé yo. Konsa, Jòb té kwè Jéhova té faché épi’y. Mé, menm si Jòb té kwè Jéhova té faché épi’y, i wifizé pou tounen do’y asou Jéhova. Jòb té asiwé Jéhova té ja ba’y an chay bon bagay, konsa i katjilé, menm kon i té byen kontan pou aksèpté sa ki bon, i sipozé byen pawé pou aksèpté sa ki mové. Alò i di: ‘Kité non Jéhova kontiné wisivwè laglwa.’ (Jòb 1:20, 21; 2:10) Jòb wèsté fidèl pou Jéhova menm si i té pèdi tout wichès li, tout zanfan’y èk santé’y. Mé, Satan p’òkò té fini épi’y.

8. Ki lòt bagay Satan fè Jòb?

⁸ Mi on lòt bagay Satan fè Jòb. I sèvi twa nonm ki té fè akwèdi yo sété jan Jòb pou fè Jòb santi i pa té vo anyen. Sé nonm sala té jis di, Jòb té ka soufè paski i té fè an chay mové bagay. (Jòb 22:5-9) Yo té jis éséyé pou fè’y kwè menm si i té ja fè on chay bon bagay, Bondyé pa té mélé épi’y. (Jòb 4:18; 22:2, 3; 25:4) Yo té ka éséyé pou fè Jòb kwè, Bondyé pa té enmen’y, Bondyé pa té kay otjipé’y èk i pa té ka fè pyès sans pou’y adowé Bondyé. Sa yo té di Jòb té sa fè Jòb santi la pa té ni pyès èspwa pou’y.

9. Kisa ki té édé Jòb pou ni konfyans an Jéhova épi pou wèsté fò?

⁹ Bon. Annou imajiné sitiwasyon-an Jòb té ka èspéyansé-a. Jòb asid atè-a an sann-lan, èk i toujou ni penn. (Jòb 2:8) Sé jan’y-la ka kontiné di’y i pa on bon nonm, èk i p’òkò fè anyen ki bon an lavi’y. Tout sé difikilté-a i té ka èspéyansé-a té ka fè’y santi konmsi i té ka chayé an chay ki twò lou. A plis di sa, i té an lapenn, paski sé zanfan’y-lan mò. An koumansman-an, Jòb pa té ka di anyen. (Jòb 2:13–3:1) Mé, si sé jan’y-la té kwè i té kay tounen do’y asou Jéhova yo té ka fè on gwo lèwè. Apwé an lè, pitèt Jòb lévé tèt li, èk i gadé sé fo jan’y-la an mitan zyé yo èvèk i di yo: ‘Jis lè mwen mò, mwen kay wèsté fidèl pou Bondyé!’ (Jòb 27:5) Kisa ki té édé Jòb pou ni konfyans an Jéhova épi wèsté fò magwé i té ka soufè? Sété èspwa-a Jòb té ni-a. Menm si i té byen dékouwajé i pa janmen pèd konfyans an Jéhova. I té asiwé Jéhova té kay édé’y. I té osi ni konfyans-lan ki, menm si i mò Jéhova té kay wésisité’y.—Jòb 14:13-15.

KI MANNYÈ NOU SA IMITÉ ÈGZANP JÒB?

10. Kisa nou sa apwann an ègzanp Jòb?

¹⁰ Ègzanp Jòb ka moutwé nou ki, Satan pa sa fosé nou pou tounen do nou asou Jéhova, èvèk, Jéhova konnèt tout sa nou ka èspéyansé. Osi, ègzanp Jòb ka édé nou pou konpwann pouki nou ka èspéyansé difikilté délè, èk pouki i enpòtan pou wèsté fidèl pou Jéhova. Apwézan, annou konsidiwé déotwa lison nou sa apwann an ègzanp Jòb.

11. Si nou kontiné mété konfyans nou an Jéhova, ki asiwans nou sa ni? (Jémz 4:7)

¹¹ Ègzanp Jòb ka moutwé nou ki, si nou kontiné mété konfyans nou an Jéhova, nou sa wèsté fò anba népòt difikilté èk nou sa éwisi goumen kont Satan. Konsa, si nou kontiné mété konfyans nou an Jéhova, Bib-la ka ban nou asiwans-lan ki, Denmou-an kay kouwi hòd nou.—Li Jémz 4:7.

12. Ki mannyè èspwa wézèwèksyon-an té fòtifyé Jòb?

¹² Kon nou té mansyonnen an atik-la avan, souvan, Satan ka sèvi pèwèz lanmò pou éséyé fè nou tounen do nou asou Jéhova. Konsa i enpòtan pou ni èspwa ki fò an wézèwèksyon-an. Satan té di, Jòb té kay fè népòt bagay pou sové lavi’y. I jis di, Jòb té kay doubout sèvi Jéhova si lavi’y té anwis. Mé, sa sété yon mansonj. Paski, menm si Jòb té kwè i té kay mò, i kontiné wèsté fidèl pou Jéhova. Kisa ki té édé Jòb pou andiwé anba sé difikilté sala? Jòb té ni konfyans an bonté Jéhova, èk i té ni konfyans-lan ki, Jéhova té kay édé’y. Osi, Jòb té ni konfyans-lan ki, menm si i mò, Jéhova té kay wésisité’y an tan pou vini. Jòb té ni an chay èspwa an wézèwèksyon-an. Konsa, si nou ni an chay èspwa an wézèwèksyon-an, pèwèz lanmò pa kay fè nou tounen do nou asou Jéhova.

13. Pouki nou sipozé apwann konsèné sé diféwan bagay-la Satan té fè Jòb?

¹³ Nou bizwen apwann konsèné sé diféwan bagay-la Satan té fè Jòb, paski jòdi jou, Satan ka sèvi sé menm bagay sala asou nou. Satan té di: ‘Dépi yon moun wè lanmò douvan’y, i kay bay tout sa i ni pou sové lavi’y.’ (Jòb 2:4, 5) Lè Satan té di “yon moun”, i té ka palé konsèné tout lézòm, pa Jòb tousèl. I té ka di, nou pa enmen Jéhova, èk si lavi nou anwis, nou té kay tounen do nou asou Jéhova pou sové lavi nou. Osi, Satan té ka di, Bondyé pa enmen nou èvèk i pa mélé épi sa nou ka fè pou plè’y. Konsa, paski nou sav sa Satan ka éséyé pou fè, nou pa ka kwè sé mansonj li-a.

14. Kisa nou sa apwann konsèné kò nou lè nou anba tès? Ba yon ègzanp.

¹⁴ Sé difikilté-a Jòb té èspéyansé-a té édé’y wè sèten kawaktè i té ni pou twavay asou. Pou ègzanp, i apwann i té bizwen ni pli imilité. (Jòb 42:3) Konsa, nou osi sa sèvi tès nou ka èspéyansé pou apwann pli konsèné kò nou. Annou pwan ègzanp yon fwè yo ka kwiyé Nikolay.c Magwé Nikolay té byen malad, yo mété’y an pwizon. Konsèné èspéyans li an pwizon i di: “Tan mwen an pwizon té édé mwen pou wè diféwan kawaktè Kwityen mwen bizwen twavay asou.” Alò, lè nou wè kawaktè Kwityen nou bizwen twavay asou, nou sa fè éfò pou twavay asou yo.

15. Ki moun nou sipozé kouté, èk pouki?

¹⁵ Nou sipozé kouté Jéhova, èk pa sé lèlmi nou-an. Lè Jéhova té ka palé ba Jòb, Jòb té ka kouté’y byen. Jéhova té wézonnen épi Jòb. Sé konmsi i té ka di Jòb: ‘Ès ou ka wè pouvwa mwen? Mwen konnèt tout bagay ki ja wivé’w. Ès ou kwè mwen pa sa otjipé’w?’ Jòb abésé kò’y èk i moutwé apwésiyasyon pou bonté Jéhova. Jòb di: “Zòwèy mwen té tann konsèné’w, mé apwézan mwen ka wè’w épi dé zyé mwen.” (Jòb 42:5) Lè Jòb té di sé pawòl sala, pitèt i té ka asid atè-a an sann-lan toujou, kò’y té kouvè épi bobo, èvèk i té an lapenn pou sé zanfan’y-lan ki té mò-a. Magwé sa, Jéhova té ba Jòb asiwans-lan ki, i enmen’y èk i ni favè’y.​—Jòb 42:7, 8.

16. Silon Izaya 49:15, 16, kisa nou sipozé chonjé lè nou ka èspéyansé difikilté?

¹⁶ Jòdi, moun pé ensilté nou, èk yo pé twété nou konmsi nou pa vo anyen. Osi, yo pé éséyé pou sali non nou, ében sali non ògannizasyon nou, èvèk yo ka jis “manti” anlè nou. (Maf. 5:11) Wakont Jòb ka moutwé nou, Jéhova ni konfyans nou kay wèsté fidèl pou li lè nou anba tès. Osi, i ka moutwé nou, Jéhova enmen nou èk i pa kay janmen abandonnen moun ki ni konfyans an li. (Li Izaya 49:15, 16.) Konsa pa kouté pyès mansonj lèlmi nou ka simen! James sé on fwè hòd péyi Turkey, èk fanmi’y té èspéyansé an chay mové difikilté. I di: “Nou wéyalizé si nou té kouté sé mansonj-lan konsèné pèp Bondyé, sa té kay dékouwajé nou. Konsa, nou fiksé atansyon nou asou èspwa Wéyòm-lan, èk nou tjenn kò nou anbawasé an sèvis Jéhova. A kòz di sa, nou té ni djwèté.” Alò menm kon Jòb, nou ka kouté Jéhova! Mansonj sé lèlmi nou-an pa ka détwi konfyans nou an Jéhova.

KONFYANS OU AN JÉHOVA KAY TJENN OU FÒ

17. Kisa ou apwann an ègzanp sé nonm èk fanm fidèl-la Hibrou chapit 11 mansyonnen?

¹⁷ Anpami sé sèvant fidèl Jéhova-a, sé pa Jòb sèlman ki té moutwé konfyans an Jéhova èk ki té wèsté fò anba mové difikilté. An liv Hibrou, zapòt Pòl mansyonnen plizyè lòt sèvant fidèl Jéhova, èvèk i kwiyé yo on ‘gwan popilas moun ki té ni lafwa’. (Hib. 12:1) Yo tout té èspéyansé move difikilté, mé diwan lavi yo té wèsté fidèl pou Jéhova. (Hib. 11:36-40) Lè yo té wèsté fò anba sé mové difikilté-a, ès yo té gaspiyé tan yo? Mé non! Menm si yo pa té wè tout pwonmèt Jéhova fèt diwan lavi yo, yo té kontiné moutwé konfyans an Jéhova. Èk paski yo té asiwé yo té ni favè Jéhova, yo té ni konfyans-lan ki, Jéhova té kay fè tout sa i pwonmèt pou fè. (Hib. 11:4, 5) Bèl ègzanp yo sa fòtifyé détèminasyon nou pou kontiné ni konfyans an Jéhova.

18. Kisa ou vlé kontiné fè? (Hibrou 11:6)

¹⁸ Nou ka viv adan an latè ki ka vini pli mové jou an jou. (2 Tim. 3:13) Èk Satan ka kontiné mété pèp Bondyé anba tès. Konsa annou kontiné twavay wèd an sèvis Jéhova, menm si nou ka èspéyansé difikilté. Épi annou kontiné “mété èspwa nou an Bondyé-a ki ka viv-la”. (1 Tim. 4:10) Èk annou toujou chonjé sa Jéhova té fè ba Jòb. Sa ka moutwé Dyé nou Jéhova “bon èk i ni konpasyon”. (Jémz 5:11) Alò, annou wèsté fidèl pou Jéhova, èk nou asiwé Jéhova ka ba “moun ki ka chaché pou li” bon bagay.—Li Hibrou 11:6.