‘Flanm Jah’ Kontiné Fè’y Bwilé Bwiyan

1. Ki mannyè Bib-la ka dékwi lanmou ki vwé?

AN LIV Chanson Sòlomon 8:6, 7, Bib-la ka dékwi lanmou ki vwé. I di: ‘Flanm lanmou menm kon flanm difé, flanm sala sé flanm Jah. Gwo dlo pa sa tenn lanmou, osi lawivyè pa sa chayé’y alé.’b Wi, sa sé vwéman on bèl mannyè pou dékwi lanmou ki vwé! Èk sé pawòl sala ka bay moun ki mayé on chay enkouwajman osi, paski i ka moutwé yo sa ni lanmou ki sa diwé pou tout tan pou yonn a lòt.

2. Kisa on madanm èk mawi ni pou fè pou tjenn lanmou yo pou yonn a lòt fò?

² Si on madanm èk mawi vlé lanmou yo pou yonn a lòt diwé tout lavi yo, yo chak ni pou fè éfò. Pou ègzanp, on boukan difé sa kontiné bwilé, mé sé sèlman si on moun kontiné ba li bwa. Kanmenm, si moun-lan doubout ba boukan difé-a bwa, apwé on lè i kay tenn. An menm mannyè-a, lanmou-a on madanm èk mawi ni pou yonn a lòt sa wèsté fò, mé pou sa fèt, yo ni pou kontiné fòtifyé wilasyon yo épi yonn a lòt. Mé délè, on madanm èk mawi pé wéyalizé lanmou-a yo ni pou yonn a lòt ka afébli. Sa pé fèt sitou lè yo ka èspéyansé pwòblenm tèl kon, pwòblenm lajan, pwòblenm santé, ében lè yo ni pou lévé ich. Konsa, kisa ou sa fè, pou kontiné fè ‘flanm Jah’ bwilé bwiyan an mawiyaj ou? Ében an atik sala, nou kay diskité twa (3) bagay moun ki mayé sa fè pou fòtifyé wilasyon yo èk pou yp enjwi on bon mawiyaj.c

KONTINÉ FÒTIFYÉ WILASYON’W ÉPI JÉHOVA

3. Lè on mawi épi madanm li ni on bon wilasyon épi Jéhova, ki mannyè sa kay édé yo an mawiyaj yo? (Ékléziyastis 4:12) (Gadé pòtwé-a osi.)

³ Pou fè ‘flanm Jah’ kontiné bwilé bwiyan an mawiyaj yo, mawi-a épi madanm li ni pou fè asiwé yo ni on bon wilasyon épi Jéhova. Mé, ki mannyè wilasyon yo épi Jéhova kay édé yo an mawiyaj yo? Ében, lè madanm épi mawi ka apwésyé wilasyon yo épi Jéhova, yo pa ka tadé pou swiv konsèy li. Èvèk, lè yo ka swiv konsèy Jéhova, sa ka édé yo pou évité, ében ganyen a bout pwòblenm ki pé afébli lanmou-a yo ni pou yonn a lòt. (Li Ékléziyastis 4:12.) Osi, moun ki ni on bon wilasyon épi Jéhova ka fè tout sa yo pé pou imité’y èk pou dévlopé sé bèl kawaktè-a i ni-a. Kawaktè tèl kon, jantiyès, pasyans, èk yo ka padonnen lézòt. (Èfés. 4:32–5:1) Alò, lè madanm épi mawi ka moutwé bèl kawaktè kon sa, i ka fè’y pli ézé pou yo kontiné enmen yonn a lòt. Pou ègzanp, an sè yo ka kwiyé Lena, ki mayé pou pli pasé vennsenk (25) lanné di: “I ézé pou enmen èk wèspèkté on moun ki ni on bon wilasyon épi Jéhova.”

4. Pou ki wézon Jéhova chwazi Jozèf èk Mari pou vini pawan Gason’y?

⁴ Annou konsidiwé yon ègzanp an Bib-la konsèné on mawi èk madanm ki té ni on bon wilasyon épi Jéhova. Lè Jéhova té ni pou chwazi dé (2) moun kon pawan Gasyon’y, Jéhova chwazi Jozèf èk Mari anpami tout désandan Wa David. Mé pouki i chwazi sé dé moun sala? Sé paski chak di yo té ni on bon wilasyon épi Jéhova, èk Jéhova té sav yo té kay mété’y pwèmyé an mawiyaj yo. Alò, si ou mayé, ki lison ou sa apwann an ègzanp Jozèf épi Mari?

5. Ki mannyè fwè ki mayé sa fè menm kon Jozèf?

⁵ Jozèf té toujou pawé pou obéyi diwèksyon Jéhova, èk sa té fè’y on pli bon mawi. Pou ègzanp, Bib-la mansyonnen apipwé twa (3) lokazyon koté Bondyé té bay Jozèf diwèksyon konsèné fanmi’y. Kanmenm chak fwa Jozèf obéyi san tadé, menm si i pa té ézé pou fè sa Jéhova té mandé’y pou fè. (Maf. 1:20, 24; 2:13-15, 19-21) Èk paski Jozèf té swiv diwèksyon Jéhova, i té sa pwotéjé Mari èk otjipé’y byen. San dout, sa té édé Mari pou enmen èk wèspèkté Jozèf pli! Alò, si’w sé on fwè ki mayé, ou sa fè menm kon Jozèf èk gadé pou sé konsèy-la Bib-la ka bay asou mannyè pou otjipé fanmi’w.d Wi, lè’w swiv konsèy Bib, menm si délè i pa ézé pou fè sa, ou ka moutwé ou vwéman enmen madanm ou èk ou ka fòtifyé mawiyaj ou. Èk sa sé mannyè yon sè ki ka viv an péyé Vanuatu ka santi. I mayé pou plis pasé ven (20) lanné èk i di: “Lè mwen wè mawi mwen ka chaché pou diwèksyon Jéhova, èk i ka swiv yo, mwen ka ni pli wèspé pou li. Mwen ka santi kam èk mwen ka ni pli konfyans an disizyon’y.”

6. Ki mannyè sè ki mayé sa fè menm kon Mari?

⁶ Mari té ni on wilasyon pèwsonnèl épi Jéhova, èk i té ka twavay wèd pou tjenn lafwa’y fò. I pa té ka dépan asou mawi’y Jozèf pou fè sa ba li. Wi, Mari té konnèt sé lévanjil-la byen. Èk osi i té ka fè asiwé i pwan tan pou katjilé asou sa i té ka apwann an sé lévanjil-la. (Louk 2:19, 51) San dout, wilasyon-an Mari té ni épi Jéhova té édé’y pou vini on bon madanm. Jòdi jou, on chay sè ki mayé ka éséyé pou fè menm kon Mari. Pou ègzanp, yon sè yo ka kwiyé Emiko di: “Avan mwen té mayé, mwen té ka fè sa mwen té bizwen fè pou tjenn wilasyon mwen épi Jéhova fò. Mé apwé mwen mayé, sé mawi mwen ki té ka pwédyé ban nou, èk sé li ki té ka pwan douvan an adowasyon an fanmi-an. Mé mwen wéyalizé piti an piti mwen té ka dépan asou mawi mwen pou fòtifyé lafwa mwen. Kanmenm, mwen wéyalizé sé mwen ki té ni wèskonsabilité-a pou tjenn wilasyon mwen épi Jéhova fò. Alò, apwézan mwen ka pwan tan pa kò mwen èk mwen ka sèvi tan sala pou pwédyé, li, èk mèdité asou Pawòl Bondyé.” (Gal. 6:5) Konsa, si’w sé on sè ki mayé, kontiné fòtifyé wilasyon’w épi Jéhova. Èvèk si ou fè sa, mawi’w kay ni pli wézon pou onnowé’w èk enmen’w.​—Pwov. 31:30.

7. Lè’y vini pou adowasyon, kisa fwè èk sè ki mayé sa apwann hòd ègzanp Jozèf èk Mari?

⁷ Jozèf èk Mari té osi twavay ansanm pou tjenn wilasyon yo épi Jéhova fò. Wi, yo té sav i té byen enpòtan pou adowé Jéhova kon yon fanmi. (Louk 2:22-24, 41; 4:16) Pitèt i pa té alèz pou yo fè sa, sitou lè yo té ni pli ich, mé yo éwisi. Mi on bèl ègzanp yo kité bay fwè èk sè jòdi ki mayé! Si kon Jozèf épi Mari ou ni ich, pitèt ou ka twapé’y difisil pou atandé tout sé mitin-lan, ében pou fè létid fanmi-an chak simenn. Èk pitèt ou ka twapé’y pli difisil pou fè tan pou ou èk madanm ou pwédyé èk étidyé Bib-la ansanm. Mé chonjé, lè madanm épi mawi ka adowé Jéhova ansanm, yo ka vini pli pwé yonn a lòt èk pli pwé Jéhova. Konsa, fwè èk sè ki mayé, fè asiwé zòt mété adowasyon Jéhova pwèmyé an lavi zòt.

8. Si yon mawi épi madanm li ka èspéyansé pwòblenm, kisa yo sa fè pou kontiné adowé Jéhova ansanm?

⁸ Vwéman, si yon madanm épi mawi ka èspéyansé pwòblenm an mawiyaj yo, pitèt yo pa kay ni dézi-a pou étidyé Bib-la ansanm. Alò, si sa sé sitiwasyon’w, kisa ou sa fè? Ében, pou létid an fanmi-an, ou épi madanm ou sa chwazi pou diskité on bèl ti sijé zòt toulédé kontan, èk pa fè létid-la twò lonng. Anfen, si zòt fè sa, sa kay fòtifyé mawiyaj zòt èk sa kay ankouwajé zòt pou kontiné adowé Jéhova ansanm.

PASÉ TAN ANSANM

9. Poutji i enpòtan pou madanm épi mawi pasé tan ansanm?

⁹ Fwè èk sè ki mayé, an lòt bagay zòt sa fè pou tjenn lanmou zòt pou yonn a lòt fò, sé pou pasé tan ansanm. Si zòt fè sa, zòt kay konnèt yonn a lòt pli mèyè. Konsa, i kay pli ézé pou konnèt sa yonn a lòt ka katjilé, èk ka santi. A lè sala zòt pa kay kon dé étwanjé an kay-la. (Jen. 2:24) Tann sa yon fwè épi madanm li wéyalizé touswit apwé yo mayé, anho kenz (15) lanné ki pasé. Non yo sé Lilia èk Ruslan. Sè-a di: “Nou wéyalizé nou pa té kay ni tan-an nou kwè nou té kay ni pou pasé ansanm. Nou té byen anbwasé épi twavay nou èk épi twavay lakay-la. Èvèk pli ta lè nou koumansé fè ich, sé manmay-la té ka pwan tout tan nou. Alò nou wéyalizé si nou pa té fè tan pou yonn a lòt, lanmou-a nou ni pou yonn a lòt pitèt té kay afébli.”

10. Ki mannyè fwè èk sè ki mayé sa swiv pwensip-la an Èfésòs 5:15, 16?

¹⁰ Bon. Fwè èk sè ki mayé, kisa zòt sa fè pou fè asiwé zòt pasé tan ansanm? Ében zòt pé ni pou fè an plan. Sa vlé di, zòt pé ni pou wanjé zafè zòt adan an mannyè pou fè asiwé zòt ni asé tan pou pasé épi yonn a lòt. (Li Èfésòs 5:15, 16.) Pou ègzanp, Uzondu sé an fwè ki ka viv an péyi Nigeria, i di: “Lè mwen ka ògannizé sa mwen ni pou fè, mwen ka fè asiwé mwen kité tan pou pasé épi madanm mwen, èk mwen pa ka kité anyen anpéché mwen pasé tan sala épi madanm mwen.” (Filip. 1:10) Osi, konsidiwé mannyè yon sè yo ka kwiyé Anastasia, ka sèvi tan’y byen. Mawi’y sé yon ansyen pou sékyout-la an péyi Moldova, i di: “Paditan mawi mwen ka pwan ka wèskonsabilité’y, mwen ka sèvi tan sala pou fè sa mwen ni pou fè. Konsa, apwé mawi mwen fini, nou sa pasé tan ansanm.” Kanmenm, si zòt ka twapé’y difisil pou fè tan pou pasé ansanm, kisa zòt sa fè?

11. Ki diféwan bagay Akwila épi madanm li Priska té ka fè ansanm?

¹¹ Akwila èk madanm li Priska té ka viv an pwèmyé syèk-la. Sé Kwityen-an an tan sala té ni an chay wèspé pou yo. Èk yo kité an bon ègzanp pou fwè èk sè ki mayé. (Ronm 16:3, 4) Bib-la pa ka bay an chay détay konsèné sa ki té ka fèt an mawiyaj yo. Mé silon sa nou li an liv Twavay, lè Priska épi Akwila té ka twavay, pwéché, épi édé lézòt, yo té ka fè’y ansanm. (Twav. 18:2, 3, 24-26) Anfen, lè’y vini pou Priska épi Akwila, Bib-la pa ka mansyonnen yonn san mansyonnen lòt-la.

12. Kisa an mawi épi madanm li sa fè pou pasé pli tan ansanm? (Gadé pòtwé-a osi.)

¹² Bon. Ki mannyè fwè èk sè ki mayé sa swiv bèl ègzanp Akwila épi madanm li Priska? Ében, katjilé asou tout sé diféwan bagay-la ou épi madanm ou ni pou fè adan an jounen. Ès zòt sa fè adan sé bagay sala ansanm? Pou ègzanp, Akwila épi Priska té ka pwéché ansanm. Ès ou épi madanm ou ka toujou fè tan pou zòt pwéché ansanm? Osi, Akwila èk Priska té ka twavay ansanm. Menm si ou épi madanm ou pa ka fè menm twavay-la, ès zòt sa fè twavay an kay-la ansanm? (Éklé. 4:9) Lè zòt twavay ansanm pou fè diféwan bagay, zòt kay ni pli chans pou palé, èk sa kay fè zòt vini pli pwé yonn a lòt. Pou ègzanp, Robert épi madanm li Linda sé an fwè èk sè ki mayé pou pli pasé senkant (50) lanné. Robert di: “Pou di’w lavéwité-a, mwen épi madanm mwen pa ni an chay tan pou anmizé kon nou ansanm. Mé, lè mwen ka lavé sé zasyèt-la, madanm mwen bò koté mwen ka swiyé yo. Ében si mwen dèwò ka twavay an jaden-an madanm mwen ka vini édé mwen. Pa dé kontan mwen ka kontan sa! Lè nou ka twavay ansanm pou fè diféwan bagay, nou ka vini pli pwé yonn a lòt. Èk lanmou-a nou ni pou yonn a lòt ka vini pli fò.”

13. Kisa an mawi èk madanm li ni pou fè pou yo vini pli pwé yonn a lòt?

¹³ Kanmenm i enpòtan pou chonjé ki, menm si an mawi èk madanm li ka viv an menm kay-la, sa pa vlé di yo kay vini pli pwé yonn a lòt djòs kon sa. Pou ègzanp, yon sè an péyi Bwazil ki mayé di: “Jòdi jou nou tèlman anbawasé, i byen ézé pou nou kwè nou ka pasé tan épi yonn a lòt paski nou ka viv an menm kay-la. Kanmenm, mwen wéyalizé i pa asé pou nou annèk viv an menm kay-la, mwen ni pou bay mawi mwen antansyon mwen. Sa vlé di, mwen ni pou fè tan pou palé épi’y èk pou vwéman kouté’y lè i ka palé ban mwen.” Bruno épi Tays, sé an lòt fwè épi madanm li ki ka fè asiwé yo ba yonn a lòt antansyon. Bruno di: “Lè nou ni an ti tan ansanm, nou ka fè asiwé nou mété pòtab nou asou koté, konsa, nou sa enjwi tan nou épi yonn a lòt.”

14. Si an madanm èk mawi pa kontan pasé tan épi yonn a lòt, kisa yo sa fè?

¹⁴ Mé pitèt ou épi madanm ou pa kontan pasé tan épi yonn a lòt, paski zòt antéwésé an diféwan bagay. Ében pitèt, zòt ka kontwayé yonn a lòt. Si sa sé sitiwasyon’w, kisa ou sa fè? Annou konsidiwé boukan difé-a nou té mansyonnen pli bonnè-a. Chonjé, lè ou djòs limen difé-a i pa ka fè on gwo flanm la menm. Pou fè on gwo flanm ou ni pou bay difé-a bwa piti an piti, èk chak fwa ou ni pou ba’y pli gwo moso bwa. An menm mannyè-a ou sa éséyé pou pasé on ti tan épi moun-lan ou mayé épi-a chak jou, fè asiwé zòt sèvi tan sala pou fè an bagay zòt toulédé kontan, pa an bagay ki kay fè zòt faché. (Jémz 3:18) Si zòt fè sa, piti an piti lanmou zòt pou yonn a lòt kay pofité ankò.

MOUTWÉ YONN A LÒT WÈSPÉ

15. Poutji i enpòtan pou an mawi èk madanm moutwé yonn a lòt wèspé?

¹⁵ Pou bagay maché byen adan an mawiyaj, madanm èk mawi ni pou moutwé yonn a lòt wèspé. Sa sé an bagay ki byen enpòtan. Anfen, nou sa konpawé wèspé adan an mawiyaj épi òksidjenn-lan ki ka tjenn an boukan difé limen. Ki mannyè? Ében, si la pa ni òksidjenn, an boukan difé kay tenn byen vit. An menm mannyè-a, si madanm épi mawi pa ka moutwé yonn a lòt wèspé, lanmou yo pou yonn a lòt kay afébli byen vit. Mé, lè madanm èk mawi ka fè tout sa yo pé pou moutwé yonn a lòt wèspé, lanmou yo pou yonn a lòt ka vini pli fò. Osi, i bon pou chonjé ki, i pa asé si ou kwè ou ka wèspèkté moun-lan ou mayé épi-a. Sa ki enpòtan sé si moun-lan ou mayé épi-a ka santi ou ka wèspèkté yo. Pou ègzanp, Aret èk Penny sé an fwè èk sè ki mayé pou pli pasé vennsenk (25) lanné. Penny di: “Paski nou ka moutwé yonn a lòt wèspé, kay nou sé an plas ki plen lanmityé. Nou pa pè pou di yonn a lòt sa ki asou lidé nou, paski nou sav nou ka wèspèkté lopinyon yonn a lòt.” Alò, kisa ou sa fè pou édé moun-lan ou mayé épi-a pou santi ou ka vwéman wèspèkté yo? Ében, annou konsidiwé ègzanp Abrahanm épi madanm li Sara.

16. Ki lison mawi sa apwann an ègzanp Abrahanm? (1 Pita 3:7) (Gadé pòtwé-a osi.)

¹⁶ Abrahanm té ka moutwé madanm li Sara an chay wèspé. I té ka fè tan pou kouté Sara, i té ka pwan lopinyon’y an konsidéwasyon èk i té ka wèspèkté mannyè-a i té ka santi. Pou ègzanp, la té ni yon lè Sara té ni an bagay ki té ka twakasé lidé’y an chay, èk i di Abrahanm ègzaktiman mannyè i té ka santi. Anfen, i jis blanmé Abrahanm pou pwòblenm-lan. Ès Abrahanm té lévé faché lè i tann sa Sara di’y? Mé non! Abrahanm té sav Sara sété an bon madanm ki té ka toujou sipòté’y. Konsa, Abrahanm kouté madanm li byen èk i fè sa’y té pé pou wanjé pwòblenm-lan. (Jen. 16:5, 6) Ki lison mawi sa apwann an ègzanp Abrahanm? Ében, si’w sé an mawi, Jéhova ba’w lotowité-a pou fè disizyon bay fanmi’w. (1 Kòr. 11:3) Mé ou ka moutwé lanmityé pou madanm ou lè ou palé épi’y avan ou fè an disizyon, sitou si sé yon disizyon konsèné an bagay ki kay afèkté’y. (1 Kòr. 13:4, 5) Osi, la ni lokazyon koté madanm ou pé ni an ti tèt cho èk i bizwen palé épi’w konsèné sa ki ka afèkté’y. Ès ou ka kouté’y byen èk moutwé’y wèspé? (Li 1 Pita 3:7.) Angela èk Dmitry sé yon sè èk fwè ki mayé pou pwèskè twant (30) lanné. Angela èspliké mannyè mawi’y ka moutwé’y wèspé. I di: “Lè mwen faché ében lè mwen bizwen palé, mawi mwen toujou pawé pou kouté mwen. I ka moutwé mwen pasyans, menm si mwen ka palé kon an fanm fòl délè.”

17. Ki mannyè sè ki mayé sa imité ègzanp Sara? (1 Pita 3:5, 6)

¹⁷ Sara té ka wèspèkté Abrahanm èk i té ka sipòté sé disizyon’y-lan. (Jen. 12:5) Pou ègzanp, yon jou, twa (3) étwanjé té vini lakay Abrahanm, èk i té vlé ba yo an wipa. Konsa, i mandé Sara pou doubout sa’y té ka fè-a èk pwépawé pen bay sé étwanjé-a. (Jen. 18:6) Alò, Sara doubout sa’y té ka fè-a, èk i fè sa Abrahanm té mandé’y pou fè. Wi, sè ki mayé sa imité ègzanp Sara lè yo sipòté disizyon mawi yo. Èk lè yo fè sa, yo ka fòtifyé mawiyaj yo. (Li 1 Pita 3:5, 6.) Dmitry nou té mansyonnen an pawagwaf-la avan-an, èspliké mannyè madanm li ka wèspèkté’y. I di: “Mwen ka apwésyé mannyè Angela ka sipòté disizyon mwen menm si nou ni diféwan lopinyon. Èk menm si disizyon mwen pa maché byen, i pa ka kwititjé mwen.” Wi, i vwéman ézé pou enmen an moun ki ka wèspèkté’w!

18. Ki bennéfis moun ki mayé ka twapé lè yo tjenn lanmou yo pou yonn a lòt fò?

¹⁸ Jòdi jou, Satan vlé Kwityen ki mayé doubout enmen yonn a lòt. Èk sa sé paski Satan sav lè moun ki mayé doubout enmen yonn a lòt, sa sa fè yo kité Jéhova. Mé kanmenm, toujou chonjé, anyen pa sa tenn lanmou ki vwé! Konsa, sé pou lanmou-a ou ni an mawiyaj ou menm kon lanmou-a Bib-la dékwi an liv Chanson Sòlomon. Alò, toujou mété Jéhova pwèmyé an mawiyaj ou, pasé tan épi yonn a lòt, èk moutwé yonn a lòt wèspé. Anfen, ki bennéfis moun ki mayé kay twapé lè yo fè sé bagay sala? Ében, lè yo fè sé bagay sala, mawiyaj yo kay bay Jéhova lonnè paski sé li ki Sous lanmityé ki vwé. Èvèk menm kon an boukan difé, an moun ka kontiné bay bwa kay toujou bwilé bwiyan, an menm mannyè-a, lanmou-a zòt ni pou yonn a lòt kay diwé pou tout lavi zòt.