Ès Ou Pawé Pou Gwan Twibilasyon-an?

1. Pouki i bon pou pwépawé pou an dézas andavans?

SI nou pwan tan pou pwépawé pou on bagay ki kay fèt, sa pé sové lavi nou. Pou ègzanp, diwan an dézas, moun ki té pwépawé pou dézas-la andavans, ni an pli mèyè chans pou sové lavi yo, èk pou édé lézòt. Anfen, yon ògannizasyon an Youròp ki ka éséyé pou édé moun di: “Lè moun byen pwépawé, sa pé sové lavi yo.”

2. Pouki nou sipozé pwépawé pou gwan twibilasyon-an? (Mafyou 24:44)

² Gwan twibilasyon-an kay koumansé sibitman. (Maf. 24:21) Délè, lè an dézas fèt, sa ka sipwi tout moun, paski pyèsonn pa té ka èspéwé’y. Mé, gwan twibilasyon-an pa kay kon sa, paski nou sav i ka vini. Apipwé dé (2) mil lanné ki pasé, Jézi té di sé disip li-a pou pwépawé kò yo pou jou sala. (Li Mafyou 24:44.) Vwéman, gwan twibilasyon-an kay an tan ki byen téwib, mé si nou pwépawé byen pou’y, nou kay sa tjébé fò, èk édé lézòt pou tjébé fò osi.​—Louk 21:36.

3. Ki mannyè abilité-a pou tjébé fò anba difikilté, konpasyon, èk lanmityé kay édé nou diwan gwan twibilasyon-an?

³ Bon, annou konsidiwé twa (3) bagay ki kay édé nou pwépawé pou gwan twibilasyon-an. Yonn (1), abilité-a pou tjébé fò anba difikilté. Ki mannyè sa kay édé nou diwan gwan twibilasyon-an? Si nou ni pou déklawé konmisyon jijman-an ki menm kon “lapli laglas,” èvèk moun ka òpozé nou pou sa, abilité-a pou tjébé fò anba difikilté kay édé nou pou obéyi Jéhova, èk kontiné ni konfyans ki, i kay pwotéjé nou. (Wév. 16:21) Dé (2), konpasyon. Diwan gwan twibilasyon-an, nou pé wè adan sé fwè èk sè nou-an pèd tout sa yo ni. Si nou ni konpasyon pou yo, sa kay pousé nou pou fè tout sa nou pé pou édé yo. (Hab. 3:17, 18) Èk twa (3), lanmityé. Lè gwoup nasyon-an ataké nou diwan gwan twibilasyon-an, pitèt nou kay ni pou wèsté adan an ti tou épi an chay an sé fwè èk sè-a pou an tan. (Izik. 38:10-12) A lè sala nou kay bizwen ni lanmityé ki fò pou yonn a lòt, pou nou sa aji épi sé difikilté sala.

4. Ki mannyè Bib-la ka moutwé nou ni pou kontiné dévlopé abilité-a pou tjébé fò anba difikilté, konpasyon, èk lanmityé?

⁴ Pawòl Bondyé ka ankouwajé nou pou kontiné dévlopé abilité-a pou tjébé fò anba difikilté, konpasyon, èk lanmityé. Pou ègzanp, Louk 21:19 di: “Tjenbé fò, paski sa sé mannyè zòt kay twapé wéyèlman lavi.” Kòlòsé 3:12 ka ankouwajé nou pou abiyé kò nou épi “konpasyon.” Èvèk 1 Tèsalonnika 4:9, 10 di: “Bondyé menm té ja [moutwé zòt] mannyè pou enmen yonn a lòt. . . . Kon sa fwè èk sè, nou ka [mandé zòt] ankò souplé, fè [sa] plis toujou.” Sé vèwsé sala té ékwi pou sé disip-la ki té ja ka moutwé yo ni abilité-a pou tjébé fò anba difikilté, konpasyon, épi lanmityé. Mé, yo té ni pou kontiné dévlopé sé twa (3) bagay sala. Nou ni pou fè menm bagay-la. Konsa, annou konsidiwé mannyè sé Kwityen-an an pwèmyé syèk-la té moutwé chak an sé twa (3) bagay sala. Apwé sa, nou kay gadé mannyè nou sa imité yo, èk moutwé nou pawé pou gwan twibilasyon-an.

FÒTIFYÉ ABILITÉ’W POU TJÉBÉ FÒ ANBA DIFIKILTÉ

5. Kisa ki té édé sé Kwityen-an an pwèmyé syèk-la pou tjébé fò anba sé difikilté-a yo té ka èspéyansé-a?

⁵ Sé Kwityen-an an pwèmyé syèk-la té ni pou tjébé fò anba difikilté. (Hib. 10:36) Yo té ka èspéyansé sé menm difikilté-a tout moun té ka èspéyansé. Mé apa di sa, yo té ka èspéyansé an chay difikilté paski yo té Kwityen. Pou ègzanp, sé mèt wilizyon sé Jwif-la, moun an lotowité anba gouvèdman Ronm, épi jis manm fanmi yo, té ka pèsikité an chay di yo. (Maf. 10:21) On lòt difikilté sé Kwityen-an té ni sé sa, moun ki té tounen apòsta té ka simen mansonj pou divizé kongwigasyon-an. Konsa, yo té ni pou twavay wèd pou pa kité sé apòsta-a enflouwansé yo. (Twav. 20:29, 30) Mé magwé tout sa, sé Kwityen-an kontiné tjébé fò. (Wév. 2:3) Kisa ki té édé yo tjébé fò anba tout sé difikilté-a yo té ka èspéyansé-a? Yo té ka pwan tan pou mèdité asou ègzanp moun an Bib-la ki té tjébé fò anba difikilté, tèl kon Jòb. (Jémz 5:10, 11) Osi, yo té ka pwédyé pou Jéhova ba yo fòs épi kouwaj. (Twav. 4:29-31) Èvèk yo té ka tjenn an lidé yo sé bèl bagay-la Jéhova té kay ba yo, si yo té kontiné tjébé fò.​—Twav. 5:41.

6. Kisa sè Merita té fè pou’y tjébé fò anba òpozisyon, èk kisa ou apwann an ègzanp li?

⁶ Bib-la épi sé piblikasyon nou-an ni an chay ègzanp moun ki té tjébé fò anba difikilté. Si nou ka toujou pwan tan pou mèdité asou sé bèl ègzanp sala, nou osi kay sa tjébé fò lè nou ka èspéyansé difikilté. Sé sa yon sè yo ka kwiyé Merita, an péyi Albania té fè. Èvèk sé sa ki édé’y pou tjébé fò lè’y té ka èspéyansé mové òpozisyon an fanmi’y. Sè-a di: “Lè mwen li wakont-la konsèné Jòb an Bib-la, sa ankouwajé mwen an chay. Mizi soufè Jòb soufè, èk magwé i pa té sav pouki i té ka èspéyansé sé pwoblenm sala, i di: ‘Jis lè mwen mò, mwen kay wèsté fidèl pou Bondyé!’ (Jòb 27:5) Sa Jòb èspéyansé té otan pli mové pasé sa mwen té ka èspéyansé. Èk Jòb pa té sav ki moun ki té ka mennen pwoblenm asou’y, mé mwen té konnèt ki moun ki té mennen pwoblenm asou mwen.”

7. Menm si nou pa ka èspéyansé an pwoblenm ki gwav apwézan, kisa nou bizwen apwann fè?

⁷ An lòt bagay nou sa fè pou fòtifyé abilité nou pou tjébé fò anba difikilté, sé pwédyé bay Jéhova souvan, èk di’y tout sa ki ka fèt an lavi nou. (Filip. 4:6; 1 Tèsa. 5:17) Pitèt ou pa ka èspéyansé an gwo pwoblenm an lavi’w apwézan. Mé ès ou ni labitid ka pwédyé èk mandé Jéhova pou édé’w lè’w faché, lè’w ni tèt cho, ében lè’w pa sav kisa pou’w fè? Si’w ka toujou mandé Jéhova pou édé’w lè’w ka èspéyansé pwoblenm ki pa gwav apwézan, i kay pli ézé pou’w dépan asou Jéhova lè’w ka èspéyansé pwoblenm ki gwav an tan pou vini. Èk ou kay ni konfyans ki, Jéhova konnèt ègzaktiman ki lè pou édé’w èk kisa i ni pou fè pou édé’w.​—Sam 27:1, 3.

8. Kon nou apwann an ègzanp sè Mira, si nou tjébé fò anba difikilté apwézan, ki mannyè sa kay édé nou an tan pou vini? (Jémz 1:2-4) (Gadé pòtwé-a osi.)

⁸ Si nou ka wèsté fidèl pou Jéhova lè nou ka èspéyansé difikilté apwézan, i kay pli ézé pou nou tjébé fò lè nou ka èspéyansé difikilté diwan gwan twibilasyon-an. (Ronm 5:3) Pou ki wézon nou sa di sa? Ében an chay fwè èk sè ka di, chak fwa yo tjébé fò anba yon difikilté, sa té ka édé yo pou tjébé fò anba lòt difikilté-a yo té ni pou èspéyansé. Wi, lè yo wè mannyè Jéhova édé yo pou tjébé fò anba yon difikilté, sa ka fòtifyé lafwa yo. Èk paski yo ni lafwa ki, Jéhova kay édé yo, sa ka ba yo kouwaj-la pou tjébé fò anba lòt difikilté-a ki vini asou yo. (Li Jémz 1:2-4.) Mira sé on sè ki ka wann sèvis kon an piyonnè an péyi Albania. Èk i té ni pou tjébé fò anba difikilté an tan pasé. Mé, i ka kwè sé sa ki ka édé’y pou tjébé fò anba difikilté i ka èspéyansé apwézan. I di, délè i ka santi akwèdi sé li yonn ki ni tout sé pwoblenm sala. Mé lè’y chonjé tout sa Jéhova ja fè pou édé’y pou sé ven (20) lanné-a ki pasé, i ka di kò’y: ‘Ou ni pou wèsté fidèl. Pa doubout sèvi Jéhova apwé i ja édé’y tjébé fò anba tout sé sitiwasyon difisil sala.’ Ou osi sa mèdité asou diféwan mannyè Jéhova ja édé’w pou tjébé fò anba difikilté. Èk ou sa asiwé, Jéhova ka òbzòvé chak fwa ou tjébé fò èk i kay benni’w pou sa. (Maf. 5:10-12) Konsa, lè gwan twibilasyon-an koumansé ou kay ja apwann mannyè pou tjébé fò anba difikilté, èk ou kay détèminé pou kontiné fè sa.

MOUTWÉ KONPASYON

9. Ki mannyè sé fwè-a an vil Antiyòk té moutwé konpasyon pou sé fwè-a an péyi Joudiya?

⁹ Annou konsidiwé sa ki té fèt lè sé Kwityen-an an péyi Joudiya té ka èspéyansé an gwo lafen. Lè sé fwè-a an kongwigasyon-an an vil Antiyòk tann konsèné gwo lafen-an, san dout, yo santi konpasyon pou sé fwè-a an péyi Joudiya. Mé yo pa té annèk santi konpasyon, yo osi moutwé konpasyon. Wi, yo pwan aksyon, èk yo fè sa yo té pé pou édé sé fwè-a an péyi Joudiya. Silon sa nou li an Twavay 11:27-30, chak sé fwè-a an vil Antiyòk désidé pou ‘voyé sa yo té pé bay sé fwè-a an péyi Joudiya.’ Konsa magwé sé fwè-a ki té ka èspéyansé gwo lafen-an té lwen, sé fwè-a an vil Antiyòk té détèminé pou édé yo.​—1 Jan 3:17, 18.

10. Kisa nou sa fè pou moutwé konpasyon pou sé fwè èk sè nou-an lè yo èspéyansé an dézas, ében lòt difikilté? (Gadé pòtwé-a osi.)

¹⁰ Jòdi jou, lè nou tann sé fwè èk sè nou-an ka soufè annékòz di dézas natiwèl ében lòt difikilté, nou osi sa moutwé konpasyon pou yo. Èk nou pa ka tadé pou fè sa nou pé pou édé yo. Tèl kon, pwédyé ba yo, fè donnasyon pou sipòté twavay-la oliwon latè-a, èk pitèt nou ka mandé sé ansyen-an si nou sa twavay asou yonn an sé pwojé-a pou pòté soukou.b (Pwov. 17:17) Pou ègzanp, an lanné dé mil ven (2020), nou apwenté pli pasé nèf san senkant (950) Konmité Pou Pòté Soukou oliwon latè-a. Sé konmité sala té ni wèskonsabilité-a pou otjipé sé fwè èk sè-a ki té bizwen èd diwan panndèmik COVID-19-lan. Nou ka vwéman apwésyé sé fwè èk sé nou-an ki ka fè twavay-la pou pòté soukou. Sé fwè èk sè sala té ka mennen manjé èk lòt bagay nésésè bay sé fwè-a, èk yo té ka édé yo pou tjenn wilasyon yo épi Jéhova fò. Osi, adan di yo té ka twavay pou wibati kay sé fwè-a, èk plas adowasyon ki té donmajé. Èk yo té ka fè tout sa paski, yo ni konpasyon pou sé fwè èk sè-a.​—Gadé 2 Kòrint 8:1-4.

11. Lè nou moutwé konpasyon pou lézòt, ki mannyè sa ka onnowé Jéhova?

¹¹ I bon pou nou chonjé, moun ka òbzòvé sé sakwifis-la nou ka fè pou moutwé konpasyon pou lézòt apwé an dézas. Pou ègzanp, an lanné dé mil diznèf (2019), Siklonn Dorian té kwazé on Sal Wéyòm an péyi Bahamas. Paditan sé fwè nou-an té ka wibati Sal-la, la té ni sèten bagay yo té bizwen an kontwaktan pou fè. Konsa, yo mandé an nonm konmen lajan i té kay mandé yo pou fè twavay-la. Nonm-sala pa té an Tèmwen Jéhova, mé i di yo: “Mwen vlé fè an donnasyon . . . mwen kay bay zòt ikipman-an, sé twavayè-a, épi matwiyo-a zòt bizwen pou fè twavay-la. . . . Mwen annèk vlé fè sa bay ògannizasyon zòt. Lè mwen wè mannyè zòt ka édé sé jan zòt-la, sa ka touché tjè mwen.” Vwéman, majòwité moun an latè-a pa konnèt Jéhova. Mé an chay di yo ka wè sa Témwen Jéhova ka fè pou édé lézòt. Mizi kontan nou ka kontan pou konnèt, lè nou moutwé konpasyon pou lézòt, sa pé pousé moun pou apwann pli konsèné Jéhova, ‘Bondyé-a ki ni tèlman konpasyon!’​—Èfés. 2:4-5.

12. Pouki i bon pou nou dévlopé konpasyon pou yonn a lòt dépi apwézan? (Wévélasyon 13:16, 17)

¹² Diwan gwan twibilasyon-an, nou kay ni pou moutwé konpasyon pou yonn a lòt. Pouki? Ében silon Bib-la, tout moun ki pa sipòté sé gouvèdman latè-a kay èspéyansé difikilté apwézan, èk diwan gwan twibilasyon-an. (Li Wévélasyon 13:16, 17.) Konsa, pitèt nou kay ni pou édé sé fwè èk sè nou-an twapé sa yo bizwen pou yo viv. Èk lè Wa nou, Jézi Kwi vini pou détwi lé méchan, nou vlé’y jwenn nou ka moutwé konpasyon pou yonn a lòt. Paski a lè sala i kay envité nou pou, vini “wisivwè sé bennédiksyon-an” anba Wéyòm Bondyé.​—Maf. 25:34-40.

FÒTIFYÉ LANMITYÉ’W POU SÉ FWÈ ÈK SÈ NOU-AN

13. Silon Ronm 15:7, kisa sé Kwityen-an an pwèmyé syèk-la té fè pou fòtifyé lanmityé yo pou yonn a lòt?

¹³ Tout moun té konnèt, sé Kwityen-an an pwèmyé syèk-la té ni lanmityé pou yonn a lòt. Mé, ès i té alèz pou yo moutwé lanmityé pou yonn a lòt? Annou pwan kongwigasyon-an an vil Ronm kon yon ègzanp. Adan sé fwè sala té Jwif, konsa dépi yo té toupiti yo apwann pou obéyi Lwa Moziz-la. Mé kongwigasyon sala té osi ni moun hòd sé nasyon-an, èk sé moun sala té ni an diféwan kilti toubonnman. Osi, i ka sanm adan sé fwè-a té anba èslavaj, èk lézòt sété moun ki té lib. Pitèt adan sé fwè-a an kongwigasyon sala té jis ni moun anba èslavaj. Konsa ki mannyè tout sé diféwan fwè sala té kay sa wèsté an lilyon èk kontiné moutwé lanmityé pou yonn a lòt? Ében yo té kay ni pou swiv konsèy-la zapòt Pòl té ba yo. I di yo: “Aksèpté yonn a lòt.” (Li Ronm 15:7.) Mé kisa sa té vlé di? Mo pawòl-la zapòt Pòl sèvi pou “aksèpté” sé an mo pawòl ki vlé di, wisouvwè an moun adan an mannyè ki janti, menm kon lè’w ka wisouvwè an moun lakay ou, ében lè’w ka wisouvwè an bon jan’w. Pou ègzanp, Onèsimòs sété èslav Filémonn, mé i té mawon. Lè’y té ka viwé jwenn Filémonn, zapòt Pòl di Filémonn: “Si ou ka konsidiwé mwen kon on kanmawad, wisivwè Onèsimòs menm kon ou té kay wisivwè mwen.” (Filém. 17) Osi, Prisilya épi Akwila té konnèt pli pasé Apòlòs, mé yo aksèpté’y èk “yo envité’y lakay yo.” (Twav. 18:26) Konsa sé Kwityen sala té diféwan, mé yo pa kité sa divizé yo. Pito sa, yo aksèpté yonn a lòt.

14. Kisa sè Anna épi mawi’y té fè pou moutwé lanmityé yo pou sé fwè èk sè-a?

¹⁴ Lè nou fè jan épi sé fwè èk sè nou-an, èk nou pasé tan épi yo, nou ka moutwé nou ni lanmityé pou yo. Èk sa ka motivé yo pou moutwé lanmityé pou nou osi. (2 Kòr. 6:11-13) Annou konsidiwé ègzanp yon sè épi mawi’y. Non sè-a sé Anna. Touswit apwé i épi mawi’y wivé Afwik pou koumansé ansayman yo kon misyonnè, panndèmik COVID-19-lan koumansé. I té byen difisil pou yo vini konnèt sé fwè èk sè-a an kongwigasyon-an, paski yo pa té sa jwenn épi yo fas a fas a kòz di panndèmik-lan. Konsa, ki mannyè sè Anna épi mawi’y moutwé lanmityé yo pou sé fwè èk sè-a? Ében, yo palé épi sé fwè èk sè-a an kongwigasyon-an asou intannèt-la, èk yo fè yo sav mizi anvi yo anvi konnèt yo. Sa touché tjè sé fwè èk sé-a, èk sé fwè-a menm koumansé kwiyé Anna épi mawi’y, èk voyé ti tèks ba yo. Mé kisa ki pousé Anna épi mawi’y pou fè éfò pou konnèt sé fwè èk sè-a? Anna di: “M’a sa janmen obliyé mannyè fwè èk sè ja moutwé lanmityé pou mwen épi fanmi mwen, ni lè bagay té bon èk lè bagay té mové. Sé bon ègzanp yo ki motivé mwen pou moutwé lanmityé.”

15. Kisa ou apwann an ègzanp sè Vanessa, ki sa édé’w fòtifyé lanmityé’w pou tout sé fwè èk sè nou-an? (Gadé pòtwé-a osi.)

¹⁵ Pou an chay di nou, sé fwè èk sè-a an kongwigasyon nou pa ni menm kilti èk menm pèsonnalité épi nou. Magwé sa, nou sa fòtifyé lanmityé nou pou tout sé fwè èk sè nou-an, si nou fiksé asou sé bèl kawaktè-a yo ni. Annou gadé yon ègzanp ki ka moutwé sa. Vanessa sé on sè ki ka wann sèvis an péyi New Zealand. Èk i té ka twapé’y difisil pou ni an bon wilasyon épi adan sé fwè èk sè-a an kongwigasyon’y. Mé, pito i halé kò’y hòd sé fwè èk sè-a ki té ni pèsonnalité i pa té kontan, i désidé pou pasé pli tan épi yo. Èvèk sa édé’y pou wè sé bèl bagay-la Jéhova té ka wè an sé fwè èk sè sala. Sè Vanessa di: “Dépi mawi mwen koumansé wann sèvis kon yon ansyen pou sékyout-la, nou ka pasé tan épi pli fwè èk sè ki ni diféwan pèsonnalité. Mé, i pli alèz pou mwen ni an bon wilasyon épi yo. Apwézan mwen kontan sé diféwan pèsonnalité-a sé fwè èk sè-a ni-an. Èvèk san dout, Jéhova kontan’y osi, paski i ka mennen moun ki ni tout diféwan kilti èk pèsonnalité ansanm pou adowé’y.” Vwéman, lè nou apwann pou gadé moun menm mannyè-a Jéhova ka gadé yo, nou ka moutwé nou ni lanmityé pou yo.​—2 Kòr. 8:24.

16. Pouki nou sa di nou kay bizwen ni lanmityé pou sé fwè èk sè nou-an diwan gwan twibilasyon-an? (Gadé pòtwé-a osi.)

¹⁶ Diwan gwan twibilasyon-an, nou kay ni pou moutwé lanmityé pou sé fwè èk sè nou-an. Mé, lè gwan twibilasyon-an koumansé, kisa Jéhova kay fè pou pwotéjé nou? Annou konsidiwé sa Jéhova té di pèp li pou fè lè sé lèlmi-an té ataké vil Babilonn an tan lontan. I di yo: ‘Alé, pèp mwen, antwé andidan chanm ou, épi fenmen lapòt-la dèyè’w. Séwé kò’w pou an ti mouman, jistan kòlè-a pasé.’ (Izay. 26:20) Pitèt nou kay ni pou swiv menm diwèksyon sala diwan gwan twibilasyon-an. Èk pitèt sé “chanm-lan” vlé di, sé kongwigasyon-an. Mé, Jéhova pwonmèt, i kay pwotéjé nou diwan gwan twibilasyon-an si nou kontiné sèvi’y an lilyon épi sé fwè èk sè nou-an. Konsa, dépi apwézan, nou ni pou twavay wèd pou nou ni lanmityé ki byen fò pou sé fwè èk sè nou-an. Pitèt lavi nou kay dépan asou sa!

APWÉZAN SÉ LÈ-A POU PWÉPAWÉ

17. Si nou pwépawé dépi apwézan, kisa nou kay sa fè diwan gwan twibilasyon-an?

¹⁷ ‘Gwan jou Jéhova’ kay an tan ki byen difisil pou tout lézòm. (Zèf. 1:14, 15) Èk pèp Jéhova kay soufè osi. Mé si nou pwépawé dépi apwézan, nou kay sa wèsté kam, èk nou kay sa édé lézòt. Wi, nou kay sa tjébé fò anba népòt difikilté nou pé èspéyansé a lè sala. Èk lè sé fwè èk sè nou-an ka soufè, nou kay sa moutwé yo konpasyon, èk fè tout sa nou pé pou édé yo twapé sa yo bizwen. Osi, si nou dévlopé lanmityé ki fò pou sé fwè èk sè nou-an dépi apwézan, nou kay sa moutwé lanmityé pou yonn a lòt diwan gwan twibilasyon-an. Si nou fè sé twa (3) bagay sala nou diskité an atik sala, Jéhova kay benni nou. Wi, i kay ban nou lavi étonnèl an latè nèf-la, koté nou pa kay menm chonjé dézas natiwèl èk lòt mové bagay ki té ka fè nou soufè.​—Izay. 65:17.