Sé Pou Lanmityé’w Pou Jéhova Épi Pou Lézòt Kontiné Pwofité

1. Ki diféwan bagay ou té apwann lè ou koumansé étidyé Bib-la?

ÈS OU ka chonjé lè’w té koumansé étidyé Bib-la? Pou ègzanp, pitèt ou ka chonjé lè’w apwann Bondyé ni on non, èk ou té byen sipwi pou apwann sa. Osi lè’w tann Bondyé pa kay bwilé moun an lanfè, pitèt sa soulajé’w. Èk pa dé kontan ou té kontan lè’w apwann ou té kay wè moun ou enmen ki mò ankò, èk ou kay viv épi yo an pawadi asou latè sala pou tout tan.

2. Kon’w té ka kontiné étidyé Pawòl Bondyé, kisa i té pousé’w pou fè? (Èfésòs 5:1, 2)

² Pli ou étidyé Pawòl Bondyé, sé pli lanmityé’w pou Jéhova té pwofité. Èk lanmityé sala pousé’w pou mété an pwatik sa’w té ka apwann. Pou ègzanp, sé sa ki édé’w pou fè bon disizyon ki bazé asou pwensip Bib. Osi, ou fè chanjman an atitid ou èk an kondwit ou paski ou té vlé plè Bondyé. Wi, menm kon an ti manmay ka imité pawan’y, ou té ka éséyé pou imité Jéhova, Papa’w ki an syèl.​—Li Èfésòs 5:1, 2.

3. Ki kèstyon nou vlé mandé kò nou?

³ Nou sa mandé kò nou kèstyon tèl kon: ‘Ès lanmityé mwen pou Jéhova pli fò jòdi pasé lè mwen té batizé? Dépi mwen batizé ès mwen ja vini pli kon Jéhova èspwèsman an mannyè-a mwen ka moutwé sé fwè èk sè-a lanmityé?’ Èben, si nou wéyalizé nou ‘pa enmen Jéhova èben sé fwè èk sè-a kon avan’, nou pa ni pou santi dékouwajé. Pou ègzanp adan Kwityen an pwèmyé syèk-la té pèd lanmityé-a yo té ni pou Jéhova èk pou sé fwè èk sè yo-a. Èk menm kon Jézi pa té widjèkté yo, i pa kay widjèkté nou non plis. (Wév. 2:4, 7) Anfen, Jézi sav nou sa viwé twapé lanmityé-a nou té ni lè nou té apwann lavéwité-a.

4. Kisa nou kay diskité an atik sala?

⁴ An atik sala nou kay diskité mannyè lanmityé nou pou Jéhova, èk pou sé fwè èk sè nou-an sa kontiné pwofité. Osi, nou kay wè sé bennédiksyon-an nou èk lézòt kay èspéyansé lè nou fòtifyé lanmityé nou pou Jéhova, épi pou yonn a lòt.

SÉ POU LANMITYÉ’W POU JÉHOVA KONTINÉ PWOFITÉ

5-6. (a) Ki difikilté zapòt Pòl té èspéyansé an minis li? (b) Èk kisa ki pousé zapòt Pòl pou kontiné an sèvis li pou Jéhova?

⁵ Zapòt Pòl té ni an bèl lavi an sèvis Jéhova. Mé kanmenm, i té èspéyansé difikilté tou. Pou ègzanp, byen souvan i té ka voyajé pou plizyè lyé, magwé an tan sala i pa té ézé pou fè sa. Osi, lè’y té ka voyajé, i té ka “pasé danjéwé lawivyè”, èk “danjéwé vòlè”. An plis di sa, la té ni tan lè sé lèlmi’y-la té jis bat li. (2 Kòr. 11:23-27) Èk sé fwè-a an kongwigasyon-an pa té ka toujou apwésyé sa’y té ka fè ba yo.​—2 Kòr. 10:10; Filip. 4:15.

⁶ Kisa ki édé Pòl pou kontiné an sèvis li pou Jéhova? Zapòt Pòl té apwann an chay bagay konsèné kawaktè Jéhova hòd sé lévanjil-la èk osi hòd mannyè-a i té ka wè lanmen Jéhova an lavi’y. Wi, Pòl té asiwé Jéhova té enmen’y. (Ronm 8:38, 39; Èfés. 2:4, 5) Èk lanmityé’y pou Jéhova té kontiné pwofité osi. Anfen, Pòl té moutwé i té vwéman enmen Jéhova an mannyè-a i té ka édé sé fwè èk sè-a.—Hib. 6:10.

7. Kisa nou sa fè pou lanmityé nou pou Jéhova pwofité?

⁷ Lanmityé nou pou Jéhova sa pwofité lè nou ka toujou étidyé Pawòl li. Pou ègzanp, kon’w ka li Bib-la, éséyé pou wè kisa chak wakont ka di’w konsèné Jéhova. Konsa lè’w ka li an wakont, mandé kò’w: ‘Ki mannyè wakont sala ka moutwé Jéhova enmen mwen? Kisa mwen apwann an wakont sala ki ka motivé mwen pou enmen Jéhova?’

8. Ki mannyè lapwiyè sa édé lanmityé nou pou Jéhova pou pwofité?

⁸ An lòt mannyè lanmityé nou pou Jéhova sa pwofité, sé lè nou palé épi’y an lapwiyè touléjou èk nou ka vwéman di’y sa ki ofon tjè nou. (Sam 25:4, 5) Èk Jéhova kay wéponn lapwiyè nou. (1 Jan 3:21, 22) Khanh sé an sésé an Asia, èk i di: “An koumansman-an, lanmityé mwen pou Jéhova té bazé asou sa mwen té ka apwann an Bib-la. Mé apwézan, lè mwen wè mannyè Jéhova ka wéponn lapwiyè mwen, sa ka fè lanmityé mwen pou Jéhova pwofité toubonnman. Alò sa ka vwéman ankouwajé mwen pou fè bagay ki kay plè’y.”b

SÉ POU LANMITYÉ’W POU LÉZÒT KONTINÉ PWOFITÉ

9. Ki mannyè nou sav lanmityé Timòfi pou sé fwè èk sè-a té ka pwofité?

⁹ Plizyè lanné apwé Pòl vini an Kwityen, i jwenn épi an bèl jenn nonm. Non’y sété Timòfi. I té a klè Timòfi té enmen ni Jéhova ni sé fwè èk sè-a. Anfen, mi sé sa zapòt Pòl di sé fwè-a an Filipay konsèné Timòfi: “I sé sèl moun ki ni menm lidé épi mwen épi ki vlé édéʼw pou vwé.” (Filip. 2:20) Lè Pòl di pawòl sala, i pa té ka palé konsèné abilité-a Timòfi té ni pou bay bon diskou, èben konsèné abilité’y pou byen ògannizé bagay. Non, i té ka palé konsèné lanmityé-a Timòfi té ni pou sé fwè-a. Konsa, la pa ni pyès dout, sé fwè èk sè-a an sé kongwigasyon-an té ka byen èksité lè Timòfi té ni pou vizité yo.​—1 Kòr. 4:17.

10. Ki mannyè Anna èk mawi’w té moutwé yo ni lanmityé pou sé fwè èk sè-a?

¹⁰ Nou osi ka gadé pou mannyè pou édé sé fwè èk sè nou-an. (Hib. 13:16) Annou konsidiwé èspéyans Anna nou té palé konsèné an atik 29. Apwé an mové tan té pasé, Anna èk mawi’y té vizité on fanmi Témwen Jéhova, èk yo wéyalizé mové tan-an kwazé fétay kay-la. A kòz di sa, fanmi-a pa té ni pyès had ki té nèt. Anna di: “Nou pwan sé had-la, nou lavé yo, nou pasé yo, nou voplé yo, èk nou mennen yo viwé bay fanmi-a. Pou nou, sa nou té fè pa té anyen, mé a kòz di sa nou té fè, nou sé bon jan jis jòdi.” Wi, paski Anna épi mawi’y enmen sé fwè èk sè-a, sa pousé yo pou fè népòt sa yo té pé pou édé yo.—1 Jan 3:17, 18.

11. (a) Ki mannyè sé fwè èk sè-a ka santi lè nou moutwé yo nou enmen yo? (b) Silon Pwovèb 19:17, kisa Jéhova kay fè lè nou moutwé sé fwè èk sè nou-an lanmityé?

¹¹ Lè nou moutwé lézòt lanmityé èk jantiyès, yo sa wè nou ka fè éfò pou imité Jéhova. Èk yo pé apwésyé sa nou fè ba yo pli pasé nou pé wéyalizé. Pou ègzanp, Khanh, sè-a nou té mansyonnen-an avan di: “Mwen ka vwéman apwésyé tout sé sè-a ki té édé mwen an sèvis-la. Yo té ka anmasé mwen lakay mwen, yo té ka envité mwen pou manjé épi yo, èk yo té ka jis fè asiwé mwen wivé kay mwen sòv. Apwézan mwen wéyalizé i pa té ézé pou fè tout sa yo té fè-a, mé yo té fè’y paski yo té enmen mwen. Mwen avoudwé mwen té kay sa péyé yo déviwé pou jantiyès yo, mé mwen pa sav koté yo tout ka wèsté. Kanmenm, Jéhova konnèt koté yo yé, èk mwen ka pwédyé pou bennédiksyon Jéhova asou yo tout.” Bon, sé pa tout moun ki kay ni òpòtyounité-a pou moutwé nou apwésiyasyon pou sa nou fè ba yo. Mé kon Khanh di, Jéhova ka òbzòvé chak lè nou moutwé sé fwè èk sè nou-an jantiyès, menm si sé an piti bagay nou fè ba yo. Èk an plis di sa, lè nou moutwé yonn a lòt lanmityé èk jantiyès, Jéhova ka gadé sa kon an sakwifis ki byen valowab, èk kon an dèt i menm kay péyé déviwé.—Li Pwovèb 19:17.

12. Ki mannyè sé fwè-a sa moutwé yo enmen kongwigasyon-an? (Gadé sé pòtwé-a osi.)

¹² Si’w sé yon fwè, ki mannyè ou sa moutwé ou vwéman enmen sé fwè èk sè-a èk ou vlé édé yo? Èben, Jordan sé an jenn fwè ki té ni kèstyon sala asou lidé’y. Konsa i mandé yon ansyen kisa i ni pou fè pou’y té sa fè pli an kongwigasyon-an. Alò, ansyen-an aplodi Jordan pou pwogwé-a i té ja ka fè, èk i osi ba’y déotwa sijèsyon ki té kay édé’y pou asisté sé fwè èk sè-a pli. Anpami sé bagay-la ansyen-an té mansyonnen-an sé; (1) éséyé pou wivé sé mitin-lan bonnè pou byen vini sé fwè èk sè-a, (2) wéponn kèstyon an sé mitin-lan, (3) pwéché wèglé épi gwoup sèvis-la, èk (4) katjilé asou diféwan bagay i sa fè pou édé sé fwè-a. Konsa Jordan mété konsèy sala an pwatik, èk a kòz di sa i twapé bennéfis. Pou ègzanp, i apwann fè bagay nèf, èk i osi dévlopé pli lanmityé pou sé fwè èk sè-a. An plis di sa, Jordan apwann ki, an fwè sipozé dévlopé lanmityé pou kongwigasyon-an avan yo apwenté’y kon an sèvant ministiriyal. Èvèk sa sé paski, lè yo apwenté fwè-a kon an sèvant ministiriyal, i ka annèk kontiné édé sé fwè èk sè-a kon’y té ka fè avan.​—1 Tim. 3:8-10, 13.

13. Ki mannyè lanmityé té édé an fwè pou wann sèvis kon yon ansyen ankò?

¹³ Si’w té ka wann sèvis kon yon sèvant ministiriyal èben kon yon ansyen an tan pasé, pa janmen obliyé Jéhova ka chonjé tout twavay-la ou té fè, èk lanmityé-a ki té pousé’w pou fè’y. (1 Kòr. 15:58) Èk Jéhova ka osi wè lanmityé-a ou ka kontiné moutwé sé fwè èk sè-a. Pou ègzanp, Christian sé an fwè ki té pèd pwivilaj-la pou wann sèvis kon yon ansyen, èk lè sa fèt, i té byen dézapwenté. Kanmenm i di: “Mwen désidé pou kontiné fè tout sa mwen pé an sèvis mwen pou Jéhova menm si mwen pa té ka wann sèvis kon yon ansyen ankò.” Apwé an tan, Christian koumansé wann sèvis kon yon ansyen ankò. I di: “Mwen té ti miyèt antjèt pou mwen wann sèvis kon yon ansyen ankò. Kanmenm mwen wéyalizé Jéhova moutwé mwen mizéwikòd, èk i vlé mwen wann sèvis kon yon ansyen ankò. Konsa, paski mwen enmen Jéhova èk mwen enmen sé fwè èk sè mwen-an, mwen aksèpté pwivilaj-la.”

14. Kisa nou apwann an sa Elena di?

¹⁴ I enpòtan pou sèvant Jéhova moutwé vwézinaj yo lanmityé. (Maf. 22:37-39) Pou ègzanp, Elena sé an sè an péyi Georgia, èk i di: “Lè mwen koumansé alé an minis-la, sé lanmityé mwen pou Jéhova tousèl ki té ka pousé mwen pou pwéché. Mé mwen wéyalizé, pli lanmityé mwen pou Jéhova pwofité, sé pli lanmityé mwen pou moun té ka pwofité osi. Alò, mwen koumansé katjilé asou sé pwòblenm-lan moun té ka aji épi, èk bagay yo té kay vlé palé konsèné. Èvèk mwen wéyalizé, pli mwen té katjilé asou vwézinaj mwen, sé pli mwen té vlé édé yo.—Ronm 10:13-15.

JÉHOVA KAY BENNI NOU LÈ NOU MOUTWÉ SÉ FWÈ ÈK SÈ-A LANMITYÉ

15-16. Silon pòtwé-a, kisa ki wézilta-a lè nou moutwé sé fwè èk sè nou-an lanmityé?

¹⁵ Lè nou moutwé sé fwè èk sè nou-an lanmityé, sé pa yo tousèl ki ka twapé bennéfis. Pou ègzanp, lè COVID-19 koumansé, fwè Paolo épi madanm li édé an chay fwè èk sè ki an laj apwann mannyè pou sèvi pòtab yo, tablèt yo, èk konpyouta yo pou pwéché. Pou ègzanp, i té difisil pou yon sésé sèvi pòtab li, mé apwé an lè, i apwann mannyè pou sèvi’y. Alò, i té sa sèvi’y pou envité fanmi’y pou atandé Mémoriyal-la. Èvèk swasant (60) di yo atandé Mémoriyal-la asou intannèt-la! Wi, ni sésé-a ni fanmi sésé-a twapé bennéfis, paski fwè Paolo épi madanm li té wédé sésé-a. Apwé sa, sésé-a ékwi Paolo èk i di’y: “Mwen ka wimèsyé’w paski ou enstwi nou. M’a kay janmen obliyé ki otan Jéhova enmen nou, èk mannyè ou twavay wèd pou édé nou.”

¹⁶ Fwè Paolo apwann on bèl lison hòd èspéyans sala. I apwann ki, lè nou moutwé moun lanmityé sa pli enpòtan pasé sa nou konnèt èben abilité nou. I di: “Mwen té ka wann sèvis kon yon ansyen pou sékyout-la. Mé jòdi mwen wéyalizé, pitèt sé fwè èk sè-a pa ka chonjé sé diskou mwen-an, mé yo ka chonjé sé bagay-la mwen té fè ba yo.”

17. Lè nou moutwé sé fwè èk sè-a lanmityé, ès nou ka twapé bennéfis osi? Ba yon ègzanp.

¹⁷ Chonjé, lè nou moutwé sé fwè èk sè-a lanmityé, nou osi ka twapé bennéfis. Pou ègzanp, Jonathan, sé an fwè ki ka wèsté an péyi New Zealand, èk i té twapé bennéfis lè’y té moutwé on piyonnè lanmityé. Yon Sanmdi apwémidi, i wè yon piyonnè ka pwéché pa kò’y, konsa, Jonathan désidé pou twavay épi fwè-a lé Sanmdi apwémidi. Mé i pa té wéyalizé sé bennéfis-la i té kay enjwi a kòz di lanmityé-a i moutwé fwè-a. Jonathan di: “M’a té kontan minis-la, mé kon mwen té ka gadé mannyè-a fwè-a té ka enstwi, èk mannyè-a i té ka ni bon wézilta, mwen koumansé enjwi minis-la. Osi, mwen èk fwè-a vini bon jan, èk i édé mwen pou fè pwogwé an lavéwité-a, pou enjwi minis-la, èk pou vansé pli pwé Jéhova.”

18. Kisa Jéhova vlé nou fè?

¹⁸ Wi, Jéhova vlé lanmityé-a nou pou li, èk pou sé fwè èk sè nou-an pwofité. Kon nou ja apwann, nou sa fòtifyé lanmityé nou pou Jéhova, lè nou li ében kouté Pawòl li èk mèdité asou’y, èvèk lè nou palé épi’y an lapwiyè touléjou. Osi nou apwann nou sa fòtifyé lanmityé nou pou sé fwè èk sè-a lè nou édé yo an diféwan mannyè. Bon, kon lanmityé nou pou Jéhova èk pou sé fwè èk sè-a nou-an ka pwofité, nou kay vansé pli pwé yo. Èk yo kay wèsté jan nou pou tout tan!