“Doubout Fò Épi Pa Kité Anyen Soukwéʼw”

1-2. (a) Lè i vini pou lwa èk pwensip Jéhova, kisa on Kwityen ni pou fè? (b) Kisa Kwityen ni pou fè lè’y posib? (1 Kòrint 15:58)

AN LANNÉ yon mil nèf san swasant dizwit (1978), yo bati on gwo kay an Japon. I té byen ho. I té ni swasant (60) étaj. Alò, lè jan plas-la wè hòtè gwo kay sala, yo di, ‘Plas sala toujou ni twanblanntè. Konsa, koumannyè gwo kay sala kay sa tjenn doubout?’ Mé sa yo pa té sav sé sa: sé ijennyè-a ki fè plan-an pou gwo kay sala fè’y pou’y soukwé èk pliyé, épi pou’y pa tonbé lè la ni on twanblanntè. Sé pou sa nou sa di, adan on sans, Kwityen menm kon gwo kay sala. Mé, an ki mannyè?

² On Kwityen ni pou tjenn on balan ant lè pou doubout fò èk lè pou pliyé. Konsa, lè i vini pou lwa èk pwensip Jéhova, on Kwityen ni pou doubout fò épi pa pliyé. (Li 1 Kòrint 15:58.) Konsa, i ni pou toujou “obéyi [Bondyé]” èk pa kité anyen fè’y kasé lwa’y èk pwensip li. (Twavay 5:29) Mé i osi ni pou “dous” èk “ni bon mannyè”. Sa vlé di, i ni pou wézonnab lè’y posib. (Jémz 3:17) Lè on Kwityen apwann pou ni on bon balan, i pa kay twòp wèd èben twòp mòl. An atik sala, nou kay konsidiwé mannyè nou sa doubout fò èk pa kité anyen soukwé nou. Osi, nou kay idantifyé senk (5) bagay Satan ka fè ki ka fè’y difisil pou nou kontiné obéyi Jéhova, èk mannyè-a nou sa wésisité sé éfò’y-la.

KOUMANNYÈ NOU SA DOUBOUT FÒ?

3. Ki lwa Jéhova té bay an Twavay 15:28, 29?

³ Sé Jéhova ki pli ho èk i ni dwa-a pou fè lwa. Èk lè i ba lwa’y, i ka fè’y ézé pou pèp li konpwann li. (Izay. 33:22) Pou ègzanp, an pwèmyé syèk-la, pwensipal konmité-a mansyonnen twa mannyè Kwityen sa doubout fò; èk sa sé lè yo: (1) pa adowé imaj, mé adowé Jéhova sèlman, (2) obéyi koumand Bondyé konsèné san paski san sakwé, èk (3) pa kouwi vyé lavi. (Li Twavay 15:28, 29.) Jòdi jou, ki mannyè Kwityen sa doubout fò èk obéyi sé twa lwa sala?

4. Ki mannyè nou sa moutwé sé Jéhova tousèl nou ka adowé? (Wévélasyon 4:11)

⁴ Nou pa ka adowé imaj, sé Jéhova tousèl nou ka adowé. Jéhova koumandé sé Izwayèlayt-la pou pa adowé pyès lòt dyé apa di li. (Dito. 5:6-10) Lè Démou-a té éséyé tanté Jézi, Jézi fè’y a klè ki sé Jéhova sèlman nou ni pou adowé. (Maf. 4:8-10) Konsa, nou pa ka adowé pyès kalité imaj. Ni non pli, nou pa ka adowé lézonm èk twété yo konmsi yo sé Bondyé—​ki yo sé mèt wilizyon, ki yo sé politisyen, ki yo sé moun ki ka jwé spò èben yo popilè. Pito nou fè sa, nou ka doubout fò èk nou ka adowé Jéhova, moun-lan ki “fè tout bagay”.​—Li Wévélasyon 4:11.

5. Pouki nou ka obéyi lwa Jéhova konsèné san?

⁵ Nou ka obéyi koumand Jéhova konsèné san paski san sakwé. Épi an zyé Jéhova, san ka wépwézanté lavi. Èk Jéhova ban nou lavi kon on kado. (Livi. 17:14) An koumansman-an, moun pa té ka manjé vyann. Mé apwé gwo délij-la, Jéhova pèwmité moun pou manjé vyann. Mé i di yo: ‘[yo] pa dwé manjé vyann ki ni san adan’y’. (Jen. 9:4) Tjèk tan apwé sa, Jéhova wépété menm koumand sala bay jan Izwayèl. (Livi. 17:10) Èk pli ta, i diwèkté pwensipal konmité-a an pwèmyé syèk-la pou di sé Kwityen-an “pa manjé san”. (Twav. 15:28, 29) Konsa, kon Kwityen, nou pa ka manjé san èk lè nou ka fè twètman médikal ki ni pou fè épi san, nou ka obéyi koumand sala.b

6. Kisa nou ni pou fè pou nou pa tonbé an imowalité?

⁶ Nou pa ka kouwi vyé lavi. (Hib. 13:4) Zapòt Pòl di nou an Kòlòsé 3:5 “pou jété nèt sòti an lavi [nou] tout sé mannyè latè-a”. Wi, i vwé, sa wèd pou fè. Mé nou ni pou fè tout sa nou pé pou jété népòt vyé dézi nou pé ni. Nou pa vlé gadé èben fè népòt bagay ki sa fè nou tonbé an imowalité. (Jòb 31:1) Lè nou ni tantasyon pou fè on bagay ki pa bon, imidyètman nou ka widjèkté népòt katjil èk aksyon ki sa donmajé wilasyon nou épi Jéhova.

7. Kisa nou détèminé pou fè? Èk pouki?

⁷ Jéhova vlé nou ‘obéyi’y épi tout tjè nou’. (Ronm 6:17) Sé lwa-a i ka bay-la, nou menm pa sa chanjé yo. Mé nou sav i enmen nou, épi tout sa i ka di nou pou fè sé pou bennéfis nou. (Izay. 48:17, 18; 1 Kòr. 6:9, 10) Konsa, nou ka fè tout sa nou pé pou plè Jéhova èk moutwé menm atitid-la Samis-la té ni. I di an Sam 119:112: ‘Mwen ditèminé pou toujou obéyi lwa’y jis olanmò.’ Kanmenm, Satan ka fè ‘y difisil pou nou doubout fò. Mé kisa i ka sèvi pou soukwé nou èk fè nou tonbé? Annou diskité sa apwézan.

KI MANNYÈ SATAN KA ÉSÉYÉ POU AFÉBLI NOU?

8. Ki sa Satan ka sèvi pou éséyé détwi wilasyon ou épi Jéhova?

⁸ I ka sèvi pèsikasyon. Satan ka sèvi vyolans épi bagay ki ka ban nou tèt cho pou soukwé nou. Plan’y sé pou “détwi” wilasyon nou épi Jéhova. (1 Pita 5:8) Pou ègzanp, an pwèmyé syèk-la, yo mennasé, yo bat èk yo tjwé sé Kwityen-an paski yo té vlé yo doubout sèvi Jéhova. (Twav. 5:27, 28, 40; 7:54-60) Jik jòdi, Satan ka kontiné pou sèvi pèsikasyon pou éséyé fè nou doubout sèvi Jéhova. Anfen, sa ka fèt a péyi Wisi èk lòt péyi koté yo ka opozé Tèmwen Jéhova. Yo ka maltwété sé fwè èk sè nou-a pou éséyé afébli lafwa yo.

9. Ba yon ègzanp ki ka moutwé pouki i bon pou pwan bon pwokosyon épi ti chalè-a Satan pé ban nou.

⁹ I ka sèvi ti chalè. Apa di pèsikasyon, délè Satan ka ban nou ti chalè pou éséyé afébli wilasyon nou épi Jéhova. (Èfés. 6:11) Ann pwan pou ègzanp fwè Bob. I té lopital pou fè on gwo lopowasyon. I di sé dòktè-a, népòt sa ki fèt i pa ka pwan san. Konsa, dòktè-a ki té ni pou fè lopowasyon-an dakò pou wèspèkté disizyon’y. Kanmenm, swè-a avan i fè lopowasyon-an, on lòt dòktè vizité’y apwé fanmi’y té ja alé lakay yo. Dòktè-a di Bob, i pa kwè yo kay sèvi san, mé i kay mété san-an asou on koté si antouka i bizwen’y. Pitèt dòktè-a té kwè paski fanmi Bob pa té la, Bob té kay chanjé lidé’y konsèné san-an. Mé Bob doubout fò. I di, ‘Népòt sa ki pé fèt, i pa vlé pyès san.’

10. Pouki katjil lézonm danjéwé? (1 Kòrint 3:19, 20)

¹⁰ I ka sèvi katjil lézonm. Si nou katjilé menm kon sé jan latè-a, ki pa ka konsidiwé lwa Jéhova, nou menm pé inyowé lwa Jéhova. (Li 1 Kòrint 3:19, 20.) Sa sé jan latè-a ka konsidiwé ki “lasajès-la”, byen souvan, ka enflouwansé moun pou dézobéyi Jéhova. Pou ègzanp, détwa Kwityen an Pèganmòs èk Tayatayra, té kité sé moun-lan oliwon yo fè yo kouwi vyé lavi èk adowé imaj. Konsa, Jézi bay jan sé kongwigasyon sala, konsèy ki té byen sèwiyé paski yo té ka aksèpté sé mové bagay sala an sé kongwigasyon-an. (Wév. 2:14, 20) Jòdi jou, moun oliwon nou sa ban nou chalè pou nou aksèpté vyé katjil yo. Fanmi nou èk lòt moun pé di nou, ‘Ou pa ni pou obéyi lwa Jéhova. Lavi kout. Fè sa ki an tjè’w. Nou tout sav Bib-la sé on vyé liv, pa jòdi i la. Pa sa tousèl, si ou péché Bondyé kay pawdonnen’w. Konsa, viv lavi’w.’

11. Jéhova ka ban nou diwèksyon ki klè. Konsa, kisa nou pa sipozé fè?

¹¹ Lélè, nou ka di diwèksyon-an Jéhova ka ban nou pa klè asé. Épi nou pé jis vlé “alé pli lwen pasé sa ki ékwi.” (1 Kòr. 4:6) Sé sa sé chèf wilizyon-an an tan Jézi té ka fè. Yo té ka mété lwa yo asou lwa Jéhova, èk sa sété “menm kon an chay lou asou tèt moun”. (Maf. 23:4) Kanmenm, Jéhova ka ban nou diwèksyon ki klè an Pawòl li èk pa ògannizasyon’y. Alò, nou pa ni pyès wézon pou ajouté asou diwèksyon-an i ka ban nou-a. (Pwov. 3:5-7) Konsa, nou pa vlé “alé pli lwen pasé sa ki ékwi” an Bib-la, épi nou pa vlé bay sé fwè èk sè nou-a lwa lè Bib-la pa ba yon lwa.

12. Kisa Satan ka sèvi pou kwennen moun?

¹² I ka sèvi bagay pou kwennen nou. Satan ka sèvi mansonj èk “katjil...ki pa vo anyen” pou kwennen èk divizé moun. (Kòl. 2:8) An pwenmyé syèk-la, adan sé bagay sala sété bagay moun ki ni gwo endikasyon té ka di, bagay sé Jwif-la té ka enstwi ki pa té bazé asou lévanjil-la, èk lésisyon-an ki Kwityen oblijé ni pou obéyi Lwa Moziz-la. Sé bagay sala té ka kwennen sé moun-lan paski i té ka tiwé atansyon yo asou Jéhova, sous lasajès. Jòdi jou, Satan ka sèvi wadyo, télévizyon, papyé nouvèl èk intannèt, pou simen mansonj èk fo nouvèl. Èk byen souvan, moun ki ni gwo pozisyon ka pwomoté sé fo nouvèl sala. Èk nou té wè sa a klè diwan COVID-19 panndèmik-la.c Tèmwen Jéhova ki té ka kouté èk swiv diwèksyon-an ògannizasyon-an té bay pa té ni menm tèt cho, kon sé moun-lan ki té ka kouté vyé nouvèl-la. ​—Maf. 24:45.

13. Pouki nou ni pou pwan gad pou nou pa twouvé kò nou distwé?

¹³ I ka sèvi bagay pou distwé nou. Wi, i byen ézé pou twouvé kò nou distwé. Mé nou ni pou wèsté fiksé asou “sa ki pli bon”-an. (Filip. 1:9, 10) Lè nou distwé, nou kay ni mwens tan èk mwens kouway pou fè sé bagay-la ki pli enpòtan-an. Sé bagay-la nou ka fè touléjou, tèl kon manjé, bwè, anmizman èk twavay, sa distwé nou si nou kité yo vini pli enpòtan bagay-la an lavi nou. (Louk 21:34, 35) An plis di sa, touléjou, nou ka tann an chay nouvèl konsèné moun ki ka pwotèsté èk chikann konsèné bagay politik. Alò, nou ni pou fè asiwé nou pa kité sé bagay sala distwé nou. Paski si nou kité yo distwé nou, nou pé koumansé sipòté yo an lidé nou èk an tjè nou. Alò, Satan ka sèvi tout sé bagay sala nou mansyonnen-an, pou afébli détèminasyon nou pou fè sa ki dwèt. Bon. Apwézan, annou konsidiwé koumannyè nou sa kontiné doubout fò.

KOUMANNYÈ NOU SA KONTINÉ DOUBOUT FÒ?

14. Kisa ki sa édé nou pou kontiné doubout fò?

¹⁴ Katjilé asou pouki ou dèdiké lavi’w bay Jéhova èk batizé. Ou pwan démach pou dèdiké lavi’w bay Jéhova èk batizé paski ou té vlé sèvi’y. Konsa, chonjé sa ki té édé’w lè ou té vini asiwé ou twouvé lavéwité-a. Ou vini konnèt Jéhova èk sa édé’w pou dévlopé on wilasyon épi’y. Ou vini wèspèkté’y èk enmen’y kon Papa’w ki an syèl. Ou dévlopé lafwa an li, èk sa motivé’w pou wépanti. Konsa, ou doubout fè bagay Jéhova hayi, èk ou koumansé fè bagay ki ka plè’y. Ou santi djèwté an tjè’w, lè ou vin sav Jéhova pawdonnen’w pou bagay ou té ja fè. (Sam 32:1, 2) Ou atandé mitin, èk ou koumansé patajé épi lézòt moun sé bèl bagay-la ou té apwann-la. Èk apwézan, kon on Kwityen ki dèdiké èk batizé, ou ka maché asou chimen-an pou lavi, épi ou détèminé kontiné maché asou chimen sala.​—Maf. 7:13, 14.

15. Pouki i enpòtan pou nou étidyé èk mèdité asou Pawòl Bondyé ?

¹⁵ Étidyé Pawòl Bondyé èk mèdité asou’y. Menm kon on pyébwa ki byen wasiné ka doubout fò, nou sa doubout fò si lafwa nou an Jéhova byen wasiné. Pou lafwa nou vini byen wasiné, nou ni pou étidyé èk mèdité asou Pawòl Bondyé. Èk lè nou fè sa, nou ka vini pli asiwé, sa Jéhova ka di nou sé pou bennéfis nou. (Kòl. 2:6, 7) Osi, i kay bon pou nou katjilé asou mannyè enstwiksyon, konsèy èk pwotèksyon Jéhova té édé sé sèvant li-a an tan pasé. Pou ègzanp, Jéhova té bay Izikèl on vizyon. Èk Izikèl, té ni pou byen gadé, byen kouté èk byen swiv tout sa nanj-la té ka moutwé’y-la, kon i té ka miziwé tanp-lan. Épi vizyon sala té fòtifyé Izikèl. Èk i ka osi ban nou bon lésisyon asou mannyè nou sa tjenn wèg Jéhova pou adowasyon ki pi.d (Izik. 40:1-4; 43:10-12) Nou osi sa twapé pli bennéfis, lè nou pwan tan pou étidyé èk mèdité kon nou ka fouyé pli fon an Pawòl Bondyé.

16. Fwè Bob té ni on tjè ki fò. Ki mannyè sa pwotéjé’w? (Sam 112:7)

¹⁶ Fè tjè’w fò. Wa David di, i pa té kay janmen pèd lanmityé-a i ni pou Jéhova lè i chanté chanson-an ki di: “Tjè mwen fò, Bondyé.” (Sam 57:7) Nou osi sa imité wa David èk dévlopé on tjè ki fò èk mété tout konfyans nou an Jéhova. (Li Sam 112:7.) Annou konsidiwé mannyè an tjè ki fò té édé Bob, fwè-a nou té mansyonnen an pawagwaf 9. Lè dòktè-a té di, i kay mété san-an asou on koté si antouka i bizwen’y, la menm, i di: ‘Awa! M’a ka pwan san. Si zòt vlé ban mwen san, mwen ka kité lopital zòt-la apwézan.’ Pli ta, lè yo mandé Bob konsèné èspéyans li, i di: “M’a té menm ni pou katjilé asou sa. Mwen té ja fè disizyon mwen. Konsa, m’a té ni pyès tèt cho.”

17. Kisa nou apwann hòd èspéyans Bob? (Gadé pòtwé-a osi.)

¹⁷ Bob té sa wèsté fò paski i té ja fè disizyon’y lontan andavans avan i té alé lopital. Èk osi: (1) i té ja désidé pou fè tjè Jéhova kontan; (2) i té ja byen étidyé sa Bib-la èk sé piblikasyon nou-a, té di konsèné lavi èk san; èk (3) i té asiwé si i swiv diwèksyon Jéhova, sa té kay mennen’y bennéfis pou tout tan. Konsa, nou osi sa fè tjè fò pou nou wèsté fidèl pou Jéhova anba népòt sitiwasyon.

18. Kisa Jéhova kay fè ban nou si nou konfyé’y? Ba yon ègzanp. (Gadé pòtwé-a ki asou kouvèti-a.)

¹⁸ Konfyé Jéhova. Annou konsidiwé mannyè Barak té ni siksé paski i té konfyé diwèksyon Jéhova. Jéhova di yo pou alé goumen ladjè. Mé a lè sala, pèp Izwayèl pa té pwépawé pou ladjè. Yo pa té menm ni fèman. Mé Jéhova di Barak, pou alé èk goumen kont Sisèra èk sé lawmé’y-la. Épi lawmé Sisèra, pa té ka matjé fèman. (Jij 5:8) Dèbra, on madanm ki té on pwòfèt Jéhova, di Barak pou désann mòn-lan pou goumen kont Sisèra èk lawmé’y. Lawmé Sisèra té ni nèf san (900) kawòs. Konsa, an plato-a, i té kay byen difisil pou sé Izwayèlayt-la goumen kont sé kawòs sala. Magwé Barak té sav sa, i pa té dézobéyi Jéhova. Konsa, i swiv diwèksyon-an , èk li èk sé sòlda’y-la désann Mòn Tabò. Paditan i yo té ka désann, Jéhova fè lapli tonbé èk sé kawòs Sisèra-a, pwi an labou-a. Èk Jéhova bay Barak laviktwa-a. (Jij 4:1-7, 10, 13-16) An menm mannyè-a, Jéhova kay ban nou laviktwa-a si nou konfyé’y èk swiv sé diwèksyon-an i ka ban nou pa ògannizasyon’y.​—Dito. 31:6.

“DOUBOUT FÒ ÉPI PA KITÉ ANYEN SOUKWÉʼW”

19. Pouki ou détèminé pou doubout fò?

¹⁹ Nou kay ni pou kontiné goumen pou doubout fò an vyé sistèm sala. (1 Tim. 6:11, 12; 2 Pita 3:17) Menm si bagay kon: pèsikasyon, ti chalè, katjil lézòm, bagay ki ka kwennen moun èk bagay ki ka distwé nou ka fè’y difisil pou nou délè, nou pa vlé yo soukwé nou. (Èfés. 4:14) Mé nou vlé kontiné pou doubout fò, enmen Jéhova, èk obéyi sé koumandman’y-lan. Èk an menm di tan, nou vlé vini moun ki wézonnab menm kon Jéhova èk Jézi. An lòt atik-la, nou kay diskité ègzanp Jéhova èk Jézi, èk nou kay wè, yo sé moun ki byen wézonnab.