Sé Pou Nou Wézonnab Menm Kon Jéhova

1. Si nou vlé kontiné sèvi Jéhova épi djèwté, kisa nou ni pou fè? (Gadé pòtwé-a osi.)

PLI SOUVAN, lè on mové tan ka pasé van-an ka tèlman fò, i ka panché an pyé koko. Mé pyé koko-a pa ka kasé menm kon lòt pyé bwa. Konsa, menm kon pyé koko-a, si nou vlé kontiné sèvi Jéhova épi djèwté, nou ni pou panché lè nou ka èspéyansé difikilté. Sa vlé di, nou ni pou vini moun ki wézonnab. Ki mannyè nou sa fè sa? Nou sa fè sa lè nou fè chanjman an lavi nou lè sitiwasyon nou chanjé. An lòt mannyè nou sa moutwé nou sé moun ki wézonnab, sé lè nou moutwé wèspé pou wipinyon èk disizyon lòt moun.

2. (a) Ki kawaktè ki kay édé nou lè sitiwasyon nou chanjé? (b) Kisa nou kay diskité an atik sala?

² Nou sé sèvant Jéhova, konsa nou vlé wézonnab. Èk osi, nou ni pou abésé kò nou èk moutwé moun konpasyon. An atik sala, nou kay wè mannyè sé kawaktè sala té édé déotwa Kwityen lè sitiwasyon yo chanjé. Osi, nou kay apwann mannyè sé kawaktè sala kay édé nou tou. Pwèmyéman, annou apwann hòd ègzanp Jéhova èk Jézi, paski yo sé vwéman moun ki wézonnab.

JÉHOVA ÈK JÉZI SÉ MOUN KI WÉZONNAB

3. Koumannyè nou sav Jéhova sé an moun ki wézonnab?

³ Bib-la ka kwiyé Jéhova ”‏Kayè-a” paski i fèm èk i solid. (Dito. 32:4) Mé, sa pa vlé di i pa wézonnab. Jéhova sé an moun ki byen wézonnab. Konsa, kon bagay ka chanjé an latè-a, Jéhova ka fè népòt chanjman ki nésésè pou fè asiwé tout sé pwonmèt li-a kay fèt vwé. Èk menm kon Jéhova, nou ni abilité-a pou fè chanjman an lavi nou lè sitiwasyon nou chanjé. Èk wézon-an pou sa, sé paski Jéhova fè nou an imaj li. Anplis di sa, Jéhova ja ban nou bon pwensip an Bib-la ki ka édé nou fè bon disizyon èk ka édé nou aji épi sé difikilté-a nou pé èspéyansé. Wi, magwé Jéhova sé “Kayè-a”, ègzanp li èk sé pwensip-la i ja ban nou, ka moutwé a klè ki, Jéhova byen wézonnab.

4. Ba yon ègzanp ki ka moutwé mannyè Jéhova wézonnab. (Livitikòs 5:7, 11)

⁴ Jéhova sé an Dyé ki pawfé èk wézonnab. Konsa, i ka toujou moutwé lanmityé èk konsidéwasyon lè i ka aji épi lézòm. Pou ègzanp, annou konsidiwé mannyè Jéhova moutwé i wézonnab lè i té aji èpi Jan Izwayèl. Anba lwa Moziz-la, Jéhova pa té mandé tout moun pou fè menm sakwifis-la. Non. Jéhova té pèwmité chak moun pou bay silon sa yo té ni.​—Li Livitikòs 5:7, 11.

5. Ba yon ègzanp ki ka moutwé Jéhova ni imilité èk konpasyon.

⁵ Jéhova ni imilité èk i ka moutwé moun konpasyon. Èk sé sé kawaktè sala ki ka fè’y wézonnab. Pa ègzanp, annou konsidiwé mannyè Jéhova té twété Lòt. Lè Jéhova té désidé pou détwi vil Sòdonm èk Gomòra, i sèvi sé nanj li-a pou di Lòt pou kouwi alé an sé montany-lan. Mé, Lòt pa té vlé alé la paski i té pè. Konsa, i mandé Jéhova pou kité’y èk fanmi’y alé Zowa. Mé Zowa sété an ti vil Jéhova té ja désidé pou détwi osi. Ès Jéhova té sa fòsé Lòt pou fè ègzaktiman sa’y té mandé’y pou fè? Mé wi. Mé pito sa, Jéhova té pèwmité Lòt pou alé Zowa, èk i pa té détwi vil sala pou lapéti Lòt. (Jen. 19:18-22) Bon. Mi on lòt ègzanp. Plizyè syèk apwé Jéhova té détwi Sòdonm èk Gomòra, Jéhova té désidé pou détwi jan Ninivè èk vil yo. Konsa, i di pwofèt li, Jonna, pou ay vèti yo, èk di yo, i té kay détwi yo épi vil yo. Mé lè jan Ninivè wépanti, sa fè Jéhova lapenn. Konsa, Jéhova moutwé yo konpasyon, èk i pa té détwi vil sala ankò.​—Jonna 3:1, 10; 4:10, 11.

6. Ba yon ègzanp ki ka moutwé Jézi ka toujou swiv ègzanp Jéhova.

⁶ Jézi ka toujou swiv ègzanp Jéhova. Konsa, Jézi sé an moun ki wézonnab osi. Jézi té moutwé kawaktè sala lè’y té asou latè-a. Magwé i té vini asou latè-a pou pwéché bay jan Izwayèl, i té moutwé i sé an moun ki wézonnab an mannyè-a i té ka twété moun ki sòti lòt nasyon. Pa ègzanp, an madanm ki pa té an Jwif mandé Jézi pou djéwi tifi’y. Tifi-a té ni “an vyé lèspwi andidan’y épi i té ka soufè an pil.” Konpasyon pousé Jézi pou djéwi tifi-a. (Maf. 15:21-28) Bon. Annou konsidiwé an lòt ègzanp. Pa twò lonng apwé Jézi koumansé pwéché, i di: “Si an moun widjèkté mwen. . .mwen kay widjèkté’y.” (Maf. 10:33) Pawòl Jézi té a klè. Mé, ès Jézi widjèkté Pita lè Pita di i pa konnèt Jézi twa fwa? Mé non. Bagay-la sé sa, Jézi té sav Pita té wigwété sa i té fè èk i té on nonm ki té fidèl. Konsa, apwé Jézi té wésisité, i pawèt douvan Pita pou ba’y asiwans-lan ki, i té pawdonnen’y èk i té enmen’y.​—Louk 24:33, 34.

7. Silon Filipay 4:5, kisa aksyon nou sipozé moutwé?

⁷ Nou ja konsidiwé déotwa ègzanp ki ka moutwé a klè, Jéhova èk Jézi sé moun ki wézonnab. Èk kon sèvant Jéhova, i vlé nou vini moun ki wézonnab osi. Alò, ki mannyè nou sa imité ègzanp li? Bib-la ka ban nou wépons-lan an Filipay 4:5. (Li’y) Konsa, nou ni pou moutwé pa aksyon nou, nou sé moun ki ni bon mannyè èk wézonnab. Alò, i bon pou mandé kò nou sé kwèsyon sala: “Ès moun ka wè mwen kon an moun ki wézonnab? Èben ès yo ka wè mwen kon an moun ki wèd èk difisil pou aji épi? Ès mwen ka démandé moun pou fè bagay ègzaktiman mannyè-a mwen kwè i sipozé fèt? Èben ès mwen ka kouté wipinyon lézòt èk fè sa yo vlé lè’y posib?” Sé wépons nou pou sé kwèsyon sala kay moutwé si nou ka swiv ègzanp Jéhova èk Jézi. Alò, nou ni pou chonjé pli nou wézonnab sé pli nou ka imité Jéhova. Konsa, annou diskité dé sitiwasyon ki ka moutwé mannyè i enpòtan pou nou wézonnab: (1) lè sitiwasyon nou chanjé, èk (2) lè nou pa ka dakò épi wipinyon èk disizyon lézòt moun.

NOU NI POU WÉZONNAB LÈ SITIWASYON NOU CHANJÉ

8. Ki kat (4) bagay nou sa fè lè sitiwasyon nou chanjé? (Gadé nòt-la an bout paj-la osi.)

⁸ Lavi nou sa chanjé sibitman. Konsa, nou ni pou moutwé nou sé moun ki wézonnab lè sitiwasyon nou chanjé. Lè bagay chanjé sibitman, nou pé èspéyansé an chay pwoblenm. Pa ègzanp, nou pé tonbé malad èben bagay sa vini pli wèd an péyi nou. (Éklé. 9:11; 1 Kòr. 7:31) Osi, i pé difisil si ògannizasyon-an mandé nou pou chanjé ansayman nou. Mé népòt tjalinj nou pé èspéyansé, nou ni pou chonjé, nou sa andiwé èk nou sa ni siksé, si nou fè sé kat (4) bagay sala: (1) aksèpté sitiwasyon-an, (2) fiksé lidé nou asou sa nou sa fè apwézan èk pa asou sa nou té ka fè, (3) fiksé asou tout sé bèl bagay-la an lavi nou, èk (4) édé lézòt.b Vwéman, lè nou fè sé bagay sala, nou kay ni siksé lè sitiwasyon nou chanjé. Apwézan, annou wè sé bennédiksyon-an sé fwè èk sè-a ja twapé lè yo fè sé kat (4) bagay sala.

9. Kisa ki té édé Emanuele èk Francesca andiwé lè sitiwasyon yo chanjé?

⁹ Aksèpté sitiwasyon-an. Fwè Emanuele èk madanm li, Francesca, té ka wann sèvis kon misyonnè adan an lòt péyi. Mé, COVID panndèmik-la koumansé kon yo té ka apwann langaj péyi-a èk kon yo té ka vini konnèt sé fwè-a pli mèyè. Konsa, Francesca èk Emanuele té ni pou wèsté lwen lézòt moun. Anplis di sa, sibitman, manman Francesca mò. Sa kasé tjè’y. Francesca té vwéman vlé witounen péyi’y pou’y té sa épi fanmi’y. Mé i pa té sa voyajé paski maladi COVID-la té ka simen toupatou. Mé kisa ki té édé’y andiwé épi sitiwasyon sala? Emanuele èk Francesca pwédyé bay Jéhova ansanm. Yo mandé Jéhova pou lasajès èk pou’y édé yo andiwé chak jou. An lè-a yo té bizwen’y pli, Jéhova té sèvi ògannizasyon’y pou wéponn lapwiyè yo. Pou ègzanp, yo té byen ankouwajé lè yo gadé on vidiyo koté yon fwè di: “Si nou pa tadé pou aksèpté sitiwasyon nèf nou, nou kay ni lajwa. Èk sa kay ban nou òpòtyounité-a pou fè tout sa nou pé an sitiwasyon nèf nou.”c Osi, Emanuele èk Francesca té désidé pou pwéché pli mèyè asou téléfòn-lan èk pou kondwi an létid Bib. Anplis di sa, fwè Emanuele èk madanm li té aksèpté èd-la èk ankouwajman sé fwè-a té ba yo. Pou ègzanp, an sésé té voyé yo an lévanjil touléjou pou yon lanné. Pa dé kontan Emanuele èk madanm li té kontan lè yo wisivwè sé lévanjil sala. Konsa, menm kon Emanuele èk Francesca, lè nou aksèpté sitiwasyon nèf nou, nou kay ni djèwté.

10. Kisa ki té édé Christina lè sitiwasyon’y chanjé?

¹⁰ Fiksé lidé nou asou sa nou sa fè apwézan èk pa asou sa nou té ka fè. Èk osi, fiksé asou tout sé bèl bagay-la an lavi nou. Christina sé an sésé ki sòti Romania mé i ka wèsté an péyi Japon. I té ka atandé mitin an kongwigasyon Anglé. Lè kongwigasyon sala fenmen, sa dézapwenté Christina an chay. Kisa ki té édé’y lè sitiwasyon’y chanjé? Christina pa té katjilé asou sa’y té ka fè avan, mé pito sa, i fiksé lidé’y asou sa i sa fè. Konsa, i koumansé atandé mitin an kongwigasyon Japanese-la. Èk i fè tout sa i pé an minis-la an langaj sala. Anplis di sa, i mandé an madanm i té ka twavay épi pou enstwi’y apwann langaj Japanese-la pli mèyè. Madanm-lan dakò pou sèvi Bib-la èk ti liv-la Ou Sa Ni An Bon Lavi Pou Tout Tan! pou enstwi’y. Kon wézilta, Christina apwann palé langaj Japanese pli mèyè èk madanm-lan té vini entéwésé an lavéwité-a. Konsa èspéyans sala ka moutwé nou, lè nou fiksé lidé nou asou sa nou sa fè apwézan èk asou tout sé bèl bagay-la an lavi nou, sé sitiwasyon nèf nou-a pé mennen an pil bennédiksyon.

11. Kisa ki té édé an fwè èk madanm li lè yo té ni pwoblenm lajan?

¹¹ Édé lézòt. An fwè èpi madanm li ki ka viv koté twavay nou anba bann, té ni pwoblenm lajan lè bagay vini wèd an péyi yo. Kisa ki té édé yo aji épi sitiwasyon sala? Yonn an sé pwèmyé bagay-la yo té fè, sé sa: yo pwan démach pou yo sa ni mwens dépans. Mi on lòt bagay yo fè. Pito yo fiksé asou pwoblenm yo, yo désidé pou fè pli an minis-la pou édé moun apwann konsèné Jéhova. Èk sa vwéman édé yo pou andiwé. (Twav. 20:35) Mi sé sa fwè-a di: “Paski nou pasé pli tan ka pwéché, sa té édé nou fiksé asou divwa Bondyé pito nou fiksé asou pwoblenm nou.” Wi, lè sitiwasyon nou chanjé, i vwéman enpòtan pou nou kontiné édé lézòt, sitou an twavay pwédikasyon-an.

12. Ki mannyè nou sa vini moun ki wézonnab menm kon Zapòt Pòl lè nou ka pwéché?

¹² Lè nou ka pwéché, nou ni pou moutwé nou wézonnab. Pouki? Paski an minis-la nou ka jwenn moun ki sòti diféwan péyi èk ki ni diféwan kilti. Osi, yo ka kwè an diféwan bagay konsèné Bondyé. Menm kon nou, Zapòt Pòl té jwenn diféwan moun an minis li. Konsa, annou konsidiwé kouman Pòl té moutwé i wézonnab. Bib-la di Jézi voyé Pòl “kon an zapòt bay sé sa ki pa Jwif-la”. (Ronm 11:13) Sa vlé di, Zapòt Pòl té kay pwéché bay sé Jwif-la, sé Gwik-la, moun ki ni endikasyon, moun òdinè, moun an gouvèdman-an, èpi Wa. Wi, i té kay pwéché bay “tout moun”. Mé ki mannyè Pòl té kay touché tjè tout sé moun sala? Bib-la di, Pòl té “vini tout bagay pou tout moun”. (1 Kòr. 9:19-23) Koumannyè Pòl té fè sa? I té katjilé byen konsèné sé moun-lan i té kay pwéché bay-la. Pòl té ka katjilé fò asou ki koté sé moun-lan sòti èk kisa sé moun-lan té ka kwè adan. Èk lè Pòl fè sa, sa édé’y pou vini an moun ki té wézonnab. I té sa pwéché bay sé moun-lan adan an mannyè ki té kay vwéman touché tjè yo. An menm mannyè-a, si nou katjilé byen konsèné sé moun-lan nou ka jwenn an minis-la, nou sa vini moun ki wézonnab èk pwéché adan an mannyè ki sa touché tjè yo.

WÈSPÈKTÉ WIPINYON ÈK DISIZYON LÒT MOUN

13. A ling épi 1 Kòrint 8:9, kisa ki pé fèt si nou pa wèspèkté wipinyon èk disizyon sé fwè èk sè nou-a?

¹³ An lavi, nou tout ni disizyon pou fè. Mé, diféwan moun kay fè diféwan disizyon. Konsa, nou ni pou wèspèkté wipinyon èk disizyon lòt moun. Lè nou wézonnab, sa kay édé nou pou fè sa. Apwézan, annou konsidiwé déotwa ègzanp koté ki nou ni pou moutwé wèspé pou disizyon èk wipinyon lézòt. Pwèmyé ègzanp. Adan sésé kontan mété makeup èk lézòt pa kontan’y pyès. Dézyenm ègzanp. La ni fwè èk sè ki ka bwè alkòhòl tanzantan, mé lézòt pa ka bwè pyès alkòhòl. Twazyenm ègzanp. Nou tout vlé bon santé, mé nou ka chwazi diféwan twètman médikal. Bon. Kisa ki pé fèt si nou pa wèspèkté wipinyon èk disizyon sé fwè èk sè nou-a? Èk kisa ki pé fèt si nou fòsé yo pou fè sa nou ka fè? Nou pé détwi lilyon-an èk lapé-a an kongwigasyon-an. Anplis di sa, nou pé afébli lafwa sé fwè èk sé nou-a. Nou pa janmen vlé fè sa! (Li 1 Kòrint 8:9; 10:23, 24) Konsa, annou konsidiwé dé (2) ègzanp ki ka moutwé mannyè pwensip Bib sa édé nou vini moun ki wézonnab, èk mannyè i sa édé nou pou tjenn lilyon-an èk lapé-a an kongwigasyon-an.

14. Ki pwensip Bib ki sipozé djidé mannyè nou ka abiyé èk mannyè nou ka gadé?

¹⁴ Mannyè nou ka abiyé èk mannyè nou ka gadé. Jéhova pa té ban nou an lis ki ka di nou ki mannyè nou sipozé abiyé. Alò, nou tout ni libèté-a pou chwazi sa nou vlé mété asou nou. Mé, magwé Jéhova pa té ban nou an lis, i ja ban nou pwensip pou djidé chwa nou. Silon Bib-la, nou sipozé “abiyé adan an mannyè ki senp, épi had ki pwòp épi wèspèktab.” (1 Tim. 2:9, 10; 1 Pita 3:3) Konsa, sa vlé di, nou pa vlé mété anyen ki ka mennen twòp atansyon asou nou. Anfen, mannyè nou ka abiyé èk mannyè nou ka gadé, sipozé moutwé, nou sé sèvant Bondyé. Bon. Pwensip Bib ka osi édé sé ansyen-an pou pa mété lwa yo menm konsèné mannyè sé fwè èk sè-a sipozé abiyé èk lapawans yo. Annou konsidiwé yon ègzanp. An yon kongwigasyon, sé jenn fwè-a té ka swiv an lamòd sé jenn mon-lan an latè-a. Yo té ka koupé chivé yo kout mé yo pa té ka penyen pyès. Konsa, sé ansyen-an té vlé édé sé jenn fwè sala. Ki mannyè sé ansyen-an té kay édé yo wézonnen asou matyè sala? Èben, ansyen-an pou sékyout-la té bay sé ansyen sala bon avi. I ankouwajé sé ansyen-an pou di sé jenn fwè-a: “Si zòt ni on pa pou mitin èk sé fwè èk sè-a ka fiksé atansyon yo pli asou chivé zòt, pasé asou sa zòt ka di, sa vlé di, mannyè zòt ka gadé ni an pwoblenm.” Konsèy sala té édé sé jenn fwè-a pou konpwann sa yo té ni pou fè. Èk, osi, sé ansyen-an pa té ni pou fè an lwa.d

15. Lè nou ni pou fè disizyon konsèné santé nou, ki lwa èk pwensip Bib ki sa édé nou? (Ronm 14:5)

¹⁵ Disizyon konsèné santé nou. Lè’y vini pou santé nou, chak Kwityen ni pou fè an disizyon pou kò’y menm. (Gal. 6:5) Kanmenm, lè Kwityen ka désidé ki twètman médikal pou aksèpté, yo ni pou obéyi lwa Bondyé konsèné san èk tjenbwa. Kwityen pa ka pwan san èk yo pa ka patisipé an tjenbwa. (Twav. 15:20; Gal. 5:19, 20) Konsa, sa ka afèkté ki kalité twètman on Kwityen sa aksèpté. Mé, lè’y vini pou lòt twètman médikal, chak di nou ni désidé pou kò nou menm. Pou ègzanp, adan Kwityen pé désidé pou alé oti dòktè pou twètman médikal. Mé lòt Kwityen pé désidé pou sèvi lòt twètman. Mi sé sa ki pé fèt létjèkfwa. Délè, paski nou kwè an sèten twètman médikal pli mèyè pasé an lòt twètman, sa ka pousé nou pou di sé fwè èk sè nou-a ki twètman médikal pou pwan. Mé, sé pou nou toujou chonjé, sé fwè èk sè nou-a ni dwa-a pou fè sa yo vlé. Konsa, nou ni pou wèspèkté disizyon yo. Pou édé nou fè sa, nou ni pou chonjé sé kat (4) pwen sala: (1) Sé sèlman Wéyòm Bondyé ki kay tiwé maladi èk soufwans. (Izay. 33:24) (2) Lè’y vini pou santé moun, chak Kwityen ni pou désidé pou kò’y sa ki bon pou’y. (Li Ronm 14:5.) (3)  Nou ni pou wèspèkté disizyon moun èk nou pa vlé fè anyen ki té kay afébli lafwa yo. (Ronm 14:13) (4)  Kwityen ka toujou moutwé yonn an lòt lanmityé, èk yo pa ka fòsé lézòt pou aksèpté wipinyon yo. (Ronm 14:15, 19, 20) Anplis di sa, yo sav lilyon-an an kongwigasyon pli enpòtan pasé wipinyon yo. Wi, si nou tjenn sé pwen sala an lidé nou, nou kay ni lapé an kongwigasyon-an èk nou kay osi ni an bon wilasyon épi sé fwè èk sè nou-a.

16. Ki mannyè an ansyen sa moutwé i wézonnab? (Gadé sé pòtwé-a osi.)

¹⁶ Sé ansyen-an dwé moutwé yo wézonnab. (1 Tim. 3:2, 3) Pa ègzanp, yon ansyen ki pli laj pasé sé lòt ansyen-an, pa ka toujou èspéwé yo pou aksèpté wipinyon’y. I byen sav, Jéhova sa sèvi lisentèspwi’y pou pousé népòt ansyen pou di an bagay ki ka édé sé ansyen-an pou fè an bon disizyon. Konsa, yon ansyen ki wézonnab kay sipòté disizyon sé ansyen-an si disizyon sala a ling épi pwensip Bib. Èk i kay fè sa menm si i pa té dakò épi disizyon-an.

LÈ NOU WÉZONNAB, NOU KAY TWAPÉ AN CHAY BENNÉDIKSYON

17. Lè nou wézonnab, ki bennédiksyon nou kay twapé?

¹⁷ Lè nou wézonnab, nou kay twapé an chay bennédiksyon. Nou kay ni an bon wilasyon épi sé fwè èk sè nou-a. Èk nou kay édé tjenn lapé an kongwigasyon nou. Anplis di sa, nou kay enjwi sèvi Jéhova an lilyon épi sé fwè èk sè nou-a ki sòti diféwan péyi èk ki ni diféwan kilti. Osi, nou kay vwéman kontan paski nou sav nou wézonnab menm kon Dyé nou, Jéhova.