Jéhova Ban Nou Asiwans-lan Ki, I Kay Fè Latè-a On Pawadi

1. Lè pwofèt Izaya kwiyé Jéhova “Dyé Lavéwité-a”, kisa i té ka di jan Izwayèl?

PWOFÈT Izaya kwiyé Jéhova “Dyé Lavéwité-a”. Mo pawòl-la yo twadwi kon “lavéwité” vwéman vlé di “ensiswatil”. (Izay. 65:16) Èk mo pawòl-la “ensiswatil” vlé di “kité’y fèt”, èben “asiwéman”. Konsa, lè Bib-la ka palé konsèné Jéhova èben Jézi Kwi, èk i sèvi èspwèsyon-an “ensiswatil”, i ka ban nou asiwans-lan ki, pawòl sala vwé; i asiwé. Alò, sa Izaya té ka di jan Izwayèl té byen klè: Lè Jéhova di on bagay kay fèt, i vwéman kay fèt. Konsa, nou sa konfyé pawòl li paski i ka toujou tjenn sé pwonmèt li-a.

2. (a) Ki wézon nou ni pou nou konfyé sé pwonmèt Jéhova-a pou tan ki ka vini? (b) Ki dé kèstyon nou kay konsidiwé?

² Ès nou sa mété konfyans nou an pwonmèt-la Jéhova ja fè pou tan ki ka vini? Mé wi! Anfen, pwèskè ywit san (800) nanné apwé Izaya ékwi sé pawòl sala, zapòt Pòl èspliké wézon-an nou sa kwè sé pwonmèt Jéhova-a kay vini vwé. Pòl di Hibrou 6:18, “Bondyé pa sa manti lè i di on bagay èk i pa sa manti lè i fè sèman.” Annou katjilé’y mannyè sala: i enposib pou on sous dlo voyé glo ki fwé èk voyé glo ki salé an menm lè-a. An menm mannyè-a, Jéhova sé sous lavéwité; i pa sa manti; i enposib pou’y manti. Konsa, nou sa ni konfyans an tout sa Jéhova di, épi an tout sa i pwonmèt nou i kay fè an tan pou vini. Bon. An atik sala nou kay konsidiwé sé kwèstyon sala: Kisa Jéhova pwonmèt pou ban nou an tan pou vini? Èk kisa i ja di èk fè pou nou fè asiwé sé pwonmèt sala kay vini vwé?

KI PWONMÈT JÉHOVA JA BAN NOU?

3. (a) Ki pwonmèt nou tout enmen? (Wévélasyon 21:3, 4) (b) Kisa adan moun ka di lè yo tann pwonmèt sala?

³ Apwézan, nou kay konsidiwé on bèl pwonmèt nou tout enmen. Pwonmèt sala an Wévélasyon 21:3, 4. (Li’y) Wi, Jéhova pwonmèt on tan, lè “la pa kay ni lanmò ankò. La pa kay ni lapenn ében pléwé ében soufwans ankò.” Vwéman sa sé on bèl èspwa pou tan pou vini. Épi an chay di nou kontan sèvi lévanjil sala pou konfòté moun nou ka palé épi, pou moutwé yo mannyè lavi kay bèl an pawadi-a. Mé kisa moun ka di lè yo tann bèl pwonmèt sala? Èben adan di yo ka di, ‘Sa sé on bèl bagay. Mé m’a sa kwè sa sa fèt.’

4. (a) Lè Jéhova fè pwonmèt-la pou on pawadi, kisa i té sav ki té kay fèt an tan nou? (b) Apa di sé bèl pwonmèt li-a, ki lòt bagay Jéhova ban nou?

⁴ Ou wè, Jéhova té sèvi lisentèspwi’y pou fè zapòt Jan ékwi konsèné pwonmèt li pou on pawadi. Èk i té sav, nou menm té kay palé konsèné sé bèl pwonmèt sala épi moun lè nou ka pwéché bon nouvèl-la. Jéhova té osi sav, i té kay difisil pou an chay moun kwè, sé bagay-la ki mansyonnen an Wévélasyon 21:3, 4, té kay fèt vwé. (Izay. 42:9; 60:2; 2 Kòr. 4:3, 4) Bon. Kèstyon sé: ki mannyè nou sa édé lézòt wè sé bagay sala kay fèt vwé? Épi kisa ki kay édé nou fòtifyé konfyans nou an Jéhova èk sé bèl pwonmèt li-a? Ou wè, Jéhova pa té sèlman ban nou sé pwonmèt sala, i osi ban nou bon wézon pou nou sa mété konfyans nou an sé pwonmèt li-a. Mé ès nou konnèt sé wézon sala? Annou diskité yo.

JÉHOVA BAN NOU ASIWANS-LAN KI PWONMÈT LI KAY VINI VWÉ

5. Ki koté nou sa twouvé wézon nou sa konfyé pwonmèt Jéhova pou on pawadi?

⁵ Nou ni wézon pou kwè an pwonmèt Jéhova pou on pawadi lè nou li Wévélasyon 21:5, 6. Mi sé sa i ka di: “Lè sala moun-an ki té asid asou gwan chèz wa-a di mwen, “Gadé, mwen ka fè tout bagay nèf.” I di mwen ankò, “Ékwi sé bagay sala paski sé pawòl sala sé lavéwité, épi ou sa toujou apiyé anlè yo.” I di mwen, “Tout bagay fini fèt. Sé mwen ki Alfa épi Oméga, koumansman-an épi finisman-an.””

6. Pawòl Jéhova an Wévélasyon 21:5, 6 menm kon kisa? Èk ki asiwans sa ka ban nou?

⁶ An sé vèwsé-an nou djòs fini li-a, sé akonmsi Jéhova ka ban nou on papyé tè. Lè on moun ni on papyé tè, i asiwé i kay wisouvwé tè-a menm si i p’òkò wè’y. Konsa, Jéhova ka asiwé nou, i kay fè sé bagay-la i pwonmèt pou fè-a an Wévélasyon 21:3, 4. Wi, sé pwonmèt li-a kay fèt vwé. Konsa, annou gadé asiwans Jéhova an vèwsé 5, 6 pli pwé.

7. Ki moun ki koumansé palé an Wévélasyon 21:5? Èk pouki sa byen spésyal?

⁷ Wévélasyon 21:5 ka koumansé kon sa: “Lè sala moun-an ki té asid asou gwan chèz wa-a di mwen.” Bon. Sé pawòl sala byen spésyal paski yo ka fè nou sav ki moun ki kay palé. Èk sa sé yonn an twa fwa lè Jéhova menm té palé an liv Wévélasyon. Ou wè, Jéhova té sa sèvi on nanj èben Jézi Kwi pou bay konmisyon-an. Mé i pa té fè sa. I menm ban nou konmisyon-an. Alò, sa ka moutwé nou, nou sa mété tout konfyans nou an sa i di. Pouki nou ka di sa? Sé paski Jéhova pa “sa manti”. (Titòs 1:2, Hib 6:18) Konsa, nou sa mété tout konfyans nou an sa ki ékwi an liv Wévélasyon, paski tout sa Jéhova di, kay fèt vwé.

“GADÉ, MWEN KA FÈ TOUT BAGAY NÈF”

8. Kisa Jéhova ka fè délè, paski i asiwé i kay akonpli pwonmèt li? (Izaya 46:10)

⁸ Apwézan, annou konsidiwé yonn mo pawòl Jéhova té sèvi. Èk mo pawòl sala sété, “Gadé”. (Wév. 21:5) Ti mo pawòl sala ka pawèt byen souvan an liv Wévélasyon. Yon liv di, “Mannyè mo pawòl sala té ékwi-a, i ka di moun-lan ki ka li’y-la pou bay bon atansyon pou sé mo pawòl-la ki ka vini apwé-a.” Mé ki mo pawòl ki té vini apwé? Bondyé di, “Mwen ka fè tout bagay nèf.” I vwé, Jéhova kay fè sé bagay sala an tan pou vini. Mé paski i asiwé i kay akonpli sé pwonmèt li-a, délè, i ka palé akonmsi i ja ka fè sé chanjman sala.​—Li Izaya 46:10.

9. (a) Ki dé bagay Jéhova kay fè? (b) Kisa ki kay wivé sé gouvèdman latè-a épi sé méchan-an?

⁹ Jéhova di, “Mwen ka fè tout bagay nèf.” Kisa sa vlé di? An lévanjil sala, i ka di nou dé (2) bagay Jéhova kay fè. Pwèmyé bagay-la Jéhova kay fè sé détwi vyé sistenm sala. Wévélasyon 21:1, ka di nou: “Syèl-la èk latè-a té dispawèt.” Bon. Ès sa vlé di syèl-la nou ka wè-a kay dispawèt? Mé non. Syèl-la an lévanjil sala ka wépwézanté sé gouvèdman-an Satan èk sé zèlèv li-a ka enflouwansé. (Maf. 4:8, 9; 1 Jan 5:19) Bon. Ès latè-a kay dispawèt tou? Non. Lè Bib-la sèvi mo pawòl-la “latè-a”, i ka wépwézanté moun ki ka viv asou’y. (Jen. 11:1; Sam 96:1) Alò, latè-a Bondyé kay détwi-a, sé tout moun ki mové. Èk lè i détwi sé gouvèdman-an èk sé méchan-an, i kay détwi yo nèt! Mi dézyenm bagay-la Jéhova kay fè. I kay établi on sistèm nèf. Mi sé sa Wévélasyon 21:1 di, “Lè sala mwen wè an syèl épi an latè nèf.” Syèl nèf sala, ka wépwézanté gouvèdman Bondyé. Èk latè nèf sala, ka wépwézanté sé moun-lan ki dwèt-la gouvèdman sala kay kondwi.

10. Kisa Jéhova kay fè nèf?

¹⁰ An Wévélasyon 21:5, nou li konsèné sé bagay-la Jéhova di i kay fè nèf. Byen òbzòvé, Jéhova pa té di, “Mwen kay viwé fè tout bagay an nèf.” Pito, i di, “Mwen kay fè tout bagay nèf.” Mé an ki mannyè Jéhova kay fè tout bagay nèf? Jéhova kay fè ni latè-a ni lézòm pawfé. Izaya ékwi, Jéhova kay fè latè-a on bèl plas menm kon jaden Édenn. Izaya di ankò, nou tout kay an bon santé; nou kay santi kò-a nèf. Anfen, moun ki enfim, moun ki avèg, moun ki soud—yo tout kay twapé djéwizon. Èk jis moun ki mò, kay viwé vivan ankò. Wi, Jéhova kay tjenn pwonmèt li, épi nou tout kay twapé bennéfis an plen.​—Izay. 25:8; 35:1-7.

“SÉ PAWÒL SALA SÉ LAVÉWITÉ. . . . TOUT BAGAY FINI FÈT.”

11. Kisa Jéhova té di Jan pou fè? Èk pouki?

¹¹ Kisa Jéhova té di ankò pou ban nou asiwans-lan, nou sa konfyé’y? I di zapòt Jan: “Ékwi sé bagay sala paski sé pawòl sala sé lavéwité, épi ou sa toujou apiyé anlè yo.” (Wév. 21:5) Jéhova té mandé jan pou “ékwi”—sa vlé di, pou ékwi tout sa Bondyé té di’y. Èk wézon-an i di’y pou fè sa sé paski “sé pawòl sala sé lavéwité, épi ou sa toujou apiyé anlè yo.” Alò, nou byen kontan Jan té obéyi Jéhova èk ékwi sa i té di’y-la. Annékòz di sa, nou sa li, kouté èk mèdité asou pwonmèt Bondyé pou on pawadi, èk tout sé bèl bennédiksyon-an i kay mennen.

12. Pou ki wézon Jéhova di: “Tout bagay fini fèt”?

¹² Mi sé sa Jéhova di apwé: “Tout bagay fini fèt.” (Wév. 21:6) Mé pou kisa Jéhova palé akwèdi tout bagay i pwonmèt pou fè a pawadi-a ja fèt? Wézon-an sé sa: Anyen pa sa anpéché’y akonpli divwa’y. Bon. Jéhova di on lòt bagay ki ka fè nou asiwé sa i pwonmèt kay vwéman fèt. Ki lòt bagay i té di?

“SÉ MWEN KI ALFA ÉPI OMÉGA”

13. Pouki Jéhova di: “Sé mwen ki Alfa épi Oméga”?

¹³ Kon nou té mansyonnen a pawagwaf sèt (7), Jéhova menm palé twa (3) kou an liv Wévélasyon. (Wév. 1:8; 21:5, 6; 22:13) Èk chak kou-a, Jéhova di “sé mwen ki Alfa épi Oméga”. Alfa, sé pwèmyé lèt-la an alfabèt Gwik-la. Èk Oméga, sé dènyé lèt-la. Konsa, lè Jéhova kwiyé kò’y “Alfa épi Oméga”, i ka ban nou asiwans-lan ki lè i koumansé on bagay i kay fini’y, épi i kay ni siksé.

14. (a) Ba yon ègzanp ki ka moutwé kilè Jéhova sété “Alfa” èk kilè i kay “Oméga.” (b) Ki asiwans ki an Jennésis 2:1-3?

¹⁴ Apwé Jéhova kwéyé Adanm èk Èv, i di yo divwa’y pou lézonm èk latè-a. Nou li an Jennésis 1:28: ‘Bondyé benni yo, èk Bondyé di yo: “Fè ich, fè an chay ich, pléplé latè-a èk ni latè-a anba pouvwa zòt.’ Lè Jéhova té di sa divwa’y té yé pou latè-a épi lézonm, sa sété koumansman-an. A lè sa-a Jéhova té ka di “Sé mwen ki Alfa”. Konsa, lè divwa’y akonpli an plen, sa sé, lè désandan Adanm èk Èv ki obéyisan plen latè-a èk fè’y on pawadi, Jéhova kay di “Sé mwen ki Oméga”. Èk Jéhova osi ban nou asiwans-lan ki divwa’y kay fèt vwé an Jennésis 2:1-3. (Li’y. ) Konsa nou wè, Jéhova di sètyenm (7^yenm) jou-a sé on jou ki sen. Kisa sa vlé di? Sa vlé di, i dèdiké jou sala, pou’y akonpli divwa’y lè i vini pou lézonm èk latè-a. Konsa, i ka asiwé nou, a bout jou sala tout bagay kay fèt menm kon i té di.

15. Pouki i té sanm Satan té anpéché divwa Bondyé fèt?

¹⁵ Wi, divwa Jéhova sé pou latè-a plen épi moun ki pawfé ki ka obéyi’y. Mé apwé Adanm èk Èv dézobéyi Bondyé, tout ich yo éwityé péché èk lanmò. (Ronm 5:12) Konsa, i té sanm Satan té anpéché divwa Bondyé fèt asou latè-a. Mé ès sa té vwé? Ès Satan té sa doubout Jéhova èk anpéché’y akonpli divwa’y? Awa! Satan pa sa janmen doubout Jéhova. Mé an lidé Satan, i té kwè i té ganyen èk i té mawé lanmen Bondyé. I té kwè Bondyé pa té kay janmen ni on bon solousyon pou sitiwasyon sala. Paski lè’y té fè Adanm èk Èv péché, i té kwè Bondyé té kay tjwé yo èk fè dé (2) lòt moun ki té pawfé pou akonpli divwa’y. Mé si Jéhova té fè sa, Denmou-a té sa kwiyé Jéhova on mantè. Pouki nou ka di sa? Sa sé paski an Jennésis 1:28, Jéhova té ja di Adanm èk Èv, sé ich yo ki té kay plen latè-a.

16. Kisa ki fè Satan kwè, Jéhova pa té sa akonpli divwa’y?

¹⁶ Ki lòt disizyon pitèt Satan té kwè Bondyé té kay ni pou fè? Pitèt i té kwè, Bondyé té kay kité Adanm èk Èv fè ich, mé sé ich sala pa té kay janmen pawfé. (Éklé. 7:20; Ronm 3:23) Épi si ich Adanm èk Èv pa té kay janmen pawfé, Satan té sa di Jéhova pa té sa akonpli divwa’y. Paski a lè sala, latè-a té kay plen épi moun, mé pa moun ki té pawfé.

17. (a) Kisa Jéhova fè pou fè asiwé divwa’y té kay akonpli? (b) Kisa ki kay fèt a bout mil lanné-a? (Gadé pòtwé-a osi.)

¹⁷ Satan pa té sa janmen imajiné sa Jéhova té kay fè. Jéhova té ni pli mèyè solousyon-an pou akonpli divwa’y, menm si Satan èk Adanm èk Èv té wébélé. (Sam 92:5) Mi sa Jéhova fè: i kité Adanm èk Èv fè ich. Konsa, pyèsonn pa té sa kwiyé’y on mantè paski i tjenn pwonmèt li an Jennésis 1:28. Èk osi, Jéhova moutwé si i di on bagay, anyen pa sa anpéché’y fè’y. Jéhova fè asiwé divwa’y fèt lè i potjiwé on ‘désandan’ ki té kay sové ich Adanm èk Èv. (Jen. 3:15; 22:18) Konsa, désandan sala té kay bay lavi’y kon on wanson pou sové lézòm. Satan pa té sa janmen kwè Jéhova té sa ni solousyon kon sa! Pouki? Sé paski Satan pa ni lanmityé; i la pou kò’y tousèl. Mé Jéhova, i plen lanmityé, èk awanjman-an i mété an plas-la bazé asou lanmityé. (Maf. 20:28; Jan 3:16) Alò, ki bennéfis nou kay twapé a kòz di awanjman-an Jéhova mété an plas-la? Èben, bò bout mil lanné kondwit Jézi, tout ich Adanm èk Èv ki obéyisan kay vini pawfé. Èk yo kay viv adan on bèl pawadi asou latè-a menm kon Jéhova té pwonmèt an koumansman-an. A lè sa-a, Jéhova kay sa di “Sé mwen ki Oméga.”

KI MANNYÈ NOU SA FÒTIFYÉ KONFYANS NOU AN PWONMÈT JEHOVAH POU ON PAWADI?

18. Kisa nou sa di moun pou fè yo asiwé latè-a kay vini on pawadi? (Gadé enfòmasyon-an anba “Twa Wézon Nou Sa Konfyé Pwonmèt Jéhova.”)

¹⁸ An atik sala nou ja konsidiwé adan sé wézon-an nou kwè latè sala kay vini on pawadi. Mé kisa nou sa di moun pou fè yo asiwé sa kay vwéman fèt? Alò, mi twa bagay nou sa di yo. Pwèmyé, sé Jéhova menm ki fè pwonmèt-la. Liv Wévélasyon di: “Moun-an ki té asid asou gwan chèz wa-a di mwen, “Gadé, mwen ka fè tout bagay nèf.”” Jéhova ni lasajès-la, pouvwa-a èk dézi-a pou akonpli pwonmèt li. Dézyenm, Jéhova sav sé pwonmèt li-a kay fèt menm kon i di. Konsa, délè, i ka palé akonmsi i ja ka fè èben i ja fè sa i pwonmèt pou fè-a. Konsa, lè Jéhova di “Sé pawòl sala sé lavéwité, épi ou sa toujou apiyé anlè yo.” Osi, “Tout bagay fini fèt”, nou sav nou sa apiyé asou sé pawòl sala. Twazyenm, anyen pa sa doubout Jéhova pou anpéché’y akonpli divwa’y. Épi sa sé wézon-an i di: “Sé mwen ki Alfa épi Oméga”. Épi Jéhova kay bay pwèv ki sé Satan ki on mantè, épi Satan pa sa anpéché’y fè divwa’y.

19. Si on moun pa kwè latè-a kay vini on pawadi, kisa ou sa fè?

¹⁹ Bon. Jéhova di nou sé bagay sala an liv Wévélasyon pou fè nou asiwé sé pwonmèt li-a kay vini vwé. Konsa, sé pou nou toujou chonjé, chak fwa nou palé épi moun konsèné yo, sa ka fòtifyé konfyans nou menm an Jéhova. Alò, lè ou li Wévélasyon 21:4 konsèné bèl pwonmèt-la Jéhova fè pou on pawadi èk yon moun di’w i pa kwè sa kay janmen fèt, kisa ou sa fè? Èben ou sa li vèwsé 5 èk 6, èk èspliké sé vèwsé sala. Épi moutwé yo, Jéhova, Dyé Lavéwité-a pa ka manti, èk nou sa dépan asou sé pwonmèt li-a. Konsa, fwè èk sè, ès Dyé Lavéwité-a kay fè latè-a on pawadi? Nou tout ni bon wézon pou di èk konfyans: “Absoliman!”​—Izay. 65:16.