Koumannyè Nou Sa Tjenn Lanmityé Nou Pou Yonn A Lòt Fò?

1-2. (a) Poutji zapòt Pòl té di lanmityé sé “pli gwan” kawaktè-a? (b) Ki kwèsyon nou kay diskité an atik sala?

LÈ ZAPÒT Pòl té ka palé konsèné lafwa, èspwa, épi lanmityé, i di “pli gwan an sé twa bagay sala sé lanmityé.” (1 Kòr. 13:13) Konsa, poutji zapòt Pòl té di sa? Ében, i té di sa paski lè nou wivé an latè nèf-la, nou pa kay bouzwen lafwa ében èspwa an pwonmèt Jéhova pou latè nèf-la ankò, paski nou kay wè Bondyé akonpli tout pwonmèt li. Mé nou kay toujou bouzwen moutwé Jéhova èk pèp li lanmityé. Anfen, lanmityé nou pou yo kay kontiné pwofité pou tout tan.

² Alò, paski nou kay toujou bouzwen moutwé yonn a lòt lanmityé, an atik sala nou kay diskité sé twa (3) kwèsyon sala: (1) Pouki nou sipozé enmen yonn a lòt? (2) Koumannyè nou sa moutwé yonn a lòt lanmityé? èk (3) Koumannyè nou sa tjenn lanmityé nou pou yonn a lòt fò?

POUKI NOU SIPOZÉ ENMEN YONN A LÒT?

3. Pouki i enpòtan pou enmen sé fwè èk sè nou-an?

³ Pouki i si tèlman enpòtan pou enmen sé fwè èk sè nou-an? Ében yonn an sé wézon-an sé sa, lè nou moutwé sé fwè èk sè nou-an lanmityé nou ka bay pwèv ki, nou sé Kwityen ki vwé. Anfen, an Jan 13:35 Jézi té di sé disip li-a: “Si zòt enmen yonn a lòt, sé lè sala tout moun kay sav zòt sé disip mwen.” Osi, lè nou ni lanmityé pou yonn a lòt sa ka tjenn nou an lilyon. Pou ègzanp, an Kòlòsé 3:14 zapòt Pòl té kwiyé lanmityé “an lilyon ki pawfé.” Mé la ni on lòt wézon ki byen enpòtan pouki nou sipozé moutwé yonn a lòt lanmityé. Pou ègzanp, lè zapòt Jan té ékwi sé fwè’y èk sè’y-la, i di yo: “Zòt ki ni lanmityé pou Bondyé-a sipozé ni lanmityé pou yonn a lòt.” (1 Jan 4:21) Konsa lè nou moutwé sé fwè èk sè nou-an lanmityé, nou ka moutwé nou enmen Bondyé osi.

4-5. Ba yon ègzanp ki ka moutwé lanmityé nou pou Jéhova èk lanmityé nou pou sé fwè èk sè nou-an ni yon konnèksyon.

⁴ Koumannyè lanmityé nou pou Jéhova èk lanmityé nou pou sé fwè èk sè nou-an ni on konnèksyon? Pou ègzanp, annou konsidiwé konnèksyon-an ant tjè nou èk lòt manm kò nou. Wi, lè on dòktè touché ponyèt nou pou jwenn pou nou, i sa twouvé enfòmasyon konsèné kondisyon tjè nou. Alò, kisa nou sa apwann hòd ègzanp sala konsèné konnèksyon-an ant lanmityé nou pou Jéhova, èk lanmityé nou pou sé fwè èk sè nou-an?

⁵ Lè on dòktè touché ponyèt nou pou santi pou nou, i sa konnèt ki otan fò tjè nou fò. An menm mannyè-a, nou sa konnèt ki otan fò lanmityé nou pou Jéhova fò si nou ègzanminé ki otan fò lanmityé nou pou sé fwè èk sè nou-an fò. Èk si nou òbzòvé lanmityé nou pou sé fwè èk sè nou-an ka vini fèb, sa ka moutwé lanmityé nou pou Jéhova ka vini fèb osi. Mé lè nou ka toujou moutwé sé fwè èk sè nou-an lanmityé, nou kay sav lanmityé nou pou Jéhova fò.

6. Si lanmityé nou pou sé fwè èk sè nou-an ka vini fèb, pouki sa sé yon pwoblenm ki byen sèwyé? (1 Jan 4:7-9, 11)

⁶ Si lanmityé nou pou sé fwè èk sè nou-an ka vini fèb, sa sé yon pwoblenm ki byen sèwyé. Pouki nou ka di sa? Ében, sa sé paski, si lanmityé nou pou sé fwè èk sè nou-an ka vini fèb, sa vlé di wilasyon nou épi Jéhova fèb osi. Zapòt Jan fè pwen sala klè an 1 Jan 4:20, lè’y di: “Moun-an ki pa ni lanmityé pou fwèʼy-la i ka wè-a pa sa ni lanmityé pou Bondyé-a i p’òkò wè-a.” Konsa, kisa ki lison-an pou nou? Ében sé sèlman lè nou moutwé nou “ni lanmityé pou yonn a lòt” Jéhova ka plè épi nou.—Li 1 Jan 4:7-9, 11.

KOUMANNYÈ NOU SA MOUTWÉ YONN A LÒT LANMITYÉ?

7-8. An ki diféwan mannyè nou sa moutwé yonn a lòt lanmityé?

⁷ Byen souvan an Pawòl Bondyé, nou ka twapé koumandman-an pou “enmen yonn a lòt” ében pou “ni lanmityé pou yonn a lòt.” (Jan 15:12, 17; Ronm 13:8; 1 Tèsa. 4:9; 1 Pita 1:22; 1 Jan 4:11) Kanmenm lanmityé sé on santiman ki andidan tjè nou èk pyèsonn pa sa wè’y. Konsa, ki mannyè sé fwè èk sè nou-an kay sav nou enmen yo? Ében, aksyon nou èk pawòl nou kay moutwé yo nou enmen yo.

⁸ La ni plizyè diféwan mannyè nou sa moutwé sé fwè èk sè nou-an nou enmen yo. Mi détwa ègzanp Bib-la ka ban nou: ‘Palé lavéwité-a épi yonn a lòt.’ (Zèk. 8:16) “Viv an lapé épi yonn a lòt.” (Mak 9:50) “Chak moun sipozé abésé kòʼy épi bay fwèʼy lonnè.” (Ronm 12:10) “Aksèpté yonn a lòt.” (Ronm 15:7) “Sé pou zòt pawdonnen lè zòt ni anyen kont yonn a lòt.” (Kòl. 3:13) “Édé yonn a lòt pòté chay li.” (Gal. 6:2) “[Kontiné] ankouwajé [ében konsolé] yonn a lòt.” (1 Tèsa. 4:18) “[Kontiné] édé yonn a lòt.” (1 Tèsa. 5:11) Èk, “pwédyé bay yonn a lòt”.—Jémz 5:16.

9. Lè nou konsolé sé fwè èk sè nou-an, ki mannyè sa ka moutwé yo nou enmen yo? (Gadé pòtwé-a osi.)

⁹ Annou konsidiwé yonn an sé mannyè-a nou sa moutwé sé fwè èk sè nou-an nou enmen yo. An 1 Tèsalonnika 4:18, zapòt Pòl di: “[Kontiné] ankouwajé [ében konsolé] yonn a lòt.” Alò lè nou konsolé sé fwè èk sè nou-an, pouki sa ka moutwé nou enmen yo? Ében an liv ki ka palé konsèné Bib-la di, mo pawòl-la zapòt Pòl sèvi pou “konsolé” vlé di “pou doubout a koté on moun pou ankouwajé’y lè’y ka soufè a kòz di yon pwoblenm ki difisil”. Konsa, lè nou ka konsolé on fwè ében on sè ki ka soufè, nou ka édé’y wèsté fidèl pou Jéhova. Èk toujou chonjé, chak lè nou konsolé on fwè ében on sè, nou ka moutwé’y nou enmen’y.​—2 Kòr. 7:6, 7, 13.

10. Ki konnèksyon la ni ant konpasyon èk konsolasyon?

¹⁰ Ki mannyè konpasyon èk konsolasyon ni yon konnèksyon? Ében on moun ki ni konpasyon pou on lòt moun, vlé konsolé moun-lan, èk fè kéchòy pou édé’y. Konsa lè nou sé moun ki ni konpasyon, sa ka pousé nou pou konsolé lézòt ki ka soufè. Anfen, zapòt Pòl èspliké ki, konpasyon Jéhova pou lézòm ka pousé’y pou konsolé yo. Pou ègzanp i dékwi Jéhova kon “Papa-a ki ni tout mizéwikòd-la, . . . ki ka konsolé nou tout”. (2 Kòr. 1:3) Wi, zapòt Pòl kwiyé Jéhova “Papa-a ki ni tout mizéwikòd-la”. Konsa, Jéhova sé ‘Papa-a’ ében Sous “tout mizéwikòd-la” paski i ni on chay konpasyon ban nou. Èk konpasyon sala ka pousé’y pou “konsolé nou an tout twakasman nou”. (2 Kòr. 1:4) Alò menm kon dlo ki sòti adan on sous ka wéfwéchi moun ki swèf, Jéhova ka wéfwéchi èk konsolé tout moun ki ni tèt cho. Konsa, koumannyè nou sa swiv ègzanp Jéhova épi ni konpasyon bay sé fwè èk sè nou-an pou nou sa konsolé yo? Ében yon mannyè nou sa fè sa, sé lè nou dévlopé kawaktè ki kay édé nou santi konpasyon pou sé fwè èk sè nou-an ki kay pousé nou pou konsolé yo. Alò, annou konsidiwé détwa kawaktè ében bon mannyè nou sa dévlopé.

11. Silon Kòlòsé 3:12 èk 1 Pita 3:8, ki lòt bon mannyè nou ni pou dévlopé ki kay édé nou pou enmen sé fwè èk sè nou-an èk konsolé yo?

¹¹ Kisa ki sa édé nou pou kontiné enmen èk ‘kontiné konsolé lézòt’ touléjou? Ében nou ni pou dévlopé bon mannyè tèl kon, soufè épi sé sa ki ka soufè-a, ni lanmityé pou yonn a lòt kon fwè èk sè, èvèk fè bon bay lézòt. (Li Kòlòsé 3:12; 1 Pita 3:8.) Alò, ki mannyè sé bon mannyè sala ében sé bèl kawaktè sala sa édé nou? Ében lè nou ni konpasyon pou sé fwè èk sè nou-an èk nou vwéman mélé épi yo, nou kay fè tout sa nou pé pou konsolé yo lè yo ka soufè. Anfen, Jézi di an Mafyou 12:34, 35: “Bouch-la ka palé bagay ki ka sòti an tjè-a. An bon nonm kay palé sé bon bagay-la i ni andidanʼy-lan.” Wi, lè nou konsolé sé fwè èk sè nou-an, sa sé yon mannyè nou ka moutwé nou vwéman enmen yo. Èk nou ka moutwé sa ki an tjè nou.

KOUMANNYÈ NOU SA TJENN LANMITYÉ NOU POU YONN A LÒT FÒ?

12. (a) Pouki nou vlé pwan bon pwokosyon pou pa pèd lanmityé-a nou ni pou yonn a lòt? (b) Ki kwèsyon nou kay konsidiwé?

¹² Nou tout vlé ‘kontiné moutwé yonn a lòt lanmityé’. (1 Jan 4:7) Kanmenm i byen enpòtan pou nou chonjé ki, Jézi té bay yon avètisman konsèné tan nou, koté’y di, “lanmityé an chay moun [té kay] vini fèb”. (Maf. 24:12) Bon, lè Jézi té di pawòl sala i pa té ka palé konsèné sé disip li-a. I té ka palé konsèné moun an latè-a. Mé nou ni pou pwan bon pwokosyon pou pa kité atitid moun an latè-a enflouwansé mannyè nou ka twété yonn a lòt. Konsa épi sa an lidé nou, annou konsidiwé kwèsyon sala: Kisa ki kay édé nou konnèt si lanmityé nou pou yonn a lòt fò?

13. Kisa ki kay édé nou konnèt si lanmityé-a nou ni pou sé fwè èk sè nou-an fò?

¹³ Yon mannyè nou sa konnèt si lanmityé nou pou yonn a lòt fò, sé pou ègzanminé mannyè nou ka aji épi sèten sitiwasyon. (2 Kòr. 8:8) Pou ègzanp an 1 Pita 4:8, zapòt Pita mansyonnen yon sitiwasyon, koté’y di: “Mé sa ki pli enpòtan pasé lòt bagay-la sé pou ou ni lanmityé pou yonn a lòt èk tout tjèʼw, paski lanmityé ka kouvè an latilyé péché.” Bon, sé fwè ében sé sè nou-an kay fè lèwè ében yo kay fè kéchòy ki kay blésé nou. Konsa lè sa fèt, mannyè-a nou aji épi sitiwasyon-an kay moutwé si lanmityé nou pou yo fò.

14. Silon 1 Pita 4:8, ki mannyè nou sipozé enmen sé fwè èk sè nou-an? Ba yon ègzanp.

¹⁴ Annou byen katjilé asou sa Pita té di. Pwèmyé pòsyon-an an vèwsé 8 ka dékwi mannyè-a nou sipozé enmen sé fwè èk sè nou-an. Wi, nou sipozé enmen yo épi “tout tjè” nou. Osi, dézyenm pòsyon-an an vèwsé-a ka dékwi kisa nou kay fè lè nou enmen sé fwè èk sè nou-an épi tout tjè nou. Wi, lè nou enmen sé fwè èk sè nou-an épi tout tjè nou, sa kay pousé nou pou kouvè péché yo. Pou ègzanp, annou imajiné on tab ki ni an chay tach. I posib pou pwan on mòso twèl èk hédi’y asou tab-la, pa annèk pou kouvè yon tach ében dé tach, mé pou kouvè on chay tach. An menm mannyè-a, si nou enmen sé fwè èk sè nou-an épi tout tjè nou, nou sa pawdonnen ében “kouvè an latilyé péché” yo, pa annèk yonn ében dé.

15. Si lanmityé nou pou sé fwè èk sè nou-an fò asé, kisa nou kay fè? (Kòlòsé 3:13)

¹⁵ Lanmityé nou pou sé fwè èk sè nou-an sipozé fò asé pou édé nou pou pawdonnen yo lè yo ofwansé nou, menm si sa pa toujou ézé pou fè. (Li Kòlòsé 3:13.) Wi, lè nou pawdonnen sé fwè èk sè nou-an sa ka moutwé lanmityé nou pou yo fò, èk sa ka osi moutwé nou vlé plè Jéhova. Alò, ki lòt bagay nou sa fè ki sa édé nou pou pawdonnen sé fwè èk sè nou-an? Èk kisa ki sa édé nou pou pa vini faché vit a kòz di lèwè yo?

16-17. Ki lòt bagay ki sa édé nou pawdonnen sé fwè èk sè nou-an? Ba yon ègzanp. (Gadé pòtwé-a osi.)

¹⁶ Nou vlé fiksé asou sé bon kawaktè sé fwè èk sè nou-an pito nou fiksé asou défo yo. Pou ègzanp, imajiné ou ka enjwi kò’w adan on plas épi on gwoup fwè èk sè. An bout lokazyon-an ou tèlman kontan, ou désidé pou pwan pòtwé gwoup-la. Anfen, ou pwan twa (3) pòtwé si antouka yonn di yo pa sòti byen. Kanmenm, kon’w ka gadé sé pòtwé-a ou wéyalizé adan yonn an sé pòtwé-a, yonn an sé fwè-a pa ka souwi. Alò, ou pé désidé pou dilit pòtwé sala, paski ou ni lòt bèl pòtwé koté tout moun ka souwi.

¹⁷ Bon, nou sa konpawé sé pòtwé-a nou pwan-an épi sé menmwa-a nou ni-an konsèné sé bèl tan-an nou pasé épi sé fwè èk sè nou-an. Wi, nou enmen wéfléchi asou sé bèl menmwa sala. Mé, ann’ di asou yonn an sé lokazyon sala, on fwè ében on sè té di ében fè on bagay ki pa té janti. Kisa nou sipozé fè épi mové menmwa sala? Ében, menm kon nou té dilit pòtwé-a ki pa té bon-an, nou sipozé éséyé dilit ében obliyé menmwa sala. (Pwov. 19:11; Èfés. 4:32) Wi, nou vlé obliyé lèwè fwè-a ében sè-a té fè-a, paski nou ni otan bèl bagay pou chonjé konsèné sé tan-an nou ja pasé épi’y. Èk sé kalité menmwa sala nou vlé chonjé èk chéwi.

POUKI I SI TÈLMAN ENPÒTAN POU NOU MOUTWÉ YONN A LÒT LANMITYÉ JÒDI JOU

18. Kisa nou té apwann konsèné lanmityé an atik sala?

¹⁸ Pouki nou ni pou tjenn lanmityé-a nou ni pou yonn a lòt fò? Ében kon nou ja diskité, lè nou moutwé sé fwè èk sè nou-an lanmityé, sa ka bay pwèv ki nou enmen Jéhova. Alò, ki mannyè nou ka moutwé sé fwè èk sè nou-an nou enmen yo? Nou ka fè sa lè nou éséyé dévlopé pli konpasyon, èk sa kay pousé nou pou “[kontiné] ankouwajé [ében konsolé] yonn a lòt”. Mé, ki mannyè nou sa tjenn lanmityé-a nou ni pou yonn a lòt fò? Ében, nou ni pou pawdonnen sé fwè èk sè nou-an, menm si i difisil pou fè sa délè.

19. Pouki i si tèlman enpòtan pou nou moutwé yonn a lòt lanmityé jòdi jou?

¹⁹ Pouki i si tèlman enpòtan pou nou moutwé yonn a lòt lanmityé jòdi jou? Ében, an 1 Pita 4:7, 8 zapòt Pita ka ban nou wépons-lan, i di: “Finisman tout bagay ka vini touswit. . . . Mé sa ki pli enpòtan . . . sé pou ou ni lanmityé pou yonn a lòt èk tout tjèʼw.” Anfen, kon tan-an pou Jézi détwi vyé sistenm Satan-an ka apwoché, kisa nou sa èspéyé? Ében Jézi té di: “Tout nasyon kay hayiʼw pou lapéti mwen.” (Maf. 24:9) Alò pou nou sa wèsté fidèl pou Jéhova anba kalté hayisans sala, i enpòtan pou nou wèsté an lilyon. Wi, nou ni pou moutwé yonn a lòt lanmityé. Èk lè nou fè sa, Satan pa kay sa janmen mété divizyon anpami nou, paski “sé lanmityé ki ka simanté tout bagay ansanm adan an lilyon ki pawfé.”​—Kòl. 3:14; Filip. 2:1, 2.