Ou Sa Asiwé Jéhova Kay Édé’w Lè’w Ka Èspéyansé Difikilté

1-2. (a) Menm kon sé Jwif-la ki té viwé Jérouzalèm, ki difikilté nou pé èspéyansé jòdi? (b) Mansyonnen adan sé difikilté-a sé Jwif-la té ka èspéyansé. (Osi, gadé enfòmasyon-an anba sijé-a: “An Tan Hagay, Zèkaraya, épi Èzra.”)

DÉLÈ, ès ou ka santi antjèt lè’w katjilé konsèné sa ou pé èspéyansé an tan pou vini? Pou ègzanp, pitèt ou antjèt paski ou pèd twavay ou, èk ou ka katjilé ki mannyè ou kay sa potjiwé bay fanmi’w. Ében pitèt la ni pwoblenm politik an péyi’w, ében ou ka èspéyansé pèsikasyon ében òpozisyon, èk ou antjèt paski ou ka katjilé ki mannyè pou pwotéjé fanmi’w. Ès ou ka èspéyansé sé kalité pwoblenm sala? Ében atik sala kay édé’w èk ankouwajé’w, paski an atik sala ou kay wè mannyè Jéhova té édé jan Izwayèl an tan pasé, lè yo té ka èspéyansé pwoblenm kon sa.

² Sé Jwif-la ki té an Babilonn té ja fè kò yo la. Anfen, adan di yo té byen konfòtab paski yo té fèt an Babilonn, yo té viv la tout lavi yo, èk bagay té bon an plas-la. Konsa, yo té kay bizwen ni lafwa ki byen fò pou yo sa kité Babilonn èk alé Jérouzalèm, paski pwèmyéman, an chay di yo pa té menm konnèt Jérouzalèm. Èvèk touswit apwé yo wivé la, yo koumansé èspéyansé pwoblenm. Pou ègzanp, i té difisil pou yo potjiwé bay fanmi yo, péyi-a té ni pwoblenm politik, èk sé Jwif-la té ka èspéyansé òpozisyon. A kòz di sa, adan sé Jwif-la té ka twapé’y wèd pou wèsté fiksé asou twavay-la pou wibati tanp Jéhova. Konsa, owon lanné senk san ven (520) avan lépòk nou, Jéhova voyé pwofèt Hagay épi pwofèt Zèkaraya pou ankouwajé pèp li, èk édé yo vini zélé pou twavay li ankò. (Hag. 1:1; Zèk. 1:1) Èvèk kon nou kay wè, sé pwofèt sala té vwéman ankouwajé sé moun-lan. Mé, pwèskè senkant (50) lanné apwé sa, sé Jwif-la té bizwen ankouwajman ankò. Konsa Èzra kité Babilonn èvèk i alé Jérouzalèm. Èzra sala té byen konnèt Lwa Moziz-la, èvèk i ankouwajé sé Jwif-la épi i édé yo pou mété adowasyon Jéhova pwèmyé an lavi yo.​—Èzra 7:1, 6.

3. Ki kèstyon nou kay wéponn an atik sala? (Pwovèb 22:19)

³ Sé pwofèsi-a pwofèt Hagay épi pwofèt Zèkaraya té ékwi-a, té édé pèp Bondyé an tan pasé pou kontiné ni konfyans an Jéhova, lè yo té ka èspéyansé òpozisyon. Jòdi jou, sé pwofèsi sala sa osi édé nou pou ni konfyans ki, népòt pwoblenm nou pé ni an lavi nou, Jéhova kay toujou édé nou. (Li Pwovèb 22:19.) Konsa, kon nou konsidiwé konmisyon Jéhova an liv Hagay épi liv Zèkaraya, èk ègzanminé ègzanp Èzra, nou kay wéponn sé kèstyon sala: Ki mannyè sé difikilté-a sé Jwif-la té ka èspéyansé-a té afèkté yo? Pouki nou sipozé tjenn adowasyon Jéhova pwèmyé an lavi nou, lè nou ka èspéyansé difikilté? Èk, kisa nou sa fè pou fòtifyé konfyans nou an Jéhova lè nou ka èspéyansé difikilté?

KI MANNYÈ SÉ DIFIKILTÉ-A SÉ JWIF-LA TÉ KA ÈSPÉYANSÉ-A TÉ AFÈKTÉ YO?

4-5. Ki diféwan bagay ki té fè sé Jwif-la pèd gou-a yo té ni pou fè twavay Jéhova?

⁴ Lè sé Jwif-la ki té ka witounen-an wivé Jérouzalèm, yo té ni an chay twavay pou fè. Èk yo té byen zélé pou fè twavay Jéhova. La menm, yo wibati lotèl Jéhova, èvèk yo bati fondasyon-an pou tanp-lan. (Èzra 3:1-3, 10) Mé touswit apwé sa, yo pèd gou-a yo té ni-an pou fè twavay Jéhova, paski yo té ka èspéyansé an chay pwoblenm. Apa di twavay-la yo té ni pou fè asou tanp-lan, yo té ni pou bati kay pou yo wèsté, yo té ni pou planté jaden yo, èk yo té ni pou potjiwé bay fanmi yo. (Èzra 2:68, 70) An plis di sa, sé lèlmi yo-a té ka ba yo an chay òpozisyon, èk yo té ka fè konplo pou doubout twavay-la sé Jwif-la té ka fè pou wibati tanp-lan.​—Èzra 4:1-5.

⁵ Sa ki té fè bagay pli mové bay sé Jwif-la ki té witounen-an sé sa, bagay té wèd an Jérouzalèm, èk osi la té ni pwoblenm politik an plas-la. A lè sala, Jérouzalèm té anba kondwit gouvèdman péyi Pèwja, èk Wa Sayròs té ka kondwi péyi Pèwja. Mé lè i mò an lanné senk san twant (530) avan lépòk nou, yon nonm yo ka kwiyé Cambyses koumansé kondwi péyi Pèwja. Cambyses sala té vlé ganyen a bout péyi Éjip. San dout, lè sé sòlda’y-la té ka alé goumen épi péyi Éjip, yo fòsé jan Izwayèl pou ba yo manjé, glo, èk plas pou yo wèsté. Èvèk sa fè bagay pli wèd bay sé Jwif-la ankò. Apwé Cambyses, sété Darayòs li pwèmyé ki té ka kondwi péyi Pèwja. Mé lè’y koumansé kondwi, la osi té ni an chay pwoblenm. Pou ègzanp la té ni pwoblenm politik an sé péyi-a ki té anba gouvèdman Pèwja, èk sé moun-lan té ka wébélé kont gouvèdman-an. Ou sa asiwé, tout sé pwoblenm sala té ka twakasé lidé sé Jwif-la ki té witounen-an, èk yo té ka katjilé ki mannyè yo té kay sa potjiwé bay fanmi yo. Paski yo té ka èspéyansé tèlman pwoblenm, adan sé Jwif-la té ka katjilé, sa pa té bon lè-a pou yo wibati tanp Jéhova.​—Hag. 1:2.

6. Silon Zèkaraya 4:6, 7, ki lòt difikilté sé Jwif-la té ka èspéyansé, èk ki asiwans pwòfèt Zèkaraya té ba yo?

⁶ Li Zèkaraya 4:6, 7. Bon, apa di sé difikilté-a sé Jwif-la té ka èspéyansé a kòz di pwoblenm politik, èk paski bagay té wèd an péyi-a, yo té ka osi èspéyansé pèsikasyon. An lanné senk san venn dé (522) avan lépòk nou, lèlmi sé Jwif-la fè gouvèdman péyi Pèwja doubout twavay-la yo té ka fè-a pou wibati tanp Jéhova. Kanmenm pwofèt Zèkaraya bay sé Jwif-la asiwans-lan ki, Jéhova té kay sèvi lisentèspwi’y pou édé yo kontiné fè twavay-la, magwé yo té ka èspéyansé difikilté. Èk an lanné senk san ven (520) avan lépòk nou, Wa Darayòs bay sé Jwif-la pèwmisyon pou kontiné fè twavay-la asou tanp-lan, èk i ba yo lajan pou édé yo fè twavay-la. Osi, i koumandé sé gouvèné-a ki té an plas-la pou édé sé Jwif-la.​—Èzra 6:1, 6-10.

7. Lè sé Jwif-la ki té witounen-an mété twavay Jéhova pwèmyé an lavi yo, ki mannyè Jéhova té sipòté yo?

⁷ Jéhova sèvi pwofèt Hagay épi pwofèt Zèkaraya pou bay pèp li an bèl pwonmèt. I di yo, si yo mété twavay-la pou wibati tanp-lan pwèmyé an lavi yo, i té kay sipòté yo. (Hag. 1:8, 13, 14; Zèk. 1:3, 16) Èvèk sé dé (2) pwofèt sala ankouwajé sé Jwif-la ki té witounen-an. Konsa, an lanné senk san ven (520) avan lépòk nou, sé Jwif-la koumansé twavay ankò pou wibati tanp-lan. Èk yo pwan mwens ki senk (5) lanné pou fini wibati tanp-lan. Wi, magwé sé Jwif-la té ka èspéyansé an chay pwoblenm, yo mété twavay Jéhova pwèmyé an lavi yo, èk Jéhova tjenn pwonmèt li pou sipòté yo. I ba yo sa yo té bizwen pou viv, èk osi, i édé yo pou tjenn wilasyon yo épi’y fò. Konsa, yo té sa kontiné adowé Jéhova épi djèwté.​—Èzra 6:14-16, 22.

TJENN ADOWASYON JÉHOVA PWÈMYÉ AN LAVI’W

8. Ki mannyè Hagay 2:4 sa édé nou pou tjenn twavay Jéhova pwèmyé an lavi nou? (Gadé nòt-la an bout paj-la osi.)

⁸ Gwan twibilasyon-an kay koumansé touswit, konsa nou ni pou chonjé, i byen enpòtan pou nou obéyi Jézi èk pwéché Bon Nouvèl-la apwézan. (Mak 13:10) Mé si nou ka èspéyansé difikilté paski nou pa ni asé lajan pou achté sa nou bizwen, ében si moun ka ba nou chalè pou fè nou doubout pwéché, nou pé twapé’y difisil pou tjenn twavay pwèchman-an pwèmyé an lavi nou. Konsa, ki sa ki kay édé nou pou mété twavay Jéhova pwèmyé an lavi nou? Ében nou bizwen ni konfyans ki, ‘Jéhova, Chèf Sé Lawmé-a,’b la épi nou. Èvèk dépi nou kontiné mété twavay Wéyòm-lan pwèmyé an lavi nou, Jéhova kay sipòté nou. Konsa, nou pa ni anyen pou pè.​—Li Hagay 2:4.

9-10. Ki mannyè yon fwè épi madanm li té èspéyansé sa Jézi pwonmèt an Mafyou 6:33?

⁹ Annou konsidiwé ègzanp fwè Olèg épi madanm li, Irina.c Yo ka wann sèvis kon piyonnè. Yo kité koté yo té ka wèsté, èk yo alé wèsté adan an lòt plas pou yo sa édé on kongwigasyon ki té ni labizwen. Mé touswit apwé yo wivé, bagay té vini pli wèd an péyi yo, èk yo pèd twavay yo. Pou apipwé yon lanné, sé tanzantan yo té ka jwenn on ti twavay. Magwé sa, yo té ka toujou wè mannyè Jéhova té ka sipòté yo. Èk délè sé fwè èk sè-a té ka édé yo. Kisa ki té édé fwè Olèg épi madanm li pou tjébé fò lè yo té ka èspéyansé sé difikilté sala? An koumansman-an, sitiwasyon-an té ka dékouwajé fwè-a. Mé, i di: “Nou pasé tout tan-an nou té pé an minis-la. Èk sé sa édé nou pou fiksé asou sé bagay-la ki pli enpòtan an lavi.” Wi, fwè-a épi madanm li kontiné chaché pou twavay, mé a menm di tan-an yo kontiné fè tout sa yo té pé an minis yo.

¹⁰ Yon jou, lè yo viwé lakay yo apwé yo sòti an minis-la, yo vini konnèt, on bon jan yo té voyajé apipwé yon san (100) lyé (yon san swasant (160) km), pou pòté dé (2) sak konmisyon ba yo. Fwè Olèg di: “Jou sala nou wè ankò, mizi enmen Jéhova épi sé fwè èk sè-a enmen nou. Nou asiwé Jéhova pa ka janmen oblijé sèvant li, menm si yo ka kwè, sitiwasyon yo pa kay vini pli mèyè.”​—Maf. 6:33.

11. Si nou mété twavay-la Jéhova ban nou pou fè-a pwèmyé an lavi nou, kisa nou sa asiwé?

¹¹ Twavay pwèchman-an sé yonn ki ka sové lavi moun, èk Jéhova vlé nou mété twavay sala pwèmyé an lavi nou. Kon nou té wè an pawagwaf 7, pwofèt Hagay té ankouwajé pèp Jéhova pou koumansé twavay asou tanp-lan ankò. Èk Jéhova pwonmèt i té ‘kay benni yo’ si yo té fè sa. (Hag. 2:18, 19) Konsa nou sa asiwé, Jéhova kay benni nou, si nou mété twavay-la i ban nou pou fè-a pwèmyé an lavi nou.

MANNYÈ NOU SA FÒTIFYÉ KONFYANS NOU AN JÉHOVA

12. Pouki Èzra épi sé Jwif-la ki té witounen épi’y-la té bizwen ni lafwa ki té byen fò?

¹² An lanné kat san swasant ywit (468) avan lépòk nou, Èzra voyajé épi on gwoup Jwif sòti péyi Babilonn pou alé Jérouzalèm. Sa sété dézyenm gwoup-la ki té ka witounen Jérouzalèm. Mé Èzra épi gwoup Jwif sala té bizwen ni lafwa ki té byen fò, paski voyaj-la yo té kay fè-a sété yonn ki té byen danjéwé. Yo té ni tout lò-a épi dajan-an Wa Darayòs té ba yo pou édé yo wibati tanp-lan. Èk i té byen alèz pou vòlè ataké yo asou chimen-an pou pwan sé bagay sala an lanmen yo. (Èzra 7:12-16; 8:31) An lòt bagay yo wéyalizé sé sa, vil Jérouzalèm pa té sòv. La pa té ni an chay moun ka wèsté an vil-la, èk sé pak masonn-lan épi sé bayè vil-la té bizwen wanjé. Alò, kisa nou sa apwann an ègzanp Èzra ki sa édé nou pou fòtifyé konfyans nou an Jéhova?

13. Kisa ki té édé Èzra pou fòtifyé konfyans li an Jéhova? (Gadé nòt-la an bout paj-la osi.)

¹³ Èzra té ja wè mannyè Jéhova té sipòté pèp Li lè yo té ka èspéyansé difikilté an tan pasé. Plizyè lanné avan, an lanné kat san katwiven kat (484) avan lépòk nou, pitèt Èzra té ka wèsté an Babilonn lè Wa Ahasiyouròs té pasé yon lwa pou tjwé tout Jwif ki té an sé péyi-a ki té anba gouvèdman péyi Pèwja. (Èsta 3:7, 13-15) Wi, Èzra épi tout sé Jwif-la té an danjé! Lè sé Jwif-la tann konsèné lwa-a Wa Ahasiyouròs té pasé-a, yo vini tèlman dékonpòté, yo pa té sa manjé. Èk kon yo té ka pwédyé pou mandé Jéhova pou édé yo, sé kon sa yo té ka pléwé. (Èsta 4:3) Èvèk bagay chanjé konplètman. Yo tjwé tout sé moun-lan ki té fè konplo-a pou tjwé sé Jwif-la. Mé, pa yon Jwif ki mò. Ès ou sa imajiné lajwa-a Èzra épi sé Jwif-la té ni lè yo wè sa ki té fèt! (Èsta 9:1, 2) San dout, sa Èzra èspéyansé a lè sala fòtifyé konfyans li ki, Jéhova ni abilité-a pou pwotèkté pèp Li. Èvèk konfyans sala té kay fè Èzra détèminé pou tjébé fò lè’y èspéyansé lòt difikilté.d

14. Lè sè Anastasia wè mannyè Jéhova pwan bon ka’y lè’y té ka èspéyansé difikilté, ki mannyè sa édé’y?

¹⁴ Lè nou wè mannyè Jéhova ka pwan bon ka nou lè nou ka èspéyansé pwoblenm, sa ka fòtifyé konfyans nou ki, Jéhova kay toujou pwan ka nou lè nou èspéyansé lòt pwoblenm an tan pou vini. Annou konsidiwé ègzanp yon sè ki ka wèsté an Youròp. Non sè-a sé Anastasia. Jan twavay li té ka bay tèlman chalè pou fè’y antwimélé kò’y an zafè politik, sè-a té ni pou kité twavay li pou’y té sa wèsté fidèl pou Jéhova. Sè-a di: “Sa sété pwèmyé fwa-a an lavi mwen, mwen pa té ni pyès lajan.” Osi i di: “Mwen kité tout bagay an lanmen Jéhova, èvèk mwen wè mannyè Jéhova otjipé mwen épi lanmityé. Konsa, si mwen janmen pèd twavay mwen ankò, mwen pa kay pè, paski si Papa mwen ki an syèl ka pwan ka mwen jòdi-a, i kay pwan ka mwen denmen.”

15. Kisa ki édé Èzra pou tjenn konfyans li an Jéhova fò? (Èzra 7:27, 28)

¹⁵ Èzra wè mannyè Jéhova té ka édé’y. Lè Èzra katjilé asou tout sé diféwan mannyè-a Jéhova té édé’y èk otjipé’y an tan pasé, san dout sa édé’y pou tjenn konfyans li an Jéhova fò. Kon nou li Èzra 7:27, 28, noté èkspwèsyon-an “lanmen Jéhova Dyé mwen té asou mwen.” Èzra sèvi èkspwèsyon ki té pwèskè menm kon èkspwèsyon sala sis (6) fwa an liv-la i ékwi-a.​—Èzra 7:6, 9; 8:18, 22, 31.

16. Ki sitiwasyon ki pé ba’w òpòtyounité-a pou wè lanmen Jéhova a klè an lavi’w? (Gadé pòtwé-a osi.)

¹⁶ Népòt difikilté nou ka èspéyansé, Jéhova sa édé nou. Pou ègzanp annou di ou ni pou mandé bòs ou pou ba’w tan pou’w atandé on konvansyon ében pou’w sa atandé sé mitin-lan wéglé. Gadé sa kon yon òpòtyounité pou’w wè lanmen Jéhova an lavi’w. Èvèk ou pé byen sipwi pou wè mannyè Jéhova édé’w pou jwenn tan-an ou bizwen-an. Lè’w wè sa Jéhova fè ba’w, konfyans ou an li kay vini pli fò.

17. Lè Èzra té twakasé ében i té antjèt, ki mannyè i moutwé i té ni imilité? (Gadé pòtwé-a ki asou kouvèti-a.)

¹⁷ Épi imilité, Èzra pwédyé èk i mandé Jéhova pou èd. Wi, chak fwa i té twakasé ében i té ka santi antjèt a kòz di sé wèskonsabilité-a i té ni-an, Èzra moutwé imilité. I pwédyé èk i mandé Jéhova pou èd. (Èzra 8:21-23; 9:3-5) Lòt moun té sa wè bon ègzanp li èvèk sa ankouwajé yo pou sipòté’y èk pou imité lafwa’y. (Èzra 10:1-4) Konsa, lè nou twakasé konsèné ki mannyè nou kay sa potjiwé sa fanmi nou bizwen, ében lè nou antjèt paski nou vlé pwotèkté fanmi nou, i bon pou nou fè menm kon Èzra épi ouvè tjè nou bay Jéhova an lapwiyè. Èvèk nou bizwen ni konfyans ki, Jéhova kay toujou édé nou.

18. Kisa ki kay édé nou pou ni pli konfyans an Jéhova?

¹⁸ Si nou moutwé imilité èk mandé Jéhova pou èd, èvèk si nou aksèpté èd hòd sé fwè èk sè nou-an, konfyans nou an Jéhova kay vini pli fò. Erika sé on sè ki ni twa (3) ich. Èk i té toujou ni konfyans ki, Jéhova té kay otjipé’y menm si i èspéyansé bagay ki té byen mové. Sè sala té ansent èk i pèd ti bébé-a. Touswit apwé sa, mawi’y mò. Mé lè’y katjilé asou tan sala, mi sé sa i di: “Ou pa sa konnèt andavans ki mannyè Jéhova kay édé’w. Ou sa twapé èd an mannyè ou pa té ka èspéyé. Mwen ja wè Jéhova sèvi sé jan mwen-an pou wéponn an chay an sé lapwiyè mwen-an, pa pawòl yo épi aksyon yo. Konsa si mwen di sé jan mwen-an sa mwen ka èspéyansé an lavi mwen, i kay pli alèz pou yo édé mwen.”

TJENN KONFYANS OU AN JÉHOVA FÒ JIS O BOUT-LA

19-20. Ki bèl lison nou apwann an ègzanp sé Jwif-la ki pa té sa witounen Jérouzalèm?

¹⁹ La ni on bèl lison nou sa apwann an ègzanp sé Jwif-la ki pa té sa witounen Jérouzalèm. Adan di yo pa té sa fè tout sa yo té vlé fè bay Jéhova, paski pitèt yo té ja an laj, ében yo pa té ni bon santé, ében sitiwasyon yo an fanmi yo pa té ka pèwmité yo pou viwé Jérouzalèm. Mé, yo té byen kontan pou sipòté sé fwè yo-a ki té ka witounen Jérouzalèm. Èvèk yo ba yo an chay an sé bagay-la yo té kay bizwen pou tanp-lan. (Èzra 1:5, 6) Anfen, diznèf (19) lanné apwé pwèmyé gwoup Jwif-la té witounen Jérouzalèm, i sanm sé Jwif-la ki té wèsté an Babilonn té ka voyé kontwibyousyon yo pou sipòté kay Jéhova an Jérouzalèm toujou.​—Zèk. 6:10.

²⁰ Konsa, menm si nou pa sa fè tout sa nou vlé fè an sèvis Jéhova, nou sa asiwé Jéhova ka apwésyé tout sa nou ka fè pou plè’y. Ki mannyè nou sav sa? Ében an tan pwofèt Zèkaraya, Jéhova té mandé’y pou sèvi lò-a épi dajan-an sé Jwif-la an Babilonn té voyé-a, pou fè on gwo, bèl kouwonn. (Zèk. 6:11) Èvèk ‘bèl kouwonn’ sala té kay wèsté an tanp-lan. Konsa tout moun ki wè’y té kay ‘chonjé’ mannyè sé Jwif-la an Babilonn té donnan an sa yo té bay pou sipòté twavay Jéhova. (Zèk. 6:14) Wi, Jéhova moutwé apwésiasyon pou tout sa sé Jwif-la an Babilonn té fè pou sipòté twavay li. Èk sa ka ba nou asiwans-lan ki, Jéhova pa kay janmen obliyé tout sa nou ka fè pou wèsté fidèl pou li, lè nou ka èspéyansé difikilté.​—Hib. 6:10.

21. Kisa ki kay édé nou pou tjenn konfyans nou an Jéhova fò anba népòt difikilté nou pé èspéyansé an tan pou vini?

²¹ San dout, nou kay kontiné èspéyansé difikilté an sé dènyé jou sala. Anfen, pou di’w lavéwité-a, bagay pé jis vini pli mové an tan pou vini. (2 Tim. 3:1, 13) Mé, nou pa bizwen twakasé tèt nou twòp konsèné sé bagay sala. I bon pou nou chonjé konmisyon-an Jéhova té sèvi pwofèt Hagay pou bay pèp li. I té di yo: “Mwen épi zòt . . . Sé pa pou zòt pè.” (Hag. 2:4, 5) Konsa dépi nou ka fè tout sa nou pé pou fè volonté Jéhova, nou sa asiwé i kay la épi nou. Èvèk si nou sèvi sé lison-an nou apwann an liv Hagay épi Zèkaraya, èk an bèl ègzanp Èzra, nou kay sa tjenn konfyans nou an Jéhova fò anba népòt difikilté nou pé èspéyansé an tan pou vini.