Ès Jéhova Kay Wéponn Lapwiyè Mwen?

1-2. Pouki nou pé kwè Jéhova pa ka wéponn lapwiyè nou?

An SAM 37:4 ka di: ”Pwan tout plézi’w an Bondyé Senyè-a, èk i kay ba’w dézi tjè’w.” Pa dé bèl pwonmèt sala bèl! Mé ès pwonmèt sala, sipozé fè nou kwè Jéhova kay ban nou tout sa nou pwédyé pou touswit apwé nou mandé’y? Èben, annou konsidiwé sé twa (3) sitiwasyon sala. Pwèmyé-a sé, an sè ki pa mayé ka pwédyé pou’y atandé Lékòl pou Pwoklanmatè Wéyòm-lan. Mé bagay-la sé sa, plizyè lanné ja pasé èk i p’òkò wisivwè an envitasyon. Mi dézyenm sitiwasyon-an; an jenn fwè ka soufè anba an maladi ki sèwiyé. Konsa, i ka mandé Jéhova pou on djéwizon paski i vlé fè plis an kongwigasyon-an. Mé tout pwédyé i ka pwédyé, santé’y pa ka vini pli mèyè. Èk finalman, twazyenm sitiwasyon-an. Pawan ki Tèmwen Jéhova ka mandé Jéhova pou édé ich yo wèsté an lavéwité-a. Mé magwé sa, ich yo désidé pou kité lavéwité-a èk doubout sèvi Jéhova.

² Èk pou ou menm, ès ou ka èspéyansé an bagay kon sa? Ès ou ja mandé Jéhova pou kéchòy, mé i p’òkò wéponn lapwiyè’w? Si wépons ou sé wi, ou pé kwè Jéhova ka wéponn lapwiyè lòt moun mé i pa ka wéponn lapwiyè’w. Èben pitèt ou pé jis santi ou ja fè an bagay ki té déplè Jéhova. An sè, non’y sé Janiceb, té santi menm kon sa. Janice èk mawi’y té vwéman vlé wann sèvis an Bèfèl. Konsa, yo pwédyé bay Jéhova konsèné dézi yo. Janice di: “Mwen té asiwé nou té kay wisivwè envitasyon-an pou alé Bèfèl touswit apwé nou di Jéhova konsèné dézi nou.” Mé apwé plizyè lanné, Janice èk mawi’y pa té wisivwè an envitasyon  pou alé Bèfèl. Konsa, Janice di: “Mwen té dékouwajé an chay. M’a té sav sa pou fè ankò. Alò, mwen koumansé katjilé kisa mwen té fè pou déplè Jéhova. Pou plizyé lanné mwen té ka pwédyé konsèné dézi nou èk i p’òkò wéponn mwen. An! Pou ki wézon Jéhova pa ka wéponn lapwiyè mwen?”

3. Kisa nou kay diskité an atik sala?

³ Délè, nou pé katjilé, ‘Ès Jéhova ka kouté lapwiyè mwen?’ Èben, si katjil sala vini an lidé’w, pa dékouwajé. Ou wè, jis nonm fidèl an tan pasé té ni menm katjil kon sa. (Jòb 30:20; Sam 22:2; Hab. 1:2) Mé kisa ki sa édé nou fòtifyé konfyans nou ki, Jéhova kay toujou wéponn lapwiyè nou? (Sam 65:2) Avan nou sa wéponn kwèsyon sala, mi yonndé kwèsyon nou vlé twapé wépons-lan pou pwèmyé: (1) Lè nou pwédyé, kisa Jéhova kay fè? (2) Lè nou pwédyé, kisa Jéhova vlé nou fè? (3) Pouki nou pé ni pou pwédyé pou an lòt bagay? Annou diskité sé kwèsyon sala.

LÈ NOU PWÉDYÉ, KISA JÉHOVA KAY FÈ?

4. Silon Jérémaya 29:12, kisa Jéhova pwonmèt pou fè?

⁴ Jéhova pwonmèt pou kouté lapwiyè nou. (Li Jérémaya 29:12.) Dyé nou enmen sé sèvant fidèl li-a, èk i pa kay janmen tounen do’y asou yo. Konsa, i pa kay janmen inyowé lapwiyè yo. (Sam 10:17; 37:28) Kanmenm, sa pa vlé di i kay ban nou tout sa nou mandé’y pou. Èk pou sèten bagay, nou pé ni pou moutwé pasyans èk èspéwé jis tan latè nèf-la wivé.

5. Jéhova ka byen kouté lapwiyè nou pou wè kisa?

⁵ Lè nou ka pwédyé, Jéhova ka byen kouté pou wè si lapwiyè nou a ling épi divwa’y. (Izay. 55:8, 9) Annou konsidiwé yonn an sé bagay-la ki sé divwa Jéhova. Jéhova vlé tout latè-a plen épi moun ki vlé’y kon kondwitè yo. Mé Satan di moun ki ni pli siksé si yo kondwi kò yo. (Jen. 3:1-5) An tout lasajès Jéhova, i pèwmité lézòm pou kondwi kò yo pou on ti tan pou moutwé sa Satan di sé on mansonj. Èk nou ka wè byen klè, gouvèdman lézòm ka annékòz an chay pwòblenm. (Éklé. 8:9) Kon Tèmwen Jéhova, nou konpwann wézon-an Jéhova p’òkò tiwé sé pwòblenm-lan ki asou latè-a. Èk wézon-an sé sa; si Jéhova tiwé tout sé pwòblenm-lan atjwèlman, moun kay kwè sé gouvèdman lézòm ki éwisi wanjé tout pwòblenm asou latè-a. Vwéman, si Jéhova fè sa, sé moun sala kay kwè, lézòm sa kondwi kò yo san èd li.

6. Ès Jéhova ka toujou wéponn menm kalité lapwiyè-a menm mannyè-a? Pouki ou ka di sa?

⁶ Jéhova pé wéponn menm kalité lapwiyè-a an diféwan mannyè. Pou ègzanp, lè Wa Hèzèkaya té byen malad, i sipliyé Jéhova pou djéwi’y. Jéhova kouté lapwiyè Wa Hèzèkaya èk i djéwi’y. (2 Wa 20:1-6) Mé lè zapòt Pòl sipliyé Bondyé pou tiwé on bagay ki té ka “pitjé lachè’y”, pitèt on pwòblenm santé, Jéhova pa té djéwi’y. (2 Kòr. 12:7-9) Annou konsidiwé on lòt ègzanp konsèné dé (2) zapòt Jézi, Jémz èk Pita. Sitiwasyon yo té gwav toubonnman. Ou wè, Wa Hèròd té vlé tjwé yo toulédé-a. Pou wézon sala kongwigasyon-an té ka pwédyé pou Pita èk san dout yo té ka pwédyé pou Jémz osi. Mé malèwèzman, Wa Hèròd té tjwé Jémz, mé yon nanj té sové Pita. (Twav. 12:1-11) Alò, nou pé katjilé, ‘Pou ki sa Jéhova té sové Pita, mé i pa té sové Jémz?’ Bib-la pa té di nou wézon-an.c Mé nou asiwé Jéhova ka toujou fè sa ki dwèt. (Sam 33:5, Dito. 32.4) Èk ni Pita ni Jémz té ni favè’y. (Wév. 21:14) Délè, Jéhova pa ka wéponn lapwiyè nou mannyè-a nou té kay vlé. Mé paski nou asiwé Jéhova ka toujou fè sa ki jis èk dwèt, èk i ka toujou wéponn lapwiyè nou adan on mannyè ki ka moutwé lanmityé, nou pa kay bougonnen konsèné mannyè i wéponn lapwiyè nou.​—Jòb 33:13.

7. Kisa nou pa vlé fè èk pouki?

⁷ Nou pa vlé konpawé sitiwasyon nou épi sitiwasyon lézòt moun. Pouki? Sé paski mi sé sa ki pé wivé nou. Nou pé mandé Jéhova pou édé nou épi on sèten bagay èk nou pa jwenn sa nou té ka pwédyé pou. Èk pli ta, nou apwann on lòt moun té ka pwédyé pou menm bagay sala. Èk i pé sanm, Jéhova wéponn lapwiyè’y. Èk sa pé dékouwajé nou an pil. Èk sé sa menm ki té wivé on sè, non’y sé Anna. Bagay-la sé, mawi’y, Matthew, té ni kansè. Konsa, i pwédyé pou mawi’y vini byen. An menm di tan, la té ni dé (2) sésé ki té pli gwan pasé mawi’y ki té malad épi kansè osi. Anna té ka pwédyé an chay pou ni mawi’y ni sé dé (2) sésé sala. Ou sav sé dé (2) sésé-a vini byen, mé mawi’y Matthew mò!? An koumansman-an, Anna té ka mandé kò’y, ‘Si i sété Jéhova ki té djéwi sé dé (2) sésé sala, pouki i pa té wéponn lapwiyè mwen pou djéwi mawi mwen?’ Èben bagay-la sé sa, nou pa sav pouki sé dé (2) sésé-a té vini byen. Kanmenm, nou sav touswit Jéhova kay tiwé tout soufwans nou nèt. Èk nou sav osi, i ni dézi-a pou wésisité tout jan’y ki ja mò.​—Jòb 14:15.

8. (a) Silon Izaya 43:2, ki mannyè Jéhova ka sipòté nou? (b) Ki mannyè lapwiyè ka édé nou lè nou ka èspéyansé difikilté? (Gadé vidéyo-a Lapwiyè Sa Édé Nou Lè Bagay Mové.)

⁸ Jéhova kay toujou sipòté nou. I sé Papa nou, èk i enmen nou, èk i pa vlé nou soufè. (Izay. 63:9) Mé sa pa vlé di i kay tiwé tout pwòblenm nou, ki Bib-la ka dékwi kon on lawivyè èben flanm difé. Mé kanmenm, Jéhova pwonmèt pou édé nou lè nou ka èspéyansé népòt difikilté. (Li Izaya 43:2.) Wi, Jéhova kay édé nou, épi i kay toujou fè’y posib pou nou tjenn wilasyon nou épi’y fò. Anplis di sa, Jéhova ka ban nou lisentèspwi’y pou édé nou tjébé fò. (Louk 11:13; Filip. 4:13) Konsa, nou sa ni konfyans-lan, Jéhova kay toujou ban nou sa nou bizwen pou andiwé èk wèsté fidèl.d

LÈ NOU PWÉDYÉ, KISA JÉHOVA VLÉ NOU FÈ?

9. Silon Jémz 1:6-8, pouki nou pa sipozé ni dé lidé?

⁹ Jéhova vlé nou mété konfyans nou an li. (Hib. 11:6) Mé délè, nou pé santi pwòblenm nou twòp difisil pou nou aji épi. Épi a kòz di sa, nou pé an dé (2) lidé, ka katjilé, ‘Ès Jéhova kay vwéman édé mwen?’ Mé Bib-la ka ban nou asiwans-lan ki, épi pouvwa Bondyé, nou sa tjenbé fò anba népòt difikilté. (Sam 18:29) Konsa, pito nou ni dé (2) lidé, sé pou nou pwédyé épi an chay lafwa. Èk sé pou nou ni konfyans-lan ki, Jéhova kay wéponn lapwiyè nou.​—Li Jémz 1:6-8.

10. Ba yon ègzanp ki ka moutwé mannyè nou ni pou twavay a ling épi lapwiyè nou.

¹⁰ Jéhova vlé nou twavay a ling épi lapwiyè nou. Pou ègzanp, ann di on fwè vlé atandé konvasyon-an. Konsa, i mandé Jéhova pou édé’y jwenn yonndé jou pou’y sa alé konvansyon. Ki mannyè Jéhova pé wéponn lapwiyè sala? Jéhova pé bay fwè-a, kouwaj-la i bizwen-an, pou apwoché mèt twavay-la. Mé fwè sala ni pou twavay a ling épi lapwiyè’y. I ni pou fè éfò-a pou apwoché mèt twavay-la pou mandé’y pou sé jou-a pou alé konvansyon-an. Èk pitèt sé pa sèlman yon fwa i pé ni pou fè sa. I pé ni pou fè sa plizyè fwa. I pé jis mandé pou chanjé sé jou-a i ka twavay-la épi on lòt twavayè pou’y sa atandé konvasyon. Èk si i nésésè, i pé mandé pou yo pa péyé’y pou sé jou-a i ka alé konvansyon-an.

11. Pouki nou ni pou kontiné pwédyé konsèné bagay ki asou lidé nou?

¹¹ Jéhova vlé nou kontiné pwédyé konsèné sé bagay-la ki enpòtan pou nou. (1 Tèsa. 5:17) An pawòl Jézi, nou ka wè, nou pa kay wisouvwè adan sa nou mandé Bondyé an lapwiyè la menm. (Louk 11:9) Mé nou pa ni pou dékonpòté! Nou ni pou kontiné pwédyé. (Louk 18:1-7) Lè nou kontiné pwédyé konsèné bagay ki asou lidé nou, nou ka moutwé Jéhova, bagay sala enpòtan pou nou. Èk osi, nou ka moutwé nou asiwé i kay édé nou.

POUKI NOU PÉ NI POU PWÉDYÉ POU ON LÒT BAGAY?

12. (a) Ki kèstyon nou ni pou mandé kò nou lè nou pa wisivwè sa nou ka pwédyé pou? Èk pouki? (b) Ki mannyè nou sa moutwé nou ni wèspé pou Jéhova lè nou ka pwédyé? (Gadé enfòmasyon-an anba sijé-a: “Ès Lapwiyè Mwen Ka Moutwé Mwen Ni Wèspé Pou Jéhova?”)

¹² Délè, lè nou pa wisouvwè sa nou ka pwédyé pou, nou pé ni pou mandé kò nou sé twa kèstyon sala. Pwèmyé kèstyon-an sé: ‘Ès sa mwen mandé Bondyé pou vwéman pli mèyè bagay-la pou mwen mandé pou?’ Nou ni pou mandé kò nou kwèsyon sala paski nou pé kwè nou konnèt sa ki pli mèyè pou nou. Mé délè, sa nou vlé pa kay bon pou nou an tan pou vini. Pou ègzanp, nou pé ni on pwòblenm èk nou kwè nou konnèt mannyè-a pou wanjé pwòblenm sala. Konsa, nou ka mandé Jéhova pou wanjé pwòblenm sala mannyè-a nou vlé. Mé pitèt la ni on pli mèyè mannyè pou wanjé pwòblenm sala. Konsa, Jéhova pé pa wéponn lapwiyè nou an mannyè-a nou vlé. Anplis di sa, adan sa nou pé mandé Jéhova pou pé pa a ling épi divwa’y. (1 Jan 5:14) Bon. Annou konsidiwé ègzanp sala. An pasay yonn (1) nou wè, pawan ki Tèmwen Jéhova ka mandé Jéhova pou édé ich yo wèsté an lavéwité-a. Magwé i pa mové pou fè on lapwiyè kon sa, nou ni pou chonjé, Jéhova pa ka fòsé pyèsonn pou sèvi’y. I vlé chak moun, jis ich nou, pou fè disizyon-an pou sèvi’y. (Dito. 10:12, 13; 30:19, 20) Konsa, pito pawan mandé Jéhova pou édé ich yo wèsté an lavéwité-a, yo té sa mandé Jéhova pou édé yo enstwi ich yo adan an mannyè ki kay touché tjè yo, èk pousé yo pou enmen Jéhova ofon tjè yo. ​—Pwov. 22:6; Èfés. 6:4.

13. Silon 1 Pita 5:6, 7, kilè Jéhova kay édé nou?

¹³ Dézyenm kwèstyon-an nou pé mandé sé: ‘Ès i sé lè Jéhova pou wéponn lapwiyè mwen?’ Délè, nou vlé Jéhova wéponn lapwiyè nou touswit apwé nou pwédyé. Mé sé pou nou toujou chonjé, Jéhova konnèt lè-a ki pli bon pou ban nou èd. (Li 1 Pita 5:6, 7.) Èk si Jéhova pa wéponn lapwiyè nou touswit apwé nou pwédyé, sé pa pou nou kwè wépons li pou lapwiyè nou sé “non”. Mé vwéman, wépons li pitèt sé “talè”. Pa ègzanp, annou katjilé asou jenn fwè-a an pasay yonn (1) ki té ka mandé Jéhova pou djéwi’y. Si Jéhova té fè an miwak pou djéwi’y, Satan té sa di sèl wézon-an fwè-a té ka sèvi Jéhova sé paski i djéwi’y. (Jòb 1:9-11; 2:4) Èk an plis di sa, Jéhova ni an lè ki fiksé pou tiwé tout maladi. (Izay. 33:24; Wév. 21:3, 4) Konsa, jistan jou sala wivé nou pa sa èspéyé Jéhova pou fè miwak pou djéwi nou. Alò, pito fwè-a mandé Jéhova pou djéwi’y, i té sa mandé Jéhova pou ba’y lapé an lidé’y èk fòs-la pou tjenbé fò anba maladi-a èk pou kontiné wèsté fidèl pou li.​—Sam 29:11.

14. Kisa èspéyans Janice ka enstwi’w?

¹⁴ Annou konsidiwé èspéyans Janice. I té ni dézi-a pou wann sèvis an Bèfèl. Konsa i kontiné pwédyé konsèné dézi’y pou plizyè lanné. Apwé senk lanné, Janice té vin konpwann ki, Jéhova té wéponn lapwiyè’y adan an mannyè i pa té ka èspéyé. Mi sa Janice di: “Jéhova té ka sèvi tout sé lanné sala pou enstwi mwen an chay bagay èk édé mwen vini an pli mèyè Kwityen. Mwen té bizwen fòtifyé konfyans mwen an li. Mwen té bizwen apwann mannyè pou étidyé Bib-la pli mèyè. Èk mwen té osi bizwen apwann mannyè mwen sa ni djèwté an népòt sitiwasyon.” Déotwa lanné apwé, mawi Janice wisivwè an envitasyon pou wann sèvis kon Ansyen-an pou sékyout-la. Èk lè Janice katjilé asou sé lanné-a ki pasé, i di: “Jéhova té wéponn lapwiyè mwen adan an mannyè mwen pa té janmen èspéyé. I té pwan mwen an chay tan pou konpwann mannyè-a Jéhova té wéponn lapwiyè mwen sété an bèl kado. Pa dé kontan mwen kontan paski mwen té ni òpòtyounité-a pou èspéyansé bonté Jéhova èk lanmityé’y.”

15. Pouki nou pa sipozé tjenn lidé nou asou yon sèl bagay lè nou ka pwédyé? (Gadé sé pòtwé-a osi.)

¹⁵ Twazyenm kwèsyon-an nou pé mandé sé sa: ‘Ès mwen sipozé pwédyé pou an lòt bagay?’ Wi, nou sav i bon pou di Jéhova ègzaktiman sa nou vlé lè nou ka pwédyé. Mé sé pa tout tan nou ni pou pwédyé kon sa. Délè, nou osi ni pou pwédyé pou lòt bagay. Lè nou fè sa, sa kay édé nou wè mannyè Jéhova vlé sèvi nou an sèvis li. Annou konsidiwé an ègzanp. An pasay yonn (1) nou té mansyonnen an sè ki té ka pwédyé konsèné dézi’y pou atandé Lékòl pou Pwoklanmatè Wéyòm-lan. Sè-a té vlé atandé lékòl-la paski i té vlé wann sèvis adan an kongwigasyon ki té bizwen pli pwoklanmatè. Paditan sè-a té ka pwédyé pou atandé lékòl-la, i té sa osi mandé Jéhova pou édé’y wè lòt mannyè i té sa fè pli an minis li. (Twav. 16:9, 10) Anplis di sa, sè-a té sa fè éfò pou twavay an ling épi lapwiyè sala. I té sa mandé Ansyen-an pou sékyout li, si la ni pyès kongwigasyon ki bizwen pli piyonnè. Èben an lòt bagay sè-a té sa fè, sé pou mandé òfis bwanch-la ki koté ki bizwen pli pwoklanmatè.e

16. Ki asiwans nou sa ni?

¹⁶ Kon nou ja apwann an atik sala, nou sa ni asiwans-lan ki, Jéhova kay wéponn lapwiyè nou. Èk lè i ka wéponn nou, i kay toujou fè’y adan an mannyè ki ka moutwé lanmityé èk i kay toujou fè sa ki dwèt. (Sam 4:3; Izay. 30:18) Mé délè, nou pa kay wisivwè wépons-lan nou ka èspéyé. Kanmenm, sa pa vlé di Jéhova ka inyowé lapwiyè nou. Jéhova vwéman enmen nou èk i pa kay janmen tounen do’y asou nou. (Sam 9:10) Konsa, sé pou “nou toujou mété konfyans nou an li” èk sé pou nou kontiné “ouvè tjè nou ba li” an lapwiyè.​—Sam 62:8.