Jéhova Kay Gadé Nou Kon Moun Ki Dwèt Si Nou Ni Lafwa Èk Nou Fè Bon Bagay

1. Lè nou katjilé asou lafwa Abrahanm, ki kwèsyon nou pitèt kay mandé?

MAGWÉ plizyè moun ja tann konsèné Abrahanm, majòwité di yo pa konnèt djè konsèné’y. Kanmenm, ou konnèt on chay bagay konsèné Abrahanm. Pou ègzanp, ou konnèt Bib-la di, “Abrahanm sé papa tout sa ki ka kwè an Bondyé”. (Ronm 4:11) Mé, pitèt ou ka katjilé: ‘Ès mwen sa ni lafwa ki fò an Bondyé menm kon Abrahanm?’ Èben wépons-lan sé, absoliman! Ou sa ni lafwa ki fò menm kon Abrahanm.

2. Pouki i bon pou étidyé konsèné ègzanp Abrahanm? (Jémz 2:​22, 23)

² Lè nou étidyé konsèné ègzanp Abrahanm nou sa dévlopé lafwa menm kon li. Abrahanm té ka toujou fè sa Bondyé di’y pou fè. Pou ègzanp, i kité péyi’y èk alé adan on lòt péyi ki té lwen, i wèsté an tant pou plizyè lanné, èk i té pawé pou ofè gason’y Ayzak kon on sakwifis magwé i té enmen’y on chay. Wi, Abrahanm fè sé bagay sala paski i té ni lafwa ki té fò an Jéhova. Èk paski i té ni lafwa an Bondyé èk i té ka fè bon bagay, i fè tjè Jéhova kontan èk i vini kanmawad li. (Li Jémz 2:​22, 23.) Wi, Jéhova vlé nou tout, ou osi, pou plè’y èk pou vini kanmawad li. Èk sé pou wézon sala i sèvi zapòt Pòl épi Jémz pou ékwi konsèné Abrahanm. Konsa, nou kay diskité kisa Ronm chapit 4 èk Jémz chapit 2 ka di konsèné Abrahanm. Anfen, ni zapòt Pòl ni Jémz di kéchòy ki byen enpòtan konsèné Abrahanm.

3. Ki lévanjil ni zapòt Pòl ni Jémz sèvi?

³ Ni zapòt Pòl ni Jémz sèvi lévanjil-la an Jennésis 15:6. Lévanjil sala di: ‘Abrahanm mété lafwaʼy an Jéhova, èk sé pou sa Bondyé aksèptéʼy kon on moun ki dwèt.’ Wi, Jéhova ka kwiyé on moun dwèt ében san fòt, lè’y plè épi sa moun-lan ka fè. Vwéman sa sé on bagay ki èstòdinè! Ès sa pa ka touché tjè’w? Jéhova ka kwiyé on moun ki pa pawfé on moun ki dwèt! Kanmenm, nou asiwé ou vlé Jéhova kwiyé’w on moun ki dwèt, ében san fòt, èk i posib pou’y fè sa. Alò apwézan, nou kay apwann poutji Jéhova té di Abrahanm sété on moun ki dwèt, èk kisa nou ni pou fè pou Jéhova kwiyé nou moun ki dwèt osi.

NOU BIZWEN LAFWA POU BONDYÉ SA GADÉ NOU KON MOUN KI DWÈT

4. Kisa ki ka anpéché nou vini moun ki dwèt?

⁴ Lè zapòt Pòl té ékwi kongwigasyon-an an Ronm, i di “tout moun ja péché”. (Ronm 3:23) Mé an moun pé mandé, si nou sé péchè ki mannyè Bondyé sa plè épi nou èk kwiyé nou moun ki dwèt? Ében pou édé Kwityen konpwann mannyè sa posib, zapòt Pòl sèvi ègzanp Abrahanm.

5. Pouki Jéhova té kwiyé Abrahanm an moun ki ka viv dwèt? (Ronm 4:​2-4)

⁵ Padan Abrahanm té ka viv an péyi Kénann, Jéhova té kwiyé’y an moun ki ka viv dwèt. Ès ou kwè Bondyé di sa paski Abrahanm té ka obéyi tout bagay an lwa-a i bay Moziz? Mé non. Poutji nou di sa? (Ronm 4:13) Ében, sa sé paski lè Jéhova kwiyé Abrahanm an nonm ki dwèt, lwa sala pa té la pyès. Anfen, Jéhova té bay jan Izwayèl lwa sala plis pasé kat san (400) lanné pli ta. Mé pouki Jéhova kwiyé Abrahanm an moun ki ka viv dwèt? Ében sa sé paski Abrahanm té ni lafwa an Jéhova. Wi, pou lapéti lafwa Abrahanm, Bondyé moutwé’y lagwas, èk i gadé’y kon an moun ki dwèt.—Li Ronm 4:​2-4.

6. Ki mannyè Jéhova sa aksèpté péchè kon moun ki dwèt?

⁶ Zapòt Pòl di lè an moun ni lafwa an Bondyé, “sé lafwa moun sala Bondyé ka konsidiwé lè i ka météʼy dwèt épiʼy”. (Ronm 4:5) Zapòt Pòl osi di: “Wa David té di menm bagay-la koté i palé konsèné mannyè nonm-lan Bondyé ja aksèpté kon an moun ki dwèt épiʼy-la kontan an chay, magwé nonm sala pa té fè anyen pou Bondyé té antwé an favèʼy. . . . Sé moun-an Bondyé ja pawdonnen pou tout sé mové bagay-la yo ka fè-a épi i ja tiwé péché yo-a, kontan an chay. Wi, nonm-lan Bondyé pa ka matjé péchéʼy-la kontan an chay.” (Ronm 4:​6-8; Sam 32:​1, 2) Alò, zapòt Pòl fè sé Kwityen-an an Ronm apwésyé mannyè Bondyé ka pawdonnen, ében kouvè péché moun ki ka mété lafwa yo an li, menm si yo sé péchè. Anfen, Jéhova ka gadè sé moun sala kon moun ki dwèt, ében kon moun ki san fòt paski yo ni lafwa an li.

7. Pouki nou sa di sèvant Bondyé an tan pasé sété moun ki té dwèt?

⁷ Magwé moun tèl kon Abrahanm, David, èk lòt sèvant Bondyé té péchè, Jéhova aksèpté yo kon moun ki té dwèt. Èk sa sé paski yo té ni lafwa an Bondyé. Wi, Jéhova té gadé sèvant li an tan pasé kon moun ki san fòt, èspwèsman lè nou konpawé yo épi moun ki pa té ni lafwa an Bondyé. (Èfés. 2:12) Èk an lèt-la zapòt Pòl té ékwi sé fwè èk sè-a an Ronm, i èspliké ki, nou pa sa vini jan Bondyé si nou pa ni lafwa. Alò Abrahanm èk David té jan Bondyé paski yo té ni lafwa an li. Anfen, nou osi sa vini jan Bondyé si nou ni lafwa an li.

KI WILASYON LA NI ANT LAFWA ÈK BON TWAVAY?

8-9. Ki malkonpwann adan moun ni konsèné sa zapòt Pòl èk Jémz té ékwi, èk pouki?

⁸ Pou plizyè san lanné, mèt wilizyon ka chikannen konsèné wilasyon-an ant lafwa èk bon twavay. Adan mèt wilizyon ka di, sèl sa ou ni pou fè pou sové sé pou kwè an Jézi. Pitèt ou ja tann yo di: “Kwè an Jézi èk ou kay sové.” Adan di yo ka jis di zapòt Pòl enstwi sa, paski i té di: “Nonm sala pa té fè anyen pou Bondyé . . . antwé an favèʼy.” (Ronm 4:6) Kanmenm lézòt mèt wilizyon ka di, ou sa sové si’w fè bon bagay èk si’w vizité plas légliz-la ka konsidiwé sen. Délè pou fè pwen yo, yo ka sèvi Jémz 2:24 ki di: “Sé pa sèlman lè an moun ni lafwa an Bondyé, Bondyé ka aksèptéʼy, mé sé lè i ka fè bon bagay èk lafwa-a i ni-an.”

⁹ I a klè, sé mèt wilizyon-an pa ka dakò. Adan mèt wilizyon ka di Pòl té kwè ki, on moun té sèlman bouzwen lafwa pou Bondyé aksèpté’y, mé lòt mèt wilizyon ka di Jémz té ka kwè ki, on moun té ni pou fè bon twavay pou Bondyé aksèpté’y. Alò paski sé mèt wilizyon-an ka kwè diféwan bagay, adan moun ki ka fè wichach asou Bib-la ka kwè, Pòl èk Jémz pa té dakò asou sa on moun ni pou fè pou Bondyé aksèpté’y. Anfen, on nonm ki ka enstwi moun konsèné Bib-la di, “Jémz pa té konpwann pouki Pòl té di, an moun sèlman bizwen lafwa pou Bondyé aksèpté’y kon on moun ki san fòt, èk Jémz pa té dakò épi sa Pòl té di.” Mé chonjé, sé Jéhova ki té annékòz ni Pòl ni Jémz pou ékwi sa yo té ékwi-a. (2 Tim. 3:16) Konsa, la oblijé ni on mannyè ki senp pou konpwann sa Pòl èk Jémz té di. Alò si nou konsidiwé lòt bagay yo té di an sé lèt yo-a, nou kay sa konpwann pli mèyè sa yo té di.

10. Lè zapòt Pòl té di i pa té nésésè pou Kwityen “swiv lwa-a” ében fè twavay lwa-a, ki “lwa” i té ka palé konsèné? (Ronm 3:​21, 28) (Gadé pòtwé-a osi.)

¹⁰ An Ronm 3 èk 4 zapòt Pòl ékwi ki, Kwityen pa té ni pou ‘swiv ében fè twavay lwa-a’. Mé, ki “lwa” i té ka palé konsèné? Ében, i té ka palé konsèné Lwa Moziz-la sé jan Izwayèl-la té ni pou swiv. (Li Ronm 3:​21, 28.) I ka sanm an tan Pòl, adan Jwif ki té Kwityen té kwè yo té ni pou swiv Lwa Moziz-la. Konsa, zapòt Pòl sèvi ègzanp Abrahanm pou bay pwèv ki, on moun pa ni pou swiv ében fè twavay Lwa Moziz-la pou’y sa plè Bondyé. Pito sa, zapòt Pòl èspliké ki, nou bouzwen lafwa pou nou sa plè Jéhova. Wi, sa ka vwéman ankouwajé nou, paski sa ka enstwi nou ki, si nou ni lafwa an Bondyé èk Jézi, nou kay plè Bondyé.

11. Lè Jémz té palé konsèné “fè bon bagay” an Jémz chapit 2, kisa i té ka palé konsèné?

¹¹ Kanmenm, lè Jémz té palé konsèné “fè bon bagay” an Jémz chapit 2, i pa té ka palé konsèné Lwa Moziz-la. I té ka palé konsèné sé bagay-la an Kwityen ka fè an lavi’y toulé jou. Sé bagay sala ka moutwé si on Kwityen ni lafwa an Bondyé opa. Bon, apwézan annou konsidiwé dé (2) ègzanp Jémz té sèvi.

12. Ki mannyè Jémz moutwé wilasyon-an ant lafwa èk bon twavay? (Gadé pòtwé-a osi.)

¹² An pwèmyé ègzanp-lan Jémz ékwi mannyè i enpòtan pou Kwityen pa moutwé pwéféwans lè yo ka aji épi moun. Èk i té bay an bèl ilistwasyon pou pézé asou pwen sala. I ékwi konsèné an nonm ki té twété yon moun wich byen, mé i pa twété an moun ki té pòv byen. Jémz di nonm sala kay di i ni lafwa, mé aksyon’y pa ka moutwé i ni lafwa. (Jémz 2:​1-5, 9) Èvèk an dézyenm ègzanp-lan, Jémz palé konsèné an moun ki wè ‘an fwè ében an sè ki bizwen had pouʼy mété anlèʼy, èk osi, i pa ni asé pouʼy manjé’, mé moun-lan pa fè anyen pou édé’y. Alò menm si moun sala di i ni lafwa, aksyon’y pa ka moutwé i ni lafwa. Anfen Jémz di “si an moun pa ka fè anyen pou moutwé i kwè an Bondyé, lafwa-a i ni-an mò.”—Jémz 2:​14-17.

13. Ki ègzanp Jémz sèvi pou moutwé nou bouzwen ni lafwa èk bon twavay? (Jémz 2:​25, 26)

¹³ Jémz mansyonnen Rahab kon an bèl ègzanp paski Rahab moutwé i té ni lafwa pa bon twavay li. (Li Jémz 2:​25, 26.) Wi, Rahab té tann konsèné Jéhova èk i wéyalizé Jéhova té ka sipòté jan Izwayèl. (Jòch. 2:​9-11) Mé, an ki mannyè Rahab moutwé i té ni lafwa? Ében, i moutwé lafwa’y pa sa i fè. Pou ègzanp, lè sé dé (2) jan Izwayèl-la té alé an sigwé pou gadé tè pwonmèt-la, i pwotéjé yo lè lavi yo té an danjé. Wézilta di sa, menm kon Abrahanm, magwé Rahab pa té pawfé èk i pa té anba Lwa Moziz-la, Bondyé kwiyé’y an moun ki dwèt. Alò, ègzanp Rahab ka moutwé a klè, nou bouzwen moutwé lafwa nou pa bon twavay nou.

14. Poutji nou sa di la pa ni pyès dézagwéman ant sa zapòt Pòl èk Jémz ékwi?

¹⁴ La pa ni pyès dézagwéman ant sa zapòt Pòl èk Jémz ékwi. Poutji nou sa di sa? Ében, sa sé paski, zapòt Pòl èk Jémz té ka èspliké lafwa èk bon twavay an dé (2) diféwan mannyè. Pòl té ka di sé Kwityen-an ki té Jwif, i pa té posib pou yo plè Bondyé menm si yo twavay wèd pou swiv Lwa Moziz-la. Èk Jémz té ka di, tout Kwityen ni pou fè bon twavay bay lézòt, paski sa kay moutwé yo vwéman ni lafwa.

15. Ki diféwan bagay nou sa fè pou moutwé nou ni lafwa an Bondyé? (Gadé sé pòtwé-a osi.)

¹⁵ Jéhova pa té di, nou ni pou fè ègzaktiman sa Abrahanm té fè pou nou sa moutwé nou vini moun ki dwèt. Pou ègzanp, Abrahanm moutwé i té ni lafwa an Bondyé lè’y té alé wèsté adan an péyi ki té lwen, lè’y té wèsté an tant, èk lè’y té pawé pou ofè gason’y Ayzak kon on sakwifis. Mé, la ni plizyè mannyè nou sa fè bon bagay èk moutwé nou ni lafwa an Bondyé. Pou ègzanp, lè moun nèf vini an kongwigasyon nou, nou sa byen vini yo, nou sa édé fwè épi sè ki bouzwen èd, èk nou sa fè bon bagay bay fanmi nou tou. Alò, lè nou fè sé bon bagay sala, Jéhova kay plè épi nou èk i kay benni nou. (Ronm 15:7; 1 Tim. 5:​4, 8; 1 Jan 3:18) An plis di sa, yonn an sé pli mèyè mannyè-a nou sa moutwé nou ni lafwa, sé lè nou patajé bon nouvèl-la épi moun. (1 Tim. 4:16) Wi, lè nou fè bon bagay, nou ka moutwé nou ni lafwa ki, Jéhova kay fè tout sa’y pwonmèt, èk nou ka osi moutwé, la pa ni pyès lòt wèg ki bon kon wèg Jéhova. Èvèk, nou sa ni asiwans-lan ki, Jéhova kay gadé nou kon moun ki dwèt, èk i kay kwiyé nou jan’y.

LÈ NOU FIKSÉ ASOU ÈSPWA NOU SA KA FÒTIFYÉ LAFWA NOU

16. Adan kisa Abrahanm té ni èspwa èk lafwa?

¹⁶ An Ronm chapit 4 nou sa apwann on lòt lison hòd Abrahanm ki byen enpòtan. An chapit sala, nou apwann ki, nou ni pou wèsté fiksé asou èspwa-a nou ni-an. Jéhova té pwonmèt i té kay sèvi Abrahanm pou benni “an chay nasyon”. Konsa, katjilé asou sé bèl pwonmèt-la Abrahanm té ni èspwa pou wisouvwè-a. (Jen. 12:3; 15:5; 17:4; Ronm 4:17) Mé kanmenm, lè Abrahanm té yon san (100) lanné èk Sara té katwiven dis (90) lanné yo p’òkò té ni an gason toujou. Pitèt pou lézòm i té ka sanm enposib pou Abrahanm èk Sara ni on gason. Wi, sa sété vwéman on tès pou Abrahanm. Mé, kon lévanjil-la di, “koté lézòm té kay pèd tout èspwa yo, Abrahanm kontiné ni èspwa an Bondyé, épi sé kon sa i vini papa plizyè nasyon”. (Ronm 4:​18, 19) Wi, Abrahanm té ni èspwa an Bondyé, èk i té asiwé Jéhova té kay tjenn pwonmèt li. Épi Jéhova vwéman tjenn pwonmèt li. Abrahanm vini papa Ayzak, gason-an i té ni èspwa pou wisivwè-a.—Ronm 4:​20-22.

17. Ki mannyè nou sav nou sa vini jan Bondyé èk i sa gadé nou kon moun ki dwèt?

¹⁷ An atik sala nou wè nou sa plè Bondé èk i sa gadé nou kon moun ki dwèt. Konsa, menm kon Abrahanm nou sa vini jan Bondyé. Anfen an Ronm 4:​23, 24 zapòt Pòl té pézé asou pwen sala, i di: “Tjò lévanjil-la ki di Bondyé gadé [Abrahanm] kon an moun ki dwèt épiʼy-la pa té matjé pou lapéti Abrahanm tousèl, mé sé pawòl sala ka palé ban nou osi, nou Bondyé kay aksèpté kon moun ki dwèt épiʼy-la paski nou kwè an Bondyé-a ki wésisité Jézi Senyè nou.” Wi, menm kon Abrahanm i enpòtan pou nou ni lafwa an Jéhova, fè bon twavay, èk ni konfyans ki, sa Jéhova ja pwonmèt kay fèt vwé. Anfen an chapit 5 an liv Ronm, zapòt Pòl kontiné pou palé konsèné èspwa nou. Konsa, an lòt atik-la nou kay diskité sa.