Abrahanm Té Ni Lafwa Ki Fò

Abrahanm té moutwé gason’y Ayzak mannyè pou enmen Jéhova. Abrahanm té osi moutwé’y mannyè pou ni konfyans an tout pwonmèt Jéhova fè. Mé lè Ayzak té apochan vennsenk «25» an, Jéhova té mandé Abrahanm fè an bagay ki té kay byen wèd pou’y fè. Ki sa Jéhova té vlé’y fè?

Bondyé té di Abrahanm: ‘Souplé, pwan sèl gason-an ou ni-an, èk alé asou yon montany an péyi Moraya. Lè’w wivé la, ofè gason’w kon an sakwifis.’ Abrahanm dwé té katjilé: ‘Yon sèl gason mwen ni, pouki Jéhova ka di mwen pou tjwé’y?’ Magwé Abrahanm pa té sav pouki Jéhova té vlé’y fè sa, Abrahanm obéyi’y kanmenm.

Byen bonnè li bonmaten, Abrahanm pwan Ayzak èvèk dé «2» sèvant li èk yo pati alé Moraya. Apwé yo maché pou twa «3» jou, yo té sa wè sé montany-lan adan an distans. Abrahanm mandé sé sèvant-lan pou èspéwé’y, padan li menm èk Ayzak alé ofè sakwifis-la. Abrahanm bay Ayzak chayé bwa-a yo té kay bizwen pou fè difé-a, èk Abrahanm menm té tjenbé on kouto. An lè, Ayzak mandé papa’y: ‘Papa, koté zannimo-a pou nou fè sakwifis-la?’ Abrahanm wéponn: ‘Ich mwen, Jéhova kay potjiwé’y.’

Finalman, lè yo wivé asou montany-lan, yo fè an lotèl. Apwé, Abrahanm mawé dé «2» lanmen èk dé «2» pyé Ayzak, épi i mété Ayzak asou lotèl-la.

Kon Abrahanm pwan kouto-a nanj Jéhova kwiyé’y èk i di’y: ‘Abrahanm! Pa tjwé tibway-la. Apwézan mwen sav ou ni lafwa an Bondyé paski ou té pawé pou bay sèl gason’w-lan kon yon sakwifis.’ Apwé, Abrahanm gadé èk i wè an bélyé. Kòn bélyé-a té pwi adan an touf bwa. La menm, Abrahanm démawé Ayzak èk i ofè mouton-an kon on sakwifis pito.

Dépi jou sala, Jéhova té ka kwiyé Abrahanm, jan’y. Ès ou sav pouki? Ében, sété paski Abrahanm té fè népòt sa Jéhova té vlé’y fè. I fè’y menm si i pa té konpwann pouki Jéhova té mandé’y fè’y.

Pli ta, Jéhova wépété pwonmèt-la i té fè Abrahanm. I di’y: ‘Mwen kay benni’w èk mwen kay fè’w ni an chay ich èk an chay désandan.’ Sa vlé di, Jéhova té kay sèvi yon désandan Abrahanm pou benni tout bon moun.