LISON 8
Abrahanm Épi Sara Té Obéyi Bondyé
Pa twò lwen vil Bébèl sété an lòt vil yo té ka kwiyé Ur. Sé moun-nan an vil sala té ka adowé an chay dyé, mé yo pa té ka adowé Jéhova. Kanmenm, la té ni yon nonm an vil Ur ki té ka adowé Jéhova sèlman. Non’y sété Abrahanm.
Jéhova té di Abrahanm: ‘Kité vil ou èk fanmi’w, èk alé an plas-la mwen kay moutwé’w.’ Mi sa Bondyé pwonmèt li apwé: ‘Ou kay vini an gwo nasyon èk pou lapéti’w, mwen kay fè bon bagay pou an chay moun an tout latè-a.’
Abrahanm pa té sav koté Jéhova té ka voyé’y, mé i té ni konfyans an Jéhova. Kon sa, Abrahanm, madanm li Sara, papa’y Tira, èk nivé’y Lòt, anmasé tout bagay yo èk yo koumansé gwo voyay-la.
Abrahanm té ni swasant kenz «75» lanné lè li èk fanmi’y wivé plas-la koté Jéhova té voyé yo. Non plas sala sété Kénnan. Lè yo wivé la, Bondyé di Abrahanm: ‘Mwen kay bay ich ou tout tè sala ou ka wè oliwon’w-lan.’ Bon Abrahanm èk Sara té ja vyé èk yo pa té ni pyès ich. Alò, ki sa Jéhova té kay fè pou tjenn pwonmèt sala i té fè Abrahanm?
“Sété paski Abrahanm té ni lafwa . . . ki fè i té obéyi . . . èk alé adan an lòt péyi Bondyé té pwonmèt pou ba li. I kité péyiʼy san i té sav koté i ka alé.”—Hibrou 11:8