Alafen Yo Fè An Gason!

Abrahanm èk Sara té ja mayé pou tibwen lanné. Yo té ka viv byen konfòtab an kay yo an vil Ur. Mé yo kité vil-la pou ay wété anba tant. Wannman, Sara pa té bougonnen paski i té ni konfyans an Jéhova.

Pa dé vlé Sara té vlé ich. Kon sa i di Abrahanm: ‘Si Héga, sèvant mwen-an fè on ich, ich sala té kay kon ich mwen menm.’ Apwé an tan, Héga fè an ti gason. Non gason sala sété Ichmayèl.

Plizyè lanné apwé, twa «3» moun vin vizité yo. Tan sala, Abrahanm té katwiven diznèf «99» lanné èk Sara té katwiven nèf «89» lanné. Abrahanm envité sé moun-nan pou vin pozé anba an pyé bwa èk pwan an ti wipa épi’y. Ès ou sav ki moun ki té vin vizité yo? Sé moun sala sété nanj! Yo di Abrahanm: ‘Lè sala lanné pwochen, ou èk madanm ou kay ni an gason.’ Bon Sara té ka kouté pa andidan tant-lan. Lè’y tann sa sé nanj-lan di, i wi sa an tjè’y èk i di: ‘Laj sala mwen yé-a, n’ay sa fè ich.’

Lanné-a apwé, Sara fè an gason, menm kon nanj Jéhova té pwonmèt yo. Abrahanm té bay non’y Ayzak. Non sala vlé di “Pou wi.”

Lè Ayzak té apochan senk «5» an, Sara òbzòvé Ichmayèl té ka toujou pwan Ayzak sèvi widitjil. Alò, Sara té vlé pwotéjé gason’y. Kon sa i mandé Abrahanm pou voyé Héga èk Ichmayèl alé. An koumansman, Abrahanm pa té vlé fè sa. Kanmenm Jéhova di Abrahanm: ‘Kouté Sara. Mwen kay gadé apwé Ichmayèl. Mé, sé Ayzak mwen kay sèvi pou fè sa mwen té pwonmèt ou-a.’