Bagay Nou Sa Fè Pou Nou Sa Ni Pli Tjè Kontan An Minis-la

1. Pouki adan sé fwè èk sè nou-an ka twapé’y difisil pou enjwi minis-la? (Gadé pòtwé-a osi.)

NOU SÉ pèp Jéhova, èk nou ka pwéché paski nou enmen Papa nou ki an syèl, èvèk nou vlé édé lòt moun vini konnèt li. Èk vwéman, an chay fwè èk sè ka enjwi twavay pwèchman-an, mé la ni lòt fwè èk sè ki ka twapé’y byen difisil pou enjwi twavay sala. Pouki? Ében adan di yo koutja, èk yo pa ka kwè yo bon asé pou enstwi moun an Pawòl Bondyé. Adan di yo pa ka santi konfòtab pou alé lakay moun, si moun-lan pa té envité yo. Adan di yo pè pou pwéché paski, yo pa vlé moun fè yo afon. Èk, la ni lézòt ki pa vlé di ében fè anyen pou kontwayé moun. Konsa, magwé sé fwè èk sè sala enmen Jéhova an chay, yo ka twapé’y difisil pou palé épi moun yo pa konnèt konsèné Bon Nouvèl-la. Mé an menm di tan-an, yo sav mizi enpòtan twavay pwèchman-an enpòtan, èk yo ka toujou patisipé adan’y. Nou sa asiwé, Jéhova byen plè épi yo.

2. Si’w ka twapé’y difisil pou enjwi minis-la, pouki ou pa sipozé dékouwajé?

² Ès délè, ou ka twapé’y difisil pou enjwi minis-la pou lapéti yonn sé wézon-an nou mansyonnen an paragraf yonn? Si sa sé sitiwasyon’w, pa dékouwajé. Anfen, si’w ka santi ou pa bon asé pou enstwi moun lavéwité-a, pitèt sa vlé di ou sé on moun ki ni imilité, konsa ou pa vlé mété twòp antansyon asou kò’w, èvèk ou pa vlé chikannen épi moun. Èk lavéwité-a sé sa, pyèsonn pa vlé moun fè yo hont, èspwèsman lè yo ka éséyé pou fè sa ki bon bay lézòt. Mé i bon pou chonjé, Papa’w ki an syèl ka konpwann mannyè ou ka santi, èvèk i vlé édé’w. (Izay. 41:13) Konsa, ou sa pwan tjè, paski ou pa pa kò’w. An atik sala, nou kay konsidiwé senk (5) bagay ou sa fè pou aji épi sé santiman sala èk pou’w sa enjwi minis ou.

KITÉ PAWÒL BONDYÉ FÒTIFYÉ’W

3. Kisa ki té édé pwofèt Jérémaya pou ni kouwaj pou pwéché?

³ Pawòl Bondyé té ka toujou fòtifyé sèvant li, lè yo té ni pou fè ansayman ki té difisil. Annou konsidiwé ègzanp pwofèt Jérémaya. Lè Jéhova té bay asayman-an pou pwéché i té tèlman antjèt, i di Jéhova: “Mwen pa konnèt mannyè pou palé, paski mwen sé on tibway.” (Jér. 1:6) Kisa ki édé Jérémaya? Pawòl Bondyé. Wi, sé pawòl Jéhova ki fòtifyé Jérémaya, épi sé sa ki bay kouwaj-la pou pwéché. Jérémaya di: “Pawòl [Jéhova] té menm kon on difé ki té andidan zo mwen. Èk mwen té las tjébé’y.” (Jér. 20:8, 9) Konsa, Jéhova té bay Jérémaya on konmisyon pou déklawé, mé sé menm konmisyon sala ki bay fòs-la i té bizwen pou’y pwéché, magwé i té ni pou pwéché adan on tèwitwa ki té difisil.

4. Lè nou pwan tan pou li ében kouté Bib-la épi nou mèdité asou’y, kisa sa ka fè ban nou? (Kòlòsé 1:9, 10)

⁴ Sé Pawòl Bondyé ki an Bib-la ki ka bay Kwityen ki vwé fòs-la yo bizwen. Lè zapòt Pòl té ékwi sé fwè èk sè-a ki té an kongwigasyon-an an vil Kòlòsé, i di yo, si yo té kontiné apwann konsèné Jéhova épi sa i té vlé yo fè, sa té kay motivé yo pou “viv kon Senyè-a vlé,” kon yo kontiné “fè bon an tout diféwan mannyè.” (Li Kòlòsé 1:9, 10.) Pawòl Bondyé ki an Bib-la ka fè menm bagay-la ban nou. Èk yonn sé mannyè-a nou ka fè bon, sé lè nou pwéché Bon Nouvèl-la. Konsa lè nou li ében kouté Bib-la, épi nou pwan tan pou mèdité asou’y, sa ka fòtifyé lafwa nou an Jéhova. Èvèk i ka édé nou pou konpwann pouki i si tèlman enpòtan pou nou kontiné pwéché Bon Nouvèl Wéyòm-lan.

5. Pou vwéman twapé bennéfis lè nou ka li ében kouté èk étidyé Bib-la, kisa nou ni pou fè?

⁵ Pou vwéman twapé bennéfis an Pawòl Bondyé, sé pa pou nou twò pwésé lè nou ka li ében kouté Bib-la, lè nou ka étidyé’y, èk lè nou ka mèdité asou sa nou apwann adan’y. Konsa pwan tan’w. Èvèk si ou li on vèwsé ou pa byen konpwann, pa annèk kité’y kon sa. Pito sa, gadé pou pli enfòmasyon ki kay édé’w pou konpwann kisa vèwsé-a vlé di. Ou sa sèvi Watch Tower Publications Index ében Djid-la Pou Édé Nou Fè Wichach pou twapé pli enfòmasyon asou on vèwsé. Si’w pwan tan’w lè’w ka étidyé Bib-la, ou kay fòtifyé konfyans ou ki, Pawòl Bondyé sé lavéwité. (1 Tèsa. 5:21) Èvèk pli ou asiwé sa ki an Bib-la sé lavéwité, sé pli ou kay enjwi palé épi lòt moun konsèné sé bèl bagay-la ou ka apwann an Bib-la.

PWÉPAWÉ BYEN POU MINIS-LA

6. Pouki nou sipozé pwépawé byen pou minis-la?

⁶ Si’w pwépawé byen pou minis-la, ou kay santi pli konfòtab lè’w ka palé épi moun. Chonjé, Jézi té édé sé disip li-a pou pwépawé byen pou minis-la, avan i té voyé yo pwéché. I té di yo kisa pou di, kisa pou fè, èk kisa pou pa fè. (Louk 10:1-11) Sé disip-la fè tout sa Jézi té di yo pou fè. Èk akòz di sa, yo akonpli an chay bon bagay an minis-la, èvèk sa ba yo an chay tjè kontan.​—Louk 10:17.

7. Kisa nou sa fè pou pwépawé pou minis-la? (Gadé pòtwé-a osi.)

⁷ Mé, kisa nou menm sa fè pou pwépawé pou minis-la? Ében i bon pou nou katjilé asou konmisyon-an nou vlé patajé épi sé moun-lan nou jwenn an minis-la. Èvèk nou ni pou fè asiwé nou byen konpwann konmisyon-an, paski a lè sala, nou kay sa palé adan an mannyè ki natiwèl. On lòt bagay nou sa fè, sé katjilé asou diféwan bagay déotwa moun pé di, lè nou éséyé pou patajé konmisyon-an épi yo. Èk nou sa osi katjilé asou ki wépons nou kay bay chak di yo. Si nou fè sé bagay sala, nou kay byen pawé pou minis-la, èvèk nou kay santi pli konfòtab. Osi nou kay sa souwi èk palé adan an mannyè ki janti.

8. An 2 Kòrint 4:7, zapòt Pòl palé konsèné vésèl ki fèt épi matwiyo ki pa fò. Ki mannyè nou sa di, Kwityen ki vwé menm kon sé vésèl sala?

⁸ An 2 Kòrint 4:7, zapòt Pòl sèvi yon ilistwasyon ki ka édé nou pou konpwann, pa-a nou ni lè’y vini pou twavay pwèchman-an. I di: “Nou ni wichès sala adan vésèl ki fèt épi matwiyo ki pa fò.” (2 Kòr. 4:7) Wichès-la sé twavay-la pou déklawé Bon Nouvèl Wéyòm Bondyé. Sa sé on twavay ki ka sové lavi moun. (2 Kòr. 4:1) Mé, kisa ki sé vésèl-la ki fèt épi matwiyo ki pa fò-a? Ében, sé vésèl sala ka wépwézanté sèvant Bondyé ki ka fè twavay-la pou pwéché Bon Nouvèl-la. An tan zapòt Pòl, sé machann-lan té ka mété bagay valowab tèl kon manjé, diven, épi lajan, adan vésèl ki fèt épi tè gwa, lè yo té ka chayé yo hòd yon plas pou mennen’y yo adan on lòt plas. Sé vésèl sala pa té fò, mé yo té ni bagay ki té byen valowab andidan yo. An menm mannyè-a, nou pa pawfé, èk la ni bagay nou pa sa fè. Mé, Jéhova ban nou konmisyon Wéyòm-lan, on bagay ki byen valowab, pou pòté bay lézòt moun. Konsa, épi èd Jéhova, nou sa ni fòs-la nou bizwen pou nou sa kontiné pwéché èk déklawé Bon Nouvèl-la.

PWÉDYÉ POU KOUWAJ

9. Kisa ki kay édé nou ganyen a bout pèwèz lézòm? (Gadé pòtwé-a osi.)

⁹ On lòt difikilté nou pè èspéyansé délè, sé pèwèz lézòm. Wi, nou pé ni pèwèz ki, moun kay òpozé nou an minis-la, ében yo pa kay kouté nou. Konsa, ki mannyè nou sa ganyen a bout difikilté sala? Ében annou wè kisa nou sa apwann an ègzanp sé zapòt-la. Lé sé ofisyé-a té koumandé yo pou doubout pwéché, sé zapòt-la pa té vini pè. Pito sa, yo pwédyé èk yo mandé Jéhova pou édé yo kontiné “palé konmisyon-an san lapè.” Èvèk la menm, Jéhova wéponn lapwiyè yo. (Twav. 4:18, 29, 31) Konsa, si délè, pèwèz lézòm ka fè nou pè pou pwéché, nou sipozé pwédyé èk mandé Jéhova pou édé nou. Nou sa mandé’y pou fòtifyé lanmityé-a nou ni pou lézòt, paski a lè sala nou pa kay pè pou patajé Bon Nouvèl-la épi yo.

10. Kisa Jéhova ka fè pou édé nou wann sèvis kon Tèmwen’y? (Izaya 43:10-12)

¹⁰ Jéhova apwenté nou pou wann sèvis kon Témwen’y, èk i pwonmèt i kay édé nou pou nou ni kouwaj. (Li Izaya 43:10-12.) Annou konsidiwé kat (4) an sé bagay-la Jéhova ka fè pou édé nou. Pwèmyé, népòt lè nou ka pwéché Bon Nouvèl-la, Jézi la épi nou. (Maf. 28:18-20) Dézyenm, Jéhova apwenté sé nanj-lan pou édé nou an twavay pwèchman-an. (Wév. 14:6) Twazyenm, Jéhova ka ban nou lisentèspwi’y pou édé nou chonjé sé bagay-la nou ja apwann an Bib-la. (Jan 14:25, 26) Katyenm, Jéhova ban nou sé fwè èk sè-a pou twavay épi nou an minis-la. Konsa épi èd Jéhova, èk sé fwè èk sè nou-an ki ka sipòté nou, nou ni tout sa nou bizwen pou nou sa ni kouwaj èk pou nou kontiné pwéché.

WÈSTÉ PÒSITIF ÈVÈK PALÉ ÉPI MOUN A LÈ-A KI PLI BON POU YO ÈK ASOU SIJÉ YO ANTÉWÉSÉ ADAN

11. Lè’w an minis-la, kisa’w sa fè pou’w sa palé épi pli moun? (Gadé pòtwé-a osi.)

¹¹ Lè’w an minis-la èk ou pa jwenn jè moun lakay yo, ès ou ka santi dékouwajé? Ében, ou sa mandé kò’w sé kwèstyon sala: ‘Ki koté sé moun-lan ki ka viv an tèwitwa mwen-an yé apwézan?’ (Twav. 16:13) ‘Ès yo an twavay, ében yo alé fè konmisyon?’ Si sa sé sitiwasyon-an, ès ou sa palé épi moun ou jwenn asou lawi-a? Sa pè ba’w òpòtyounité pou palé épi pli moun. Yon fwè yo ka kwiyé Jòchwa, di: “Mwen ja twapé òpòtyounité pou pwéché paditan mwen té ka maché an plas ki ni otan boutik, èk lòt plas ki ni anpil moun.” Fwè Jòchwa épi madanm li Bridget, ka osi jwenn pli moun lakay yo, lè yo pwéché pli ta an jounen-an èk lé dimanch apwémidi.​—Èfés. 5:15, 16.

12. Kisa nou sa fè pou ditèminé kisa on moun ka kwè adan, ében kisa ki asou lidé’y?

¹² Si on moun ou ka palé épi pa antéwésé an Bon Nouvèl-la, éséyé pou ditèminé kisa moun-lan ka kwè adan, ében kisa ki asou lidé’y. Fwè Jòchwa épi madanm li Bridget, ka sèvi sé kwèstyon-an ki asou kouvèti sé trak-la, lè yo ka palé épi moun. Pou ègzanp, si yo ka palé épi on moun èk yo ka sèvi trak-la, Pawòl Ki Moun Ki An Bib-la? yo ka di moun-lan: “Adan moun ka kwè, Bib-la sé on liv hòd Bondyé. Mé, la ni lòt moun ki pa ka vwéman kwè sa. Kisa ki lopinyon’w asou sa?” Byen souvan, an ti kwèstyon kon sa ka ba yo òpòtyounité-a pou ni an bèl ti konvézasyon épi moun-lan.

13. Pouki nou sa di nou ka ni siksé an minis-la, ki moun kouté nou opa? (Pwovèb 27:11)

¹³ Menm si moun pa kouté nou lè nou ka pwéché, sa pa vlé di nou pa ka ni siksé an minis-la. Pou ki wézon nou sa di sa? Sé paski, sa Jéhova épi Gason’y Jézi vlé nou pou fè, sé bay on témwéyaj. (Twav. 10:42) Konsa, lè nou ka pwéché Bon Nouvèl-la, ki moun kouté opa, èk menm si nou pa jwenn pyèsonn pou palé épi, nou ni siksé paski nou ka fè sa Jéhova vlé nou fè. Èvèk nou sa ni tjè kontan osi, paski nou sav nou ni favè Jéhova.​—Li Pwovèb 27:11.

14. Lè an lòt pwoklanmatè jwenn an moun ki antéwésé an konmisyon Wéyòm-lan, pouki nou tout sa ni tjè kontan?

¹⁴ An lòt bagay ki sa ban nou tjè kontan an minis-la, sé lè an lòt pwoklanmatè jwenn on moun ki antéwésé an konmisyon Wéyòm-lan. Gad-la ja konpawé twavay pwèchman-an nou ka fè-a épi twavay-la moun ka fè, pou chaché pou an ti manmay ki pèd. Pas, si on ti manmay pèd, an chay moun ka twavay ansanm, èk yo ka fè gwo èfò pou gadé toupatou pou ti manmay sala. Èvèk lè yo jwenn li, sé pa dé kontan yo tout ka kontan, menm si sé yon sèl moun ki twapé ti manmay-la. An menm mannyè-a, nou sa di, tout moun an kongwigasyon-an ka twavay ansanm pou fè disip, paski nou tout ka twavay ansanm pou pwéché bay tout sé moun-lan ki an tèwitwa-a. Konsa, lè on moun koumansé atandé sé mitin-lan, nou tout ka ni tjè kontan, menm si sé yon sèl fwè ében yon sèl sè ki ka étidyé épi moun sala.

FIKSÉ ASOU LANMITYÉ-A OU NI POU JÉHOVA ÉPI POU LÒT MOUN

15. Silon Mafyou 22:37-39, dé (2) pli enpòtan konmandman-an sé pou enmen Bondyé épi enmen lézòt. Ki mannyè lévanjil sala sa édé nou pou mété pli lavi an pawòl nou lè nou ka pwéché? (Gadé pòtwé-a osi.)

¹⁵ Si nou fiksé asou lanmityé-a nou ni pou Jéhova épi pou lòt moun, sa kay édé nou pou mété pli lavi an pawòl nou lè nou ka pwéché. (Li Mafyou 22:37-39.) Annèk imajiné mannyè Jéhova ka kontan lè’y wè nou ka fè twavay pwèchman-an, èk mannyè sé moun-lan nou ka pwéché bay-la kay kontan lè yo koumansé étidyé Bib-la! Osi, i bon pou chonjé, moun ki kouté nou èk désidé pou sèvi Jéhova, sa enjwi an bon lavi pou tout tan. Lè’w katjilé asou sa, ès sa pa ka ankouwajé’w pou fè tout sa’w pé pou pwéché Bon Nouvèl-la.​—Jan 6:40; 1 Tim. 4:16.

16. Si’w pa sa sòti paski ou malad, ou an laj, ében pou on lòt wézon, ki mannyè ou sa ni tjè kontan an minis ou? Bay ègzanp.

¹⁶ Bon, adan sé fwè èk sè nou-an pa sa sòti paski yo malad, yo an laj, ében pou lòt wézon. Si sa sé sitiwasyon’w, fiksé asou sa’w sa fè pou moutwé lanmityé pou Jéhova, épi pou lòt moun. Annou pwan ègzanp fwè Samuel épi sè Dania. Diwan Panndèmik COVID-19-lan, yo pa té sa sòti. Magwé tan sala té byen difisil pou yo, yo té ka toujou ékwi lèt èk sèvi téléfòn-lan pou pwéché, èvèk yo té ka kondwi létid Bib asou Zoom. Osi, fwè Samuel té ka pwéché bay sé moun-lan i té ka jwenn an klinik-la, lè’y alé pwan twètman’y pou kansè. I di: “Lè nou ka èspéyansé difikilté, nou pé santi antjèt épi las. Sé difikilté-a sa osi mété lafwa nou anba tès. Konsa, nou bizwen ni tjè kontan an sèvis nou pou Jéhova.” Diwan tan sala osi, sè Dania tonbé, èk i té malad an kabann pou twa (3) mwa. Apwé sa, i té ni pou sèvi on chèz a woul pou sis (6) mwa. Sè Dania di: “Mwen éséyé pou fè tout sa mwen té pé bay Jéhova an sitiwasyon-an mwen té yé-a. Mwen pwéché bay on nòs ki té ka vini otjipé mwen, èk mwen palé épi moun ki té ka vini lakay nou pòté bagay ban nou. Osi, mwen té ka ni bèl ti konvézasyon asou fòn-lan épi on madanm ki té ka twavay épi on biznis ki ni pou fè épi santé. Wi, magwé fwè Samuel épi sè Dania pa té sa fè sa yo té ka fè avan, yo té ni tjè kontan paski yo té ka fè tout sa yo té pé bay Jéhova, an sitiwasyon-an yo té yé-a.

17. Pou twapé pli bennéfis, kisa nou ni pou fè épi sé senk (5) bagay-la nou mansyonnen an atik sala?

¹⁷ An atik sala, nou diskité senk (5) bagay nou sa fè pou nou ni pli tjè kontan an minis-la. Mé, pou’w twapé pli bennéfis, nou ka ankouwajé’w pou fè tout sé senk (5) bagay sala ansanm. Konsidiwé sa: si’w ka sèvi on rèsipi pou fè on bonbon, rèsipi-a ka di’w tout sé diféwan bagay-la ou ni pou mété an bonbon-an. Èk sé lè’w mété yo ansanm bonbon-an ka sòti bèl, èk i ka ni bon gou. An menm mannyè-a, si’w sèvi tout sé senk (5) bagay-la nou mansyonnen an atik sala ansanm, sé lè sala ou kay sa goumen kont vyé katjil, èk ni pli tjè kontan an minis-la.