“Vini Matwité An Lafwa-a”

1. Kisa Jéhova ka mandé nou pou fè?

YONN an sé bagay-la ki ka bay on mawi èk madanm an chay tjè kontan sé lè ti bébé yo fèt. Mé magwé pawan enmen ti bébé yo, yo pa vlé’y wété on ti bébé pou tout lavi’y. Anfen, si ti bébé-a pa ka pwofité, sa té kay ba yo tèt cho. An menm mannyè-a, Jéhova ka kontan lè nou koumansé apwann konsèné’y, mé i pa vlé nou doubout la. (1 Kòr. 3:1) Pito sa, i vlé nou kontiné apwann konsèné’y. Anfen, i ka mandé nou pou vini “gwan moun”.​—1 Kòr. 14:20.

2. Ki kat (4) kwèsyon nou kay diskité an atik sala?

² An atik sala nou kay twapé sé wépons-lan pou sé kat (4) kwèsyon sala: ‘Koumannyè on Kwityen ki ni on bon wilasyon épi Jéhova ka katjilé èk ka fè bagay? Kisa nou sa fè pou vini matwité an lafwa-a? Ki mannyè gwo manjé spiwitwèl ka édé nou vini matwité? Èk, menm si nou ja ni on bon wilasyon épi Jéhova, pouki i pa bon pou nou katjilé nou pa bouzwen kontiné fòtifyé’y?’

KI MANNYÈ ON KWITYEN KI NI ON BON WILASYON ÉPI JÉHOVA KA KATJILÉ ÈK KA FÈ BAGAY?

3. Koumannyè nou sa vini gwan moun ében Kwityen ki matwité?

³ An langaj Gwik, èspwèsyon-an “gwan moun” sa osi vlé di, “matwité”, “pawfé”, èk “konplèt”.a (1 Kòr. 2:6) Alò, menm kon on ti bébé ka kontiné pwofité jis lè’y vini on gwan moun, nou osi sipozé kontiné pwofité an wilasyon nou épi Jéhova. Èk, si nou pwofité an wilasyon nou épi Jéhova, nou sa vini gwan moun ében Kwityen ki matwité. Kanmenm lè nou vini matwité, nou pa vlé doubout fè pwogwé an wilasyon nou épi Jéhova. (1 Tim. 4:15) Èk chonjé, nou tout, jis jenn moun sa vini Kwityen ki matwité. Alò, koumannyè ou sa konnèt si ou sé on moun ki matwité?

4. Kisa on Kwityen ki matwité ka fè?

⁴ On Kwityen ki matwité ka fè tout bagay Jéhova mandé’y pou fè, èk i pa ka sèlman fè sé bagay-la i vlé fè. Kanmenm, i pa pawfé, konsa i kay toujou fè lèwè. Mé chak jou i ka fè tout sa’y pé pou katjilé èk fè bagay mannyè-a Jéhova vlé. Osi i ja mété on kawaktè ki nèf, èk pli an pli i ka éséyé pou katjilé menm kon Jéhova. (Èfés. 4:22-24) An plis di sa, i ja apwann mannyè pou fè bon disizyon, paski i ka katjilé asou lwa èk pwensip Jéhova. Èk a kòz di sa, i pa bouzwen an chay lwa pou di’y sa pou fè. Alò, lè’y fè yon disizyon, i ka twavay wèd pou fè sa’y té di i té kay fè.​—1 Kòr. 9:26, 27.

5. Kisa ki sa wivé on Kwityen ki pa matwité? (Èfésòs 4:14, 15)

⁵ I kay byen ézé pou on Kwityen ki pa matwité kwè mansonj i tann ében li asou nouvèl-la, ében mansonj sé apòsta-a ka simen.b (Li Èfésòs 4:14, 15.) Osi, i kay ézé pou on Kwityen ki pa matwité jalou lézòt moun, babyé épi yo, ében vini ofwansé vit. Èk lè’y twapé tantasyon, i kay ézé pou’y fè sa ki pa bon.​—1 Kòr. 3:3.

6. Poutji nou sa konpawé wilasyon nou épi Jéhova, épi mannyè on ti bébé ka pwofité? (Gadé pòtwé-a osi.)

⁶ Kon nou té mansyonnen pli bonnè-a, sé lévanjil-la ka konpawé wilasyon nou épi Jéhova épi mannyè on ti bébé ka pwofité pou vini on gwan moun. Sa vwé, la ni an chay bagay on timoun pa konnèt, konsa i bouzwen on gwan moun pou pwotéjé’y èk djidé’y. Pou ègzanp, on manman pé mandé tifi’y pou tjenbé lanmen’y kon’y ka janbé chimen-an. Alò, kon tifi-a ka pwofité, pitèt manman-an kay kité’y janbé chimen-an pa kò’y, mé i kay fè’y chonjé pou fè asiwé pyès vwati pa ka pasé a lè-a. Konsa, lè tifi-a vini on gwan moun, i kay konnèt mannyè pou tjenn kò’y hòd danjé kon sa. Wi, jenn zanfan bouzwen èd hòd gwan moun pou tjenn kò yo hòd danjé. An menm mannyè-a Kwityen ki pa matwité bouzwen èd hòd Kwityen ki matwité pou fè bon disizyon, èk pou tjenn kò yo hòd bagay ki sa donmajé wilasyon yo épi Jéhova. Okontwè, lè Kwityen ki matwité ni on disizyon pou fè, yo ka mèdité asou sa Bib-la ka di pou yo sa wè katjil Jéhova. Èk apwé yo ka fè sa ki dwèt.

7. Ès Kwityen ki matwité bouzwen èd hòd lézòt?

⁷ Bon. Ès an Kwityen ki matwité pa ka janmen bouzwen èd hòd pyèsonn? Non. La ni on chay Kwityen ki matwité ki bouzwen èd délè. Mé diféwans-lan ant on Kwityen ki matwité èk on Kwityen ki p’òkò matwité sé sa: On Kwityen ki p’òkò matwité pitèt kay vlé lézòt moun di’y sa pou fè, ében fè on disizyon ba li. Mé, lè on Kwityen ki matwité mandé lézòt ki ni pli lasajès èk èspéyans pou èd, i sav i ni pou fè disizyon’y pou kò’y menm, èk “pòté chay li menm.”​—Gal. 6:5.

8. An ki mannyè Kwityen ki matwité diféwan épi yonn a lòt?

⁸ Menm kon tout gwan moun diféwan, tout Kwityen ki matwité pa ni sé menm kawaktè-a. Wi, yo diféwan. Pou ègzanp, adan Kwityen ki matwité ni an chay lasajès, èk adan ni an chay kouwaj. Osi adan di yo byen donnan, èk lézòt ka moutwé an chay konpasyon. An plis di sa, lè dé (2) Kwityen ki matwité ka aji épi menm sitiwasyon-an, pitèt yo kay fè diféwan disizyon, mé toulé dé kay swiv pwensip Bib. Èk sa ka fèt sitou lè yo ni pou fè disizyon ki ni pou fè épi konsyans yo. Konsa yo pa kay jijé yonn a lòt menm si disizyon yo diféwan. Pito sa, yo ka fè tout sa yo pé pou wèsté an lilyon.​—Ronm 14:10; 1 Kòr. 1:10.

KISA NOU SA FÈ POU VINI MATWITÉ AN LAFWA-A?

9. Ès nou sa ni an bon wilasyon épi Jéhova san pyès éfò? Poutji ou di sa?

⁹ Kon tan ka pasé, i natiwèl pou an ti manmay pwofité pou’y vini an gwan moun. Mé an moun pa sa ni an bon wilasyon épi Jéhova si’y pa fè pyès éfò. Pwan pou ègzanp sé Kwityen-an an Kòrint an pwenmyé syèk-la. Yo aksèpté Bon Nouvèl-la, yo batizé, yo wisouvwè lisentèspwi Bondyé èk yo apwann an chay bagay hòd zapòt Pòl. (Twav. 18:8-11) Mé magwé sa, plizyè lanné pli ta, an chay di yo pa té ni an bon wilasyon épi Jéhova. (1 Kòr. 3:2) Konsa i bon pou chonjé, menm bagay-la sa wivé nou. Alò, kisa nou sa fè pou nou kontiné ni an bon wilasyon épi Jéhova?

10. Kisa nou sa fè pou vini matwité an lafwa-a? (Joud 20)

¹⁰ Pou nou sa vini matwité an lafwa-a nou ni pou dévlopé dézi-a pou ni an bon wilasyon épi Jéhova. Moun ki ‘pa konnèt anyen’ èk ki pa vlé fè pwogwé, pa kay vini matwité an lafwa-a. (Pwov. 1:22) Anfen, nou pa vlé vini kon moun ki vlé pawan yo fè disizyon bay yo magwé yo ja gwan. Pito sa, nou vlé pwan wèskonsabilité pou kò nou èk fè asiwé nou ka kontiné pwofité an wilasyon nou épi Jéhova. (Li Joud 20.) Èk si’w ka fè pwogwé pou vini an Kwityen ki matwité, mandé Jéhova pou baʼw dézi-a pou fè bagay ki ka plèʼy épi “pouʼy sa baʼw kouway-la pouʼw sa fè sé bagay sala.”​—Filip. 2:13.

11. Ki èd Jéhova ka ban nou pou édé nou dévlopé an bon wilasyon épi’y? (Èfésòs 4:11-13)

¹¹ Ès Jéhova vlé nou dévlopé an bon wilasyon épi’y pa kò nou? Non. I ja ban nou bèwjé èk titja an kongwigasyon-an pou édé nou ni an bon wilasyon épi’y, èk pou édé nou vini matwité an lafwa-a menm kon Jézi. (Li Èfésòs 4:11-13.) Jéhova ka osi ban nou lisentèspwi’y pou édé nou “ni lidé Jézi.” (1 Kòr. 2:14-16) An plis di sa, Jéhova ban nou sé kat (4) liv-la Mafyou, Mak, Louk èk Jan, pou moutwé nou mannyè Jézi té ka katjilé, palé, èk sa i té ka fè lè’y té asou latè-a. Konsa, lè’w fè éfò-a pou katjilé, palé, èk fè bagay menm kon Jézi, ou kay dévlopé an bon wilasyon épi Jéhova.

MANNYÈ GWO MANJÉ SPIWITWÈL KA ÉDÉ NOU VINI MATWITÉ

12. Kisa “sé pwèmyé lison-an nou té apwann konsèné Jézi Kwi-a” yé?

¹² Pou nou sa vini matwité an lafwa-a, nou ni pou apwann pli pasé “sé pwèmyé lison-an nou té apwann konsèné Jézi Kwi-a.” Pou ègzanp, adan sé pwèmyé bagay-la nou té apwann, sété bagay konsèné batenm, lafwa, wépantisman, wézèwèksyon-an, èk lafwa. (Hib. 6:1, 2) Wi, tout Kwityen oblijé apwann sé pwèmyé lison sala. Konsa, lè Pita té ka palé épi sé moun-lan diwan Fèt Pentikòs-la, i palé konsèné sé bagay sala. (Twav. 2:32-35, 38) Alò, pou nou sa vini disip Jézi, nou ni pou aksèpté “sé pwèmyé lison-an”. Pou ègzanp, zapòt Pòl di, si nou pa ka kwè an wézèwèksyon-an, nou pa sa di nou sé disip Jézi. (1 Kòr. 15:12-14) Mé kanmenm, pou nou sa vini Kwityen ki matwité nou ni pou apwann pli pasé sé pwèmyé lison-an.

13. Kisa nou ni pou fè pou twapé bennéfis hòd gwo manjé-a Hibrou 5:14 mansyonnen-an? (Gadé pòtwé-a osi.)

¹³ Gwo manjé spiwitwèl sé pa sèlman lwa Jéhova, mé yo sé pwensip li osi. Konsa, gwo manjé sala sa édé nou vini Kwityen ki matwité, paski yo ka édé nou konpwann katjil Jéhova. Alò, pou twapé bennéfis hòd manjé sala, nou ni pou li ében kouté Bib-la asou òdiyo, katjilé asou sa nou li ében kouté, èk fè tout sa nou pé pou apliké sa nou apwann. Wi, kon nou ka fè sé bagay sala, nou kay apwann mannyè pou fè disizyon ki kay plè Jéhova.c​—Li Hibrou 5:14.

14. Koumannyè zapòt Pòl té édé sé Kwityen-an an Kòrint pou vini matwité?

¹⁴ Lè Bib-la pa ni on lwa asou on sèten sitiwasyon, i ka difisil pou Kwityen ki pa matwité pou fè on bon disizyon. Adan di yo kwè si la pa ni on lwa yo sa fè sa yo vlé. Èk pitèt lézòt ka mandé pou on lwa lè la pa ni pyès lwa. Pou ègzanp, sé Kwityen-an an Kòrint té vlé konnèt si yo té sa manjé manjé moun té ofè idòl. Konsa yo mandé zapòt Pòl pou on lwa konsèné sa. Alò, pito Pòl di yo sa pou fè, i di yo, chak di yo ni ‘libèté-a’ pou fè on disizyon silon sa konsyans yo pèwmité yo pou fè. I osi mansyonnen déotwa pwensip Bib ki té sa édé yo fè bon disizyon ki té kay kité yo épi on bon konsyans, mé an menm di tan pa fè moun ki fèb an lafwa-a tonbé adan péché. (1 Kòr. 8:4, 7-9) Wi, Pòl té ka enstwi sé Kwityen-an an Kòrint pou sèvi sé lévanjil-la pou fè bon disizyon, pito yo dépan asou lòt moun, ében yo gadé pou lwa. Èk an mannyè sala i édé yo vini Kwityen ki matwité.

15. Koumannyè zapòt Pòl té édé sé Kwityen Hibrou-a pou fòtifyé wilasyon yo épi Jéhova?

¹⁵ Nou apwann on lison ki enpòtan hòd sa zapòt Pòl té ékwi sé Kwityen Hibrou-a. Wi, adan sé Kwityen-an té kité wilasyon yo épi Jéhova vini fèb. Anfen, “pito [yo] manjé gwo manjé, sé lèt [yo] té bizwen toujou.” (Hib. 5:12) Pou ki wézon? Ében, yo pa té apwann èk aksèpté sé bagay nèf-la Jéhova té ka sèvi kongwigasyon-an pou enstwi yo. (Pwov. 4:18) Pou ègzanp, an chay Jwif té ka pwomoté Lwa Moziz-la, magwé twant (30) lanné té ja pasé dépi lanmò Jézi té mété on bout pou Lwa sala. (Ronm 10:4; Titòs 1:10) Konsa, sé twant (30) lanné sala té bay sé Kwityen-an an chay tan pou konpwann ki, yo pa té ni pou kontiné swiv Lwa sala! Alò, Pòl té ka édé yo aksèpté sé gwo manjé-a i té ka enstwi yo-a. Konsa, lèt li té édé yo wè, mannyè nèf-la Jéhova té mété an plas pou adowé’y té pli mèyè pasé Lwa Moziz-la. Lèt sala osi ba yo kouwaj-la pou kontiné pwéché magwé sé Jwif-la té ka opozé yo.​—Hib. 10:19-23.

POUKI NOU NI POU KONTINÉ TWAVAY WÈD POU WÈSTÉ MATWITÉ AN LAFWA-A?

16. Apa di éfò-a nou ni pou fè pou vini matwité an lafwa-a, ki lòt bagay nou ni pou fè?

¹⁶ Nou ni pou twavay wèd pa sèlman pou vini matwité an lafwa-a, mé nou osi ni pou kontiné wèsté pwé Jéhova. Alò, nou ni pou pwan pwokosyon pou nou pa kwè paski nou matwité an lafwa-a nou pa ni pou kontiné fòtifyé wilasyon nou épi Jéhova. (1 Kòr. 10:12) Wi, nou vlé kontiné “gadé lavi” nou pou fè asiwé nou ka kontiné fè pwogwé.​—2 Kòr. 13:5.

17. Ki mannyè lèt-la zapòt Pòl té ékwi sé fwè-a an Kòlòsé ka moutwé i enpòtan pou wèsté matwité an lafwa-a?

¹⁷ Lèt-la zapòt Pòl té ékwi sé fwè-a an Kòlòsé, ka moutwé i enpòtan pou nou wèsté matwité an lafwa-a. Menm si yo té ni an bon wilasyon épi Jéhova, Pòl di yo pou pwan pokosyon pou pa kité katjil moun an latè-a kwennen yo. (Kòl. 2:6-10) Osi, an lòt fwè ki té konnèt sé Kwityen-an an kongwigasyon sala byen sété Épafras. I té ka toujou pwédyé pou yo “doubout fò”. Sa vlé di i té ka toujou pwédyé pou yo wèsté matwité an lafwa-a. (Kòl. 4:12) Alò, kisa nou ka apwann an sa? Ében ni Pòl ni Épafras té konpwann ki, pou nou sa wèsté matwité an lafwa-a, nou bizwen èd Jéhova èk osi, i nésésè pou nou kontiné pwofité an wilasyon nou épi’y. Wi, yo toulé dé té vlé sé Kwityen-an an Kòlòsé kontiné ni an bon wilasyon épi Jéhova menm si yo té ka èspéyansé difikilté.

18. Menm si an Kwityen matwité an lafwa-a, kisa ki sa wivé’y? (Gadé pòtwé-a osi.)

¹⁸ Pòl vèti sé Kwityen-an ki, yon Kwityen ki matwité an lafwa-a sa pèd favè Bondyé si i pa pwan pokosyon. Wi, an Kwityen ki ka wifizé obéyi Bondyé ka hédi kò’y hòd Bondyé. Sa byen danjéwé, paski i pé hédi kò’y tèlman lwen i pé enpòsib pou’y wépanti èk wisouvwè pawdonnasyon Bondyé. Gwan mèsi Bondyé, sa pa té sitiwasyon sé Kwityen Hibrou-a. (Hib. 6:4-9) Jòdi jou, la ni Kwityen ki té èskonminiké èk lézòt ki té doubout pwéché bon nouvèl-la. Mé pli ta yo abésé kò yo, èk yo wépanti. Alò, sa ka moutwé, yo pa kon sé moun-lan Pòl té palé konsèné-a ki té sa pèd favè Bondyé pou tout tan. Kanmenm, lè sé moun sala witounen pou Jéhova, yo bouzwen an chay èd. Èk Jéhova ka potjiwé èd sala. (Izik. 34:15, 16) Konsa, sé ansyen-an pé mandé an fwè ében an sè ki matwité an lafwa-a pou édé yo fòtifyé wilasyon yo épi Jéhova ankò.

19. Kisa nou vlé kontiné fè?

¹⁹ Si ou ka fè éfò-a pou dévlopé wilasyon’w épi Jéhova, ou sa éwisi. Konsa, kontiné pou fouyé fò an Bib-la, èk kontiné pou wè bagay mannyè Jéhova ka wè’y. Èk si ou ja vini an Kwityen ki matwité an lafwa-a, fè tout sa ou pé pou tjenn an bon wilasyon épi Jéhova pou tout tan.