Kontiné Apwann Hòd Sé Lavéwité Senp-la Ki An Bib-la

1. Ki mannyè lavi’w chanjé lè ou koumansé étidyé Bib-la?

SÉ BAGAY-LA nou té apwann lè nou koumansé étidyé Bib-la ja chanjé lavi nou. Pou ègzanp, lè nou té apwann non Bondyé sé Jéhova, nou koumansé vansé pli pwé’y. (Izay. 42:8) Èk lè nou té apwann sa ki ka wivé on moun lè i mò, sa soulajé tjè nou paski nou sav moun nou enmen ki ja mò pa ka soufè. (Éklé. 9:10) Èvèk lè nou té apwann konsèné pwonmèt Bondyé pou fè latè-a vini on pawadi, sa té vwéman bon nouvèl, èk sa tiwé tout pèwèz nou pou tan ki ka vini. Wi, pa dé kontan nou té kontan pou sav nou kay sa viv, pa pou swasant dis «70» ében katwiven «80» lanné sèlman, mé pou tout tan!​—Sam 37:29; 90:10.

2. Menm si sé Kwityen-an té “ja établi an lavéwité-a”, pouki Pita té ankouwajé yo pou katjilé asou sa yo té ja apwann? (2 Pita 1:12, 13)

² Sé pou nou pa janmen obliyé enpòtans sé lavéwité senp ki an Bib-la. Bon. Lè zapòt Pita ékwi dézyenm lèt li, i té ékwi’y bay sé Kwityen-an té “ja établi an lavéwité-a”. (Li 2 Pita 1:12, 13.) Èk alè sala, kongwigasyon-an té an danjé; paski la té ni fo pwòfèt èk fo titja ki té vlé sé fwè èk sè-a tounen do yo asou lavéwité-a. (2 Pita 2:1-3) Alò, Pita té vlé fòtifyé sé fwè èk sè sala, èk édé yo pwotèkté kò yo kont fo lésisyon. Épi pou fè sa, i fè yo chonjé adan sé lavéwité-a yo té ja konnèt. Wi, sé lavéwité sala té kay édé yo tjébé fò èk wèsté fidèl pou jis bout-la.

3. Pouki tout Kwityen sipozé kontiné katjilé asou sé lavéwité senp-la ki an Bib-la? Ba yon ègzanp.

³ Menm si nou an lavéwité-a pou plizyè lanné, nou sa toujou twapé bennéfis an sé lavéwité senp-la ki an Bib-la. Pou ègzanp, on manman ki konnèt mannyè pou tjwit manjé byen èk on fi ki p’òkò ni djè èspéyans an mannyè-a pou tjwit manjé, sa sèvi menm salézon-an, menm pwovizyon-an, èk menm lédjim-lan pou fè on wipa. Paski manman-an ni èspéyans èk konnèt mannyè pou tjwit manjé, i sa sèvi menm sé bagay sala pou fè diféwan kalité bon manjé. Mé fi-a p’òkò sa fè tout sé diféwan kalité manjé sala. An menm mannyè-a, on sèvant Jéhova ki an lavéwité-a pou plizyè lanné, sa gadé yon lévanjil èk apwann plizyè diféwan lison. Mé on moun ki an lavéwité-a tou fwé, p’òkò sa òbzòvé tout sé diféwan lison-an an lévanjil-la. Bon. San dout, dépi tan-an nou batizé pou jis apwézan, bagay an lavi nou ja chanjé. Pitèt, sitiwasyon nou ja chanjé, ében sa nou ka fè an sèvis Jéhova ja chanjé. Mé lè nou katjilé asou sé lavéwité senp-la nou té apwann an tan pasé, nou ka wè mannyè nèf nou sa sèvi yo pou édé nou an sitiwasyon nou apwézan. Bon. Annou gadé twa «3» lavéwité senp ki an Bib-la èk sa Kwityen ki “ja établi an lavéwité-a” sa apwann hòd yo.

SÉ JÉHOVA “KI FÈ TOUT BAGAY”

4. Paski nou apwann Jéhova sé Kwéyatè-a, ki mannyè sa ka afèkté nou?

⁴ Mi yon lavéwité ki byen senp nou tout konnèt: “Sé Bondyé ki fè tout bagay.” (Hib. 3:4) Sé li ki kwéyatè-a, èk sé li ki ni pli pouvwa èk lasajès. I fè latè-a èk tout sa ki asou’y. I fè nou, alò i byen konnèt nou. An plis di sa, i mélé épi nou, èk i sav sa ki pli bon pou nou. Èk paski nou konnèt Jéhova sé kwéyatè-a, nou ka konpwann pou ki wézon nou asou latè-a. Èk sa ka ba lavi nou pli valè.

5. Kisa ki sa édé nou abésé kò nou? Ba yon ègzanp. (Izaya 45:9-12)

⁵ Wi. Jéhova sé kwéyatè-a. Konsa, ki lison nou sa apwann an lavéwité senp sala? Nou ka apwann ki, nou sipozé abésé kò nou. Pou ègzanp, Jòb té on nonm ki té ka viv lavi’y dwèt. Mé lè i té ka soufè an chay, i koumansé kwè i té twòp pli bon pasé lézòt. Èk pitèt i té jis kwè i té pli dwèt pasé Bondyé. Mé pou édé’y, Jéhova té ni pou fè’y chonjé ki moun ki kwéyatè-a. (Jòb 38:1-4) Wi, èk sa édé Jòb pou wè, i té nésésè pou’y abésé kò’y, paski tout sa Jéhova ka fè toujou dwèt. A ling épi sa, Izaya di moun pa sipozé kwè yo pli savan pasé Kwéyatè yo.​—Li Izaya 45:9-12.

6. (a) Kisa on moun ki an lavéwité-a pou an chay tan pé koumansé fè? (b) Kisa i sipozé pwan tan pou fè? Èk an ki mannyè sa kay édé’y? (Gadé sé pòtwé-a osi.)

⁶ Lè on moun ja sèvi Jéhova pou an chay tan, i pé koumansé dépan asou katjil li menm pito i dépan asou Jéhova èk Pawòl li. (Jòb 37:23, 24) Mé si on moun pwan tan èk katjilé asou lasajès èk pouvwa Jéhova, sa kay édé’y pou wéyalizé katjil Jéhova twòp pli ho èk pli enpòtan pasé sa li, èk i kay ni pou kontiné abésé kò’y. ​—Izay. 40:22; 55:8, 9.

7. Kisa Rahela té fè pou’y sa aksèpté sé chanjman-an an ògannizasyon-an?

⁷ Bon. Sa ki ka édé Rahela, yon sésé ki ka wèsté Slovenia, aksèpté sé chanjman-an an ògannizasyon-an, sé lè i wéfléchi asou kwéyatè’y. Mi sé sa i di: “Délè, i pa toujou ézé pou mwen aksèpté sé disizyon-an sé fwè-a ki ka pwan douvan an ògannizasyon-an ka fè. Pou ègzanp, magwé mwen té ja gadé 2023 Wapò #8 Hòd Pwensipal Konmité-a, mwen té sipwi pwèmyé fwa mwen wè on fwè épi on bab ka ba yon diskou. Alò, mwen pwédyé bay Jéhova pou édé mwen aksèpté chanjman sala.” Rahela vini konpwann, Jéhova sé kwéyatè syèl-la épi latè-a. Èk i toujou sav pli mèyè mannyè-a pou diwèkté ògannizasyon’y. Bon. Si ou twouvé’y difisil pou konpwann èben aksèpté on diwèksyon nèf, i kay bon pou pwan tan pou katjilé asou lasajès èk pouvwa kwéyatè-a.​—Ronm 11:33-36.

WÉZON-AN BONDYÉ KA KITÉ NOU SOUFÈ

8. Ki bennéfis nou ka twapé paski nou konnèt wézon-an Jéhova ka kité nou soufè?

⁸ ‘Pouki Bondyé ka kité nou soufè?’ Adan moun ki pa konnèt wépons-lan pou kwèsyon sala ka lévé faché kont Bondyé. Èk adan ka jis kwè la pa ni on Bondyé! (Pwov. 19:3) Mé ou ja vini apwann, sé pa Jéhova ki ka annékòz moun pou soufè. Mé paski yo éwityé péché yo ka soufè èk mò. Osi, ou té apwann Jéhova ni pasyans épi nou èk akòz di sa, milyon di moun ja vini konnèt li. Èk yo ja apwann mannyè i kay mété on bout pou soufwans pou tout tan. (2 Pita 3:9, 15) San dout, sé lavéwité sala ja konfòté’w, èk ja édé’w vini pli pwé Jéhova.

9. An ki diféwan sitiwasyon i kay bon pou chonjé sé wézon-an Jéhova ka kité nou soufè?

⁹ Paditan nou ka èspéwé asou Jéhova pou mété on bout pou tout soufwans, nou bouzwen ni pasyans. Kanmenm, lè on manm fanmi nou èben on lòt moun nou enmen mò èben ka èspéyansé difikilté èben enjistis, sa pé twakasé nou; paski nou pé santi akonmsi Jéhova ka pwan twòp tan pou mété on bout pou soufwans. (Hab. 1:2, 3) Mé lè sé bagay sala fèt, i kay bon pou nou wéfléchi asou sé wézon-an Jéhova ka kité bon moun soufè kon sa.a (Sam 34:19) Épi osi, nou sa katjilé asou pwonmèt Jéhova pou mennen an bout pou tout soufwans.

10. Apwé manman Anne mò, kisa ki konfòté’y?

¹⁰ Bon. Lè nou sav pou ki wézon Jéhova ka kité nou soufè sa kay édé nou tjébé fò lè nou anba twaka. Pou ègzanp, Anne, ki ka wèsté an péyi Mayotte, di: “Mwen pèd manman mwen yonndé lanné ki pasé èk sa kasé tjè mwen. Kanmenm, mwen té ka tjenn an lidé Jéhova pa wèskonsab pou soufwans. Épi i pawé pou tiwé tout kalté soufwans èk jis wésisité moun nou enmen ki mò. Alò, lè mwen mèdité asou sé lavéwité sala, yo ka ban mwen lapé an lidé èk yo ka konfòté mwen.”

11. Pou ki diféwan wézon nou ka kontiné pwéché?

¹¹ Paski nou konnèt sé wézon-an Bondyé ka kité moun soufè, sa ka pousé nou pou kontiné pwéché. Konsa, apwé Pita di Jéhova ni pasyans paski i vlé tout moun wépanti èk jwenn lavi, i ékwi an 2 Pita 3:11: “Vwéman ou sipozé viv lavi ki nèt épi viv bay Bondyé tousèl.” Yonn an sé bagay-la nou ni pou fè lè nou ka “viv bay Bondyé tousèl”, sé pou nou ay pwéché. Menm kon Papa nou Jéhova, nou enmen moun. Èk nou vlé yo enjwi lavi an latè nèf-la an pawadi. Vwéman, Jéhova ni an pil pasyans èk i ka bay sé moun-lan an konmin ou yon òpòtyounité pou vini adowé’y. Nou ni on bèl pwivilaj pou twavay ansanm épi Bondyé èk pou édé tout moun apwann konsèné’y avan bout-la wivé!​—1 Kòr. 3:9.

NOU KA VIV AN “DÈNYÉ TAN-AN”

12. Lè nou gadé atitid moun jòdi jou, sa ka édé nou pou fè kisa?

¹² Bib-la té ja di ki mannyè moun té kay yé an “dènyé tan-an”. (2 Tim. 3:1-5) Anfen nou pa ni pou alé lwen; nou anni ni pou gadé oliwon nou pou wè sa Bib-la té ja di ka fèt vwé. Épi nou ka wè atitid moun ka vini pli mové jou apwé jou. Konsa, sa ka édé nou pou mété pli konfyans an Pawòl Bondyé.​—2 Tim. 3:13-15.

13. A ling épi Louk 12:15-21, ki kèstyon nou sipozé mandé kò nou?

¹³ Paski nou sav nou ka viv an dènyé tan-an, sa ka osi édé nou pou fiksé asou sa ki pli enpòtan. Nou ka apwann pouki i enpòtan pou fè sa, lè nou gadé yon pawabòl Jézi té bay an Louk 12:15-21. (Li’y.) Pouki lévanjil-la di nonm sala té “kouyon”? Sé pa paski i té wich, mé sé paski sa ki té pli enpòtan pou li sété pou ni pli wichès. Konsa, i té “ka sanblé wichès pou kòʼy, mé i pa [té] ni pyès konfyans an Bondyé.” Mé nonm sala té fè on gwo lèwè, paski i pa té òbzòvé lavi’y té otan kout. Menm swè sala Bondyé di nonm-lan: ‘Kouyon, òswè-a menm ou kay pèd lavi’w.’ Bon. Ki mannyè pawabòl sala sa édé nou jòdi jou? Èben, nou sav la pa wèsté an chay tan avan vyé sistèm sala bout. Alò i kay bon pou nou mandé kò nou: ‘Ès sa mwen ka fè apwézan, èk sa mwen vlé fè an tan pou vini, ka moutwé mwen ka fiksé asou sa ki pli enpòtan-an? Ès sa mwen ka ankouwajé manmay mwen pou fè épi lavi yo ka édé yo fiksé asou bagay ki pli enpòtan? Ès mwen ka sèvi kouway mwen, tan mwen èk lajan mwen pou sanblé wichès pou kò mwen, èben pou fè sé bagay-la ki ni valè an zyé Bondyé?’

14. Koumannyè èspéyans Miki ka édé nou pou wè pouki i enpòtan pou nou chonjé nou ka viv an dènyé tan-an?

¹⁴ Lè nou pwan tan pou katjilé, èk nou wè évidans  ka moutwé nou tou pwé bout sistèm sala, sa ka enflouwansé sé disizyon-an nou ka fè-a. Pou ègzanp, mi sé sa on sésé, non’y sé Miki, di: “Lè mwen kité lékòl, mwen té vlé alé younivèsité pou mwen étidyé zannimo, paski sé sa mwen té vlé fè kon on twavay. Èk mwen osi té vlé wann sèvis kon on piyonnè wéglé, èben wann sèvis koté ki ni on labizwen. Adan sé fwè èk sè-a an kongwigasyon-an té di mwen pou katjilé byen pou wè si i posib pou fè twavay-la mwen di mwen vlé fè-a, èk an menm lè-a, pou piyonnè wéglé èben pou ay wann sèvis koté ki ni labizwen. Yo osi fè mwen chonjé, vyé sistèm sala kay bout touswit, épi an sistèm nèf-la, mwen kay tout tan-an pou étidyé tout sé zannimo-a mwen vlé. Konsa, mwen désidé pou pa alé younivèsité, paski sa té kay pwan twòp tan pou mwen apwann léta-a mwen té vlé apwann-la. Mé pito, mwen chwazi on léta ki té kay pwan mwens tan pou apwann, ki té sa édé mwen jwenn an twavay, èk an menm di tan, ki té kay fè mwen ni asé lajan èk tan pou piyonnè. Wi, m’a té wigwété disizyon-an mwen té fè-a, paski mwen koumansé wann sèvis kon on piyonnè wéglé, èk pli ta, mwen alé Ecuador koté ki ni on labizwen.” Bon, apwézan, Miki èk mawi’y ka wann sèvis an plen an Ecuador, èk mawi’y sé yonn an sé ansyen-an pou sékyout-la.

15. Koumannyè ègzanp Jémz ka moutwé moun sa chanjé? Konsa kisa nou sipozé kontiné fè? (Gadé sé pòtwé-a osi.)

¹⁵ Bon. Sé pa pou nou santi dékouwajé si moun pa antéwésé an bon nouvèl-la. Lavéwité-a sé, moun sa chanjé. Konsidiwé ègzanp Jémz, fwè Jézi. I lévé ansanm épi Jézi. I wè Jézi vini Mèsaya-a. Èk i wè, la pa té ni pyèsonn ki té sa enstwi menm kon Jézi. Mé pou an chay lanné, Jémz pa té swiv Jézi. Sé sèlman apwé Jézi wésisité i vini on disip. Anfen, i vini yonn ki té byen zélé!b (Jan 7:5; Gal. 2:9) Konsa, menm si fanmi nou, èben lòt moun, p’òkò moutwé lentéwé an bon nouvèl-la, pa janmen kwè yo pa kay chanjé. Èk pa janmen doubout di yo konsèné bon nouvèl-la. Chonjé, nou ka viv an dènyé tan-an, èk twavay pwèchman-an tèlman enpòtan, moun bizwen tann li avan i twò ta. Wi, èk sa ou di yo jòdi-a sa touché tjè yo pli ta èk pousé yo pou pwan aksyon. Anfen, nou pa sav kilè i kay touché tjè yo. I pé jis touché tjè yo apwé gwan twibilasyon-an koumansé.c

PA JANMEN PÈD APWÉSIYASYON POU TOUT SA NOU JA APWANN

16. Ki bennéfis ou ja twapé hòd enfòmasyon-an ògannizasyon-an ja pwépawé èspwésman pou piblik-la? (Osi gadé bwèt-la “Sèvi Enfòmasyon-an Pou Édé Lézòt.”)

¹⁶ Adan sé enfòmasyon-an ògannizasyon nou ka potjiwé sé pou moun ki pa konnèt djè konsèné Bib-la. Pou ègzanp, nou ni diskou piblik-la toulé simenn, sèten atik èk vidiyo asou jw.org, èk sèten magazin, èspwèsman pou moun ki pa Tèmwen Jéhova. Mé ès nou menm sa twapé bennéfis hòd yo? Absoliman! Yo ka fè lanmityé nou pou Jéhova vini pli fò, yo ka fòtifyé lafwa nou an Pawòl li, épi yo ka édé nou pou enstwi lavéwité-a ki an Bib-la pli mèyè.​—Sam 19:7.

17. Kisa nou té apwann an atik sala? Ba yon ègzanp.

¹⁷ Pou nou ki an lavéwité-a pou an chay tan, lè nou vini konpwann an bagay an Bib-la pli mèyè sa ka ban nou an chay djèwté. Wannman, nou byen kontan pou sé lavéwité senp-la nou té apwann ki mennen nou pwé Jéhova. Kon nou ja apwann, sé lavéwité sala sa édé nou apwézan. Pou ègzanp, (1) lè nou wisouvwè diwèksyon hòd ògannizasyon-an, èk nou kwè wipinyon nou èben mannyè nou ka fè bagay pli mèyè, nou ni pou abésé kò nou èk chonjé sé Jéhova ki ka diwèkté ògannizasyon-an, sé li ki pli savan èk sé li ki Kwéyatè-a ki ni tout pouvwa. (2) Lè nou èben on moun nou enmen ka èspéyansé twaka, nou bouzwen ni pasyans èk wéfléchi asou wézon-an Jéhova ka kité nou soufè. (3) Lè nou ka désidé mannyè pou sèvi tan nou èk lajan nou, nou ni pou chonjé nou ka viv an dènyé tan-an èk tou talè vyé sistèm sala kay bout. Bon. Si nou fè sé bagay sala Jéhova kay kontiné édé nou wèsté fidèl pou li, i kay édé nou fè tout sa nou pé an sèvis li, èk i kay édé nou fè bon disizyon.