Ès Ou “Ja Apwann Sigwé-a” Pou Satisfè Épi Sa’w Ni?

1. (a) Lè an moun satisfè épi sa i ni, kisa sa vlé di? (b) Menm si an moun satisfè épi sa i ni, ki atitid i pa kay ni?

ÈS OU satisfè épi sa ou ni? Lè an moun satisfè épi sa i ni, i ka ni pli lakontantman, paski i ka apwésyé sé bon bagay-la Jéhova ha ba li. Èk wézilta di sa, i ni pli lajwa èk lapé an lavi’y. Èk i pa ka vini faché paski la ni sèten bagay i pa ni. Kanmenm, menm si an moun satisfè épi sa i ni, sa pa vlé di i kay doubout fè pli mèyè’y bay Jéhova. Pou ègzanp, an Kwityen ki satisfè épi sa i ni, kay kontiné chaché pou diféwan mannyè pou i fè pli an sèvis Jéhova. (Ronm 12:1; 1 Tim. 3:1) Èvèk menm si i p’òkò wisivwè yon ansayman i vlé, i pa ka pèd lajwa’y.

2. Ki mové bagay ki sa fèt si nou pa satisfè épi sa nou ni?

² Bon. Si nou pa satisfè épi sa nou ni, sa pé annékòz nou pou fè disizyon ki pa bon. Pou ègzanp, la ni Kwityen ki ka twavay pou an chay nèditan pou achté bagay yo pa bizwen paski yo pa satisfè épi sa yo ni. Malèwèzman, adan di yo ha jis vòlè lajan èben lòt bagay yo té vlé. Mé poutji yo té fè sa? Pitèt yo té ka katjilé, ‘sa sipozé sa mwen,’ ‘mwen vlé’y apwézan,’ èben ‘mwen kay péyé lajan-an déviwé pli ta.’ Kanmenm, lè an moun vòlè sa ka déplè èk dézonnowé Jéhova. (Pwov. 30:9) Osi, lézòt ha vin dézapwenté paski yo pa té wisivwè yon sèten pwivilaj. Èk a kòz di sa yo jis doubout sèvi Jéhova. (Gal. 6:9) Bon. Pouki yon sèvant Jéhova kay fè an bagay kon sa? Ében pitèt sa sé paski, mizi an mizi, i té ka pèd apwésiyasyon’y pou sa i té ni.

3. Ki bèl lison nou apwann an Filipay 4:11, 12?

³ Nou tout sa apwann mannyè pou satisfè épi sa nou ni. Anfen, zapòt Pòl di, i apwann mannyè pou satisfè épi sa i té ni. (Li Filipay 4:11, 12.) Bon, magwé Pòl ékwi sé pawòl sala padan i té an pwizon, i pa té pèd lajwa’y. Èvèk sa sé paski i té apwann an bagay byen pé moun ha apwann. Èk sa sé; i té apwann sigwé-a pou satisfè épi sa i ni. Wi, èspéyans Pòl ka moutwé a klè, népòt sitiwasyon nou ka èspéyansé, nou osi sa satisfè épi sa nou ni. Bon. Sa pa toujou ézé pou fè, mé nou sa apwann mannyè pou satisfè épi sa nou ni. Alò an atik sala, nou kay diskité déotwa kawaktè nou ni pou dévlòpé, ki kay édé nou apwann sigwé-a pou satisfè épi sa nou ni.

MOUTWÉ APWÉSIYASYON POU SA OU NI

4. Lè nou moutwé apwésiyasyon, ki mannyè sa ka édé nou pou satisfè épi sa nou ni? (1 Tèsalonnika 5:18)

⁴ Bon. Lè nou ni apwésiyasyon sa ka édé nou pou satisfè épi sa nou ni. (Li 1 Tèsalonnika 5:18.) Wi, si nou ka toujou wimèsyé Bondyé paski i ka ban nou sa nou bizwen, nou pa kay bay kò nou tèt cho konsèné sa nou pa ni. Osi, lè nou ka toujou wimèsyé Jéhova pou sé pwivilaj-la nou ka enjwi apwézan, sa kay édé nou pou fè pli mèyè nou an ansayman nou pito nou ka gadé pou lòt ansayman nou simyé fè. Anfen, Jéhova konnèt i enpòtan pou nou moutwé apwésiyasyon. Èk sa sé wézon-an i ka di nou an Pawòl li, pou toujou wimèsyé’y lè nou ka pwédyé! Èvèk lè nou moutwé apwésiyasyon, nou ka èspéyansé lapé an tjè nou èk an lidé nou. Anfen, “lapé sala tèlman bon pyèsonn pa sa fini konpwann li.”​—Filip. 4:6, 7.

5. Ki bon wézon jan Izwayèl té ni pou moutwé Jéhova apwésiyasyon pou sa yo té ni? (Gadé pòtwé-a osi.)

⁵ Bon, plizyè fwa, jan Izwayèl té ka bougonnen kont Jéhova paski yo pa té ni manjé-a yo té ka manjé an péyi Éjip. (Lim. 11:4-6) Sé vwé, lavi an savann sèk-la pa té ézé. Mé si yo té katjilé asou tout sé bagay-la Jéhova té ha fè ba yo, yo té kay moutwé apwésiyasyon pou sa yo ni. Pou ègzanp, yo té sipozé chonjé lè yo té ka soufè kon èslav an Éjip, Jéhova voyé dis «10» malédiksyon asou sé Éjipsyen-an èk i sové yo. Èvèk lè yo té ka kité Éjip Jéhova fè sé Éjipsyen-an ba yo dajan, lò, èk had. (Ègz. 12:35, 36) An plis di sa, lè yo té pwi ant lawmé Féro èk Lanmè Wouj-la, Jéhova ouvè lanmè-a pou yo chapé. Èvèk lè yo té an savann sèk-la, touléjou Jéhova té ka ba yo manna. Konsa yo té ka bougonnen konsèné manjé, pa paski yo pa té ni manjé, mé paski yo pa té ka apwésyé sa yo té ni.

6. Kisa ki sa édé nou pou moutwé apwésiyasyon?

⁶ Mi yonndé bagay nou sa fè ki sa édé nou pou moutwé apwésiyasyon. Pwèmyéman, fè tan chak jou pou katjilé asou sé bon bagay-la ou ka enjwi an lavi’w. Èk ou sa jis ékwi déotwa an sé bagay sala. (Lama. 3:22, 23) Dézyenmman, fè asiwé pou wimèsyé moun lè yo fè an bagay ba ou, sitou Jéhova. (Sam 75:1) Èvèk twazyenmman, chwazi moun ki ka moutwé apwésiyasyon pou bon jan’w. Paski si’w ni jan ki ka moutwé apwésiyasyon, sa kay pousé’w pou moutwé apwésiyasyon tou. (Dito. 1:26-28; 2 Tim. 3:1, 2, 5) Wi, lè nou ka toujou gadé pou òpòtyounité pou di moun mèsi, nou kay ni mwens tan pou katjilé asou sé pwoblenm nou-an, èben asou sé bagay-la nou vlé mé nou pa ni.

7. Kisa ki édé Asha pou moutwé apwésiyasyon, èvèk ki bennéfis i twapé?

⁷ Bon, Ashaa sé an sésé ki ka wèsté Indonesia. I di: “Diwan COVID-19-la, mwen koumansé konpawé sitiwasyon mwen épi sitiwasyon sé fwè èk sè-a an kongwigasyon-an. Èvèk wézilta di sa, mwen vini désatisfè èk mwen pèd djèwté mwen.” (Gal. 6:4) Bon. Kisa ki édé Asha pou chanjé katjil li? I di: “Mwen koumansé katjilé asou sé bon bagay-la Jéhova té ka fè ban mwen chak jou. Èk mwen té ka byen katjilé asou sé bon bagay-la mwen té ka èspéyansé paski mwen té an ògannizasyon’y. Èk a kòz di sa, mwen koumansé wimèsyé Jéhova èk mwen koumansé santi satisfè épi sa mwen té ni.” Alò si’w pèd lajwa’w a kòz di sitiwasyon’w, fè menm kon Asha. Anfen, sa kay édé’w pou moutwé apwésiyasyon èk twapé djèwté’w ankò.

FIKSÉ ASOU SA JÉHOVA VLÉ’W FÈ ÈK ABÉSÉ KÒ’W

8. Kisa ki té wivé Baròk?

⁸ La té ni an tan, Baròk, sigwétè Jérémaya pa té satisfè épi lavi’y. Sé vwé, i té ni yon ansayman ki té byen difisil. Anfen, i té ni pou édé Jérémaya di sé jan Izwayèl-la sé mové bagay-la ki té kay wivé yo a kòz di dézobéyisans yo. Mé pito Baròk fiksé asou sa Jéhova té vlé’y fè, i koumansé katjilé twòp asou sa i menm té vlé fè. Konsa Jéhova sèvi Jérémaya pou di Baròk: ‘Ou ka chaché gwo bagay pou kò’w. Alò doubout fè sa.’ (Jér. 45:3-5) Wi, sé akonmsi Jéhova té ka di Baròk: “Ou ni pou satisfè épi sitiwasyon’w.” Èk Baròk kouté Jéhova, èk yo wèsté bon jan.

9. Lè’y vini pou pwivilaj, kisa nou apwann an 1 Kòrint 4:6, 7? (Gadé sé pòtwé-a osi.)

⁹ Délè an sèvant Jéhova pé santi i sipozé ni an sèten pwivilaj. Èk i pitèt ka santi kon sa paski i ka twavay wèd, i ni ladwès, èben i ha sèvi Jéhova pou an chay lanné. Kanmenm si lézòt twapé pwivilaj sala, kisa ki sa anpéché’y vin faché? Ében i sa wéfléchi asou sa zapòt Pòl ékwi an 1 Kòrint 4:6, 7. (Li’y. ) Wi, sé Jéhova ki ban nou népòt pwivilaj èben talan nou ni. Èk i ban nou sé bagay sala pa paski nou pli bon pasé lézòt, mé paski i enmen nou, èk a kòz di lagwas li.​—Ronm 12:3, 6; Èfés. 2:8, 9.

10. Ki mannyè nou sa apwann mannyè pou abésé kò nou?

¹⁰ Bon. Si nou fè tan pou katjilé asou ègzanp Jézi, èk nou éséyé swiv ègzanp li, nou sa apwann mannyè pou abésé kò nou. Pou ègzanp, Jézi té lavé pyé sé zapòt li-a menm si i té sav i sété Gason Bondyé èk i té ni an chay lotowité. Anfen, zapòt Jan ékwi: “Jézi sav Papa-a té ja ba li pouvwa anho tout bagay. I sav i té sòti an Bondyé èk i té ka viwé alé jwenn Bondyé. . . . èk i koumansé lavé pyé sé disip li-a.” (Jan 13:3-5) Bon, Jézi té sa mandé sé zapòt li-a pou lavé pyé’y, mé Jézi pa té ka katjilé kon sa. Anfen Jézi pa té janmen santi paski i sété Gason Bondyé, i té sipozé ni an lavi ki té ézé, an bèl kay, èvèk an chay lajan. (Louk 9:58) Wi, Jézi té abésé kò’y, konsa i té satisfè èpi sa’y té ni. Èk i kité an bèl ègzanp pou nou.​—Jan 13:15.

11. Lè Dennis abésé kò’y, ki mannyè sa édé’y vin satisfè épi sitiwasyon’y?

¹¹ Dennis, yon fwè ki ka wèsté péyi Holland, ka twavay wèd pou abésé kò’y menm kon Jézi. Tann sa i di: “Délè lè an moun twapé yon ansayman mwen té vlé pou kò mwen, mwen ka vini ti miyèt faché. Lè sa fèt, mwen ka étidyé sijé-a, mannyè pou abésé kò’w. Èvèk asou app-la JW Library^®, mwen ha mété plizyè lévanjil ansanm ki ni pou fè épi sijé sala. Lè mwen fè sa, i ézé pou mwen twapé yo pou mwen sa li yo ankò. Mwen ha osi downlod plizyè diskou konsèné mannyè pou abésé kò nou asou pòtab mwen, èk mwen ka kouté yo souvan.b Konsa, sa ka édé mwen pou chonjé tout bagay mwen ka fè sé pou bay Jéhova laglwa, pito kò mwen. Wi, Jéhova ka ban nou pwivilaj-la pou twavay ansanm épi’y, mé sé li ki ka pousé twavay-la douvan.” Konsa, si nou ka pèd lajwa nou, paski nou pa ni yon ansayman nou vlé, nou ni pou twavay wèd pou abésé kò nou. Anfen sa kay édé nou pou wèsté bon jan épi Jéhova, èk nou kay toujou satisfè épi sitiwasyon nou.​—Jémz 4:6, 8.

KONTINÉ KATJILÉ ASOU SÉ BAGAY-LA JÉHOVA PWONMÈT

12. Kisa Jéhova pwonmèt nou an tan pou vini ki ka édé nou pou satisfè épi sitiwasyon nou? (Izaya 65:21-25)

¹² Bon, lè nou mèdité asou pwonmèt Jéhova pou tan ki ka vini, sa ka édé nou pou satisfè épi sitiwasyon nou. An liv Izaya Jéhova di nou, i ka konpwann lavi an sistèm sala difisil. Mé i ka osi pwonmèt nou ki, i kay tiwé tout sé pwoblenm nou-an. (Li Izaya 65:21-25.) Wi, Jéhova pwonmèt ki, nou kay sòv èk nou kay ni bèl kay. Osi, nou kay vwéman enjwi twavay nou. An plis di sa, nou kay enjwi bèl kalté manjé ki kay nouwi nou. Èk nou pa kay janmen pè an mové bagay kay wivé nou ében ich nou. (Izay. 32:17, 18; Izik. 34:25) Èk nou asiwé tout sé bèl pwonmèt sala kay fèt vwé.

13. (a) Ki difikilté nou ka èspéyansé apwézan? (b) Lè nou katjilé asou èspwa nou pou tan-an ki ka vini, ki mannyè sa ka édé nou?

¹³ Bon, pouki i si tèlman enpòtan pou nou katjilé asou èspwa nou pou tan-an ki ka vini? Ében sa sé paski, nou ka viv an “dènyé tan-an” koté bagay [byen] difisil. (2 Tim. 3:1) Mé kanmenm, toulé jou Jéhova ka ban nou konsèy-la, fòs-la, èk èd-la nou bizwen pou nou sa tjenbé fò. (Sam 145:14) Èk bèl èspwa-a nou ni pou tan-an ki ka vini, ka osi édé nou pou tjenbé fò anba sé difikilté nou-an. Pou ègzanp, pitèt ou ka twavay byen wèd pou potjiwé had, manjé, èk an plas pou fanmi’w wèsté. Mé ès sa vlé di ou kay toujou wèsté pòv? Janmen! Jéhova ha pwonmèt i kay ba’w sa ou bizwen apwézan, èk an Pawadi-a i kay ba’w an chay plis pasé ou bizwen. (Sam 9:18; 72:12-14) Ében pitèt ou ka débat épi an mové maladi, dipwèsyon, ében sé twakasman-an vyéyès ka mennen. Bon, ès sa vlé di ou kay toujou soufè, san pyès djéwizon? Mé non. Paski Jéhova pwonmèt pou tiwé lanmò èk maladi an latè nèf-la. (Wév. 21:3, 4) Wi, lè nou fiksé asou bèl èspwa-a nou ni pou tan-an ki ka vini, sa kay anpéché nou vini faché ében ni tèt cho konsèné sa ki ka wivé nou jòdi. Èvèk menm si moun maltwété nou, èben nou pèd an moun nou enmen an lanmò, ében népòt lòt mové bagay nou pé èspéyansé, nou sa ni lajwa èk lapé. Èvèk sa sé paski nou sav, “tout sé ti twakasman sala la pou an ti tan tousèl” èk an latè nèf-la nou pa kay janmen soufè ankò.​—2 Kòr. 4:17, 18.

14. Kisa nou sa fè pou nou sa konfyé pwonmèt Jéhova pli?

¹⁴ Bon, èspwa nou pou tan-an ki ka vini ka édé nou pou satisfè épi sitiwasyon nou apwézan. Alò, kisa nou sa fè pou nou fòtifyé konfyans nou an pwonmèt Jéhova? Èben menm kon on moun ka mété linèt pou’y sa wè bagay ki lwen pli mèyè, la ni bagay nou sa fè pou fòtifyé èspwa nou pou tan-an ki ka vini. Pou ègzanp, nou sa éséyé wè kò nou an Pawadi-a. Konsa lè nou twakasé paski nou pa ni asé lajan, nou sa imajiné kò nou an Pawadi-a, lè moun pa kay bizwen lajan èk pyèsyonn pa kay pòv. Èvèk si nou ka santi dézapwenté paski nou pa ni an sèten ansayman, nou sa katjilé asou mannyè sé bagay sala pa kay tèlman enpòtan lè nou pawfé an latè nèf-la, èk nou ka enjwi lavi. (1 Tim. 6:19) Sé vwé, i pé difisil pou nou katjilé asou sé pwonmèt sala, paski nou ni tèlman tèt cho apwézan. Kanmenm lè nou fè éfò-a pou katjilé asou latè nèf-la, sa kay anpéché nou fiksé asou pwoblenm nou.

15. Kisa nou apwann an èspéyans Kristal?

¹⁵ Bon, nou sa apwann an chay an èspéyans Kristal.c I sé madanm menm Dennis-la nou té palé konsèné-a an pawagwaf wonz «11». Kristal di: “Mwen si tèlman malad mwen pa sa maché, èk mwen bouzwen an ‘wheelchair’. Osi pwèskè tout tan-an mwen an kabann mwen, èk mwen an penn toulé jou. Anfen, pa twò lontan dòktè-a di mwen, mwen pa kay vini pli mèyè. Mé mannyè-a i ka gadé tan-an ki ka vini èk mannyè-a mwen ka wè’y, diféwan toubonnman. Wi, mwen ka fiksé asou èspwa mwen, èk sa ka ban mwen lapé an tjè mwen èk an lidé mwen. Sé vwé, mwen ka èspéyansé an chay pwoblenm, mé toutalè mwen kay enjwi an bèl lavi an latè nèf-la!”

“MOUN KI KA WÈSPÈKTÉ [JÉHOVA] KAY JWENN TOUT SA YO BIZWEN”

16. Pouki Wa David té sa ékwi “moun ki ka wèspèkté [Jéhova] kay jwenn tout sa yo bizwen”?

¹⁶ Yon sèvant Bondyé ki satisfè épi sa’y ni kay ni pwoblenm osi. Pou ègzanp, katjilé asou sé bagay-la ki té wivé Wa David. Twa «3» an sé ich li-a mò, moun manti asou’y èk di i fè mové bagay. Osi, adan an sé jan’y-lan twayi’y, èk yon wa té ka kouwi dèyè’y pou plizyè lanné pou tjwé’y. Mé magwé sé difikilté sala, David té ni lapé èk djèwté. Anfen i di: “Moun ki ka wèspèkté [Bondyé] kay jwenn tout sa yo bizwen.” (Sam 34:9, 10) Bon. Pouki David té sa di sa? Èben sa sété paski, David té konnèt magwé Jéhova té kité’y èspéyansé pwoblenm, Jéhova té kay toujou ba li sa’y té bizwen. (Sam 145:16) Èvèk menm kon David, nou osi sa ni konfyans-lan ki, Jéhova kay édé nou pou wèsté fidèl lè nou ka èspéyansé difikilté. Konsa népòt sitiwasyon nou adan, nou sa ni lapé èk djèwté.

17. Pouki ou vlé apwann sigwé-a pou satisfè épi sa’w ni?

¹⁷ Bon. Jéhova vlé’w satisfè épi sa’w ni. (Sam 131:1, 2) Konsa fè tout sa’w pé pou apwann sigwé-a pou satisfè épi sa’w ni. Alò fè éfò-a pou toujou fè sé twa «3» bagay sala: (1) Toujou moutwé apwésiyasyon pou sa’w ni, (2) toujou fiksé asou sa Jéhova vlé’w fè èk abésé kò’w, èvèk (3) kontiné katjilé asou sé bagay-la Jéhova pwonmèt. Anfen si’w fè sé bagay sala, ou kay sa di: “Mwen ja apwann pou mwen satisfè èk sa mwen ni.”—Filip. 4:11.