Ki Mannyè Nou Sa Ba Lézòt Bon Konsèy?

1. Ki moun ki sipozé bay lézòt konsèy? Èspliké.

BON, ès ou kontan bay moun konsèy? Ében adan moun ka twapé’y ézé pou bay lézòt konsèy, mé pou lézòt moun i difisil pou yo fè sa. Kanmenm nou tout ni pou bay lézòt konsèy délè, ki nou enmen fè sa opa. Alò, pouki nou ka di sa? Ében sa sé paski, sa sé yon mannyè nou sa moutwé sé fwè èk sè-a lanmityé. Anfen Jézi di, nou ni pou moutwé yonn a lòt lanmityé si nou sé vwéman disip li. (Jan 13:35) Osi, Bib-la ka di lè nou bay lézòt konsèy, nou ka vansé pli pwé yonn a lòt.​—Pwov. 27:9.

2. Kisa sé ansyen-an ni pou konnèt mannyè pou fè, èk pouki? (Gadé osi bwèt-la “Mannyè Sé Ansyen-an Ka Bay Konsèy An Mitin-lan An Mitan Simenn-lan.”)

² Sé ansyen-an ni pou konnèt mannyè pou bay lézòt bon konsèy. Èk sa sé paski, sé Jéhova èk Jézi ki ba yo wèskonsabilité-a pou gadé apwé kongwigasyon-an. (1 Pita 5:2, 3) Bon, yonn an sé mannyè-a yo ka bay bon konsèy, sé lè yo bay diskou ki ni konsèy ki bazé asou Pawòl Bondyé. Osi, si yo wéyalizé an fwè èben an sè bizwen konsèy yo pa ka tjébé dèyè pou ba li konsèy-la. Èk yo ka osi édé sé fwè èk sè-a ki kité Jéhova pou witounen an kongwigasyon-an. Alò, ki mannyè sé ansyen-an, èk anfen nou tout sa bay lézòt bon konsèy?

3. (a) Ki mannyè nou sa apwann mannyè pou bay lézòt bon konsèy? (Izaya 9:6; gadé osi bwèt-la “Swiv Ègzanp Jézi Lè Nou Ka Ba Moun Konsèy.”) (b) Kisa nou kay diskité an atik sala?

³ Nou sa apwann mannyè pou bay bon konsèy, lè nou étidyé mannyè moun an Bib-la té ka bay konsèy, sitou Jézi. Paski la pa té ni an lòt moun asou latè-a ki té sa bay konsèy pli mèyè pasé Jézi. Anfen an Bib-la, i ni tit-la ‘Konsèyè Èstòdinè’. (Li Izaya 9:6.) Bon, an atik sala, nou kay diskité sa nou sa fè lè an moun mandé nou pou konsèy, èk sa nou sa fè lè nou ni pou bay an moun konsèy menm si i pa mandé nou pou konsèy-la. Èvèk nou kay osi diskité, pouki i bon pou bay konsèy a bon lè-a, èk adan an bon mannyè.

LÈ AN MOUN MANDÉ NOU POU KONSÈY

4-5. Avan nou bay an moun konsèy, ki kèstyon nou ni pou mandé kò nou? Bay yon ègzanp.

⁴ Lè an moun mandé’w pou konsèy ou pé santi kontan moun-lan ka konfyé’w, èk ou pé vlé édé’y la menm. Kanmenm, pwèmyé bagay-la ou ni pou fè sé pou mandé kò’w kèstyon sala. ‘Ès mwen ni asé èspéyans èben asé enfòmasyon asou sitiwasyon-an pou bay moun-lan konsèy?’ Délè pli mèyè mannyè-a pou édé moun-lan, sé pou twapé an lòt moun ki ni èspéyans ében ki konnèt pli konsèné sitiwasyon-an.

⁵ Pou ègzanp, ann’ di ou ni an bon jan ki byen malad. I di’w i ha koumansé fè wichach asou sé diféwan twètman-an ki avélab, èk i ka mandé’w pou lopinyon’w konsèné ki twètman ou kwè ki pli mèyè. Bon. Pitèt ou simyé an sèten twètman, mé chonjé ou pa an dòktè, èk ou p’òkò wisivwè pyès entwennman asou maladi sala. Alò, pli mèyè mannyè-a pou édé jan’w, sé pou édé’y twapé an moun ki konnèt mannyè pou twété maladi sala.

6. Kisa i bon pou nou fè avan nou ba moun konsèy, èk pouki?

⁶ Lè an moun mandé nou pou konsèy asou an sèten bagay, menm si nou sa ba yo bon konsèy, nou pé chwazi pou pwan an ti tan avan nou fè sa. Èvèk sa sé paski Pwovèb 15:28 ka di, ‘an moun ki dwèt ka wéfléchi an tjè’y avan’y wéponn.’ Alò menm si nou kwè nou konnèt sa pou di, i kay bon pou nou fè wichach, pwédyé, èk katjilé asou sa nou kay di avan nou ba moun-lan konsèy-la. Bon. Lè nou fè sé bagay sala, nou kay ni asiwans-lan ki, konsèy-la nou ka bay kay plè Jéhova. Èvèk nou kay wè sa a klè kon nou kay ègzanminé ègzanp pwofèt Nafann.

7. Kisa ou apwann an ègzanp pwofèt Nafann?

⁷ Lè Wa David té di pwofèt Nafann i té vlé bati an tanp pou Jéhova, la menm pwofèt Nafann di’y i sa bati tanp-lan. Kanmenm, Nafann té sipozé pwan an ti tan pou mandé Jéhova sa i té vlé David fè avan i wéponn David, paski Jéhova pa té vlé David bati tanp-lan. (1 Kw. 17:1-4) Bon. Ègzanp sala ka moutwé nou a klè, lè an moun mandé nou pou konsèy, i kay bon pou nou “pa pwésé palé” menm kon Jémz 1:19 ka di.

8. Pou ki lòt wézon nou vlé byen katjilé avan nou ba an moun konsèy?

⁸ Bon. An lòt wézon poutji nou ni pou byen katjilé avan nou ba an moun konsèy, sé paski si an mové bagay fèt a kòz di konsèy-la nou ba moun-lan, nou kay twapé blanm-lan osi. Alò, nou vlé toujou byen katjilé avan nou bay an moun konsèy.

MANNYÈ POU BAY KONSÈY LÈ MOUN-LAN PA MANDÉ NOU POU KONSÈY

9. Kisa sé ansyen-an ni pou asiwé avan yo ba an moun konsèy? (Galécha 6:1)

⁹ Délè lè an fwè ében an sè fè an lèwè, sé ansyen-an ka ba li konsèy. (Li Galécha 6:1.) Pou ègzanp, pitèt moun-lan ka pwan an mové chimen ki kay annékòz li pou fè an péché ki gwav. Wi, sé ansyen-an vlé édé moun-lan pou kontiné sèvi Jéhova, èk pou viv pou tout tan. (Jémz 5:19, 20) Kanmenm, pou yo bay moun-lan bon konsèy, yo ni pou fè asiwé moun-lan ka vwéman fè an lèwè. Paski menm si moun-lan ka fè an bagay yo menm pa té kay fè, sa pa vlé di moun-lan ka péché. (Ronm 14:1-4) Kanmenm, si sé ansyen-an wéyalizé moun-lan ka vwéman fè an bagay ki sa donmajé wilasyon’y épi Jéhova, ki mannyè yo sa ba li bon konsèy?

10-12. Kisa sé ansyen-an ni pou fè lè yo ni pou bay an moun konsèy ki pa mandé yo pou konsèy? Bay an ègzanp. (Gadé sé pòtwé-a osi.)

¹⁰ Bon. I pa ézé pou sé ansyen-an bay an moun ki pa mandé yo pou konsèy, konsèy. Mé pouki? Èben sa sé paski zapòt Pòl di moun-lan pitèt pa menm sav i ka pwan an mové chimen. Alò avan sé ansyen-an bay moun-lan konsèy, la ni bagay yo kay ni pou fè ki kay fè’y pli ézé pou moun-lan aksèpté konsèy-la.

¹¹ Katjilé asou ègzanp sala: Ann’ di an moun vlé planté gwenn tanmadòz, mé tè-a wèd. Konsa la ni déotwa bagay i kay ni pou fè avan i koumansé planté sé gwenn-lan. Pwèmyéman i kay ni pou pwépawé tè-a. Apwé sa, i kay planté sé gwenn tanmadòz-la. Èk finalman, i kay wouzé sé gwenn-lan pou sé plan-an pwofité. An menm mannyè-a la ni bagay sé ansyen-an sa fè ki kay fè’y pli ézé pou moun-lan askèpté konsèy-la. Pou ègzanp, sé ansyen-an ni pou pwépawé tjè moun-lan. Èk yo ka fè sa lè yo chwazi an lè ki apwopwiyab pou di moun-lan yo enmen’y èk la ni an bagay yo vlé palé épi’y konsèné. Èk si moun-lan sav sé ansyen-an janti èk yo ni lanmityé, sa kay fè’y pli ézé pou’y aksèpté konsèy-la.

¹² An lòt bagay sé ansyen-an sa fè pou pwépawé tjè moun-lan pou aksèpté konsèy-la, sé pou fè moun-lan chonjé tout moun ka fè lèwè. Konsa nou tout bizwen konsèy délè. (Ronm 3:23) Osi adan an mannyè ki janti èk wèspèktab, sé ansyen-an kay sèvi sé lévanjil-la pou fè moun-lan wè lèwè-a i ka fè-a. Bon, dépi moun-lan aksèpté i ka fè an lèwè. Sé ansyen-an kay “planté gwenn-lan”, sa vlé di, yo kay édé moun-lan wè a klè sa i ni pou fè pou fè pli mèyè. Èk finalman, sé ansyen-an kay “wouzé” gwenn-lan, sa vlé di an bout konmézasyon-an yo kay fè’y pli ézé pou moun-lan aksepté konsèy-la lè yo aplodi’y pou sé bon bagay-la i ka fè, èk lè yo pwédyé épi’y.​—Jémz 5:15.

13. Kisa sé ansyen-an sa fè pou édé moun-lan byen konpwann konsèy-la?

¹³ Délè, menm si sé ansyen-an bay an moun bon konsèy, i ka difisil pou moun-lan byen konpwann konsèy-la. Konsa, kisa sé ansyen-an sa fè pou édé moun-lan byen konpwann konsèy-la? Èben adan an mannyè ki janti yo sa mandé moun-lan déotwa kwèsyon pou fè asiwé i ka byen konpwann mannyè pou swiv konsèy-la.​—Éklé. 12:11.

BAY KONSÈY A BON LÈ-A ÈK ADAN AN BON MANNYÈ

14. Pouki i pa bon pou bay konsèy lè nou faché?

¹⁴ Bon, nou pyès pa pawfé, alò délè nou kay fè ében di bagay ki kay ofwansé lézòt. (Kòl. 3:13) Anfen, Bib-la ka di, délè an moun pé fè èben di an bagay ki sa fè nou faché. (Èfés. 4:26) Kanmenm nou pa vlé bay konsèy lè nou faché. Pouki? Èben sa sé paski Jémz 1:20 ka di: “An moun ki faché pa sa fè sa ki ka plè Bondyé.” Wi, si nou bay konsèy lè nou faché, nou sa fè sitiwasyon-an pli mové. Bon, sa pa vlé di nou pa ni pou di moun-lan ki fè nou faché-a mannyè-a nou ka santi. Kanmenm, nou ni pou èspéyé jis tan kòlè nou bésé avan nou palé épi moun-lan. Anfen, nou sa apwann an bèl lison an ègzanp Ilayou, an nonm ki té bay Jòb bon konsèy.

15. Kisa nou sa apwann an ègzanp Ilayou? (Gadé pòtwé-a osi.)

¹⁵ Pou plizyè jou, Jòb té ka fè défans kò’y kont sé mansonj-lan sé konpany li-a té ka di kont li. Èk tout tan sala Ilayou té ka kouté Jòb épi i té ka santi lapenn ba li. Mé kanmenm, padan Jòb té ka fè défans kò’y, i di déotwa bagay konsèné Jéhova ki pa té vwé, èvèk sa fè Ilayou byen faché. Kanmenm, Ilayou èspéyé jis tan kòlè’y bésé pou bay Jòb konsèy adan an mannyè ki té janti èk wèspèktab. (Jòb 32:2; 33:1-7) Bon, nou ka apwann an bèl lison an ègzanp Ilayou, èk lison-an sé sa: Lè nou ka bay moun konsèy i bon pou nou vini kam avan, èk nou vlé fè sa épi lanmityé èk wèspé.​—Éklé. 3:1, 7.

KONTINÉ BA MOUN KONSÈY ÈK AKSÈPTÉ’Y OSI

16. Ki lison ou apwann an Sam 32:8?

¹⁶ Lévanjil-la atik sala bazé asou ka di nou, ‘Jéhova ka ban nou konsèy èk i ka kité zyé’y asou nou’. (Li Sam 32:8.) Wi, Jéhova ka pwonmèt pou ban nou konsèy, èk pou kontiné édé nou swiv konsèy-la. Èk nou vlé swiv ègzanp Jéhova. Konsa lè nou ka ba moun konsèy, nou vlé kontiné ankouwajé yo èk édé yo fè bon disizyon.

17. Ki mannyè sé ansyen-an ka fè nou santi lè yo ban nou konsèy ki bazé asou Bib-la? (Izaya 32:1, 2)

¹⁷ Jòdi plis pasé avan, nou bizwen ba moun bon konsèy, èk nou bizwen aksèpté’y osi. (2 Tim. 3:1) Bon, lè sé ansyen-an ban nou konsèy ki bazé asou Bib-la, sa ka wéfléchi nou ‘menm kon an ti lawivyè adan an savann sèk’. Wi, yo ka ankouwajé nou èk édé nou pou kontiné sèvi Jéhova. (Li Izaya 32:1, 2.) Èk nou ka osi wimèsyé Jéhova pou sé fwè èk sè-a ki pa ka pè pou ban nou konsèy-la nou bizwen. Anfen, konsèy yo bèl ‘menm kon ponm lò yo mété adan an pla ki fèt an dajan’. (Pwov. 25:11) Konsa, annou tout kontiné apwann mannyè pou ba moun bon konsèy èk mannyè pou aksèpté’y osi.