Pouki Nou Sipozé Mandé Pou Konsèy?

1. Ki mannyè nou sa fè bon disizyon pou nou sa twapé bon wézilta? (Pwovèb 13:10; 15:22)

BON. Nou tout vlé fè bon disizyon ki kay mennen bon wézilta. Mé kanmenm, Pawòl Bondyé ka di nou a klè pou sa sa fèt, nou ni pou mandé pou konsèy.​—Li Pwovèb 13:10; 15:22.

2. Kisa Jéhova pwonmèt pou fè ban nou?

² Bon, pli mèyè moun-lan ki sa ban nou konsèy sé Papa nou Jéhova. Konsa nou vlé toujou mandé’y pou ban nou lasajès pou fè bon disizyon. Èk i pwonmèt pou édé nou. Anfen, an Sam 32:8 i di: “Mwen kay baʼw konsèy èk mwen kay kité zyé mwen asouʼw.” Wi, Jéhova pwonmèt pou ban nou konsèy-la nou bizwen, èk pou édé nou swiv li an lavi nou.

3. Ki kèstyon nou kay diskité an atik sala?

³ An atik sala nou kay sèvi Pawòl Bondyé pou édé nou wéponn sé kat «4» kèstyon sala: (1) Ki kawaktè ki kay édé mwen twapé bennéfis hòd bon konsèy? (2) Ki moun ki sa ban mwen bon konsèy? (3) Ki mannyè mwen sa moutwé mwen vwéman vlé konsèy? Èk (4), poutji mwen pa ni pou mandé lézòt moun pou fè disizyon ban mwen?

KI KAWAKTÈ KI KAY ÉDÉ MWEN TWAPÉ BENNÉFIS HÒD BON KONSÈY?

4. Pou twapé bennéfis hòd bon konsèy, ki kawaktè nou bizwen?

⁴ Si nou vlé twapé bennéfis hòd bon konsèy nou ni pou abésé kò nou. Chonjé nou pa konnèt tout bagay, konsa, délè nou bizwen èd hòd lézòt. Osi, si nou pa abésé kò nou, Jéhova pa kay sa édé nou. Èk lè nou tann konsèy-la an Pawòl Bondyé, konsèy-la kay antwé yon zòwèy èk sòti an lòt-la. (Mayk. 6:8; 1 Pita 5:5) Kanmenm, si nou abésé kò nou, nou kay toujou kouté èk swiv konsèy-la ki an Bib-la èk twapé bennéfis.

5. Ki diféwan bagay David té fè ki té sa fè’y ni lògèy?

⁵ Nou sa apwann an chay bon bagay an ègzanp David. Paski magwé David té fè an chay bon bagay i pa té ni lògèy. Pou ègzanp, plizyè lanné avan’y vini wa, moun té ha sav i té sa jwé mizik byen. Anfen, Wa Sòl té mandé’y pou jwé ba li. (1 Sm 16:18, 19) Osi, Jéhova té chwazi David pou vini lòt wa-a, èk i ba li lisentèspwi’y, konsa David té ni an chay pouvwa. (1 Sm 16:11-13) An plis di sa, moun té ka ba’y laglwa paski i té ka tjwé lèlmi yo, tèl kon Golayèf. (1 Sm 17:37, 50; 18:7) Alò, si David té ni lògèy i té kay katjilé i pa té bizwen konsèy hòd lézòt. Mé kanmenm, David pa té ni lògèy, i té ka toujou abésé kò’y.

6. Ki mannyè nou sav David té vlé moun ba li konsèy? (Gadé pòtwé-a osi.)

⁶ Apwé David vin wa, i chwazi jan ki té sa ba li konsèy. (1 Kw. 27:32-34) Anfen avan i vini wa, i té toujou pawé pou kouté lè lézòt té ka ba li konsèy. Èk, i aksèpté konsèy pa sèlman hòd nonm, mé osi hòd an madanm yo ka kwiyé Abigél. Non, David pa té kon Nébal mawi Abigél. Nonm sala pa té ni pyès wèspé, i té engwa, èk i té plen lògèy. Mé David té ka toujou abésé kò’y, èk i swiv bon konsèy-la Abigél ba li, èk sa anpéché’y fè an gwo lèwè.​—1 Sm 25:2, 3, 21-25, 32-34.

7. Ki lison nou sa apwann hòd ègzanp David? (Ékléziyastis 4:13) (Gadé sé pòtwé-a osi.)

⁷ Bon, nou sa apwann bèl lison hòd ègzanp David. Pou ègzanp, nou pé konnèt mannyè pou fè an bagay byen, ében nou pé ni lotowité anho lézòt. Kanmenm nou pa janmen vlé kwè nou konnèt tout bagay, ében nou pa bizwen konsèy. Wi, menm kon David nou vlé toujou pawé pou kouté bon konsèy hòd népòt moun. Èk sa kay anpéché nou fè an chay gwo lèwè ki kay ban nou èk lézòt lapenn.—Li Ékléziyastis 4:13.

KI MOUN KI SA BAN MWEN BON KONSÈY?

8. Pouki Jonatann té sa bay David bon konsèy?

⁸ Bon, mi an lòt bèl lison nou sa apwann hòd ègzanp David. David té ka kouté konsèy hòd moun ki té ni an bon wilasyon épi Jéhova èk ki té byen konnèt sitiwasyon’y. Pou ègzanp, lè David té vlé konnèt si Wa Sòl té vlé fè lapé épi’y, i kouté konsèy Jonatann, gason Sòl. Èk pouki Jonatann té sa bay David bon konsèy? Ében sa sé paski, Jonatann té ni an bon wilasyon épi Jéhova, èk i té osi konnèt Sòl byen. (1 Sm 20:9-13) Bon. Ki mannyè nou sa fè menm kon David?

9. Ki moun nou sa mandé pou konsèy? Bay yon ègzanp. (Pwovèb 13:20)

⁹ Lè nou bizwen konsèy, nou ni pou mandé an moun ki ni an bon wilasyon épi Jéhova, èk ki konnèt konsèné sitiwasyon nou byen.a (Li Pwovèb 13:20.) Pou ègzanp, ann’ di an jenn fwè ka gadé pou an sè pou mayé. Sé vwé, yonn an sé jan’y-lan ki pa mayé sa ba li bon konsèy ki bazé asou Bib-la. Mé fwè-a pitèt kay twapé pli bon konsèy, si’y mandé an fwè èk sè ki mayé èk ki ka sèvi Jéhova pou plizyè lanné, èk ki osi konnèt li byen. Èk sa sé paski, yo pa kay sèlman édé’y swiv pwensip Bib, mé yo kay osi di’y sa yo apwann an mawiyaj yo.

10. Kisa nou kay diskité apwézan?

¹⁰ Bon. Nou ha diskité dé «2» kawaktè nou bizwen pou nou sa twapé bennéfis hòd bon konsèy, èk ki moun ni pou mandé pou konsèy. Konsa apwézan nou kay diskité ki mannyè nou sa moutwé nou vwéman vlé konsèy, èk pouki nou pa ni pou mandé moun pou fè disizyon ban nou.

KI MANNYÈ MWEN SA MOUTWÉ MWEN VWÉMAN VLÉ KONSÈY?

11-12. (a) Lè nou ka mandé moun pou konsèy, kisa nou pa vlé fè? (b) Kisa Wa Réyobowanm té fè lè’y té ni pou fè an gwo disizyon?

¹¹ Délè an moun ka mandé lézòt pou konsèy, mé i ha fè lidé’y konsèné sa’y vlé fè, konsa i ka sèlman chaché pou moun ki kay dakò épi disizyon’y. Bon, sa sé an bagay nou pa janmen vlé fè, paski sa kay moutwé nou pa vwéman vlé konsèy. Anfen, la ni an bèl lison nou sa apwann an ègzanp Wa Réyobowanm.

¹² Bon, apwé Sòlomonn mò, gason’y Réyobowanm vini wa. A lè sala, sé moun-lan té ni an chay bon bagay, mé yo té santi Sòlomonn té fè yo twavay twò wèd. Konsa, yo mandé Réyobowanm pou fè twavay yo ti miyèt pli ézé. Alò, Réyobowanm mandé yo pou ba li twa «3» jou, pou i fè an disizyon. Pwèmyé bagay-la Réyobowanm fè, sé pou mandé sé nonm-lan ki té an laj ki té wédé Sòlomonn pou konsèy. Èk sété an bon bagay. (1 Wa 12:2-7) Kanmenm, i widjèkté konsèy yo. Mé pouki i fè sa? Ès i té ha désidé sa’y té vlé fè, èk i té ka annèk gadé pou moun ki té kay dakò épi disizyon’y? Ében si sé sa i té gadé pou, lè’y mandé sé pli jenn jan’y-lan pou konsèy èk yo di’y sa’y té vlé tann, sé pa dé kontan i té kontan. (1 Wa 12:8-14) Alò Réyobowanm di sé moun-lan sa sé jan’y-lan té di’y. Èk wézilta di sa; sé moun-lan tounen kont li, èk yo chwazi an lòt wa, épi dépi tan sala sé twaka tousèl Réyobowanm té ni.​—1 Wa 12:16-19.

13. Ki mannyè nou sa sav, si nou vwéman vlé konsèy?

¹³ Bon, kisa nou sa apwann an ègzanp Réyobowanm? Ében nou pa vlé mandé moun pou konsèy èk nou ha désidé sa nou kay fè. Osi nou vlé toujou pawé pou kouté lè moun ban nou konsèy. Mé, ki mannyè nou sa sav si nou vwéman vlé konsèy? Ében nou sa mandé kò nou kwèsyon sala: ‘Lè mwen mandé moun pou konsèy, ès mwen ka widjèkté konsèy-la si yo pa di mwen sa mwen vlé tann?’

14. Lè moun ban nou konsèy, kisa nou vlé chonjé? Bay yon ègzanp. (Gadé pòtwé-a osi.)

¹⁴ Ann’ di yon moun ofè an fwè an twavay ki ka péyé byen. Kanmenm, avan i aksèpté twavay-la i mandé yon ansyen pou konsèy. Fwè-a di ansyen-an, si’y aksèpté twavay-la i kay ni pou kité fanmi’y souvan pou plizyè simenn. Konsa, ansyen-an édé fwè-a chonjé pwensip Bib ki ka moutwé, pli gwo wèskonsabilité-a i ni, sé pou édé fanmi’y ni an bon wilasyon épi Jéhova. (Èfés. 6:4; 1 Tim. 5:8) Kanmenm, fwè-a pa enmen sa ansyen-an di’y, alò i kontiné mandé lézòt moun an kongwigasyon-an pou konsèy, jis tan i jwenn an moun ki ankouwajé’y pou aksèpté twavay-la. Èk sé sa i té vlé tann. Bon. Ès fwè-a té vwéman vlé konsèy? Ében ès i té ha fè disizyon’y, èk i té ka annèk gadé pou an moun ki té kay di’y sa’y vlé tann? Chonjé tjè nou byen twèt. (Jér. 17:9) Konsa, délè, konsèy-la nou pa enmen-an, sé konsèy-la nou vwéman bizwen.

POUTJI MWEN PA NI POU MANDÉ LÉZÒT MOUN POU FÈ DISIZYON BAN MWEN?

15. Kisa nou pa vlé fè, èk pouki?

¹⁵ Jéhova vlé nou fè disizyon pou kò nou. (Gal. 6:4, 5) Bon. Kon nou ha diskité, avan nou fè an disizyon, i bon pou nou chaché pou konsèy an Pawòl Bondyé èk hòd moun ki ha moutwé yo ni an bon wilasyon épi Jéhova. Kanmenm, nou pa vlé mandé moun pou fè disizyon ban nou. Konsa, nou pa vlé mandé moun: “Kisa ou té kay fè si ou té an sitiwasyon mwen?” Èk nou pa annèk vlé fè menm disizyon épi lòt moun san nou byen katjilé asou disizyon-an.

16. Ki disizyon Kwityen an Kòrint té ni pou fè konsèné vyann moun té ofè imaj? (1 Kòrint 8:7; 10:25, 26)

¹⁶ Kwityen an Kòrint té ni pou fè an disizyon konsèné si pou manjé vyann moun té ofè imaj opa. Bon, an 1 Kòrint 8:4, zapòt Pòl té di sé Kwityen-an: “Nou sav an imaj sé an fo bondyé. Épi nou sav osi, sé yon sèl Bondyé ki ni pou vwé.” Konsa, adan Kwityen désidé yo té sa manjé vyann moun té ofè imaj yo té ka vann an laplas-la. Kanmenm, lézòt Kwityen désidé yo pa té sa manjé vyann sala pou lapéti konsyans yo. (Li 1 Kòrint 8:7; 10:25, 26.) Bon, sa sété an disizyon chak moun té ni pou fè pou kò yo. Konsa, zapòt Pòl pa janmen di sé Kwiyen-an pou fè disizyon bay lézòt, èben pou fè sa lézòt fè, paski ‘chak moun té ni pou wéponn tèt li douvan Bondyé’.—Ronm 14:10-12.

17. Kisa ki sa fèt si nou annèk fè sa lézòt ka fè? Bay yon ègzanp. (Gadé sé pòtwé-a osi.)

¹⁷ Bon. Ki mannyè nou sa ni an sitiwasyon menm kon sé Kwityen-an an Kòrint? Èben, annou konsidiwé ‘blood fractions’ kon yon ègzanp.b Sé vwé, nou pé twapé sijé sala difisil pou konpwann. Kanmenm, lè’y vini pou ‘blood fractions’, nou ni pou fè disizyon-an pou kò nou menm, si nou kay aksèpté’y opa. Èvèk sa sé paski, nou chak wèskonsab pou wilasyon nou épi Jéhova. (Ronm 14:4) Chonjé, si nou annèk fè sa lézòt moun fè, nou pa kay janmen ni lasajès. Sèl mannyè pou nou twapé lasajès, sé lè nou fè disizyon ki bazé asou pwensip Bib. (Hib. 5:14) Alò, avan nou fè an disizyon nou vlé fè wichach nou. Èk si nou bizwen èd pou wè mannyè pou sèvi pwensip Bib pou édé nou épi sitiwasyon nou, nou sa mandé moun ki ha moutwé yo ni an bon wilasyon épi Jéhova pou èd.

KONTINÉ MANDÉ POU KONSÈY

18. Kisa Jéhova ha fè ban nou?

¹⁸ Jéhova ha moutwé an chay konfyans an nou, paski i ka pèwmité nou pou fè disizyon pou kò nou menm. Kanmenm, kon an bon Papa, Jéhova ka édé nou pou fè sa. Pou ègzanp, i ka ban nou Bib-la èk i ka osi ban nou bon jan ki sa édé nou wézonnen asou pwensip Bib. (Pwov. 3:21-23) Kanmenm, ki mannyè nou sa moutwé Jéhova nou ka apwésyé tout sa i ka fè ban nou?

19. Ki mannyè nou sa kontiné fè tjè Jéhova kontan?

¹⁹ Pawan ka kontan lè yo wè ich yo pwofité èk vini sèvant Jéhova ki savan èk ki vlé édé lézòt. Èk an menm mannyè-a, Jéhova ka kontan lè’y wè nou ka kontiné fòtifyé wilasyon nou épi’y, lè’y wè nou ka mandé lézòt pou konsèy, èk lè’y wè nou ka fè bon disizyon ki ka moutwé nou enmen’y.