Kisa Ki Sa Édé’w Fè On Bon Disizyon Lè’y Vini Pou Mawiyaj?

1-2. Bay ègzanp ki ka moutwé, sé pa tout moun ki ka ni menm èspéyansé-lan, lè yo ka pasé tan ansanm pou vini konnèt yonn a lòt pli mèyè.

LÈ dé (2) moun ka pasé tan ansanm pou vini konnèt yonn a lòt pli mèyè, sa sé on bagay ki sa pòté an chay djèwté. Anfen, si’w ja ka pasé tan épi on moun pou vini konnèt yo pli mèyè, san dout, ou vlé enjwi tan sala. Èk sa pa anyen ki dwòl, paskè an chay moun ka enjwi tan sala. Pou ègzanp, yon sè hòd péyi Ethiopia yo ka kwiyé Tsiona di: “Tan-an mwen épi mawi mwen pasé ansanm pou konnèt yonn a lòt pli mèyè, sé yonn an sé tann-an mwen enjwi pli an lavi mwen. Diwan tan sala, nou té ka diskité bagay ki té byen enpòtan, mé nou té ka osi wi épi yonn a lòt. Lè mwen wéyalizé mwen té jwenn on moun mwen té enmen, épi moun-lan té enmen mwen osi, mwen té tèlman kontan.”

² Kanmenm, sé pa tout moun ki ka ni menm èspéyans-lan sè Tsion té ni-an. Pou ègzanp, yon fwè hòd péyi Netherlands yo ka kwiyé Alessio di: “I sété on plézi pou mwen vini konnèt madanm mwen pli mèyè, mé nou osi té ni tjalinj diwan tan sala.” Konsa, an atik sala nou kay diskité déotwa tjalinj moun sa èspéyansé diwan tan sala, èk nou kay gadé yonndé pwensip Bib ki sa édé yo. Osi, nou kay konsidiwé kisa nou sa fè pou sipòté fwè èk sè ki ka pasé tan ansanm, pou vini konnèt yonn a lòt pli mèyè.

POU KI WÉZON DÉ (2) MOUN KA PASÉ TAN ANSANM?

3. Pou ki wézon dé (2) moun ka pasé tan ansanm? (Pwovèb 20:25)

³ Bon, wézon-an dé (2) moun ka pasé tan ansanm, sé pou yo vini konnèt yonn a lòt pli mèyè, èvèk sa ka édé yo pou désidé si sé pou mayé yonn a lòt opa. Mé, lè dé (2) moun ka mayé, yo ka fè on sèman douvan Jéhova ki, yo kay enmen èk wèspèkté yonn a lòt pou tout lavi yo. San dout ou kay dakò, i byen enpòtan pou dé (2) moun katjilé byen avan yo fè sèman sala. Anfen, Bib-la ka moutwé, nou bizwen pwan tan pou katjilé byen avan nou fè on sèman. (Li Pwovèb 20:25.) Konsa wi, lè dé (2) moun ka vini konnèt yonn a lòt pli mèyè, sa sé on bagay ki sa pòté an chay djèwté, mé i bon pou chonjé, sa sé on bagay ki byen sèwyé osi. Èvèk wi, sé dé (2) moun-lan pé désidé pou pa mayé yonn a lòt. Mé chonjé, wézon-an ou ka pasé tan ansanm sé pou édé’w fè on bon disizyon konsèné mawiyaj. Konsa, ki ou désidé pou mayé épi moun-lan ou té ka pasé tan épi-a opa, ou sa asiwé, tan-an ou pasé épi yo-a té vo’y, paskè i édé’w pou fè on bon disizyon.

4. Pouki nou sipozé byen konpwann kisa’y vlé di lè dé (2) moun ka pasé tan épi yonn a lòt?

⁴ Bon, i enpòtan pou nou tout byen konpwann kisa’y vlé di, lè dé (2) moun ka pasé tan ansanm. Pou ki wézon? Ében, lè moun ki p’òkò mayé konpwann kisa’y vlé di pou pasé tan ansanm épi on moun, yo pa kay koumansé pasé tan épi on moun lè yo ja sav yo pa vlé mayé moun sala. Mé, sé pa moun ki pa mayé tousèl ki bizwen konpwann sa. Sa sé on bagay nou tout ni pou konpwann. Pou ègzanp, la ni moun ki ka kwè, dépi dé (2) moun ka pasé tan ansanm, yo oblijé mayé épi yonn a lòt. Ki mannyè katjil sala ka afèkté fwè èk sè ki pa mayé? Melissa sé on sè hòd Lanméwik. Sè sala pa mayé, èk mi sé sa i di: “Lè dé (2) moun ka pasé tan ansanm, adan sé fwè èk sè-a ka èspéwé pou sé dé (2) moun sala mayé épi yonn a lòt. Mé kalité katjil sala ka ba moun an chay tèt cho. I ka annékòz adan moun pou kontiné adan on wilasyon menm si yo sav, yo pa bon pou yonn a lòt. Èk, la ni lòt fwè èk sè ki pa mayé, mé yo pa vlé pasé tan épi lòt moun, pou lapéti menm katjil sala.”

ÉSÉYÉ POU VINI KONNÈT YONN A LÒT BYEN

5-6. Lè dé (2) moun ka pasé tan ansanm kisa yo sa apwann, èk ki diféwan bagay yo sipozé diskité épi yonn a lòt? (1 Pita 3:4)

⁵ Si’w ka pasé tan épi on moun, kisa ki kay édé’w désidé si sé pou’w mayé épi moun-lan opa? Ében, zòt ni pou vini konnèt yonn a lòt byen. San dout, ou apwann yonndé bagay konsèné moun-lan dépi avan zòt koumansé pasé tan ansanm. Mé apwézan, kon zòt ka pasé tan ansanm, ou ni òpòtyounité-a pou vini konnèt sa ki vwéman an ‘tjè’ moun-lan. (Li 1 Pita 3:4.) Wi, kon zòt ka pasé tan ansanm, ou sa apwann pli konsèné pèsonnalité moun-lan, mannyè i ka katjilé, èk kalté wilasyon-an i ni épi Jéhova. Konsa apwé an tan, ou sipozé konnèt wépons-lan pou kèstyon tèl kon: ‘Ès moun sala kay on bon moun pou mwen mayé?’ (Pwov. 31:26, 27, 30; Èfés. 5:33; 1 Tim. 5:8) ‘Ès nou sa ba yonn a lòt lanmityé-a épi atansyon-an nou bizwen? Ès i ézé pou mwen pawdonnen ti lèwè moun-lan ka fè?’b (Ronm 3:23) Mé, kon zòt ka vini konnèt yonn a lòt pli mèyè i bon pou chonjé, sa ki enpòtan sé pa kantité bagay zòt ni an konmen, mé sé mannyè zòt ka twété yonn a lòt lè zòt pa dakò asou on bagay.

⁶ Ki lòt bagay ou sipozé konnèt konsèné moun-lan ou ka pasé tan épi-a? Ében lè dé (2) moun ki kontan yonn a lòt ka pasé tan ansanm, yo ka vini byen pwé. Mé avan zòt vini twò pwé, zòt sipozé diskité bagay enpòtan tèl kon, sa moun-lan vlé akonpli an lavi’y, èk an sèvis li pou Jéhova. Osi, zòt kay ni pou diskité bagay pèsonnèl tèl kon, pwòblènm santé, pwoblenm lajan, ében lòt bagay ki wivé’w an tan pasé ki pé afèkté katjil ou, santiman’w, èk atitid ou. Mé zòt pa oblijé diskité tout sé bagay sala kon zòt koumansé pasé tan ansanm. (Gadé Jan 16:12.) Konsa, si moun-lan mandé’w on kèstyon pèsonnèl èk ou p’òkò vlé wéponn li, fè moun-lan konnèt sa. Mé chonjé, moun-lan kay ni pou konnèt wépons pou sé kwèstyon sala pou’y sa fè an bon disizyon konsèné wilasyon-an zòt ni-an. Konsa, yon lè, zòt kay ni pou palé konsèné tout sé bagay sala adan an mannyè ki fèplé.

7. Lè dé (2) moun ka pasé tan ansanm, ki diféwan bagay yo sa fè pou yo sa vwéman vini konnèt yonn a lòt? (Osi, gadé enfòmasyon-an ki anba sijé-a “Lè’w Ka vini konnèt On Moun Ki Pa Ka Viv Pwé’w.”) (Gadé sé pòtwé-a osi.)

⁷ Mé, ki mannyè ou sa vwéman konnèt kisa ki an tjè moun-lan ou ka pasé tan épi-a? Ében yonn an sé pli mèyè bagay-la zòt sa fè, sé palé épi yonn a lòt adan an mannyè ki fèplé èk onnèt. (Pwov. 20:5; Jémz 1:19) Mandé yonn a lòt kèstyon, èk vwéman kouté lè lòt moun-lan ka palé. Konsa, pitèt i kay bon pou zòt fè diféwan bagay ki kay fè’y pli alèz pou zòt palé. Pou ègzanp, tanzantan zòt sa alé pwan on ti maché adan an plas piblik, zòt sa enjwi on ti wipa ansanm, èk zòt sa twavay épi yonn a lòt an minis-la. Lè zòt ka fè bagay kon sa, zòt kay ni bon òpòtyounité pou palé, èk sa kay édé zòt pou konnèt yonn a lòt pli mèyè. On lòt bagay ki kay bay zòt òpòtyounité pou apwann pli konsèné yonn a lòt, sé lè zòt ka pasé tan épi fanmi zòt ében jan zòt. Osi, éséyé pou fè an chay diféwan aktivité ansanm, paskè sa kay bay zòt chans-lan pou wè mannyè yonn a lòt ka aji an diféwan sitiwasyon, èk épi diféwan moun. Sé sa yon fwè hòd péyi Netherlands té fè. Konsèné sa li épi madanm li Alicia té ka fè lè yo té ka vini konnèt yonn a lòt, i di: “Nou té ka fè bagay ki té kay ban nou òpòtyounité pou apwann pli konsèné yonn a lòt. Byen souvan, nou té ka fè ti bagay senp tèl kon, pwépawé on ti wipa ansanm, ében fè on ti twavay ansanm. Kon nou té ka fè sé bagay sala, nou twapé chans-lan pou wè sé bèl kawaktè-a, èk sé fèblès-la chak di nou té ni.”

8. Lè dé (2) moun ki ka vini konnèt yonn a lòt ka étidyé Bib-la ansanm, ki bennéfis yo sa twapé?

⁸ An lòt bagay ki sa édé zòt vini konnèt yonn a lòt pli mèyè, sé lè zòt étidyé Bib-la ansanm. Anfen, si zòt mayé, zòt kay ni pou fè tan wéglé pou fè létid fanmi zòt, si zòt vlé tjenn Jéhova kon Moun-lan ki pli enpòtan an mawiyaj zòt. (Éklé. 4:12) Konsa, si zòt ka pwan tan dépi apwézan pou étidyé pawòl Bondyé, sa sé on bon bagay. Mé menm si zòt ka étidyé Bib-la ansanm, chonjé zòt p’òkò mayé. Konsa, zòt p’òkò on fanmi, èk fwè-a p’òkò tèt sé-a i ka vini konnèt-la nonplis. Bon bagay-la sé sa, kon zòt ka étidyé Bib-la ansanm, zòt kay apwann an chay bagay konsèné kalité wilasyon-an lòt moun-lan ni épi Jéhova. Yon fwè épi madanm li hòd Lanméwik mansyonnen on lòt bennéfis zòt sa twapé, lè zòt ka étidyé Bib-la ansanm diwan tan-an zòt ka vini konnèt yonn a lòt pli mèyè. Non yo sé, Max épi Laysa. Èk fwè Max di: “Kon nou koumansé pasé tan ansanm épi yonn a lòt, nou koumansé étidyé enfòmasyon an sé piblikasyon nou-an ki té ni pou fè épi mawiyaj, lavi an fanmi-an, èk enfòmasyon pou moun ki ka pasé tan ansanm pou vini konnèt yonn a lòt pli mèyè. Sa nou étidyé an sé piblikasyon-an fè’y pli ézé pou nou palé konsèné an chay bagay enpòtan, ki té kay difisil pou nou diskité.”

LÒT BAGAY POU KONSIDIWÉ

9. Kisa dé (2) moun ki ka vini konnèt yonn a lòt sipozé konsidiwé, avan yo désidé ki moun yo kay di konsèné wilasyon yo?

⁹ Ki moun zòt sipozé di konsèné wilasyon zòt? Ében sa sé on disizyon zòt dé-a kay ni pou fè. Mé, Bib-la ka ankouwajé nou pou ‘kontwolé pawòl’ nou. Konsa, pitèt i kay bon pou zòt pa di twòp moun konsèné wilasyon zòt, kon zòt koumansé pasé tan ansanm. (Pwov. 17:27) Mé, si zòt tjenn wilasyon-an kon yon sigwé, zòt pé twapé kò zòt adan on sitiwasyon ki byen danjéwé. Paskè sa vlé di, zòt kay pasé an chay tan pa kò zòt, èk a lè sala i kay pli ézé pou zòt fè bagay ki sa déplè Jéhova. Konsa, menm si zòt pa di an chay moun konsèné wilasyon zòt, i bon pou zòt di yonndé moun ki sa ba zòt bon konsèy, èk èd-la zòt bizwen-an. (Pwov. 15:22) Pou ègzanp, zòt sa di sèten moun an fanmi zòt, bon jan ki matwité an lafwa-a, ében on ansyen.

10. Lè dé (2) moun ka pasé tan ansanm pou vini konnèt yonn a lòt pli mèyè, ki mannyè yo sa wèsté nèt an zyé Jéhova? (Pwovèb 22:3)

¹⁰ Ki mannyè zòt sa wèsté nèt an zyé Jéhova? Kon zòt kontiné pasé tan épi yonn a lòt, san dout zòt kay vini pli pwé. Konsa, kisa ki kay édé zòt pou wèsté nèt an zyé Jéhova? (1 Kòr. 6:18) Ében, zòt ni pou pwan bon pokosyon pou zòt pa fè bagay ki sa lévé dézi zòt pou sèks, èk fè’y pli wèd pou zòt obéyi Jéhova. Pou ègzanp, pa tjenn vyé konvézasyon sal, pa pasé tan ansanm pa kò zòt, èk pa bwè twòp alkòhòl. (Èfés. 5:3) Osi, i kay bon pou zòt dé-a toujou palé konsèné sa zòt sa fè pou obéyi pwensip Jéhova, èk moutwé wèspé pou yonn a lòt. (Li Pwovèb 22:3.) Mi sé sa fwè Dawit épi madanm li Almaz hòd péyi Ethiopia di ki té édé yo wèsté nèt an zyé Jéhova, diwan tan-an yo té ka vini konnèt yonn a lòt pli mèyè. Yo di: “Nou té ka pasé tan ansanm épi yonn a lòt an plas ki té ni an chay moun, ében anpanmi jan nou. Nou pa janmen pasé tan ansanm adan an motoka, ében adan on kay pa kò nou. An mannyè sala nou pa té mété kò nou adan sitiwasyon ki té sa tanté nou pou fè bagay ki ka déplè Jéhova.”

11. Lè dé (2) moun ka vini konnèt yonn a lòt, kisa yo ni pou konsidiwé avan yo désidé pou moutwé afèksyon?

¹¹ Bon, lè dé (2) moun ka vini konnèt yonn a lòt, ès yo sa moutwé afèksyon pou yonn a lòt? Ében, kon zòt ka vini pli pwé, zòt pé désidé pou moutwé afèksyon pou yonn a lòt adan an mannyè ki aksèptab. Mé kanmenm, si dézi’w pou sèks vini twò fò, sa pé twoublé lidé’w, èk i kay fè’y difisil pou’w fè on bon disizyon konsèné lòt moun-lan. (Sòlo. 1:2; 2:6) Osi, lè’w ka moutwé afèksyon, ou pé twapé’y difisil pou’w kontwolé kò’y, èk a lè sala i kay byen fasil pou’w fè bagay ki ka déplè Jéhova. (Pwov. 6:27) Konsa, kon zòt koumansé pasé tan ansanm, palé konsèné ki sa zòt kay fè pou moutwé afèksyon pou yonn a lòt, an ling épi pwensip Jéhova.c (1 Tèsa. 4:3-7). Èk mandé kò zòt sé kwèstyon sala: ‘Si nou moutwé afèksyon pou yonn a lòt, ki mannyè moun an konmin nou té kay gadé sa?’ Èk, ‘Si nou moutwé afèksyon, ès sa kay lévé dézi nou pou sèks?’

12. Lè dé (2) moun ki ka pasé tan ansanm ka ni dézagwéman, ki mannyè yo sipozé gadé sa?

¹² Ki mannyè zòt kay aji épi pwoblenm an wilasyon zòt? Si ou épi moun-lan ou ka pasé tan épi-a ka ni ti dézagwéman tanzantan, ès sa vlé di, moun sala sé pa on bon moun pou’w mayé? Pa oblijé. Lavéwité-a sé sa, lè dé (2) moun ni yon wilasyon, la kay toujou ni bagay yo pa ka dakò asou. Anfen, lè dé (2) moun ni on bon mawiyaj, sa pa vlé di yo ka dakò asou tout bagay. Sa’y vlé di sé sa, yo ka wèspèkté yonn a lòt, èvèk yo pawé pou twavay ansanm pou yo sa ni siksé an mawiyaj yo. Konsa, mannyè zòt ka aji lè zòt ni ti dézagwéman apwézan, sa édé zòt pou wè si zòt kay ni on bon mawiyaj opa. Mandé kò zòt sé kwèstyon sala: ‘Lè nou ka diskité on bagay, ès nou sa palé adan an mannyè ki dous èk wèspèktab? Ès nou ka pwan wèskonsabilité lè nou fè on lèwè, èk éséyé pou fè pli mèyè? Ès nou ka pwésé pou fè apoloji, pou pawdonnen yonn a lòt, èk pou fè chanjman lè’y nésésè?’ (Èfés. 4:31, 32) Kanmenm, si diwan tan-an zòt ka vini konnèt yonn a lòt zòt ka toujou chikannen, ében zòt pa ka dakò asou anyen, pitèt sa pa kay chanjé apwé zòt mayé. Èvèk si ou wéyalizé, moun-lan ou ka pasé tan épi-a sé pa on bon moun pou’w mayé, pli mèyè bagay-la ou sa fè sé fini épi wilasyon-an. Disizyon sala kay pòté zòt toulédé-a bennéfis.d

13. Ki kantité tan on fwè èk sè sipozé pwan pou vini konnèt yonn a lòt pli mèyè, èk kisa yo ni pou chonjé?

¹³ Ki kantité tan zòt sipozé pwan pou vini konnèt yonn a lòt pli mèyè? Lè ou pa pwan asé tan pou katjilé avan ou fè on disizyon, souvan, bagay pa ka maché byen. (Pwov. 21:5) Konsa, zòt sipozé pwan asé tan pou zòt vini konnèt yonn a lòt pli mèyè. Mé zòt pa sipozé pwan an chay tan pou vini konnèt yonn a lòt, si sa pa nésésè. Paski kon Bib-la ka di: ‘Lè yon moun ka èspéwé on bagay, èk bagay sala pa wivé a lè-a i té ka èspéwé’y-la, sa ka fè’y pèd èspwa.’ (Pwov. 13:12) An plis di sa, chonjé, kon zòt ka pasé tan ansanm zòt ka vini pli pwé. Konsa pli tan zòt pasé ansanm, sé pli i kay difisil pou zòt kontwolé kò zòt pou zòt pa fè on péché sèksyouwal. (1 Kòr. 7:9) Konsa, pito zòt fiksé asou konmen tan pou zòt pwan pou vini konnèt yonn a lòt, mandé kò zòt kèstyon sala: ‘Kisa ankò mwen bizwen konnèt konsèné lòt moun-lan, avan mwen sa fè on disizyon?’

KISA NOU SA FÈ POU SIPÒTÉ FWÈ ÈK SÈ KI KA PASÉ TAN ANSANM?

14. Ki diféwan bagay nou sa fè pou sipòté fwè èk sè ki ka pasé tan ansanm? (Gadé pòtwé-a osi.)

¹⁴ Si nou konnèt on fwè èk sè ki ka pasé tan ansanm, kisa nou sa fè pou édé yo? Ében, nou sa envité yo pou manjé épi nou, pou fè létid an fanmi nou épi nou, ében pou pasé on ti tan épi nou an anmizman. (Ronm 12:13) Sé bagay sala sa ba yo òpòtyounité pou vini konnèt yonn a lòt pli mèyè. Osi, si yo bizwen on moun la épi yo lè yo ka sòti ében yo ka fè lòt bagay, ében yo bizwen on moun pou mennen yo on koté, ében yo bizwen on plas ko yo sa palé san moun tann yo, nou sa ofè pou édé yo. (Gal. 6:10) Pli bonnè-a nou té mansyonnen sè Alicia. Mi sé sa i di i épi mawi’y Aschwin té apwésyé. I di: “Lè adan sé fwè èk sè-a di nou, nou sa vini lakay yo si nou bizwen on plas pou palé san moun distwé nou, sa touché tjè nou anpil.” Konsa, si dé (2) moun ki ka pasé tan ansanm mandé’w pou vini on plas épi yo, pou yo pa la pa kò yo, gadé sa kon yon pwivilaj. Èk pwan bon pokosyon pou’w pa kité yo konplètman pa kò yo, mé an menm di tan-an, ou bizwen sèvi bon jijman pou’w konnèt lè yo bizwen chans pou palé konsèné bagay ant yo dé-a.​—Filip. 2:4.

15. Ki lòt bagay nou sa fè pou sipòté fwè èk sè ki ka pasé tan ansanm? (Pwovèb 12:18)

¹⁵ On lòt bagay nou sa fè pou sipòté fwè èk sè ki ka pasé tan ansanm, sé lè nou pwan pokosyon épi sa nou di yo. Anfen délè, nou pé ni pou kontwolé kò nou, èk pa di anyen. (Li Pwovèb 12:18.) Pou ègzanp, pitèt nou tèlman vlé di tout moun, tèl fwè èk tèl sè ka pasé tan ansanm. Mé, pitèt fwè-a épi sè-a té kay simyé pou di moun sa, yo menm. Osi, lè dé (2) moun ka pasé tan ansanm, nou pa sipozé palé yo mal, kwititjé yo, ében fouyé né nou an zafè yo. (Pwov. 20:19; Ronm 14:10; 1 Tèsa. 4:11) An plis di sa, nou pa sipozé di yo bagay ében mandé yo kwèstyon ki kay fè yo kwè, yo oblijé mayé. Yon sé yo ka kwiyé Elise épi mawi’y ka chonjé: “Pa ti jennen nou té ka jennen lè moun té ka mandé nou kwèstyon konsèné plan-an pou nòs nou, lè nou menm p’òkò té menm diskité sé bagay sala.”

16. Lè dé (2) moun ki té ka pasé tan ansanm désidé pou fini épi wilasyon yo, kisa nou sipozé fè?

¹⁶ Bon, lè dé (2) moun ki té ka pasé tan ansanm désidé pou fini épi wilasyon-an, sé pa pou nou mélé kò nou an zafè yo, èk sé pa pou nou di nou ka pwan pou fwè-a ében pou sè-a. (1 Pita 4:15) Mi sé sa on sè yo ka kwiyé Lea di: “Mwen épi on fwè ki té ka pasé tan ansanm désidé pou fini épi wilasyon nou. Èk mwen vini konnèt, adan sé fwè èk sè-a té vlé sav pouki mwen épi fwè-a pa ansanm ankò. Sa vwéman blésé tjè mwen.” Mé kon nou té mansyonnen pli bonnè-a, menm si dé (2) moun ki té ka pasé tan ansanm désidé pou fini épi wilasyon yo, sa pa vlé di yo fè on mové disizyon. Paskè wézon-an yo ka pasé tan ansanm sé pou édé yo wè si’y bon pou yo mayé. Konsa, ki yo désidé pou mayé opa, tan-an yo pasé épi yonn a lòt té vo’y, paskè i édé yo pou fè on bon disizyon. Kanmenm, pitèt i pa té ézé pou yo té fè disizyon-an, èk pitèt sa fè yo twis. Konsa, i kay bon pou nou gadé pou wè kisa nou sa fè pou sipòté, èk soulajé yo.​—Pwov. 17:17.

17. Si dé (2) moun ka pasé tan ansanm, kisa yo ni pou kontiné fè?

¹⁷ Kon nou ja wè, lè dé (2) moun ka pasé tan ansanm yo pé èspéyansé difikilté, mé yo sa osi enjwi tan sala. Mi sé sa yon sè yo ka kwiyé Jèssica di: “Anvéwité, lè nou té ka pasé tan ansanm, sa pa té alèz. Mé, mwen kontan nou sèvi tan nou èk fòs nou pou vini konnèt yonn a lòt byen.” Konsa, si’w ka pasé tan épi on moun, kontiné fè éfò pou zòt konnèt yonn a lòt byen. Si zòt fè sa, bagay kay maché byen, paskè zòt kay sa fè on bon disizyon, lè’y vini pou mawiyaj.