Fè Disizyon Ki Kay Plè Jéhova

1. Kisa nou tout ni pou fè?

TOULÉ JOU nou ni pou fè disizyon. Èk adan sé disizyon sala byen ézé pou fè tèl kon; sa nou kay ni pou dité, ében ki lè nou kay alé dòmi. Kanmenm, la ni disizyon ki pa ézé pou fè, paski yo kay afèkté santé nou, lakontantman nou èk fanmi nou, èk mannyè nou ka sèvi Jéhova. Bon, nou vlé sé disizyon-an nou ka fè pou ban nou èk fanmi nou bennéfis, èk pli enpòtan, nou vlé sé disizyon sala plè Jéhova.​—Ronm 12:1, 2.

2. Kisa ou sa fè pou ou sa fè bon disizyon?

² Bon. Ou kay sa fè bon disizyon si’w fè sé twa (3) bagay sala: (1) twapé asé enfòmasyon, (2) katjilé asou mannyè Jéhova ka gadé sitiwasyon-an, èk (3) byen katjilé asou sé diféwan chwa-a ou ni. Alò, an atik sala nou kay diskité sé twa bagay sala, èk nou kay osi wè mannyè nou sa sèvi bon jijman lè nou ka fè disizyon.​—Pwov. 2:11.

TWAPÉ ASÉ ENFÒMASYON

3. Pouki i bon pou twapé asé enfòmasyon avan ou fè an disizyon? Ba yon ègzanp.

³ Bon. Pwèmyé bagay-la nou ni pou fè pou nou sa fè an bon disizyon sé sa: twapé asé enfòmasyon. Alò pouki sa enpòtan? Ében imajiné ou alé wè on dòktè paski ou byen malad. Ès ou té kay vlé dòktè-a ba’w wimèd avan i ègzanminé’w, ében san’y mandé’w kwèsyon. Mé non. Konsa an menm mannyè-a, ou pa vlé fè disizyon avan ou twapé asé enfòmasyon. Bon. Kisa ou sa fè pou ou sa twapé asé enfòmasyon?

4. Silon Pwovèb 18:13, kisa ou sa fè pou ou sa twapé asé enfòmasyon? (Gadé pòtwé-a osi.)

⁴ Bon. Yon bagay ou sa fè pou’w twapé asé enfòmasyon sé sa: mandé kwèsyon. Pou ègzanp ann’ di, an moun envité’w pou an ti fèt. Si’w pa konnèt kisa ki kay pwan kou an ti fèt-la, ki mannyè ou kay désidé si pou atandé opa? Ében ou sa mandé moun-lan ki envité’w-la kwèsyon. Pou ègzanp ou sa mandé’y: “Ki koté, ki lè, èk ki jou fèt-la kay pwan kou? Ki mizi moun ki kay atandé? Ki moun ki wèskonsab pou fè asiwé tout bagay kay maché byen an fèt-la? Ki moun ki kay la? Kisa ki kay pwan kou an fèt-la? Ès la kay ni alkòhòl?” Wi, lè’w twapé sé wépons-lan pou sé kwèsyon sala, sa kay édé’w pou fè an bon disizyon, si pou atandé opa.​—Li Pwovèb 18:13.

5. Kisa ou sipozé fè apwé ou twapé asé enfòmasyon?

⁵ Bon, apwé ou twapé asé enfòmasyon, pwan tan pou byen katjilé asou sitiwasyon-an. Pou ègzanp, pitèt ou apwann adan sé moun-lan ki kay atandé ti fèt-la, pa ka swiv wèg Jéhova? Ében yo kay ni alkòhòl an ti fèt-la, mé la pa kay ni pyèsonn ki kay anpéché moun bwè twòp. Konsa, ès ou sa wè mannyè ti fèt-la sa tounen an bakannal? (1 Pita 4:3) Bon. Mi an lòt bagay pou katjilé asou; ‘Si ou atandé ti fèt-la ès ou kay mantjé mitin ou, ében ès sa kay anpéché’w alé an minis-la?’ Wi, lè ou fè tan pou byen konsidiwé tout enfòmasyon-an ou twapé, sa kay édé’w pou fè an bon disizyon. Bon. Menm si ou konnèt mannyè ou ka santi konsèné sitiwasyon-an, la ni on lòt bagay ou ni pou fè. Ou ni pou mandé kò’w: Ki mannyè Jéhova ka santi konsèné sitiwasyon-an?​—Pwov. 2:6.

KATJILÉ ASOU MANNYÈ JÉHOVA KA SANTI KONSÈNÉ AN SITIWASYON

6. Silon Jémz 1:5, pouki i enpòtan pou mandé Jéhova pou èd?

⁶ Bon. Si’w ni on disizyon ki difisil pou fè, mandé Jéhova pou édé’w wè mannyè i ka santi konsèné sitiwasyon-an. Anfen, Jéhova pwonmèt i kay ba’w lasajès-la pou’w sa byen kopwann si disizyon-an ou vlé fè kay plè’y. Wi, Jéhova kay “bay tout moun [lasajès] san miziwé.”​—Li Jémz 1:5.

7. Ki mannyè ou sa konnèt katjil Jéhova konsèné an sitiwasyon? Ba yon ègzanp.

⁷ Bon. Apwé ou pwédyé bay Jéhova èk ou mandé’y pou diwèksyon’y, i enpòtan pou gadé pou wépons li. Pou ègzanp, padan ou ka voyajé, si’w pa konnèt ki koté ou yé, ou sa mandé an moun ki ka wèsté an plas-la pou diwèksyon. Bon. Ès ou té kay tounen do’w asou moun-lan avan i wéponn ou. Mé non! Anfen ou té kay byen kouté diwèksyon-an i ka ba’w-la. An menm mannyè-a, lè ou mandé Jéhova pou lasajès, éséyé pou kopwann wépons li. Èk ou kay twapé lasajès Bondyé lè’w chaché pou pwensip Bib èben lwa ki kay édé’w épi sitiwasyon’w. Pou ègzanp, lè’w ka désidé si pou atandé fèt-la nou té mansyonnen pli bonnè-a, i kay bon pou konsidiwé sa Bib-la ka di konsèné bakannal, mové asosiyasyon, èk enpotans-lan pou mété Wéyòm Bondyé douvan sa nou té kay vlé fè.​—Maf. 6:33; Ronm 13:13; 1 Kòr. 15:33.

8. Kisa ou sa fè si’w bouzwen èd pou twapé enfòmasyon-an ou ka chaché pou? (Gadé pòtwé-a osi.)

⁸ Délè, ou pé bizwen èd pou twapé enfòmasyon-an ou ka chaché pou. Alò kisa ou sa fè? Ében ou sa mandé an fwè èben sè ki ni èspéyans pou konsèy. Kanmenm ou kay osi twapé bennéfis si’w fè wichach pou kò’w menm. Anfen, la ni an chay enfòmasyon an Research Guide for Jehovah’s Witnesses èk Scriptures for Christian Living. Konsa toujou tjenn an lidé sa ou vlé fè, sé pou fè disizyon ki kay plè Jéhova.

9. Ki mannyè nou sa fè asiwé disizyon nou kay plè Jéhova? (Èfésòs 5:17)

⁹ Ki mannyè nou sa fè asiwé disizyon-an nou kay fè kay plè Jéhova? Pwèmyéman, nou ni pou vin konnèt Jéhova byen. Anfen, Pwovèb 9:10 ka di: ‘Nòlaj Moun-lan Ki Pli Sen-an ka fè nou ni lakonpwann.’ Wi, nou ka twapé bon lakonpwann lè nou vin konnèt kawaktè Jéhova, sa i vlé akonpli, èk sa i enmen ében sa i hayi. Alò mandé kò’w: ‘Silon sa mwen konnèt konsèné Jéhova ki disizyon mwen sa fè ki kay plè’y?’​—Li Èfésòs 5:17.

10. Pouki pwensip Bib pli enpòtan pasé twadisyon fanmi èben kilti péyi-a?

¹⁰ Délè pou nou sa plè Jéhova, nou ni pou fè bagay ki kay dézapwenté moun nou ni on bon wilasyon épi. Pou ègzanp, adan pawan pé vlé fi yo mayé an nonm ki ni an chay lajan, menm si nonm-lan pa ni on bon wilasyon épi Jéhova. Bon. I natiwèl pou pawan vlé fi yo pou ni an lavi ki konfòtab. Mé fi-a ni pou mandé kò’y: ‘Ès nonm sala kay édé mwen ni an bon wilasyon épi Jéhova? Ki mannyè Jéhova kay gadé an mawiyaj kon sa?’ Bon. Nou ka twapé wépons-lan an Mafyou 6:33 (NWT) koté Jézi di: ‘Fè gouvèdman Bondyé bagay-la ki pli enpòtan an lavi’w.’ Alò menm si nou ka onnowé pawan nou, èk nou ka wèspèkté moun an konmin nou, bagay-la ki pli enpòtan pou nou sé sa; nou vlé fè tjè Jéhova kontan.

BYEN KATJILÉ ASOU SÉ DIFÉWAN CHWA-A OU NI

11. Silon Filipay 1:9, 10, ki kawaktè ki kay édé nou pou byen katjilé asou sé diféwan chwa-a nou ni?

¹¹ Bon. Apwé ou konsidiwé sé pwensip Bib-la ki ni pou fè épi disizyon-an ou vlé fè, ou ni pou byen katjilé asou sé diféwan chwa-a ou ni. (Li Filipay 1:9, 10) Anfen, zapòt Pòl mansyonnen kawaktè-a bon jijman, èk kawaktè sala byen enpòtan, paski i kay édé’w pou wè a klè ki wézilta chak sé chwa-a kay mennen. Chonjé sé pa tout disizyon ki ézé pou fè, mé kanmenm, bon jijman kay édé’w pou fè bon disizyon, menm si disizyon-an pa ézé pou fè.

12-13. Ki mannyè bon jijman sa édé’w fè yon disizyon ki savan lè’w ka chaché pou twavay?

¹² Imajiné sitiwasyon sala: Ou ka chaché pou twavay pou sipòté fanmi’w, èk la ni dé (2) djòb ki avélab. Ou katjilé asou tout enfòmasyon-an konsèné sé dé (2) djòb sala. Pou ègzanp, kalité twavay-la, lè-a ou kay ni pou twavay, distans-lan ou kay ni pou voyajé, èk bagay kon sa. Bon. Yon Kwityen sa chwazi népòt an sé djòb-la paski yo pyès pa ka kasé pwensip Bib. Pitèt ou vlé chwazi yonn an sé djòb-la paski ou simyé kalité twavay-la ében ou kay fè pli lajan. Kanmenm, la ni lòt bagay ou ni pou konsidiwé avan ou fè an disizyon.

¹³ Pou ègzanp: ‘Ès népòt an sé djòb-la kay anpéché’w atandé mitin épi kongwigasyon’w? Ében, ès yo kay anpéché’w pasé tan épi fanmi’w èk édé yo wèsté pwé Jéhova?’ Wi, pito ou fiksé asou mannyè pou fè pli lajan, si’w mandé kò’w sé kwèsyon sala, sa kay édé’w pou “chwazi sa ki pli bon”. Èk sa sé: Adowasyon’w pou Jéhova èk sa fanmi’w bouzwen. Èvèk a lè sala ou kay fè an disizyon ki kay plè Jéhova.

14. Lè nou sèvi bon jijman èk nou ni lanmityé, ki mannyè sa kay anpéché nou bay moun wézon pou fè sa ki pa bon?

¹⁴ Bon jijman kay osi édé nou pou konsidiwé ki mannyè disizyon nou pé afèkté lòt moun. Èk sa kay anpéché nou fè disizyon ki kay “bay [moun] wézon pou fè sa ki pa bon”. (1 Kòr. 10: 32) Wi, sa byen enpòtan lè nou ka fè disizyon pèsonnèl konsèné bagay tèl kon, abiman nou, èk lapawans nou. Pou ègzanp, pitèt nou enmen sèten had, èben nou enmen tjenn chivé nou èben bab nou adan an sèten mannyè. Mé si sa kay ofwansé sé fwè èk sè nou-an, èben lòt moun an konmin nou, kisa nou kay fè? Èben bon jijman kay édé nou pou wèspèkté santiman yo. Osi si nou ni lanmityé, sa kay pousé nou pou “katjilé asou sa ki bon pou lézòt”, èk nou kay abiyé adan an mannyè ki pwòp èk wèspèktab. (1 Kòr. 10:23, 24; 1 Tim. 2:9, 10) Wi, si nou sèvi bon jijman èk nou ni lanmityé, nou kay fè disizyon ki kay moutwé moun nou enmen yo èk nou ka wèspèkté yo.

15. Avan ou fè an gwo disizyon, kisa ou ni pou katjilé asou?

¹⁵ Bon. Si’w ka fè an gwo disizyon, ou ni pou katjilé asou kisa disizyon-an kay kouté’w. Paski an Louk 14:28 Jézi di: “Katjilé konmen lajan i kay kouté’w.” Konsa katjilé asou ki otan tan, lajan, èk éfò ou kay bizwen pou fè disizyon’w twavay. Osi, silon sitiwasyon-an, i kay bon pou palé épi fanmi’w, paski i kay fè’y pli ézé pou fanmi’w sipòté disizyon-an ou fè-a. (Pwov.15:22) Wi, lè nou fè sé bagay sala avan nou fè an gwo disizyon, sa pé jis édé nou wè nou ni pou fè chanjman an sa nou té ni an lidé pou fè.

FÈ YON DISIZYON KI KAY ÉWISI

16. Ki diféwan bagay ou sa fè ki kay édé’w fè on disizyon ki kay éwisi? (Gadé osi bwèt-la “Mannyè Pou Fè Disizyon Ki Savan.”)

¹⁶ Si’w fè tout sé bagay-la nou diskité an atik sala, sa kay édé’w pou fè on disizyon ki savan. Wi, ou ja twapé enfòmasyon-an ou bizwen, èk ou ja ègzanminé pwensip Bib ki sa édé’w pou fè on disizyon ki kay plè Jéhova. Konsa apwézan, ou sa mandé Jéhova pou benni disizyon’w pou i sa éwisi.

17. Kisa ki kay vwéman édé’w pou fè bon disizyon?

¹⁷ Menm si ou ja fè bon disizyon an tan pasé, toujou chonjé, sa ki kay vwéman édé’w fè bon disizyon sé sa: Pa dépan asou entèlijans ou èben èspéyans ou, mé dépan asou lasajès Jéhova. Wi, sé Jéhova tousèl ki sa ba ou nòlaj ki vwé, lakonpwann, èk bon jijman. Èvèk tout sé bagay sala enpòtan pou nou ni lasajès pou nou sa fè bon disizyon. (Pwov. 2:​1-5) Alò, si nou swiv diwèksyon Jéhova, sa kay édé nou pou fè bon disizyon ki kay plè’y, èk nou kay twapé lakontantman.​—Sam 23:2, 3.