Mannyè Mawi Sa Moutwé Lanmityé Épi Wèspé Pou Madanm Yo

1. Ba yon wézon pouki Jéhova ban nou mawiyaj kon an kado?

JÉHOVA sé “Bondyé-a ki ni tjè kontan,” èk i vlé nou ni tjè kontan osi. (1 Tim. 1:11) Anfen, pou édé nou enjwi lavi, i ban nou an chay bon kado. (Jémz 1:17) Èk yonn an sé kado sala sé mawiyaj. Paskè lè on misyé épi on madanm mayé, yo ka pwonmèt pou enmen, wèspèkté, èk chéwi yonn a lòt. Si yo tjenn lanmityé yo pou yonn a lòt fò, mawiyaj yo ka pòté yo an chay tjè kontan.​—Pwov. 5:18.

2. Ki difikilté adan moun ka èspéyansé an mawiyaj yo?

² Magwé mawiyaj sé on bèl kado, malèwèzman, la ni an chay moun ki ka èspéyansé difikilté an mawiyaj yo. Pou ègzanp, lè dé (2) moun mayé, yo ka pwonmèt pou enmen èk wèspèkté yonn a lòt, mé an chay madanm épi misyé pa ka kontiné fè sa, èvèk sa ka mennen pwoblenm an mawiyaj yo. Osi, pa jè tan ki pasé, yon wapò hòd ògannizasyon-an yo ka kwiyé “World Health Organization” di, la ni an chay mawi ki ka bat madanm yo, ensilté yo, ében maltwété yo an lòt mannyè. Délè, lè yo anpanmi moun, sé mawi sala ka fè akwèdi yo ka chéwi madanm yo, mé lè yo lakay yo, yo ka maltwété madanm yo. Bon, la ni mawi ki ka gadé pònografi,a èk sa sé on lòt bagay ki ka mennen pwoblenm an mawiyaj. Paskè lè on mawi ka gadé pònografi, sa ka distwé sèvèl madanm li, èk i ka fè’y kwè i pa vo anyen pou mawi’y.

3. Ki diféwan bagay ki sa annékòz on mawi pou maltwété madanm li?

³ Mé kisa ki ka fè on mawi maltwété madanm li? Ében la ni plizyè bagay ki sa annékòz sa. Pou ègzanp, pitèt mawi-a té lévé adan on kay koté i té ka wè papa’y ka bat manman’y. Konsa pou li, i nòmal pou on nonm bat madanm li. La ni lòt mawi ki ka maltwété madanm yo paskè sé sa an chay nonm an kilti yo ka fè, pou moutwé madanm yo ki moun ki “boss-la” an mawiyaj-la. Bon, la ni lòt nonm ki pa janmen apwann pou kontwolé imosyon yo. Konsa, lè yo faché yo pa sa kontwolé kò yo. Pònografi sé on lòt bagay ki sa fè on mawi maltwété madanm li, paskè sé vyé pòtwé sal sala ka chanjé katjil li, èk i ka fè’y kwè, sèl bagay on madanm la pou, sé sèks. An plis di sa, la ni plizyè wapò ki ka moutwé, diwan panndèmik COVID-19-lan, an chay mawi koumansé maltwété madanm yo. Mé, ki sé pou sé wézon sala ében pou lòt wézon, on mawi pa janmen ni dwa pou maltwété madanm li.

4. Ki pokosyon mawi ki ka sèvi Jéhova sipozé pwan, èk pouki sa enpòtan?

⁴ Byen souvan, katjil nou ka enflouwansé aksyon nou. Konsa, lè’y vini pou mannyè i ka gadé madanm,b on mawi ki ka sèvi Jéhova ni pou pwan bon pokosyon pou’y pa kité vyé katjil moun an latè-a ni, enflouwansé katjil li. Zapòt Pòl té vèti sé Kwityen-an an vil Ronm konsèné mannyè i enpòtan pou pwotéjé katjil yo. I té di yo pou pa “swiv mannyè latè-a.” (Ronm 12:1, 2) Bò lè-a zapòt Pòl té ékwi yo-a, i té ja ni plizyè lanné dépi sé fwè èk sè sala té batizé kon Kwityen. Mé i sanm, adan di yo té ka katjilé kon moun an latè-a toujou. Sé pou wézon sala zapòt Pòl ankouwajé yo pou chanjé katjil yo épi atitid yo. Èk sa sé bon konsèy osi, pou sé fwè-a ki mayé jòdi jou. Malèwèzman, adan sé fwè nou-an kité katjil latè-a enflouwansé yo si tèlman, yo jis twapé kò yo ka bat madanm yo,c ében maltwété’y an lòt mannyè. Mé, ki mannyè Jéhova vlé on mawi twété madanm li? Nou sa twapé wépons-lan pou kwèstyon sala an lévanjil-la atik sala bazé asou-a.

5. An ling épi 1 Pita 3:7, ki mannyè on mawi sipozé twété madanm li?

⁵ Li 1 Pita 3:7. Jéhova ka koumandé mawi pou twété madanm yo épi wèspé. Ében si on mawi ka wèspèkté madanm li, asiwé i kay twété’y épi jantiyès, èk i kay moutwé’y lanmityé. An atik sala, nou kay konsidiwé kisa on mawi sa fè pou moutwé madanm li wèspé. Mé pwèmyéman, annou diskité sé bagay-la on mawi pa janmen sipozé fè madanm li.

PA JANMEN FÈ ANYEN KI KAY BLÉSÉ TJÈ MADANM OU

6. Ki mannyè Jéhova ka gadé on mawi ki ka bat madanm li, ében ki ka maltwété’y an pyès mannyè? (Kòlòsé 3:19)

⁶ On mawi pa sipozé bat madanm li. Jéhova hayi népòt moun ki enmen vyolans. (Sam 11:5) Èvèk i vlé mawi twété madanm yo byen. Konsa, si on mawi ka bat madanm li, ében i ka maltwété’y an pyès mannyè, Jéhova pa kay kontan sa pyès. (Mala. 2:16; li Kòlòsé 3:19.) Anfen, silon 1 Pita 3:7, si on mawi pa ka twété madanm li byen, sa kay jennen lapwiyè’y. Sa vlé di, Jéhova pa kay menm kouté lapwiyè’y. Wi, on mawi ki ka fè sé bagay sala pa sa ni on bon wilasyon épi Jéhova.

7. Silon sa nou li an Èfésòs 4:31, 32, kisa on mawi pa sipozé fè madanm li? (Osi, gadé enfòmasyon-an ki anba ti sèksyon-an “Sa Mo Pawòl Sala Vlé Di.”)

⁷ On mawi pa sipozé ensilté madanm li. La ni mawi ki ka ensilté madanm yo, ében yo ka sèvi pawòl yo pou blésé tjè’y. Mé i bon pou chonjé, adan sé bagay-la Jéhova vwéman hayi-a, sé bagay tèl kon waj épi kòlè. Konsa lè moun ka lévé faché épi yonn a lòt, ében yo ka ‘hélé dèyè èk ensilté’ lézòt,’ Jéhova pa ka plè pyès.d (Li Èfésòs 4:31, 32.) I osi bon pou chonjé, Jéhova ka wè èk tann tout bagay, èk i ka gadé mannyè-a on mawi ka twété madanm li. Menm si pyès lòt moun pa sav ki mannyè on mawi ka vwéman twété madanm li, sitou lè yo pa kò yo, Jéhova konnèt. Konsa, on mawi ki ka sèvi pawòl li pou blésé tjè madanm li pa ka sèlman donmajé wilasyon’y épi madanm li, i ka osi donmajé wilasyon’y épi Jéhova.​—Jémz 1:26.

8. Kisa ki katjil Jéhova lè’y vini pou pònografi?

⁸ On mawi pa sipozé gadé pònografi. Pònografi sé on vyé bagay sal, èk Jéhova hayi sa. Konsa, on mawi ki ka gadé vyé pòtwé sal ka donmajé wilasyon’y épi Jéhova, èk i ka déwèspèkté madanm li.e On lòt bagay sé sa, Jéhova vlé on mawi wèsté fidèl pou madanm li, pa sèlman an aksyon’y, mé osi an katjil li. Ében, on mawi ki fidèl pou madanm li pa kay janmen fè bagay imowal épi on lòt madanm. Anfen, i pa kay menm katjilé asou bagay kon sa, paskè kon Jézi té di, népòt moun ki ka kontiné gadé on madanm jis tan i anvi’y, ja fè adiltè épi madanm sala ‘an tjè’y.’f​—Maf. 5:28, 29.

9. Lè’y vini pou sèks, pouki nou sa di, Jéhova pa vlé on mawi fòsé madanm li pou fè bagay i pa vlé fè?

⁹ Lè’y vini pou sèks, on mawi pa sipozé fòsé madanm li pou fè anyen i pa vlé fè. Bon, lè’y vini pou sèks, la ni mawi ki ka fòsé madanm yo pou fè bagay yo pa vlé fè, ében bagay ki ka anbété konsyans yo. Sa sé on bagay Jéhova pa kontan pyès, paskè an zyé’y, on mawi sipozé enmen madanm li, twété’y épi jantiyès, èk wèspèkté konsyans li. (Èfés. 5:28, 29) Mé, si on mawi ki ka sèvi Jéhova ka fè sé bagay sala, ében i ka bat madanm li, ében i ka gadé pònografi, ès i sa chanjé katjil li épi atitid li?

MANNYÈ ON MAWI SA CHANJÉ KATJIL LI ÉPI ATTITID LI

10. Magwé Jézi pa té mayé, kisa on mawi sa apwann an ègzanp li?

¹⁰ Bon, si on mawi ki ka sèvi Jéhova ka maltwété madanm li an pyès kalité mannyè, kisa ki sa édé’y pou chanjé? Ében, i sa fè éfò pou imité Jézi. Èk non, Jézi pa té janmen mayé, mé mannyè-a i té ka twété sé zapòt li-a, sé on bèl ègzanp ki sa moutwé on mawi mannyè pou’y twété madanm li. (Èfés. 5:25) Konsa, annou konsidiwé mannyè Jézi té ka palé bay sé zapòt li-a. La ni bèl lison on mawi sa apwann an sa.

11. Ki mannyè Jézi té ka twété sé zapòt li-a?

¹¹ Jézi té ka toujou twété sé zapòt li-a épi jantiyès èk wèspé. I pa janmen maltwété yo. Èk magwé i té ni otan pli pouvwa épi lotowité pasé yo, i pa janmen sèvi sa pou fè yo vini pé’y. Pito sa, i té ka toujou édé yo. (Jan 13:12-17) Osi, Jézi té ‘ni pasyans épi i té dous.’ Èk i ankouwajé sé zapòt li-a pou swiv ègzanp li. I di yo si yo té fè sa, yo té kay jwenn lapé an tjè yo. (Maf. 11:28-30) Wi, Jézi té dous, mé sa pa vlé di i té fèb. Anfen, on moun ki dous sé on moun ki byen fò. Wi, i fò asé pou kontwolé kò’y èk wèsté kam, menm si i faché.

12. Ki mannyè Jézi té ka sèvi pawòl li?

¹² Jézi té ka toujou sèvi pawòl li pou konsolé èk ankouwajé lézòt. Èk, i té toujou janti an mannyè-a i té ka palé épi sé moun-lan ki té ka swiv li-a. (Louk 8:47, 48) Anfen, Jézi té jis janti épi sé lèlmi’y-lan. Lè yo té ka “ensiltéʼy, i pa janmen ensilté yo déviwé.” (1 Pita 2:21-23) Èk la té ni lè, Jézi té ka wèsté an silans, pito pou’y palé adan an mannyè ki pa té janti. (Maf. 27:12-14) Mi on bèl ègzanp Jézi kité bay mawi ki ka sèvi Jéhova!

13. Lè Bib-la di, on mawi sipozé “viv épi” madanm li, kisa sa vlé di? (Mafyou 19:4-6) (Gadé pòtwé-a osi.)

¹³ Jézi té bay mawi koumandman-an pou wèsté fidèl pou madanm yo. Papa’y Jéhova té bay mawi menm koumandman sala lè’y té di, on nonm sipozé “viv épi madanm li kon madanm èk misyé.” (Li Mafyou 19:4-6.) An langaj Gwik, mò pawòl-la yo sèvi pou èkspwèsyon-an “viv épi” vlé di, “kolé ansanm.” Konsa, lè dé moun mayé, yo sipozé tèlman pwé épi yonn a lòt, sé akwèdi yo kolé ansanm. Èvèk si on bagay sépawé yo, yo toulé dé-a ka soufè. On mawi ki ni kalité wilasyon sala épi madanm li, pa kay gadé, kouté, ében li bagay pònografi. Wi, i pa kay ‘kité zyé’y kontiné gadé bagay ki pa vo anyen.’ (Sam 119:37) Èk menm kon Jòb, i détèminé pou’y pa gadé pyès lòt madanm adan on mannyè sèksyouwal.​—Jòb 31:1.

14. Si on mawi ka maltwété madanm li an pyès mannyè, ki diféwan bagay i ni pou fè pou’y chanjé?

¹⁴ Bon, kon nou ja wè, on mawi ki ka maltwété madanm li, ki pa pawòl li ében pa aksyon’y, ka donmajé wilasyon’y épi madanm li, èk wilasyon’y épi Jéhova. Konsa, si on mawi ka maltwété madanm li, kisa i ni pou fè pou’y wanjé wilasyon’y épi madanm li èk Jéhova? Ében, la ni plizyè bagay i kay ni pou fè. (1) I ni pou konpwann, sa sé on bagay ki byen sèwyé, èk Jéhova ka wè èk tann tout bagay. Konsa i pa sa séwé anyen. (Sam 44:21; Éklé. 12:14; Hib. 4:13) (2) I ni pou doubout maltwété madanm li, èk chanjé vyé atitid li. (Pwov. 28:13) (3) I ni pou mandé Jéhova épi madanm li pou pawdonnen’y. (Twav. 3:19) Èvèk i ni pou plédé épi Jéhova pou bay dézi-a èk èd-la i bizwen, pou’y sa chanjé mannyè i ka katjilé èk palé, èk pou édé’y fè sé bagay-la ki ka plè’y. (Sam 51:10-12; 2 Kòr. 10:5; Filip. 2:13) (4) I ni pou twavay an ling épi lapwiyè’y. Konsa i ni pou fè tout sa’y pé pou moutwé i hayi tout kalité vyolans, èk tout kalité pawòl ki ka blésé tjè moun. (Sam 97:10) (5) Pli vit ki posib, i ni pou alé oti sé ansyen-an èk mandé yo pou édé’y. (Jémz 5:14-16) (6) I ni pou désidé kisa i kay fè pou’y pa janmen adòpté vyé atitid sala ankò. On lòt bagay nou té wè sé sa, lè on mawi ka gadé pònografi, sa ka mennen pwoblenm an mawiyaj-la. Konsa, on mawi ki ka gadé pònografi kay ni pou fè sé menm sis (6) bagay-la nou fini mansyonnen-an, pou’y chanjé. Èvèk i sa asiwé, Jéhova kay ba’y èd-la i bizwen pou’y fè sé chanjman-an ki nésésè. (Sam 37:5) Bon, si on mawi doubout maltwété madanm li, sa sé on bon bagay. Mé, i ni pou fè pli pasé sa. I osi ni pou moutwé madanm li lanmityé épi wèspé. Ki mannyè i sa fè sa?

MOUTWÉ MADANM OU LANMITYÉ ÉPI WÈSPÉ

15. Ki diféwan bagay on mawi sa fè pou moutwé madanm li afèksyon?

¹⁵ Moutwé madanm ou afèksyon. Bib-la ka ankouwajé nou pou moutwé lézòt moun lanmityé, pa aksyon nou. An ling épi pwensip sala, la ni fwè ki ka fè on bagay toulé jou pou moutwé madanm yo lanmityé épi afèksyon. (1 Jan 3:18) Èk souvan, sé pa anyen èstòdinè ou ni pou fè pou’w moutwé madanm ou afèksyon. Pou ègzanp, ou sa tjébé lanmen’y, ében anbwasé’y. Osi, ou sa annèk voyé’y on ti tèks pou di’y ou ka mantjé’y, ou enmen’y, ében pou mandé’y ki mannyè jounen’y ka alé. Èk tanzantan, ou sa ékwi madanm ou on ti lèt pou di’y mizi enmen ou enmen’y. Tout sé bagay sala sé ti bagay ki byen senp, mé on mawi ki ka fè sa ka moutwé lanmityé épi afèksyon pou madanm li, èk sa ka fòtifyé wilasyon yo.

16. Pouki i enpòtan pou on mawi moutwé madanm li apwésiasyon?

¹⁶ Moutwé madanm ou apwésiasyon. Lè on mawi ni lanmityé èk wèspé pou madanm li, i ka ankouwajé madanm li èk i ka fè’y konnèt i ni an chay valè pou li. Pou ègzanp, i ka toujou wimèsyé madanm li pou tout sa’y ka fè pou sipòté’y. (Kòl. 3:15) Lè on mawi ka toujou di madanm li mannyè i ka apwésyé’y, sa ka touché tjè madanm-lan, èk i ka ba’y asiwans-lan ki, mawi’y enmen’y, èk i sa dépan asou’y.​—Pwov. 31:28.

17. Ki mannyè on mawi sa moutwé madanm li wèspé?

¹⁷ Twété madanm ou épi jantiyès èk wèspé. Lè on mawi enmen madanm li, i ka chéwi’y. Pou li, madanm li sé on kado hòd Jéhova—on kado ki ni an chay valè. (Pwov. 18:22; 31:10) Konsa, i ka toujou twété madanm li épi jantiyès èk wèspé. Èk lè’y vini pou sèks, on mawi ki ka wèspèkté madanm li pa kay bay chalè pou’y fè bagay i pa konfòtab épi, bagay ki ka anbété konsyans li,g ében bagay ki ka fè’y santi akwèdi i pa ni pyès valè. Mawi-a menm kay fè tout sa’y pé pou’y tjenn on bon konsyans douvan Jéhova.​—Twav. 24:16.

18. Kisa on mawi sipozé kontiné fè? (Osi, gadé enfòmasyon-an ki anba sijé-a “Kat Bagay Ou Sa Fè Pou Moutwé Madanm Ou Wèspé.”)

¹⁸ Si’w sé on mawi, ou sa asiwé Jéhova ka wè tout sa’w ka fè pou’w moutwé madanm ou lanmityé épi wèspé, èk i ka apwésyé sa an chay. Konsa, fè lidé’w pou’w pa fè anyen ki kay blésé tjè madanm ou. Pito sa, kontiné twété’y épi jantiyès èk wèspé. Èk kontiné moutwé’y afèksyon. Si’w fè sa, ou kay pwotéjé wilasyon-an ki pli enpòtan an lavi’y. Sa vlé di, wilasyon’w épi Jéhova.​—Sam 25:14.