Bay Jéhova Laglwa

1. Kisa an chay moun pli mélé épi jòdi jou?

JÒDI jou, pitèt ou ha òbzòvé an chay moun pli mélé épi kò yo pasé lézòt. Pou ègzanp, an chay moun ka sèvi intannèt-la pou bavadé konsèné kò yo èk sa yo ka fè. Malèwèzman sé byen pé moun ki ka bay Jéhova laglwa. Alò an atik sala nou kay diskité kisa i vlé di pou bay Jéhova laglwa, èk pouki nou sipozé fè sa. Osi, nou kay apwann mannyè nou sa bay Jéhova laglwa-a i méwité, èk nou kay osi wè mannyè Jéhova menm kay glowifyé non’y an tan pou vini.

KISA’Y VLÉ DI POU BAY JÉHOVA LAGLWA?

2. Ki mannyè Jéhova té moutwé laglwa’y asou Mòn Saynay? (Gadé pòtwé-a osi.)

² Bib-la ka moutwé Jéhova sé an Dyé ki èstòdinè, i ni an chay pouvwa, èk i bon toubonnman. Déotwa jou apwé Jéhova délivwé nasyon Izwayèl hòd èslavaj an Éjip, i moutwé yo i sé yon Dyé ki èstòdinè èk i ni an chay pouvwa. Imajiné sa, plizyè milyon an sé jan Izwayèl-la té asanblé bò Mòn Saynay pou tann sa Jéhova té kay di yo. A lè sala, moutany-lan té kouvè épi yon nwaj ki té nwè èk épé. Osi, sibitman la té ni on gwo twanblanntè, èvèk moutany-lan koumansé soukwé an chay. La té ni zéklè, loway, èk on kòn té ka sonnen byen fò. (Ègz. 19:16-18; 24:17; Sam 68:8) Wi, san dout, lè Jéhova té fè sé bagay sala sé jan Izwayèl-la té étonnen pou wè laglwa Jéhova.

3. Ki mannyè lézòm sa bay Jéhova laglwa?

³ Vwéman, Jéhova sé an Dyé ki èstòdinè! Kanmenm, ès lézòm sa bay Jéhova laglwa? Asiwéman! Èk yon mannyè nou sa fè sa, sé lè nou di moun konsèné pouvwa Jéhova èk sé bèl kawaktè’y-la. Osi, an lòt mannyè nou sa bay Jéhova laglwa, sé lè nou ba’y lonnè pou tout sé bagay-la i ka édé nou pou fè. (Izay. 26:12) Bon. Wa David sété yon moun ki té bay Jéhova laglwa. Adan an lapwiyè i té ofè Jéhova an pwézans sé jan Izwayèl-la, i di Bondyé: ‘Dyé Jéhova, ou gwan èk bèl, sé ou ki toupisan, ou ni an pil laglwa épi ou ni an pil pouvwa. Paski, tout sa ki an syèl-la èvèk tout sa ki asou latè-a sé sa ou.’ Èk apwé lapwiyè-a, ‘tout kongwigasyon-an koumansé glowifyé Jéhova’.—1 Kw. 29:11, 20.

4. Ki mannyè Jézi té bay Jéhova laglwa?

⁴ Lè Jézi té asou latè-a, i bay Papa’y laglwa lè’y fè moun konnèt sé Jéhova ki té ba’y pouvwa-a pou fè sé miwak-la. (Mak 5:18-20) Jézi osi bay Jéhova laglwa an sa i té ka di moun konsèné Papa’y, èk an mannyè-a i té ka twété moun. Pou ègzanp, yon jou, Jézi té ka enstwi adan yonn an sé légliz sé Jwif-la, èvèk anpami sé moun-lan ki té ka kouté’y, sété an madanm ki té ni yon vyé lèspwi andidan’y pou dizwit (18) lanné. Vyé lèspwi sala té fè’y malad, i té fè’y koubé, èk i pa té sa doubout dwèt pyès. Lè Jézi wè madanm-lan, sa fè’y lapenn èk i té vlé édé’y. Alò, i apwoché madanm-lan, èk adan an mannyè ki té byen dous, i di’y: “Madanm, maladi’w ja djéwi.” Èk “i mété lanmen’y anlè madanm-lan, èk la menm [madanm-lan] doubout dwèt èk i glowifyé Bondyé.” Wi, madanm-lan té apwésyé ki, Jéhova té ba’y bon santé ankò! (Louk 13:10-13) Alò, i té ni bon wézon pou bay Jéhova laglwa, èk nou osi ni bon wézon pou bay Jéhova laglwa.

POUKI NOU KA GLOWIFYÉ JÉHOVA?

5. Pouki nou ka wèspèkté Jéhova?

⁵ Nou ka glowifyé Jéhova paski nou ni an chay wèspé pou li. Bon. Nou ni an chay wézon pouki nou sipozé wèspèkté Jéhova. Pou ègzanp, i sé Bondyé toupisan. Sa vlé di, i ni pouvwa-a pou fè népòt sa’y vlé, èk i pa sa janmen vini las. (Sam 96:4-7) Osi nou ka wè lasajès li an sé bagay-la i fè. Sé li ki ban nou lavi èk tout sa nou bizwen pou nou sa viv. (Wév. 4:11) An plis di sa, i fidèl. (2 Sm 22:26) Èvèk i ka ni siksé an tout sa i ka fè, èvèk i ka toujou tjenn pwonmèt li. (Jòch. 23:14) Alò, i pa ka sipwi nou ki, pwofèt Jérémaya di konsèné Jéhova: ‘La pa ni pyèsonn kon ou anpami tout sé moun-lan ki ni lasajès anpami sé nasyon-an, èk anpami tout sé wéyòm yo-a’! (Jér. 10:6, 7) Wi, nou ni plizyè wézon pouki nou sipozé wèspèkté Papa nou an syèl. Mé nou pa ka sèlman wèspèkté Jéhova, nou enmen’y paski i ni bèl kawaktè.

6. Pouki nou enmen Jéhova?

⁶ Nou ka glowifyé Jéhova, paski nou enmen’y an chay. Èk nou enmen Jéhova pou lapéti sé bèl kawaktè’y-la. Pou ègzanp, Jéhova plen mizéwikòd èk konpasyon. (Sam 103:13; Izay. 49:15) Lè nou an lapenn i ka santi penn nou. (Zèk. 2:8) I ka édé nou pou vin konnèt li, èk pou vini Jan’y. (Sam 25:14; Twav. 17:27) Osi, Jéhova ka abésé kò’y. Anfen, Sam 113:6, 7 ka di: ‘I ka bésé byen ba pou gadé syèl èk latè. Èk i ka lévé sé maléwé-a hòd lapousyè-a.’ Alò, pou tout sé bon wézon sala nou ka glowifyé gwan Dyé nou, Jéhova.​—Sam 86:12.

7. Ki bèl pwivilaj nou ni?

⁷ Nou ka glowifyé Jéhova paski nou vlé lézòt konnèt li. Bon. An chay moun pa konnèt lavéwité-a konsèné Jéhova, ében adan di yo pa ka menm kwè i ka ègzisté. Mé pouki? Ében sa sé paski, Satan ja di an chay mansonj asou Jéhova, èk an chay moun ka kwè sé mansonj sala. (2 Kòr. 4:4) Wi, pou ègzanp, Satan ka fè moun kwè Jéhova sé an Dyé ki plen waj, i pa mélé épi nou, èk sé li ki wèskonsab pou soufwans nou an latè-a. Mé nou konnèt lavéwité-a konsèné Dyé nou, Jéhova! Alò, nou ni bèl pwivilaj-la pou di moun ki kalté Dyé Jéhova vwéman yé, èk pou édé yo glowifyé’y tou. (Izay. 43:10) Bon. Sam katwiven sèz (96) ka fiksé asou mannyè nou sa bay Jéhova laglwa, alò, annou diskité adan sé vèwsé-a an Sam sala. Èk kon nou ka fè sa, annou gadé pou diféwan mannyè nou sa bay Jéhova laglwa-a i méwité.

KI MANNYÈ NOU SA BAY JÉHOVA LAGLWA-A I MÉWITÉ?

8. An ki mannyè nou sa bay Jéhova laglwa? (Sam 96:1-3)

⁸ Li Sam 96:1-3. Nou sa glowifyé Jéhova lè nou palé konsèné’y. Sé vèwsé sala ka di nou pou “chanté bay Bondyé”, pou “lévé nonʼy”, pou “fè moun konnèt bon nouvèl-la mannyè i ja sové nou”, èk pou “fè sé nasyon-an konnèt pouvwaʼy”. Wi, an tout sé mannyè sala nou sa sèvi pawòl nou pou glowifyé Jéhova. Bon. I sété an plézi pou sèvant Jéhova an tan pasé pou di moun konsèné bèl kawaktè Jéhova, èk tout sé bon bagay-la i té fè ba yo. (Dann. 3:16-18; Twav. 4:29) Alò, ki mannyè nou sa swiv ègzanp yo?

9-10. Kisa ou apwann an èspéyans Angelena? (Gadé pòtwé-a osi.)

⁹ Bon. Annou konsidiwé èspéyans Angelena,a an sésé ki ka viv an Lanméwik. Angelena té moutwé kouwaj lè’y té palé konsèné Jéhova an plas twavay li. Yo envité Angelena pou an mitin koté tout twavayè nèf té kay ni an chans pou di moun kéchòy konsèné lavi yo. Konsa Angelena pwépawé déotwa pòtwé pou moutwé yo bèl lavi-a i ka enjwi kon an Témwen Jéhova. Kanmenm, djòs avan i koumansé palé, an lòt twavayè entwodwi kò’y. Nonm-lan di i té lévé épi pawan ki té Témwen Jéhova, èk i koumansé kwititjé sa Témwen Jéhova ka kwè adan. Angelena di: “Tjè mwen té ka bat byen fò, mé mwen té sav sa’y té ka di konsèné Jéhova pa té vwé pyès. Alò mwen katjilé: ‘Mwen ni pou di yo lavéwité-a konsèné Jéhova.’”

¹⁰ Lè nonm-lan fin palé, Angelena di an lapwiyè byen vit an tjè’y. Apwé sa, adan an mannyè ki té byen janti i di nonm-lan: “Menm kon ou mwen té lévé épi pawan ki té Témwen Jéhova èk jòdi mwen sé an Témwen Jéhova.” Magwé i pa té ézé, Angelena wèsté kam. I moutwé sé twavayè-a sé pòtwé-a i té pwépawé-a koté li èk sé jan’y-lan té ka sèvi Jéhova épi djèwté. Osi, i èspliké sa Témwen Jéhova ka kwè adan. (1 Pita 3:15) Èk kisa ki té wézilta-a? Èben lè Angelena fini palé, nonm-lan vini dous. Èk i jis mansyonnen yonn dé bon èspéyans i té ni lè i té jenn èk i té ka asosiyé épi Témwen Jéhova. Angelena di: “Jehovah méwité nou fè défans li. Èk i sé an lonnè pou di moun lavéwité-a konsèné’y.” Wi, i sé vwéman an gwan lonnè èk pwivilaj pou nou glowifyé Jéhova lè moun ka déwèspèkté’y.

11. Ki mannyè pèp Jéhova an tan lontan té swiv pwensip-la an Sam 96:8?

¹¹ Li Sam 96:8. Nou sa glowifyé Jéhova épi bagay valowab nou. Sèvant Jéhova ka toujou onnowé’y an mannyè sala. (Pwov. 3:9) Pou ègzanp, sé jan Izwayèl-la té bay lajan èk lòt bagay valowab pou bati tanp-lan èk pou tjenn li an bon kondisyon. (2 Wa 12:4, 5; 1 Kw. 29:3-9) Osi, sé disip Jézi-a “té ka dépansé lajan yo pou bay Jézi épi sé [zapòt] li-a sa yo té bizwen.” (Louk 8:1-3) Èk Bib-la ka di nou an pwèmyé syèk-la lè adan Kwityen té ka soufè a kòz di an gwo lafen, sé fwè èk sè yo-a ki té ka viv an diféwan plas té voyé lajan ba yo pou édé yo. (Twav. 11:27-29) Konsa an menm mannyè-a, jòdi jou nou osi sa glowifyé Jéhova lè nou fè kontwibyousyon.

12. Ki mannyè kontwibyousyon nou ka bay Jéhova laglwa? (Gadé pòtwé-a osi.)

¹² Bon. Mi an èspéyans ki ka moutwé mannyè kontwibyousyon nou ka bay Jéhova laglwa. An lanné dé mil ven (2020), péyi Zimbabwe pa té ni lapli pou an chay tan. Anfen, plis pasé yon milyon moun té sa mò paski yo pa té ni manjé. Yonn an sé moun sala sété yon sésé. Non’y sé Prisca. Menm si sitiwasyon-an té byen difisil diwan tan sèk sala, Prisca kontiné pwéché toulé Mèkwédi èk Vandwédi, jik diwan sézon-an yo té ka twavay tè-a. Lè sé vwézinaj li-a té ka wè i té ka alé an minis-la pito i alé an jaden’y, yo té ka pwan’y sèvi wizib èk yo té ka di’y: “Ou kay mò fen.” Mé Prisca té asiwé Jéhova té kay otjipé’y, alò i té ka di yo: “Jéhova pa kay janmen tounen do’y asou sé sèvant li-a.” Touswit apwé sa, Prisca twapé manjé èk lòt bagay i té bizwen hòd ògannizasyon nou. Wi, i té sa twapé èd sala pou lapéti sé donnasyon-an nou chak ka fè. Sé vwézinaj Prisca-a té étonnen èk yo di’y: “Bondyé’w ka toujou édé’w, alò nou vlé apwann pli konsèné’y.” Èk sèt (7) an sé vwézinaj li-a koumansé atandé sé mitin-lan.

13. Ki lòt bagay nou sa fè pou glowifyé Jéhova? (Sam 96:9)

¹³ Li Sam 96:9. Nou ka glowifyé Jéhova pa bon kondwit nou. Sa vlé di, lè nou tjenn kondwit nou nèt èk san fòt. Sé pwèt-la ki té ka wann sèvis an tabènak-la èk pli ta an tanp Jéhova té ni pou lavé kò yo èk tjenn kò yo nèt. (Ègz. 40:30-32) Bon. Nou osi ni pou tjenn kò nou nèt pa sèlman lè nou benyen èk otjipé kò nou, mé osi lè nou tjenn kò nou byen lwen népòt bagay Jéhova hayi. (Sam 24:3, 4; 1 Pita 1:15, 16) Bib-la di nou ni pou twavay wèd pou jété “vyé lavi-a”, sa vlé di atitid èk pwatik ki ka ofwansé Bondyé. Èk nou osi ni pou twavay wèd pou “mété an lavi ki nèf.” Sa vlé di, nou ni pou apwann pou katjilé èk fè bagay adan an mannyè ki ka moutwé nou ka swiv Jéhova èk sé bèl kawaktè’y-la. (Kòl. 3:9, 10) Èvèk épi èd Jéhova, jis moun ki té ka fè bagay ki té byen mové sa chanjé èk mété an lavi ki nèf.

14. Kisa nou apwann an èspéyans Jack? (Gadé pòtwé-a osi.)

¹⁴ Annou konsidiwé èspéyans Jack. Jack sété an nonm ki té byen danjéwé èk i té fè bagay ki té byen mové. Anfen, yo té jis ba’y soud non-an Denmou-an. Èvèk yo kondanné Jack pou mò pou lapéti sé mové bagay-la i té fè-a. Kanmenm, padan i té ka èspéyé jou-a yo té kay tjwé’y, Jack dakò pou étidyé Bib-la épi an fwè ki té ka vizité pwizon-an. Magwé Jack té fè an chay mové bagay an lavi’y, i chanjé sé vyé kawaktè’y-la èk apwé an lè i jis batizé kon yon Témwen Jéhova. Anfen, Jack té fè si tèlman chanjman, jou-a yo té kay tjwé’y, adan sé gad-la té ka pléwé kon yo té ka di dédé. Yon sòlda ki té ka twavay an pwizon-an di: “Jack sété yonn an sé pli mové moun-lan an pwizon sala, mé apwézan i sé yonn an sé pli mèyè-a.” Lè sé fwè-a witounen an pwizon-an pou fè mitin simenn-lan apwé Jack mò, yo jwenn an pwizonnyé ki atandé mitin pou pwèmyé fwa-a. Bon, pouki i désidé pou atandé? Ében sé chanjman-an Jack té fè té touché’y si tèlman i té vlé konnèt kisa i té ni pou fè pou adowé Jéhova. Wi, i a klè, kondwit nou ka glowifyé Papa nou an syèl!​—1 Pita 2:12.

KI MANNYÈ JÉHOVA KAY GLOWIFYÉ NON’Y AN TAN POU VINI?

15. Touswit Jéhova kay glowifyé non’y. Ki mannyè i kay fè sa? (Sam 96:10-13)

¹⁵ Li Sam 96:10-13. Sé dènyé vèwsé-a an Sam katwiven sèz (96) ka dékwi Jéhova kon an Jij èk an Wa ki pa ka moutwé pwéféwans. Bon. Ki mannyè Jéhova kay glowifyé non’y an tan pou vini? Ében i kay fè sa lè i mennen jistis asou latè-a. Touswit Jéhova kay détwi Gwan vil Babilonn-an, sa sé tout fo wilizyon paski yo ja fè an chay mové bagay èk yo ja di an chay mansonj asou’y. (Wév. 17:5, 16; 19:1, 2) Èk lè Gwan vil Babilonn-an pa la ankò, adan moun pé koumansé adowé Jéhova ansanm épi nou. Èk finalman, diwan ladjè Anmagèdonn Jéhova kay détwi vyé sistèm Satan ansanm épi tout moun ki hayi’y èk ki ka manti asou’y. Kanmenm Jéhova kay sové tout moun ki enmen’y, ki ka obéyi’y, èk ki ka ba’y laglwa. (Mak 8:38; 2 Tèsa. 1:6-10) Èk apwé dènyé tès-la ki kay fèt lè Mil Lanné-a fini, Jéhova kay moutwé a klè sé li sèlman ki méwité adowasyon hòd tout moun. (Wév. 20:7-10) Èvèk a lè sala, kon Habakòk 2:14 ka di, ‘latè-a kay vwéman plen épi konnésans Jéhova menm kon lanmè-a plen dlo.’

16. Kisa ou fè lidé’w pou fè? (Gadé pòtwé-a osi.)

¹⁶ Pa dé bon i kay bon lè tout moun ki vivan kay bay Jéhova laglwa-a i méwité! Mé kanmenm, kon nou ka èspéyé jou sala, jis apwézan nou sa fè tout sa nou pé pou palé konsèné Dyé nou Jéhova èk pou viv lavi nou adan an mannyè ki kay ba’y laglwa. Alò, pou édé nou fiksé asou gwo wèskonsabilité sala, Pwensipal Konmité-a chwazi Sam 96:8 kon lévanjil-la pou lanné 2025. I ka di: “Glowifyé non [Jéhova] Bondyé Senyè-a paski i méwité sa.”