LAVI NOU KON KWITYEN
Éséyé Apwann Mannyè Jéhova Ka Katjilé
An tout sa nou ka fè, nou vlé fè tjè Jéhova kontan. (Pwovèb 27:11) Kanmenm pou nou fè tjè Jéhova kontan, nou ni pou fè disizyon ki an ling épi katjil li menm si nou pa ni on lwa pou djidé nou. Konsa, kisa ki sa édé nou fè disizyon ki an ling épi katjil Jéhova?
Li ében kouté Pawòl Bondyé touléjou. Chak lè nou li ében kouté Pawòl Bondyé sé konmsi nou ka pasé tan épi Jéhova. Alò, yonn an sé mannyè-a nou sa apwann mannyè Jéhova ka katjilé, sé lè nou òbzòvé mannyè-a i té twété pèp li an tan pasé. Osi on lòt mannyè nou sa apwann mannyè Jéhova ka katjilé sé lè nou ègzanminé mannyè i aji épi moun ki té fè bon disizyon èk moun ki té fè mové disizyon. Èk pa obliyé lè nou ni pou fè on disizyon, lisentèspwi Jéhova sa édé nou chonjé bèl lison èk pwensip nou ja apwann an Pawòl li.—Jan 14:26.
Fè wichach. Lè ou ni pou fè on disizyon, mandé kò’w: ‘Ki vèwsé ében listwa an Bib-la ki sa édé mwen konnèt katjil Jéhova konsèné sitiwasyon-an?’ Osi, pwédyé bay Jéhova èk mandé’y pou édé’w, èvèk sèvi sé zouti-a ou ni an langaj ou pou fè wichach. Si’w fè sé bagay sala, ou kay twapé pwensip Bib ki kay édé’w épi sitiwasyon’w.—Sam 25:4.
GADÉ VIDIYO-A NOU DWÉ ‘KOUWI ÉPI PÈSÉVÉWANS’—MANJÉ BON MANJÉ, ÈK APWÉ WÉPONN SÉ KWÈSYON SALA:
Ki diféwan pwòblenm jenn sè-a an vidiyo-a té ni?
Si’w ka èspéyansé pwòblenm kon jenn sè-a an vidiyo-a, ki mannyè ou sa sèvi sé zouti-a pou fè wichach pou édé’w?
Lè nou ni disizyon pou fè, ki bennéfis nou sa twapé si nou fè tan pou étidyé Bib-la èk fè wichach?—Hibrou 5:13, 14