Lison Nou Sa Apwann Hòd Sé Wa-a Ki Té Ka Kondwi Nasyon Izwayèl

1-2. Kisa Bib-la ka di nou konsèné adan sé wa-a ki té ka kondwi nasyon Izwayèl?

BIB-LA ka di nou konsèné kawant (40) nonm ki té ka kondwi kon wa an Izwayèl.a Èk i pa ka séwé sé bagay-la adan di yo té fè. Wi, jis sé bon wa-a té fè bagay ki mové. Pou ègzanp, annou konsidiwé ègzanp Wa David, ki té on bon wa. An 1 Wa 14:8 Jéhova di konsèné’y: ‘David, sèvant mwen . . . té swiv mwen épi tout tjè’y, èk i té ka toujou fè sa ki dwèt an zyé mwen.’ Mé kanmenm, David fè adiltè épi on madanm mayé, èk i fè plan pou tjwé mawi madanm-lan diwan on ladjè.​—2 Sm 11:4, 14, 15.

² Bib-la ka osi di nou konsèné adan sé bon bagay-la sé wa-a ki pa té wèsté fidèl pou Jéhova té fè. Pou ègzanp, annou konsidiwé ègzanp Wa Réyobowanm. Jéhova di i sété on wa ki ‘fè sa ki mové’. (2 Kw. 12:14) Mé, Réyobowanm té fè bon bagay tou. Pou ègzanp, i obéyi Jéhova lè Jéhova té di’y pou pa goumen kont sé dis (10) lafanmi nasyon Izwayèl-la, èk pou kité yo chwazi on lòt wa pou kondwi yo. Réyobowanm osi té fòtifyé plizyè vil an wéyòm li pou pwotéjé pèp Bondyé hòd lèlmi yo.​—1 Wa 12:21-24; 2 Kw. 11:5-12.

3. Ki kwèsyon nou vlé twapé wépons-lan pou, èk kisa nou kay diskité an atik sala?

³ I enpòtan pou twapé wépons-lan pou kwèsyon sala: ‘Si sé wa-a an Izwayèl té ka fè bon bagay èk mové bagay, kisa Jéhova té ka gadé pou, pou détèminé si an wa té fidèl pou li opa?’ Alò, wépons-lan pou kwèsyon sala, kay édé nou konpwann sa Jéhova ka gadé pou an nou pou nou sa plè’y. Bon, an atik sala nou kay diskité twa (3) bagay Jéhova té ka gadé pou adan on wa, pou édé’y désidé si wa-a té bon opa. Pwèmyéman, Jéhova té ka gadé pou wè si wa-a té enmen’y épi tout tjè’y. Dézyenman, i té ka gadé pou wè si wa-a té wépanti lè’y té fè kéchòy ki té mové. Èk twazyenman, i té ka gadé pou wè si wa-a té ka kontiné adowé’y an mannyè-a ki dwèt-la.

YO TÉ SÈVI JÉHOVA ÉPI TOUT TJÈ YO

4. Kisa Bib-la ka di nou konsèné sé wa-a ki té fidèl èvèk sé wa-a ki pa té fidèl?

⁴ Sé wa-a ki té vwéman plè Jéhova té sèvi’y épi tout tjè yo.b Pou ègzanp Bib-la di nou Wa Jéhòchafat té ‘chaché pou Jéhova épi tout tjè’y.’ (2 Kw. 22:9) Èk konsèné Wa Josaya, 2 Wa 23:25 di: ‘La pa té ni pyès wa avan Josaya ki té viwé jwenn Jéhova kon li.’ Mé kisa Bib-la ka di nou konsèné sé wa-a ki pa té fidèl? Pou ègzanp Sòlomonn, lè’y té an vyéyès li, i té fè sa ki té mové an zyé Bondyé. Anfen, 1 Wa 11:4 di nou: ‘[Sòlomonn] pa té kontiné sèvi Jéhova, Bondyé’y-la, épi tout tjè’y.’ Èk an lòt wa ki pa té fidèl sété Wa Anbaydjanm. Konsèné’y Bib-la di: ‘I pa té sèvi Jéhova, Bondyé’y-la, épi tout tjè’y’. —1 Wa 15:3.

5. Kisa i vlé di pou sèvi Jéhova épi tout tjè’w?

⁵ An moun ki ka sèvi Jéhova épi tout tjè’y pa ka adowé Bondyé sèlman paski i sav i sipozé fè sa. Pito, moun-lan ka sèvi Jéhova paski i ka wèspèkté’y èk i vwéman enmen’y. An plis di sa, diwan tout lavi’y i ka kontiné enmen Jéhova èk wèspèkté’y.

6. Ki mannyè nou sa enmen Jéhova épi tout tjè nou? (Pwovèb 4:23; Mafyou 5:29, 30 NWT)

⁶ Bon, ki mannyè nou sa imité sé wa-a ki té fidèl èk kontiné enmen Jéhova épi tout tjè nou? Ében nou sipozé wèsté lwen népòt bagay ki sa afébli lanmityé nou pou Jéhova. Pou ègzanp, nou ni pou byen chwazi sa nou ka gadé èk fè pou anmizman. Osi, nou ni pou chwazi bon jan ki pa kay fè nou kwè sé lajan ki pli enpòtan bagay-la an lavi. Alò, si nou wéyalizé an bagay ka afébli lanmityé nou pou Jéhova, nou ni pou tiwé’y èk jété’y.​—Li Pwovèb 4:23; Mafyou 5:29, 30 NWT.

7. Pouki nou sipozé wèsté lwen népòt bagay ki sa afébli lanmityé nou pou Jéhova?

⁷ Nou ni pou pwotéjé tjè nou, paski si nou pa fè sa, i ézé pou nou kwennen kò nou èk kwè paski nou anbawasé an sèvis Jéhova, sé mové bagay-la an latè Satan pa sa afèkté nou. Pou ègzanp, imajiné tan-an byen cho. Alò pou’w santi fwé, ou désidé pou bwè pli dlo. Mé magwé ou ka bwè dlo, kisa ki kay fèt si ou wèsté an sòlèy-la tout jounen-an èk ou pa chaché pou an ti lonbwaj? Ében ou pa kay janmen santi wéfwéchi, anfen ou pé jis tonbé malad. Konsa pwen-an sé sa, i pa asé pou nou fè bon bagay ki kay édé nou vansé pwé Jéhova. Nou osi ni pou pwotéjé kò nou hòd népòt bagay an vyé latè sala ki sa afébli lanmityé nou pou Jéhova.​—Èfés. 2:2.

YO WÉPANTI HÒD PÉCHÉ YO

8-9. Kisa Wa David èk Wa Hèzèkaya té fè lè yo twapé kowijman? (Gadé pòtwé-a.)

⁸ Kon nou ja mansyonnen, Wa David té fè an péché ki té byen gwav. Kanmenm lè pwofèt Nafann kowijé’y pou péché-a i té fè-a, i abésé kò’y èk i wépanti. (2 Sm 12:13) Èk i pa té fè sa pou kwennen Nafann ében pou chapé pinisyon. Anfen, lè nou li pawòl li an Sam senkantenyen (51), nou ka wè a klè David té vwéman wigwété péché-a i té fè-a.​—Sam 51:3, 4, 17.

⁹ Hèzèkaya sété an lòt wa ki té péché kont Jéhova. Anfen, an 2 Kwonnikèl 32:25 Bib-la di: ‘I kité lògèy antwé an tjè’y, èk a kòz di sa waj Bondyé vini asou li, Jouda èk Jérouzalèm.’ Bon. Poutji Hèzèkaya dévlopé lògèy? Ében pitèt sé paski Jéhova té ba’y wichès, ében paski Jéhova té ba’y laviktwa asou Asiriya, ében paski Jéhova té djéwi’y hòd an mové maladi. Konsa, pitèt sé lògèy ki annékòz Hèzèkaya pou moutwé jan Babilonn tout wichès li. Èk a kòz di sa, pwofèt Izaya té ni pou kowijé’y èk di’y Jéhova té faché kont li. (2 Wa 20:12-18) Kanmenm, magwé Hèzèkaya fè péché ki gwav, i abésé kò’y èk i wépanti ofon tjè’y menm kon David. (2 Kw. 32:26) Alò Jéhova té gadé’y kon an wa ki té fidèl. Wi an zyé Jéhova, Hèzèkaya sété an wa ‘ki té ka kontiné fè sa ki dwèt’.—2 Wa 18:3.

10. Ki atitid Wa Amazaya té ni lè’y twapé kowijman?

¹⁰ An lòt wa an Jouda sété Wa Amazaya. I té kontiné fè sa ki dwèt an zyé Jéhova, ‘mé i pa té fè sa épi tout tjè’y’. (2 Kw. 25:2) Ki mové bagay Amazaya fè? Ében apwé Jéhova édé’y bat jan Idonm, i koumansé adowé sé dyé Idonm-lan.c Èk lè pwofèt Izaya palé épi’y konsèné sa i té fè-a, i pa té vlé kouté. Èk i fè pwofèt-la alé.​—2 Kw. 25:14-16.

11. Silon 2 Kòrint 7:9, 11, kisa nou ni pou fè pou Jéhova pawdonnen nou? (Gadé sé pòtwé-a osi.)

¹¹ Bon. Kisa nou apwann an sé twa (3) ègzanp sala? Ében nou apwann, nou sipozé wépanti lè nou fè péché. Èk nou ni pou fè tout sa nou pé pou pa fè péché-a ankò. Osi, si sé ansyen-an ban nou konsèy, pitèt pou an bagay nou kwè ki pa gwav, nou pa janmen vlé kwè Jéhova pa enmen nou, ében sé ansyen-an kont nou. Chonjé, jis sé bon wa-a an nasyon Izwayèl té bizwen kowijman èk konsèy. (Hib. 12:6) Alò, lè nou twapé kowijman nou vlé fè sé twa (3) bagay sala: (1) abésé kò nou, (2) fè népòt chanjman ki nésésè, èk (3) kontiné sèvi Jéhova épi tout tjè nou. Wi si nou vwéman wépanti ofon tjè nou lè nou péché, Jéhova kay pawdonnen nou.—Li 2 Kòrint 7:9, 11.

ADOWÉ JÉHOVA AN MANNYÈ-A KI DWÈT-LA

12. Pouki sé wa-a ki té fidèl té diféwan épi sé wa-a ki pa té fidèl?

¹² Sé wa-a Jéhova té konsidiwé kon moun ki té fidèl, té adowé’y an mannyè-a i té vlé yo adowé’y. Èk yo ankouwajé pèp Bondyé pou fè menm bagay-la. Kanmenm, kon nou té ja di, sé wa sala té ka fè lèwè. Mé magwé sa, yo adowé sèlman Jéhova, èk yo twavay wèd pou détwi sé idòl-la ki té an wéyòm yo.d

13. Pouki Jéhova té di, wa Éhab pa té fidèl?

¹³ Pouki Jéhova té di, adan sé wa-a pa té fidèl? Sé vwé, sé wa sala pa té ka toujou fè sa ki mové. Pou ègzanp, lè Wa Éhab, méchan-an, tann yo tjwé Nébòf pou lapéti’y, i abésé kò’y èk i té twis. (1 Wa 21:27-29) Osi, Wa Éhab té bati vil èk ganyen ladjè ba nasyon Izwayèl. (1 Wa 20:21, 29; 22:39) Mé i té fè on bagay ki té byen mové. I kité madanm li enflouwansé’y pou pwomoté adowasyon fo dyé. Èk i pa janmen wépanti hòd sa.​—1 Wa 21:25, 26.

14. (a) Pouki Jéhova di Wa Réyobowanm pa té fidèl? (b) Kisa pwèskè tout sé wa-a ki pa té fidèl té fè?

¹⁴ Annou konsidiwé an lòt wa, non’y sété Réyobowanm. Kon nou té di an pawagwaf dé (2), i fè an chay bon bagay. Mé apwé i vini on wa ki té fò, i doubout obéyi lwa Jéhova èk i koumansé adowé fo dyé. (2 Kw. 12:1) Apwé sa, délè i té ka adowé Jéhova, èk délè i té ka adowé fo dyé. (1 Wa 14:21-24) Bon. Sé pa sèlman Wa Réyobowanm èk Wa Éhab ki té doubout adowé Jéhova an mannyè-a ki dwèt-la. Anfen, pwèskè tout sé wa-a ki pa té fidèl pou Jéhova, adowé fo dyé, èk yo enkouwajé lézòt moun pou fè menm bagay-la. Alò i a klè, Jéhova té ka gadé pou wè si on wa té ka adowé’y an mannyè-a i vlé-a pou’y désidé si’y té fidèl opa.

15. Pouki Jéhova vlé moun adowé’y adan mannyè-a ki dwèt-la?

¹⁵ Pouki Jéhova té vlé sé wa-a èk nasyon Izwayèl adowé’y adan mannyè-a ki dwèt-la? Ében yon wézon sé paski sé wa-a té ni wèskonsabilité-a pou édé pèp Jéhova adowé’y an mannyè-a ki dwèt-la. Osi, lè moun ka adowé fo dyé, sa ka pousé yo pou fè mové bagay, èvèk yo ka maltwété lézòt moun. (Hoz. 4:1, 2) Apa di sa, sé wa-a èk jan Izwayèl té dèdiké pou Jéhova. Alò lè yo koumansé adowé fo dyé, Bib-la di sa té konmsi yo té ka fè adiltè. (Jér. 3:8, 9) Sa té sèwyé, paski lè an moun fè adiltè, i ka vwéman kasé tjè moun-lan i mayé-a. An menm mannyè-a si an moun ki dèdiké lavi yo pou Jéhova doubout sèvi’y èk i koumansé mélé kò’y an fo wilizyon, sa ka vwéman fè Jéhova lapenn.e​—Dito. 4:23, 24.

16. Pou Jéhova, kisa ki diféwans-lan ant yon moun ki dwèt épi yon moun ki mové?

¹⁶ Ki lison nou sa apwann an sé mové ègzanp sala? Ében nou ni pou wèsté lwen népòt bagay ki ni pou fè épi fo wilizyon. Mé nou osi sipozé adowé Jéhova an mannyè-a i vlé-a. Èk nou vlé fè tout sa nou pé an sèvis Jéhova. Anfen, pwofèt Malakay té byen èspliké sa ki diféwans-lan ant an bon moun èk an mové moun. An Malakay 3:18, i di: ‘Ou kay wè diféwans-lan ankò, ant yon moun ki dwèt épi yon moun ki mové, èk ant yon moun ki ka sèvi Bondyé èk yonn ki pa ka sèvi’y.’ Wi nou vlé Jéhova gadé nou kon moun ki dwèt. Konsa nou pa vlé anyen fè nou doubout sèvi Jéhova, pa menm défo nou èvèk lèwè nou. Èk nou vlé toujou chonjé, si nou doubout sèvi Jéhova sa sé an péché ki byen gwav.

17. Pouki nou sipozé pwan pwokosyon konsèné ki moun nou kay mayé?

¹⁷ Si ou pa mayé èk ou ka gadé pou an moun pou mayé, pawòl pwofèt Malakay sa édé’w pou chwazi on bon moun. Alò katjilé asou sa: Sé vwé, an moun sa ni bon mannyè, mé si moun sala pa ka sèvi Jéhova, ès Jéhova ka gadé’y kon an moun ki dwèt? (2 Kòr. 6:14) Osi si ou mayé moun sala, ès i kay édé’w wèsté fidèl pou Jéhova? Èk chonjé, sé madanm Wa Sòlomonn-lan pitèt té ni bon mannyè, mé yo pa té ka adowé Jéhova. Pito yo té ka adowé fo dyé. Èk a kòz di sé madanm sala, Sòlomonn koumansé adowé fo dyé osi. (1 Wa 11:1, 4) Alò i a klè, nou sipozé pwan pwokosyon konsèné ki moun nou kay mayé.

18. Kisa pawan sipozé enstwi ich yo?

¹⁸ Pawan, zòt sa sèvi ègzanp sé wa-a an Bib-la pou édé ich zòt dévlopé an dézi pou sèvi Jéhova. Édé yo pou kopwann ki, sé wa-a ki té ni favè Jéhova sété sé wa-a ki té adowé Jéhova èk ki té ankouwajé pèp Jéhova pou fè menm bagay-la. Osi, enstwi ich ou pa ègzanp ou èk pa pawòl ou ki, sa ki pli enpòtan an lavi sé bagay ki kay édé nou wèsté pwé Jéhova. Sa sé bagay tèl kon; étidyé Bib-la, atandé mitin, èk pwéché Bon Nouvèl-la. (Maf. 6:33) Pawan, si zòt fè sa, sa kay édé ich zòt dévlopé an bon wilasyon épi Jéhova, èk yo kay sèvi’y paski yo vlé fè sa, pa paski zòt ka fè sa. Wi, sa kay édé yo wè, pli enpòtan bagay-la an lavi sé pou adowé Jéhova.

19. Ès la ni èspwa pou moun ki doubout sèvi Jéhova? (Osi gadé bwèt-la “Ou Sa Ni An Bon Wilasyon Épi Jéhova Ankò!”)

¹⁹ Si an moun doubout sèvi Jéhova, ès sa vlé di i pèd bon wilasyon’y épi Jéhova pou tout tan? Ében non, paski moun sala sa wépanti èk ni an bon wilasyon épi Jéhova ankò. Kanmenm, si i vlé fè sa, i ni pou abésé kò’y èk aksèpté èd sé ansyen-an an kongwigasyon-an. (Jémz 5:14) Èvèk menm si i difisil, i kay vo tout éfò-a i kay fè pou i sa vini jan Jéhova ankò!

20. Si nou swiv bon ègzanp sé wa fidèl-la an Izwayèl ki mannyè Jéhova kay gadé nou?

²⁰ Bon, kisa nou apwann an ègzanp sé wa-a ki té ka kondwi an nasyon Izwayèl? Ében nou apwann ki, nou sa fè menm kon sé wa-a ki té fidèl si nou kontiné enmen Jéhova èk nou kontiné adowé’y épi tout tjè nou. Wi, menm kon sé wa sala, nou vlé apwann hòd sé lèwè-a nou fè-a. Nou vlé wépanti ofon tjè nou èk nou vlé fè népòt chanjman ki nésésè. Osi, nou vlé kontiné adowé Jéhova, sèl Dyé Vwé-a ki ni-an. Wi, si ou wèsté fidèl pou Jéhova, i kay gadé’w kon an moun ki dwèt.