Mandé Sé Ansyen-an Pou Èd

1. An ki mannyè Jéhova moutwé i enmen tout sèvant li?

JÉHOVA enmen tout sèvant li èk i ka otjipé yo menm kon on bèwjé ka otjipé mouton’y. I péyé on gwo pwi pou achté yo épi san gason’y. Èk i bay sé ansyen-an wèskonsabilité-a pou gadé apwé yo. (Twav. 20:28) Èk Jéhova pa vlé sé ansyen-an maltwété sé mouton’y-lan. Mé i vlé sé ansyen-an twété yo épi jantiyès. Alò, Bondyé mété Jézi kon tèt kongwigasyon-an. Épi sé ansyen-an ka swiv diwèksyon Jézi, èk yo ka édé sé mouton-an pou tjenn on wilasyon ki pwé épi Jéhova.—Izay. 32:​1, 2.

2. Silon Izikèl 34:​15, 16, ki mannyè Jéhova ka édé sé mouton’y-lan?

² Lè Jéhova wè on mouton ki pèd, ki alé ladwiv, ki blésé èben ki fèb, i ka pwan démach pou édé mouton sala. Èk i ka sèvi sé ansyen-an pou ba yo èd-la yo bouzwen-an. (Li Izikèl 34:​15, 16.) Wi, Jéhova kay édé nou lè nou bizwen èd. Alò, sé pa pou nou pè pou pwédyé èk mandé Bondyé pou sipòté nou. An plis di sa, nou dwé mandé sé ansyen-an an kongwigasyon-an pou èd paski Bondyé ba yo wèskonsabilité-a pou “gadé apwé” nou èk pou “enstwi” nou.—Èfés. 4:​11, 12.

3. (a) Ki kwèsyon nou kay wéponn an atik sala? (b) Pouki i bon pou nou étidyé atik sala?

³ An atik sala, nou kay apwann pli konsèné mannyè Jéhova ka sèvi sé ansyen-an pou édé sé sèvant li-a ki ni on wilasyon ki fèb épi’y. Konsa, nou kay wéponn sé kwèsyon sala: ‘Kilè nou ni pou mandé sé ansyen-an pou èd? Pouki nou ni pou mandé yo? Èk an ki mannyè yo sa édé nou?’ Bon. Pitèt wilasyon nou épi Jéhova fò, èk apwézan, nou pa bizwen èd sé ansyen-an. Mé ès sa vlé di atik sala sé pa pou nou? Mé non. Anfen atik sala kay édé nou ni pli apwésiyasyon pou mannyè Jéhova ka sèvi sé ansyen-an. Èk osi, i kay édé nou pou sav kisa pou nou fè, lè nou kay bizwen èd hòd sé ansyen-an.

KILÈ NOU SIPOZÉ “VOYÉ KWIYÉ” SÉ ANSYEN-AN?

4. Ki mannyè nou sav lévanjil-la an Jémz 5:​14-16, 19, 20 ka palé konsèné on moun ki donmajé wilasyon’y épi Jéhova? (Gadé sé pòtwé-a osi.)

⁴ Disip Jémz té èspliké mannyè Jéhova ka sèvi sé ansyen-an pou édé nou. I ékwi: “Si la ni pyèsonn ki malad anpami zòt, sé pouʼy voyé kwiyé sé ofisyé-a ki ka kondwi légliz-la (èben nou sa di sé ansyen-an).” (Li Jémz 5:​14-16, 19, 20.) Bon. An lévanjil sala, Jémz ka palé konsèné on moun ki donmajé wilasyon’y épi Jéhova. Pouki nou ka di sa? Sé paski Jémz di moun-lan ki malad-la pou kwiyé sé ansyen-an èk pa on dòktè. Jémz osi di, moun-lan ki malad-la kay jwenn djéwizon, lè i jwenn pawdonnasyon pou péché’y. Bon. Pawòl Jémz ka fè nou chonjé sé démach-la nou ni pou pwan lè nou malad. Pou ègzanp, lè nou malad, nou kay alé oti on dòktè, nou kay èspliké bay dòktè-a sa ki wivé nou, èk lè dòktè-a di nou sa pou fè, nou ka swiv diwèksyon’y pou nou twapé djéwizon. An menm mannyè-a, pou wanjé wilasyon nou épi Jéhova, nou ka alé oti sé ansyen-an, nou ka di yo sa ki wivé nou èk nou ka swiv sé diwèksyon-an yo ban nou-a ki bazé asou sé lévanjil-la.

5. Ki kèstyon nou sa mandé kò nou pou nou sa sav si wilasyon nou épi Jéhova ka vini fèb?

⁵ An Jémz chapit 5, Jémz ankouwajé nou pou palé épi sé ansyen-an si nou ka santi nou ka pèd wilasyon pwé-a nou ni épi Jéhova. Konsa, i byen enpòtan pou nou mandé sé ansyen-an pou èd avan nou pèd favè Jéhova. Bib-la vèti nou, si nou pa pwan pwokosyon, nou pé kwennen kò nou èk kwè nou ni favè Jéhova lè lavéwité-a sé, nou pa ni’y. (Jémz 1:22) Sé sa ki té wivé adan sé Kwityen-an an kongwigasyon Sadis. Jézi té di yo: “Moun ka kwè zòt ka viv, mé zòt mò! . . . Mwen wè sé bagay-la zòt ka fè-a pa bon pyès an zyé Bondyé mwen-an.” (Wév. 3:​1, 2) Mé ki mannyè nou sa konnèt si nou ni on bon wilasyon épi Jéhova opa? Èben, yon mannyè nou sa fè sa, sé lè nou konpawé mannyè nou té enmen Jéhova lè nou té batizé, épi mannyè nou enmen’y apwézan. (Wév. 2:​4, 5) Nou pé mandé kò nou: ‘Ès mwen kontan li Bib-la toujou? Ès mwen kontan katjilé fon asou sa mwen li an Bib-la menm kon avan? Ès mwen ka pwépawé pou tout sé mitin-lan? Ès mwen ka mantjé adan sé mitin-lan? Ès mwen zélé pou twavay pwèchman-an toujou? Ès mwen ka katjilé pli asou lajan apwézan pasé mwen té ka fè avan?’ Si wépons nou pou népòt an sé kwèsyon sala sé ‘Wi’, sa vlé di, wilasyon nou épi Jéhova ka vini fèb. Épi pitèt i sa vini pli mové si nou pa fè anyen pou wanjé’y. Alò, si nou pa sa fòtifyé wilasyon nou épi Jéhova pa kò nou, èben nou ja fè on bagay Jéhova pa plè épi, nou sipozé mandé sé ansyen-an pou èd.

6. Kisa on moun ki fè on péché ki sèwyé ni pou fè?

⁶ Bon. La ni péché ki si tèlman sèwyé, si moun-lan ki fè’y-la pa ka wépanti, sé ansyen-an kay tiwé’y an kongwigasyon-an. On moun ki fè on péché ki sèwyé pa sa wanjé wilasyon’y épi Jéhova pa kò’y. Alò, i ni pou palé épi yonn an sé ansyen-an pou’y sa twapé èd. (1 Kòr. 5:​11-13) Anfen, Jéhova kay pawdonnen péché nou si nou “fè bagay pou moutwé lavi [nou] ja chanjé.” (Twav. 26:20) Èk yonn an sé bagay-la nou sa fè pou moutwé nou ja chanjé lavi nou, sé pou palé bay sé ansyen-an. Yo pawé pou édé nou.

7. Ki lòt moun sé ansyen-an pawé pou édé?

⁷ Sé ansyen-an osi pawé pou édé moun ki fèb èk ka lité épi vyé dézi. (Twav. 20:35) Pou ègzanp, on moun ki té ka pwan dwòg, gadé pònografi èben viv on vyé lavi avan i apwann lavéwité-a, pé twouvé’y difisil pou goumen kont sé mové dézi sala. Si sa sé sitiwasyon’w, pa pè pou mandé pou èd. Ou sa palé épi yon ansyen ou ka santi konfòtab épi. Ansyen sala kay byen kouté’w. Épi i ki kay édé’w pou wè sé chanjman-an ou sa fè pou édé’w kontiné goumen kont mové dézi-a. An plis di sa, i kay fè’w chonjé Jéhova enmen’w èk ou ka fè tjè’y kontan lè’w wézisté tantasyon. (Éklé. 4:12) Bon. Si ou ka santi dékouwajé paski ou ni mové dézi toujou, sé ansyen-an kay fè’w chonjé: Jéhova byen plè épi’w paski ou mandé pou èd. Èvèk paski ou pwan démach sala, sa ka moutwé ou ka abésé kò’w èk ou pa ka dépan asou fòs ou tousèl. (1 Kòr. 10:12) Osi, i ka moutwé ou enmen Jéhova èk ou vlé plè’y.

8. Ès nou sipozé ay oti sé ansyen-an pou tout ti lèwè nou fè? Èspliké.

⁸ Bon. Nou pa bouzwen ay oti sé ansyen-an konsèné tout ti lèwè nou fè. Pou ègzanp, nou pé lévé faché èk di on lòt fwè, èben sè, on bagay ki pa bon. Konsa, pito nou alé oti sé ansyen-an, i kay pli mèyè pou nou swiv konsèy Jézi an Mafyou 5:​23, 24 èk ‘alé fè lapé’ épi fwè èben sè sala. Osi, i kay bon pou nou fè wichach an sé piblikasyon nou-a asou sijé tèl kon jantiyès, pasyans, èk mannyè pou kontwolé kò nou. Mé, si apwé nou fè tout sa, nou santi ou bouzwen èd toujou, nou sa palé épi yon ansyen pou asisté nou. Èk i kay ba’w èd-la ou bouzwen-an menm kon fwè-a té édé Youdiya épi Sintiki lè yo té ni on dézagwéman ant yo dé-a.—Filip. 4:​2, 3.

POU KI LÒT WÉZON NOU NI POU MANDÉ SÉ ANSYEN-AN POU ÈD?

9. Menm si nou hont, pouki i bon pou nou palé bay sé ansyen-an? (Pwovèb 28:13)

⁹ Bon. I pa toujou ézé pou mandé sé ansyen-an pou èd lè nou fè on péché ki sèwyé, èben lè nou ka lité épi vyé dézi. Anfen, nou bouzwen lafwa épi kouwaj pou nou fè sa, épi i vo éfò-a. Alò, menm si nou hont nou sipozé palé bay sé ansyen. Pouki nou ka di sa? Sé paskè lè nou fè sa, nou ka moutwé Jéhova nou ka konfyé’y, nou vlé obéyi’y, èk nou bizwen èd li pou nou kontiné fè sa ki dwèt. (Sam 94:18) An plis di sa, lè nou konfèsé péché nou èk doubout fè sa ki pa bon, Jéhova kay ni mizéwikòd asou nou èk i kay pawdonnen péché nou. (Li Pwovèb 28:13) Wi, pa janmen obliyé, Jéhova enmen nou, èk i potjiwé sé ansyen-an pou édé nou tjenn on wilasyon ki fò épi’y.

10. Kisa ki sa fèt lè nou éséyé séwé péché nou?

¹⁰ Wi, lè nou di sé ansyen-an konsèné péché nou, Jéhova sa pawdonnen nou èk nou sa ni on bon wilasyon épi’y. Mé si nou séwé péché nou, nou sa fè sitiwasyon nou pli mové. Pou ègzanp, ann di nou twapé blésé èben nou ni on maladi; si nou pwan twòp tan avan nou twété’y, sé pli mové i kay vini. Ès pa? Wi, sé sa ki té wivé Wa David lè’y té péché. I té éséyé séwé péché’y èk i vini mizéwab. I pèd favè Jéhova paski i té pwan twòp tan avan i konfèsé péché’y. (Sam 32:​3-5) Konsa, an menm mannyè-a, si nou fè on péché ki sèwyé èk nou pwan twòp tan avan nou chaché pou èd hòd sé ansyen-an, nou pé pèd wilasyon nou épi Jéhova. Ou wè, Jéhova pa vlé sa wivé nou paski i vlé nou wèsté jan épi’y. Èk sé pou wézon sala i ka envité nou pou “vini . . . . èk wanjé bagay” épi’y.—Izay. 1:​5, 6, 18.

11. Ki lòt bagay ki pé fèt si nou pa di sé ansyen-an konsèné on péché ki sèwyé?

¹¹ Si nou fè on péché ki sèwyé èk nou séwé’y, sa sa afèkté sé fwè èk sè-a. An ki mannyè? Ében nou sa anpéché Jéhova voyé lisentèspwi’y asou kongwigasyon-an; èk osi nou sa distwé lapé-a sé fwè èk sè-a ni-a. (Èfés. 4:30) Osi byen, si nou vini konnèt yon moun an kongwigasyon-an fè on péché ki sèwyé, nou sipozé ankouwajé’y pou alé palé bay sé ansyen-an konsèné péché sala. Mé si i pa di sé ansyen-an anyen apwé nou ba’y asé tan pou fè sa, nou menm ni pou di sé ansyen-an sa nou konnèt. Paskè si nou pa fè sa, nou ka édé moun-lan séwé péché-a, èk sa kay fè nou on soutiwèz èvèk nou kay koupab osi. (Lev. 5:1) Bon. Lanmityé nou pou Jéhova, èk sé fwè èk sè nou-a, sipozé pousé nou pou di sé ansyen-an konsèné sa nou konnèt. Konsa, nou sa édé pwotèkté sé fwè èk sè-a an kongwigasyon-an, èk édé moun-lan ki péché-a ni on bon wilasyon épi Jéhova ankò.

KI MANNYÈ SÉ ANSYEN-AN KA ÉDÉ NOU?

12. Kisa sé ansyen-an kay fè pou édé on fwè, èben on sè, wanjé wilasyon’y épi Jéhova?

¹² Sé ansyen-an ka swiv konsèy-la ki an Bib-la pou édé sé fwè èk sè-a ki bizwen wanjé wilasyon yo épi Jéhova. (1 Tèsa. 5:14) Konsa, pou yo ba’w èd-la ou vwéman bouzwen-an, yo kay mandé’w kwèsyon pou yo konpwann katjil ou èk mannyè-a ou ka santi. (Prov. 20:5) Konsa, menm si ou ka santi hont, ében ou on ti miyèt koutja, pa tjébé dèyè pou wéponn kwèstyon yo. Palé libman épi yo. Di yo tout bagay, èk pa kwè yo kay jijé’w èk di’w, pawòl-la ou ka di yo-a sé “vyé pawòl.” (Jòb 6:3) Anfen, sé ansyen-an kay byen kouté’w pou yo sav tout sa ki té pwan kou, èk pou yo ba’w konsèy hòd Bib-la. (Prov. 18:13) Bon. Sé ansyen-an sav i kay pwan tan pou édé on moun wanjé wilasyon’y épi Jéhova. Konsa, yo kay bizwen ni pli pasé yon konmézasyon épi’w, pou yo sa ba’w èd-la ou bizwen-an.

13. (a) Ki mannyè lapwiyè sé ansyen-an sa édé nou? (b) Ki mannyè sé lévanjil-la yo kay sèvi-a kay édé nou? (Gadé sé pòtwé-a osi.)

¹³ Lè ou palé bay sé ansyen-an, yo pa kay fè’w santi pli koupab. Pito sa, yo ka pwédyé ba ou. Épi Jéhova ka kouté lapwiyè yo. Lapwiyè sala ni “an pil pouvwa” épi i kay konfòté’w èk fòtifyé’w plis pasé ou sa imajiné. Lè on moun kwiyé sé ansyen-an, lévanjil-la osi di nou: “Yo kay vidé lwil anlèʼy an non Senyè-a.” (Jémz 5:​14-16) Kisa sa vlé di? Èben, an vèwsé sala, “lwil-la” sé Pawòl Bondyé. Konsa, sé ansyen-an kay diskité épi’w sé vèwsé-a ki an Bib-la ki sa konfòté’w èk édé’w ni on bon wilasyon épi Jéhova ankò. (Izay. 57:18) Konsèy-la yo kay ba’w-la kay ba’w fòs-la ou bouzwen-an pou kontiné fè sa Jéhova vlé. Wi, i kay menm kon ou ka tann vwa Jéhova ka di’w: “Mi chimen-an. Maché asou’y.”—Izay. 30:21.

14. Silon Galécha 6:​1, ki mannyè sé ansyen-an ka édé moun ki “tonbé an péché”? (Gadé sé pòtwé-a osi.)

¹⁴ Li Galécha 6:1. Lè on Kwityen “tonbé an péché” sa vlé di i pa ka fè sa Jéhova vlé’y fè. La ni diféwan mannyè on moun sa tonbé an péché. Pou ègzanp, pitèt i fè on disizyon ki pa té bon. Èben, pitèt i fè on péché ki sèwyé. Bon. Paski sé ansyen-an enmen sé fwè èk sè-a, épi jantiyès, yo ka palé ba yo pou fè yo “viwé an bon chimen-an.” An langaj Gwik, moun té ka sèvi èspwèsyon-an “fè’y viwé” pou dékwi mannyè on dòktè ka mété viwé on zo an plas li, pou fè’y djéwi byen. On bon dòktè ka pwan bon ka lè’y ka éséyé mété zo-a viwé an plas li pou’y pa bay moun-lan pli penn. An menm mannyè-a, lè sé ansyen-an ka éséyé fè on moun ki tonbé an péché “viwé an bon chimen-an”, yo pa vlé ba li pli penn. Pito, yo ka fè tout sa yo pé pou kowijé moun-lan adan on mannyè ki janti. Bib-la osi di sé ansyen-an: “Véyé kòʼw pou ou menm pa tonbé an péché tou.” Konsa, lè sé ansyen-an ka édé on moun pou apliké sé konsèy Bib-la, yo ni pou toujou chonjé, yo osi sa fè lèwè. Épi yo ni pou pwan bon ka pou pa kwè yo pli dwèt èben pli bon pasé moun-lan yo ka ba èd-la. Pito sa, yo kay abésé kò yo èk moutwé konpasyon.—1 Pita 3:8.

15. Si nou ni on pwòblenm, kisa ki kay bon pou nou fè?

¹⁵ Nou sa konfyé sé ansyen nou-an. Pouki? Paski Jéhova ja enstwi yo pou pa wépété zafè lòt moun. Osi, i entwennen yo pou sèvi Pawòl li pou bay konsèy pasé yo sèvi wipinyon yo menm. An plis di sa, yo ja apwann ki, yo ni pou kontiné édé nou pou aji épi pwòblenm nou. (Prov. 11:13; Gal. 6:2) Wi i vwé, kawaktè yo èk èspéyans yo pé diféwan, mé nou sa apwoché népòt an sé ansyen-an pou diskité pwòblenm nou. Kanmenm, mi on bagay nou vlé tjenn an lidé: Nou pa vlé alé palé bay chak ansyen ka chaché pou wépons-lan nou vlé tann. Si nou fè sa, nou kay menm kon sé moun-lan ki ka “mennen an chay titja pou enstwi an sé bagay-la yo kontan tann-an.” (2 Tim. 4:3) Bon. Lè nou apwoché yon ansyen épi on pwòblenm, i pé mandé nou si nou ja palé épi on lòt ansyen èk ki konsèy ansyen-an té ban nou. Èk paski i ni imilité, i pé mandé on lòt ansyen pou édé’y.—Prov. 13:10.

WÈSKONSABILITÉ NOU

16. Ki wèskonsabilité nou tout ni?

¹⁶ Sé ansyen-an ka ban nou konsèy èk yo ka édé nou lè nou ni pwòblenm, mé yo pa ka di nou ki disizyon pou nou fè. Ou wè, nou ni wèskonsabilité-a pou moutwé Jéhova, nou enmen’y èk nou vlé plè’y. Èk nou sa fè sa pa pawòl nou èk pa aksyon nou. Épi nou ni konfyans-lan ki Jéhova kay édé nou fè bon disizyon èk wèsté fidèl pou li. (Ronm 14:12) Èk sa sé wézon-an sé ansyen-an pa ka di nou sa pou fè, mé pito, yo ka sèvi Bib-la pou édé nou konpwann katjil Jéhova pou nou sa fè on bon disizyon. Wi, pou nou “apwann diféwans ant bon èk mové”, nou ni pou mèdité èk apliké konsèy Bib-la.—Hib. 5:14.

17. Kisa nou sipozé ditèminé pou fè?

¹⁷ Pa dé kontan nou kontan pou sav Jéhova enmen nou si tèlman! I voyé Jézi Kwi, “bon bèwjé-a”, ki mò pou nou sa ni lavi diwant. (Jan 10:11) Èk Jéhova ban nou sé ansyen-an pou gadé apwé nou menm kon i té pwonmèt an Jérémaya 3: 15 ki di: “Épi mwen kay ba’w bèwjé ki ka fè tjè mwen kontan. Épi yo kay ba’w nòlaj èk lakonpwann.” Konsa, lè nou ka santi lafwa nou ka vini fèb, èben nou vlé wanjé wilasyon nou épi Jéhova, nou pa sipozé pè pou kwiyé sé ansyen-an pou èd. Sé pou nou ditèminé pou sèvi awanjman sala Jéhova mété an plas, paski i kay édé nou tjenn on bon wilasyon épi Papa nou Jéhova!