Moutwé Lézòt Wèspé

1. Pouki moun enmen lè lézòt ka moutwé yo wèspé? (Pwovèb 22:1)

ÈS OU ka kontan lè lézòt moutwé’w wèspé? Asiwé ou kay di wi. Èk sa sé paski tout moun ka apwésyé lè lézòt moutwé yo wèspé. Èvèk sa sé wézon-an Bib-la ka di ‘wèspé pli bon pasé dajan èk lò.’—Li Pwovèb 22:1.

2-3. (a) Pouki i pa toujou ézé pou moutwé lézòt wèspé? (b) Kisa nou kay apwann an atik sala?

² Bon, délè i pa ézé pou moutwé lézòt wèspé. Èvèk sa sé paski i ézé pou wè défo yo. Osi, nou ka viv anpami moun ki ka déwèspèkté yonn a lòt. Mé nou ni pou moutwé nou diféwan paski Jéhova vlé nou “pòté tout moun wèspé.”—1 Pita 2:17.

³ Konsa, an atik sala nou kay apwann sa’y vlé di pou moutwé lézòt wèspé. Èk osi nou kay apwann mannyè nou sa moutwé (1) fanmi nou, (2) fwè èk sè nou èk (3) moun ki pa Témwen Jéhova wèspé. An plis di sa nou kay apwann mannyè nou sa moutwé lézòt wèspé lè’y difisil pou fè sa.

SA’Y VLÉ DI POU MOUTWÉ LÉZÒT WÈSPÉ?

4. Kisa i vlé di pou moutwé lézòt wèspé?

⁴ Bon. Kisa mo pawòl-la “wèspé” vlé di? Ében, mo pawòl sala vlé di mannyè nou ka katjilé konsèné lézòt, èk mannyè nou ka twété yo. Konsa, lè nou òbzòvé an moun ni bon kawaktè, ében i ka fè bon bagay, ében i ni lotowité anho nou, sa ka pousé nou pou moutwé moun sala wèspé. Kanmenm, pou nou vwéman wèspèkté an moun i ni pou sòti ofon tjè nou.—Maf. 15:8.

5. Kisa ki sa édé nou moutwé lézòt wèspé?

⁵ Bon, Jéhova vlé nou wèspèkté lézòt. Pou ègzanp i vlé nou wèspèkté gouvèdman péyi-a. (Ronm 13:​1, 7) Mé adan moun pé di: “Mwen ka wèspèkté moun sèlman si yo ka fè sa ki bon.” Mé ès i bon pou nou katjilé kon sa? Mé non! Paski kon sèvant Jéhova, nou pa ka wèspèkté moun sèlman si yo fè sa ki bon. Nou ka wèspèkté moun paski Jéhova vlé nou fè sa. Èk nou vlé bay Jéhova tjè kontan.—Jòch. 4:14; 1 Pita 3:15.

6. Ès i posib pou wèspèkté an moun ki pa ka moutwé nou wèspé? Èspliké. (Gadé osi sé ki asou kouvèti-a.)

⁶ Adan moun pé katjilé: ‘Ès i vwéman posib pou wèspèkté an moun ki pa ka moutwé yo wèspé?’ Wi, i posib pou fè sa. Alò annou konsidiwé twa {3} ègzanp. Pwenmyéman, Wa Sòl té fè gason’y Jonatann hont douvan lézòt. (1 Sm 20:​30-34) Mé magwé sa, Jonatann kontiné moutwé papa’y wèspé, èk i jik mò ka sipòté papa’y an ladjè. (Ègz. 20:12; 2 Sm 1:23) Dézyenmman, Chèf Pwèt Ilay té di Hanna té sou. (1 Sm 1:​12-14) Mé Hanna té palé épi wèspé bay Ilay, menm si tout moun an Izwayèl té konnèt Ilay pa té ka kowijé sé gason’y-lan pou movèsté yo. (1 Sm 1:​15-18; 2:​22-24) Èk twazyenmman, sé nonm-lan an vil Afenz té ensilté zapòt Pòl èk yo di i sé an “vyé palapata.” (Twav. 17:18) Mé magwé sa, zapòt Pòl té moutwé yo wèspé lè’y té ka palé ba yo. (Twav. 17:22) Bon. Sé ègzanp sala ka moutwé a klè, lè nou enmen Jéhova èk nou pa vlé déplè’y, sa sa pousé nou pou moutwé lézòt wèspé menm si sa pa ézé pou fè. Konsa, annou diskité ki moun nou ni pou moutwé wèspé èk pouki.

MOUTWÉ MOUN AN FANMI NOU WÈSPÉ

7. Pouki i difisil délè pou moutwé moun an fanmi nou wèspé?

⁷ Sé wézon-an i wèd pou moutwé moun an fanmi nou wèspé. Nou ka pasé an chay tan épi fanmi nou. Konsa nou konnèt bon kawaktè yo, èk défo yo. Pou ègzanp, adan moun an fanmi nou pé ni an maladi ki ka fè’y difisil pou nou otjipé yo. Èk adan di yo pé ni an chay tèt cho. Osi, adan moun an fanmi nou pé di ében fè bagay ki sa blésé tjè nou. Bon, nou vlé santi konfòtab épi fanmi nou. Mé menm kon an maladi sa anpéché kò-a twavay byen, lè moun an fanmi-an pa ka moutwé yonn a lòt wèspé, sa sa anpéché fanmi-a twavay byen ansanm, èk kwazé lilyon-an anpami yo. Kanmenm, menm kon la ni twètman pou an maladi, i posib pou moun an fanmi-an apwann mannyè pou wèspèkté yonn a lòt.

8. Pouki i enpotan pou nou moutwé moun an fanmi nou wèspé? (1 Timòfi 5:​4, 8)

⁸ Bon. Pouki i enpotan pou nou moutwé moun an fanmi nou wèspé? (Li 1 Timòfi 5:​4, 8.) An pwenmyé lèt-la zapòt Pòl té ékwi Timòfi, i diskité mannyè moun an fanmi-an sipozé otjipé èk twété yonn a lòt. Zapòt Pòl èspliké ki, nou vlé moutwé moun an fanmi nou wèspé, pa sèlman paski nou sipozé fè sa, mé paski nou enmen Jéhova èk nou vlé plè’y. Alò lè nou moutwé moun an fanmi nou wèspé, nou vwéman ka moutwé Jéhova wèspé paski sé li ki fè fanmi-an.—Èfés. 3:​14, 15

9. Ki mannyè an mawi èk an madanm sa moutwé yonn a lòt wèspé? (Gadé sé pòtwé-a osi.)

⁹ Bon. Ki mannyè nou sa moutwé yonn a lòt wèspé. An mawi ki ka wèspèkté madanm li ka chéwi’y ni lè yo pa kò yo, ni lè yo anpami moun. (Pwov. 31:28; 1 Pita 3:7) Osi, i pa kay janmen bat madanm li, fè’y santi hont douvan lézòt, ében fè’y santi i pa ni valè. George,a an fwè ki ka wèsté Argentina, di: “A kòz di maladi-a madanm mwen ka soufè épi-a, délè i ka di bagay ki ka blésé tjè mwen. Èk lè sa fèt mwen ka éséyé chonjé, sa madanm mwen ka di sé pa vwéman mannyè i ka santi. Èk osi, mwen ka chonjé 1 Kòrint 13:5. Lévanjil sala ka édé mwen palé épi madanm mwen épi wèspé èk épi jantiyès.” (Pwov. 19:11) Bon. An madanm ki ni wèspé pou mawi’y ka di bon bagay konsèné’y lè’y anpami lézòt. (Èfés. 5:33) Pou ègzanp, i pa kay kwititjé mawi’y ében ensilté’y épi vyé blag. (Pwov. 14:1) Anfen, tann sa an sésé ki ka wèsté Itali di konsèné mawi’y ki malad: “Délè mwen ka santi mawi mwen ka twakasé lidé’y twòp konsèné bagay. Èvèk an tan pasé, souvan, sa mwen té ka di, èk fidjay mwen té ka moutwé mwen pa té ni wèspé pou li. Mé lè mwen pasé tan épi jan ki té ka palé konsèné lézòt épi wèspé, sa ka édé mwen pou moutwé mawi mwen wèspé.”

10. Ki mannyè jenn moun sa moutwé pawan yo wèspé?

¹⁰ Jenn moun, ou ka moutwé ou ka wèspèkté pawan’w lè’w obéyi sé wèg-la yo mété an plas ba ou. (Èfés. 6:​1-3) Èk osi lè ou palé ba yo épi wèspé. (Ègz. 21:17) Èvèk kon pawan’w ka vini an laj, fè tout sa’w pé pou bay yo èd-la yo bizwen. Bon. Annou konsidiwé ègzanp sésé María. I té ka otjipé papa’y ki pa an Temwen Jéhova. Lè papa’y tonbé malad i té ka fè’y difisil pou Maria otjipé’y, paski i pa té ka twété’y byen, èvèk i té ka di bagay pou blésé tjè’y. Maria di: “Mwen mandé Jéhova pou édé mwen pou moutwé papa mwen wèspé ofon tjè mwen. Mwen di kò mwen, sé Jéhova ki ka di mwen pou wèspèkté pawan mwen, alò i kay ba mwen fòs-la pou fè sa. Èvèk apwé an lè mwen wiyalizé mwen ni pou moutwé papa mwen wèspé menm si i pa chanjé atitid li.” Wi, lè nou moutwé moun an fanmi nou wèspé, menm si i difisil délè, nou ka moutwé Jéhova, Tèt fanmi-an wèspé.

MOUTWÉ SÉ FWÈ ÈK SÈ-A AN KONGWIGASYON-AN WÈSPÉ

11. Pouki i difisil délè pou moutwé sé fwè èk sè nou-an wèspé?

¹¹ Sé wézon-an i difisil pou moutwé sé fwè èk sè nou-an wèspé. Sé vwé, sé fwè èk sè nou-an ka éséyé pou viv an ling épi pwensip Bib. Mé délè, adan di yo pé twété nou adan an mannyè ki pa janti, yo pé maljijé nou ében jis kontwayé nou. Anfen, lè bagay kon sa fèt, i sa difisil pou nou kontiné moutwé sé fwè èk sè nou-an wèspé. (Kòl. 3:13) Mé kisa ki sa édé nou pou kontiné moutwé yo wèspé?

12. Pouki i enpotan pou moutwé sé fwè èk sè nou-an wèspé? (2 Pita 2:​9-12)

¹² Bon. Pouki i enpotan pou nou moutwé sé fwè èk sè nou-an wèspé? (Li 2 Pita 2:​9-12.) An dézyenm lèt-la zapòt Pita té ékwi, i di, adan fwè an kongwigasyon-an pa té ka moutwé sé ansyen-an ki ni lotowité an kongwigasyon-an pyès wèspé. Bon. Sé nanj-lan té ka wè sa sé fwè sala té ka fè èk di. Mé paski sé nanj-lan ni wèspé pou Jéhova, yo pa té sèvi pyès kalité langaj ensiltan kont sé fwè-a ki té ka déwèspèkté sé ansyen-an. Imajiné sa! Sé nanj-lan wifizé pou ensilté sé fwè sala. Pito sa, yo kité sé fwè sala bay Jéhova pou jijé yo. (Ronm 14:​10-12; gadé osi Joud 9.) Bon, ègzanp sé nanj-lan sipozé pousé nou pou wèspèkté sé fwè èk sè nou-an. (Ronm 12:10) Anfen, lè nou wèspèkté sé fwè èk sè nou-an nou ka wèspèkté Jéhova.

13-14. Ki mannyè nou sa moutwé sé fwè èk sè-a an kongwigasyon-an wèspé? Ba yon ègzanp. (Gadé sé pòtwé-a osi.)

¹³ Bon. Ki mannyè nou sa moutwé sé fwè èk sè-a wèspé? Sé ansyen nou-an, lè’w ka enswti lézòt, toujou éséyé fè sa épi lanmityé. (Filém. 8, 9) Èk lè’w ni pou bay an moun konsèy, fè sa épi jantiyès èk pa lè ou faché. Èk sé sè nou-an, zòt sa fè an chay pou édé sé fwè èk sè-a ni wèspé pou yonn a lòt. Èk zòt sa fè sa lè zòt éseyé wèd pou pa mal palé lézòt ében sali non yo. (Titòs 2:​3-5) Osi, nou tout an kongwigasyon-an sa twavay wèd pou moutwé sé ansyen wèspé. Èvèk nou sa fè sa lè nou sipòté yo èk di yo nou ka apwésyé tout twavay wèd yo. Pou ègzanp, sé ansyen ka enstwi nou an sé mitin-lan, yo ka pwan douvan an pwédikasyon-an, èk yo ka édé nou si nou “tonbé an péché”.—Gal. 6:1; 1 Tim. 5:17.

¹⁴ An sésé, non’y sé Rocío, té twapé’y difisil pou’y wèspkèté yon ansyen ki té ba li konsèy. I di: “Mwen té faché épi’y, paski mwen té santi i pa té janti lè’y té palé ba mwen. Konsa, mwen té ka malpalé’y lakay mwen. Èk menm si mwen pa té vlé moutwé mwen té faché kont li, mwen té santi i pa té vwéman mélé épi mwen. Alò mwen pa té kouté konsèy li.” Mé kisa ki édé Rocío? Ében i di: “Padan mwen té ka li Bib mwen, mwen li 1 Tèsalonnika 5:​12, 13. Èvèk mwen wéyalizé mwen pa té ka moutwé fwè sala wèspé, alò konsyans mwen koumansé bat mwen. Konsa mwen palé bay Jéhova an lapwiyè. Mwen osi fè wichach an sé piblikasyon nou-an pou twapé enfòmasyon ki té sa édé mwen pou chanjé atitid mwen. Èk mwen wéyalizé pwoblenm-lan pa té fwè-a, mé sété mwen ki té ni twòp lògèy. Apwézan mwen vin konpwann ki, si mwen pa abésé kò mwen sa kay fè’y difisil pou mwen moutwé lézòt wèspé. Kanmenm mwen ka kontiné twavay wèd pou moutwé lézòt wèspé, èk mwen sav Jéhova ka apwésyé tout sé éfò-a mwen ka fè-a.”

MOUTWÉ MOUN KI PA TÉMWEN JÉHOVA WÈSPÉ

15. Pouki i difisil délè pou moutwé moun ki pa Témwen Jéhova wèspé?

¹⁵ Sé wézon-an i difisil pou moutwé moun ki pa Témwen Jéhova wèspé. Souvan, lè nou an minis-la nou ka jwenn moun ki pa mélé épi Bondyé ében Bib-la. (Èfés. 4:18) Osi, adan moun ka wifizé kouté konmisyon nou, a kòz di sa yo té apwann dépi yo té tou piti. An plis di sa, délè adan moun nou ka twavay épi, ében alé lékòl épi pa ka twété nou byen. Ek délè bòs nou ében titja pa ka apwésyé twavay nou. Èvèk a kòz di sa, nou pé pèd wèspé pou sé moun sala èk doubout twété yo byen.

16. Pouki i enpòtan pou nou moutwé moun ki pa Témwen Jéhova wèspé? (1 Pita 2:12; 3:15b, 16)

¹⁶ Bon, pouki i enpòtan pou nou moutwé moun ki pa ka sèvi Jéhova wèspé? Ében, i bon pou nou chonjé Jéhova ka òbsové mannyè nou ka twété moun ki pa ka sèvi’y. Osi zapòt Pita té fè sé Kwityen-an chonjé lè moun wè bon twavay yo, sa sa pousé yo pou “glowifyé Bondyé”. Èk sé pou wézon sala i di yo, lè yo ka èspliké sa yo ka kwè adan, yo ni pou “fè sa èk wèspé épi adan an mannyè ki janti”. (Li 1 Pita 2:12; 3:15b, 16.) Konsa, si nou ni pou èspliké sa nou ka kwè adan bay an jij, ében bay népòt lòt moun, nou ni pou toujou fè sa épi wèspé. Èvèk nou vlé chonjé Jéhova ka gadé èk kouté sa nou ka di, èk mannyè-a nou ka di’y. Alò, sa sé an bon wézon pou nou moutwé moun ki pa ka sèvi Jéhova wèspé!

17. Ki mannyè nou sa moutwé moun ki pa ka sèvi Jéhova wèspé?

¹⁷ Bon, ki mannyè nou sa moutwé moun ki pa Témwen Jéhova wèspé? Ében, lè nou ka pwéché nou pa vlé fè moun kwè nou konnèt pli pasé yo. Pito sa nou vlé abésé kò nou, èk toujou chonjé sé moun sala ni an pil valè an zyé Bondyé. (Hag. 2:7; Filip. 2:3) Konsa si an moun ensilté nou, nou pa vlé ensilté’y déviwé. Pou ègzanp, nou pa vlé di bagay pou fè moun-lan faché. Èk si nou di an bagay nou pa té sipozé di, pa pèdi tan pou di moun-lan padon. (1 Pita 2:23) Bon, ki mannyè ou sa moutwé moun an plas twavay ou wèspé? Ében ou sa fè sa, lè’w twavay byen, èvèk lè’w éséyé wè sé bon kawaktè-a an sé moun-lan ou ka twavay épi-a, èvèk moun-lan ou ka twavay pou. (Titòs 2:​9, 10) Osi, lè’w onnèt èk ou ka twavay wèd, ou sa asiwans-lan ki Jéhova plè épi’w.—Kòl. 3:​22, 23.

18. Pouki i enpòtan pou nou moutwé tout moun wèspé?

¹⁸ Bon, nou ni an chay bon wézon pou nou moutwé tout moun wèspé! Pou ègzanp, kon nou ha wè, lè nou wèspkèté moun an fanmi nou, nou ka moutwé Tèt fanmi nou Jéhova wèspé. Osi, lè nou wèspkèté sé fwè èk sè nou-an, nou ka wèspkèté Papa nou ki an syèl. Èvèk lè nou moutwé moun ki pa Témwen Jéhova wèspé, nou ka fè’y pli ézé pou yo onnowé Jéhova. Èvèk menm si adan moun pa moutwé nou wèspé, nou kay kontiné moutwé yo wèspé, paski Jéhova kay benni nou. Anfen an 1 Sanmyèl 2:​30, Jéhova di: ‘Mwen kay onnowé moun ki ka onnowé mwen.’