Pouki Témwen Jéhova Pa Ka Sélébwé Nwèl?
Sa moun ka di konsèné Témwen Jéhova èk Nwèl
Sa moun ka di: Témwen Jéhova pa ka sélébwé Nwèl, paski yo pa ka kwè an Jézi.
Lavéwité-a: Témwen Jéhova sé Kwityen, èk nou ka kwè an Jézi. Anfen nou ka kwè, sèl mannyè-a nou sa viv pou tout tan, sé si nou mété lafwa nou an Jézi.—Twavay 4:12.
Sa moun ka di: Témwen Jéhova ka fè fanmi tounen kont yonn a lòt, paski yo ka enstwi moun pou pa sélébwé Nwèl.
Lavéwité-a: Nou vlé fanmi ni lakontantman, konsa nou ka sèvi Bib-la pou édé fanmi ni lilyon.
Sa moun ka di: Témwen Jéhova pa ka èspéyansé bonté-a, lapé-a, èk jantiyès-la lòt moun ka èspéyansé diwan sézon Nwèl.
Lavéwité-a: Touléjou nou ka éséyé pou viv an lapé épi moun èk pou moutwé tout moun jantiyès. (Pwovèb 11:25; Ronm 12:18) Pou ègzanp, lè nou ka pwéché ében tjenn mitin nou, nou ka swiv konsèy Jézi, lè’y di: ‘Ou wisivwè pou anyen, kon sa alé fè bagay bay moun san péyiman.’ (Mafyou 10:8) An plis di sa, nou ka toujou di moun konsèné Wéyòm Bondyé, paski sé Wéyòm sala ki kay vwéman mennen lapé asou latè sala.—Mafyou 10:7.
Pouki Témwen Jéhova Pa Ka Sélébwé Nwèl?
Mi kat «4» wézon.
Jézi di sé disip li-a pou sélébwé jou-a i mò, i pa janmen di yo pou sélébwé jou-a i fèt.—Louk 22:19, 20.
Sé zapòt Jézi-a èk sé disip li-a pa té sélébwé Nwèl. Moun koumansé sélébwé nwèl pli pasé yon san «100» lanné apwé dènyé zapòt-la mò. Anfen liv-la New Catholic Encyclopedia di, “avan lanné dé san kawant twa «243» an lépòk nou, moun pa té ka sélébwé Nwèl”.
Bib-la pa ka ban nou dat-la Jézi té fèt. Èk la pa ni pyès èvidans ki ka moutwé Jézi té fèt li 25 Désanm.
Lè moun sélébwé Nwèl, sa pa ka plè Bondyé, paski sélébwasyon sala bazé asou enstwiksyon fo wilizyon èk twadisyon nonm.—2 Kòrint 6:17.
Pouki nou pa sipozé sélébwé Nwèl menm si moun pa kay kontan sa?
An chay moun ka sélébwé Nwèl menm si yo konnèt Bib-la pa ka sipòté’y. Alò, pouki Kwityen pa sipozé sélébwé Nwèl, menm si moun kay ba yo chalè pou sélébwé’y?
Èben Bib-la ka enkouwajé nou pou adowé Bondyé adan an mannyè ki nèt èk adan an mannyè i kay aksèpté. (Ronm 12:1, 2) Osi, Bib-la ka enkouwajé nou pou “adowé Bondyé kon moun sipozé adowé’y”, èvèk Bondyé vlé nou adowé’y an lavéwité-a. (Jan 4:23, 24) Alò menm si nou pa vlé moun hayi nou, ében palé kont nou, sa ki pli enpòtan pou nou sé pou plè Bondyé.
Kanmenm, menm si nou pa ka sélébwé Nwèl, nou pa ka anpéché lòt moun sélébwé’y. Èvèk sa sé paski, chak moun ni dwa-a pou désidé si i kay sélébwé Nwèl opa.