Pouki Témwen Jéhova Pa Ka Sélébwé Pak?
Sa moun ka di konsèné Témwen Jéhova èk Pak
Sa moun ka di: Témwen Jéhova pa ka sélébwé Pak paski yo pa ka kwè an Jézi.
Lavéwité-a: Témwen Jéhova ka kwè an Jézi. Anfen nou ka kwè sèl mannyè-a nou sa viv pou tout tan, sé si nou mété lafwa nou an Jézi. Èvèk nou ka fè tout sa nou pé pou “swiv menm chimen épi’y.”—1 Pita 2:21; Louk 2:11.
Sa moun ka di: Témwen Jéhova pa ka kwè Bondyé wésisité Jézi.
Lavéwité-a: Témwen Jéhova ni lafwa Bondyé wésisité Jézi èk nou ka pwéché sa ba tout moun.—1 Kòrint 15:3, 4, 12-15.
Sa moun ka di: Témwen Jéhova pa mélé si ich yo pa ka enjwi fèt Pak.
Lavéwité-a: Témwen Jéhova enmen ich yo, èk yo ka fè tout sa yo pé pou entwennen ich yo èk pou édé yo enjwi lavi.—Titòs 2:4.
Pouki Témwen Jéhova Pa Ka Sélébwé Pak?
Mi twa «3» wézon:
Bib-la pa ka di nou pou sélébwé Pak.
Jézi di sé disip li-a pou sélébwé lanmò’y, mé i pa janmen di yo pou sélébwé wézèwèksyon’y. Konsa toulé lanné, Témwen Jéhova ka sélébwé lanmò Jézi asou menm dat-la i té mò.—Louk 22:19, 20.
Pak bazé asou twadisyon fo wilizyon. An tan lontan, moun té ka sèvi pwatik fo wilizyon pou édé yo fè pli ich, ében pou fè jaden yo pwodwi pli. Èk Pak ni adan sé twadisyon sala. Bon. Bondyé vlé moun ‘adowé’y tousèl’. Konsa sélébwasyon Pak pa ka plè’y paski i ni bagay ki ka ofwansé’y.—Ègzodòs 20:5; 1 Wa 18:21.
Nou sav disizyon nou pou pa sélébwé Pak bazé asou Bib-la. Èk Bib-la ka ankouwajé nou pou ‘ni lasajès èk pou katjilé’ asou sa ki ka plè Bondyé, pito nou annèk swiv twadisyon nonm. (Pwovèb 3:21; Mafyou 15:3) Kanmenm menm si nou pa ka sélébwé Pak, nou pa ka anpéché moun sélébwé’y, paski chak moun ni dwa-a pou désidé sa’y kay fè.—1 Pita 3:15.